MOSIS KƐŊ IZIRAL TƖŊŊAA LƖƖ 15 - WƖA TENIŊ

Mosis yɩɩ yɩɩlɩŋ a dɛnnɛ La TƖƖNA

¹ Ŋɩɩ nɛ Mosis arɩ Iziral tɩŋŋaa yɩɩ yɩɩlɩŋ deeŋ a dɛnnɛ La TƖƖNA: “Mɩ jaŋ yɩɩ yɩɩlɩŋ a dɛnnɛ La TƖƖNA, bɛɛ wɩaa ʋ leŋ ʋ yɩrɩŋ faasa yɩrɛ nɛ. Ʋ yuo dii janɩŋ arɩ ba jɩjɩllaa a jomba yuo hɛ mʋga lɛ.

² La TƖƖNA nɛ ŋaa mɩ doluŋ, mɩ jaŋ yɩɩ yɩɩlɩŋ aa dagɛ wɩalɩŋ ʋ sɩ ŋaa. Ʋ nɛ ŋaa mɩ Laataara. Ʋ nɛ ŋaa mɩ Wɩa, mɩ jaŋ dɛnnʋ. Ʋ nɛ ŋaa mɩ nyɩmma Wɩa, mɩ jaŋ leŋ dɩ ʋ yɩrɩŋ yɩrɛ.

³ La TƖƖNA ŋaa bayuoru nɛ, ʋ yɩrɩŋ nɛ La TƖƖNA.

⁴ Ʋ joŋ Ijipiti tinteeŋ kuoro janɩŋ torukoba arɩ ʋ laalɩyuoroo yuo hɛ mʋgʋ-balɩŋ lɛ nɛ. Ijipiti kuoro laalɩyuori-kpaŋkpamba kala jʋʋ Mʋgʋ-fɩaŋ.

⁵ Lɩɩ-luŋii-la tɔba nɛ, ba tuu lɩɩŋ bʋbʋɔŋ nɛ a nagɛ tabɩɩŋ.

⁶ La TƖƖNA, ŋ naduo-la kɛŋ doluŋ woruŋ, ʋ nɛ ŋ kaa ŋmoo ŋ dʋndɔŋŋɔɔ pɩsɛ.

⁷ Ŋ doluŋ yʋga, ŋɩɩ nɛ ŋ yuo dii nɩalɩŋ sɩ bɩ ŋ niiŋ sɛyɛ. Ŋ leŋe ŋ baanɩŋ guu sii nɛ, a diiba a nagɛ nyiniŋ sɩ dii ya-yʋalaa.

⁸ Ŋ mɩɩ-boiŋ peliŋ nɛ yigi lɩɩŋ mʋ hɛ dɔŋɔ, ʋ sii chɩŋ a nagɛ kɛrɛ, ka fuo-luŋii-la tʋɔŋ kala hɩl.

⁹ Ŋɩɩ nɛ ŋ dʋndɔŋŋɔɔ bigisi ba tɩtɩa lɛ a bʋl, ‘La jaŋ kire kɛmba a kpʋba arɩ tokobiee aŋ laa kɩalɩŋ kala la sɩɩ chɛ ba dʋa tʋɔŋ.’

¹⁰ Ŋ wiese hɛ ba lɛ nɛ, mʋgʋ-balɩŋ tɔ ba kala, ba tuu lɩɩŋ bʋbʋɔŋ a nagɛ hɔɔ-yuŋuŋ sɩ tuu lɩɩ-balɩŋ.

¹¹ La TƖƖNA, vesiŋ tʋɔŋ, veŋ bɛɛ nɛ hɛ nɩmɛ a magɩŋ? Kʋbɛɛ nɛ hɛ nɩmɛ a jaŋ wuo dagɛ ʋ tʋɔpʋla arɩ ʋ doluŋ a magɛ dɩ la fɩfáʋ a dɛnnʋ a tɩŋ ʋ sɩɩ ŋaa wʋkpuŋkperisiŋ?

¹² Ŋ dagɛba ŋ doluŋ nɛ, tinteeŋ paaba liŋ.

¹³ Ŋ chonuŋ sɩ bɩ dɛrɛ wɩaa ŋ jaŋ laa nɩalɩŋ ŋ sɩ laata sɩpaaŋ. Ŋ dol-la nɛ ŋ jaŋ kaa kɛmba hɛ ŋ dɩɩ-zɔmʋŋ tʋɔŋ.

¹⁴ Dɩ tinteyee dɔnsʋŋ nɩaa nɛ nɩɩ wɩɩŋ deeŋ, fawʋllʋŋ jaŋ jʋʋba dɩ ba chichel. Fawʋllʋŋ jaŋ jʋʋ Fɩlɩsɩtɩa tɩŋŋaa ma woruŋ.

¹⁵ Fawʋllʋŋ jaŋ kɛŋ Ɛdɔm tinteeŋ kuoroo, dɩ Mʋab tinteeŋ babiibalaa ma chichel, dɩ Kɛnaŋ tinteeŋ nɩaa nandaasɩŋ kala yʋɔrɛ.

¹⁶ Fawʋllʋŋ jaŋ chaasa jʋʋba dɩ ba chichel. Ŋ doluŋ jaŋ leŋ dɩ ba chɩŋ jim a nagɛ bʋŋ, ka ŋ nɩaa kʋ bal, nɩalɩŋ ŋ sɩ laa ta.

¹⁷ Ŋ jaŋ kɛmba jɩla hɛ ŋ peeliŋ nyuŋ, ŋ tɩtɩa dɩhɔnʋŋ, lee-la ŋ sɩ sɩ ŋ jaŋ joŋo pɩba, lee-la ŋ sɩ saa pɩ ŋ tɩtɩa a jʋjʋʋ.

¹⁸ La TƖƖNA jaŋ dii kuoruŋ a kaa mʋ wuu.”

¹⁹ Iziral tɩŋŋaa vɛŋ tintee-hɩlɩŋ lɛ nɛ a lɩɩ mʋgʋ-balɩŋ tʋɔŋ, ama Ijipiti tinteeŋ kuoro janɩŋ arɩ ʋ janɩŋ torukoba arɩ ja-jɩllaa sɩ mʋ jʋʋ mʋga-la, La TƖƖNA leŋe lɩɩŋ mɩɩra kʋ tɔba nɛ.

²⁰ Mɩrɩam fa ŋaa Arɔŋ dɩhaala nɛ, a ŋaa Wɩa wʋlaabʋllʋ. Ʋ sii a joŋ chɩnchɩga. Haalaa dɔnsʋŋ ma sii to ʋ harɩŋ a paa ba chɩnchɩgɩsɩŋ a gʋgʋa.

²¹ Ŋɩɩ nɛ Mɩrɩam ta yɩɩlɩŋ pɩba. Ʋ sɩ, “Má yɩɩ yɩɩlɩŋ pɩ La TƖƖNA, má leŋ dɩ ʋ yɩrɩŋ yɩrɛ woruŋ. Ʋ joŋ ja-jɩlla arɩ ʋ jaaba kala a yuo hɛ mʋgʋ-balɩŋ tʋɔŋ nɛ.”

²² Ŋɩɩ nɛ Mosis kɛŋ Iziral tɩŋŋaa ba sii Mʋgʋ-fɩaŋ-la niiŋ. Ba mʋ jʋʋ Suu tintee-hɩlɩŋ. Ba vɛŋ tintee-hɩlɩɩ-la tʋɔŋ tapʋlaa batori aŋ bɩ lɩɩŋ na dɩ ba nyʋa.

²³ Ŋɩɩ nɛ ba kʋ yi lee kʋbala baa yɩrɛ Mara. Ba bɩ lɩɩ-la sɩ hɛ lee-la wuo nyʋa, bɛɛ wɩaa lɩɩ-la hɛyɛ nɛ. (Ŋɩɩ nɛ tɩɩ ba kɛŋ lee-la yɩyɩrɛ Mara.)

²⁴ Ŋɩɩ nɛ nɩalɩŋ gʋgʋrɩmɛ wɩaa Mosis teeŋ, aa bʋl, “Nɩɩ nɛ la jaŋ na lɩɩŋ a nyʋa?”

²⁵ Ŋɩɩ nɛ Mosis bunso pɩ La TƖƖNA. La TƖƖNA dagʋ daaŋ ʋ joŋo yuo hɛ lɩɩ-la lɛ ʋ zɔŋ arɩ nyʋanʋŋ. Nɩmɛ nɛ La TƖƖNA bil wombiee pɩba a magɩsɛba.

²⁶ Ʋ sɩ, “Dɩ ma nɛ jaŋ jegile nɩɩ mɩ-na ma TƖƖNA Wɩa niiŋ woruŋ a ŋɩŋaa wɩaa ba bʋa lɛ, a to wɩalɩŋ kala mɩ sɩ dagɛma, mɩ bɩ jaŋ joŋ nyanyalɩa-la mɩ sɩ joŋo hɛ Ijipiti tɩŋŋaa lɛ a hɛ ma lɛ. Mɩ nɛ ŋaa ma TƖƖNA, mɩ nɩɩ vaarɛ ma nyanyalaa.”

²⁷ Ŋɩɩ nɛ ba kɔ lee kʋbala baa yɩrɛ Elim. Lɩɩ-bulo bʋɔsʋŋ fii arɩ balɩa hɛ nɩmɛ, abɛ tɩɩsɩŋ mahɩŋ batori arɩ fii ma hɛ nɩmɛ. Ba hɛ ba lɛŋŋɛɛ a hɔŋ a kpagɛ lɩɩ-la.