MOSIS KƐŊ IZIRAL TƖŊŊAA LƖƖ 1 - WƖA TENIŊ

Iziral tɩŋŋaa na hɛɛŋ Ijipiti tinteeŋ lɛ

¹ Jekɔb hambolibiisi-la sɩ to ʋ harɩŋ mʋ Ijipiti tinteeŋ arɩ ba dɩa nɩaa nɛ ŋ-la:

² Rubiŋ, Simioŋ, Levi, arɩ Juda.

³ Ɩsaka, Zebuluŋ arɩ Bɛnjamɩŋ,

⁴ Daŋ, Nafɩtalɩ, Gad arɩ Asa.

⁵ Jekɔb doho nɩalɩŋ kala fa ŋaa mahɩŋ batori arɩ fii nɛ, bʋa-la lɛ dɩ Josɛf-na fa paala hɛ Ijipiti tinteeŋ lɛ.

⁶ Ʋ kʋ magɛ ŋɩɩ Josɛf arɩ ʋ naambiiri-la kala sɩ hɛ Ijipiti tinteeŋ lɛ sʋʋ.

⁷ Ama ba doho nɩaa fa lʋl biiriŋ yʋgɛ nɛ woruŋ a pʋŋa su tintee-la kala.

⁸ Ŋɩɩ nɛ kuoru-falɩɩ kʋ dii kuoruŋ Ijipiti tinteeŋ lɛ, ʋ bɩ Josɛf wɩaa jɩŋ.

⁹ Kuoru-la bʋla pɩ ʋ nɩaa, “Má bee na, Iziral tɩmma-la pʋŋa kɩɩla nɛ.

¹⁰ Má leŋ dɩ la chɛ wɩɩ, dɩ ŋɩɩ dee ba jaŋ pʋŋa kieli, dɩ laalɩŋ nɛ maachie kʋ sii, ba jaŋ pɛ la dʋndɔŋŋɔɔ lɛ dɩ ba yuo diila aŋ fá.”

¹¹ Ŋɩɩ nɛ ba chaarɛ nɩaa ba bibeŋ Iziral tɩmma-la dɩ ba fʋgɛba dɩ ba tɩtɩŋ yoŋ tɩntɩŋŋaa. Ba saa tabalaa balɩa a pɩ Ijipiti tinteeŋ kuoro, dɩ baa bil kɩaa nɩmɛ, tasɩ-la yɩraa nɛ Pɩtɔm arɩ Ramesis.

¹² Ba sɩ faasa dʋdɔgɩsɛba ŋɩɩ, ŋɩɩ tɩtɩa nɛ ba pʋŋa pɩpɛ, a jɛrɛ su tintee-la. A tɩŋ ŋɩɩ wɩaa Ijipiti tɩŋŋaa fɩfába woruŋ,

¹³ aŋ ha dʋdɔgɩsɛba a leŋ ba tɩtɩŋ yoŋ tɩntɩŋŋaa.

¹⁴ Ba joŋ dɩɩsɩŋ saanɩŋ arɩ ba tɩntɩŋ-duoruŋ kala ba sɩ kɛnɛ ba bagɩsɩŋ lɛ a fʋgɛba kɩɩ. Bʋa deeŋ kala lɛ Ijipiti tɩŋŋaa bɩ Iziral tɩŋŋaa nisusuŋ fa.

¹⁵ Ŋɩɩ nɛ Ijipiti tinteeŋ kuoro bʋla pɩ Hiburu tɩŋŋaa hachagɩraa deemba balɩa: Sɩfɩra arɩ Pʋa,

¹⁶ “Dɩ Hiburu tɩŋŋaa haal kala nɛ togilo dɩ ʋ lʋl, má bee na, dɩ ʋ nɛ ŋaa hambolibie, má kpʋʋ, ka dɩ hantolibie nɛ, ma leŋu.”

¹⁷ Ama hachagɩra-la ka fá Wɩa nɛ, ba vɩa Ijipiti tinteeŋ kuoro niiŋ a bɩ Hiburu tɩŋŋaa hambolibiisi-la kpʋa.

¹⁸ Ŋɩɩ nɛ Ijipiti tinteeŋ kuoro yɩrɛ hachagɩra-la kɔ ʋ sɩpaaŋ a pɩɛsɛba, “Bɛɛ nɛ ma ŋaa ŋ-la? Bɛɛ nɛ tɩɩ ma bɩ hambolibiisi-la kpʋa?”

¹⁹ Ŋɩɩ nɛ hachagɩra-la bʋla pɩ Ijipiti tinteeŋ kuoro, “Hiburu tɩŋŋaa haalaa bɩ Ijipiti tɩŋŋaa haalaa naga. Hiburu tɩŋŋaa haalaa kɛŋ nyalɩma nɛ woruŋ, dɩ kʋŋ nɩɩ chɛ dɩ ʋ lʋl, hachagɩraa jaŋ magɛ ŋɩɩ kʋkɔ dɩ ʋ lʋla.”

²⁰ Ŋɩɩ nɛ Wɩa pɛ hachagɩra-la lɛ a leŋ Hiburu tɩmma-la pʋŋ woruŋ.

²¹ A tɩŋ hachagɩra-la sɩɩ fá Wɩa a bɩ hambolibiisi-la kpʋa, Wɩa leŋ ba kʋŋkala lʋl biiriŋ, a kɛŋ ba tɩtɩa dɩa nɩaa.

²² Ŋɩɩ nɛ Ijipiti tinteeŋ kuoro bʋla pɩ ʋ tinteeŋ nɩaa kala, “Má kɛsɛ Hiburu tɩŋŋaa hambolibiisiŋ kala a yuo hɛ fuo-la ba sɩɩ yɩrɛ Naayɩl lɛ, aŋ leŋ hantolibiisiŋ.”