ƐSƖTA 1 - WƖA TENIŊ

Ba kiri Vasiti kuoruŋ lɛ

¹ Wɩɩŋ deeŋ nɛ ŋaa bʋa-la lɛ Zɛzɛs sɩɩ beŋ tasɩŋ zɔlɔ arɩ mara arɩ balɩpɛ a chɩŋ Indɩa lɛ a kaa mʋ Kus.

² Zɛzɛs kuori kpaha fa hɛ taŋ-la ba sɩɩ yɩrɛ Susa lɛ nɛ.

³ Ʋ sɩ dii kuoruŋ ʋ jɩ-tori lɛ, ʋ yɩrɛ ʋ tɩntɩnnɩ-hɩasɩŋ, Pɛsɩa arɩ Midia laalɩyuori hɩasɩŋ, sɩpaalaaraa arɩ ʋ tinteeŋ nɩbalaa a hɛ dɔŋɔ a ŋaa kʋdiilee ba gbieli.

⁴ Ba gbieli gbiele-la ŋɩɩ halɩɩ tapʋlaa zɔlɔ arɩ mahɩŋ banɛsɛ. Gbiele-la lɛ nɛ ʋ dagɛ ʋ kuoruŋ magɩsɩŋ. Ŋɩɩ ʋ tinteeŋ dʋa sɩ maga arɩ ʋ doluŋ sɩ maga ŋɩɩ.

⁵ Gbiele-la harɩŋ, kuoro Zɛzɛs bɩra leŋ ba ŋaa kʋdiilee ʋ yɩrɛ Susa tabal-la nɩaa kala, nɩbalaa arɩ nɩbiisiŋ kala. Ba kʋ gbieli ʋ kuoru dɩɩ-zɔŋ-la lɩga tʋɔŋ tapʋlaa balɩpɛ.

⁶ Ba kpɩɛrɛ lee-la kala a kɛŋ ŋmɛŋ-vachalɩŋ a vɔɔ patɩɩsaŋ diibelimbine arɩ patɩɩsaŋ pʋllʋŋ kaala-la harɩŋ a mɛrɛ ba sɩ kɛŋ hɔpʋla ŋaa nenii-pɩraa a joŋo hɛ sɛlɩmɛ ba sɩ kaa ŋaa jebiee lɛ. Ka tinteeŋ kala ŋaa tabɩɩ mʋmʋlaa sɩ kɛŋ kpɩɛrɛ dosunuŋ. Sɛlɩmɛ arɩ hɔpʋla ba sɩ kaa ŋaa kpasɩnɩŋ chɩŋ nɩmɛ.

⁷ Nɩalɩŋ kala ʋ sɩ yɩra kɛŋ nyʋnyʋalʋsʋŋ ba sɩ kɛŋ sɛlɩmɛ a ŋaa ba kpɩɛraa bɩ dɔŋɔ naga nɛ a nyʋnyʋa girep nɛnɛɛ sɩnɩŋ. Kuoro leŋe sɩnɩŋ pʋrɩgɛ nɛ woruŋ gbiele-la lɛ.

⁸ Kuoro bʋla pɩ ʋ tɩntɩnna-la sɩɩ kpaa sɩŋ-la, “Má leŋ dɩ nʋʋkala nyʋa sɩnɩŋ ŋɩɩ ʋ sɩɩ chɛ.”

⁹ Baala-la kala fa sɩɩ nyʋa sɩnɩŋ ŋɩɩ, kuoro habidiire Vasiti ma ŋaa kʋdiilee yʋgɛ woruŋ a pɩ haala-la kala sɩ hɛ kuoru dɩa lɛ.

¹⁰ Tapʋl-pɛɩ chɛɛŋ, dɩ Zɛzɛs nyʋa girep nɛnɛɛ sɩnɩŋ ʋ tʋɔŋ kala tɔrɛ, ʋ bʋla pɩ ʋ tɩntɩnna-la balɩpɛ ba sɩ fere, ba yɩraa nɛ Mehuman, Bɩzɩta, Habona, Bigita, Abagɩta, Zeta arɩ Kaakas,

¹¹ dɩ ba kɛŋ ʋ habidiire Vasiti kɔ ʋ teeŋ. Kuoro faa chɛ dɩ Vasiti laalɛ ʋ gɛrɩ-zɔŋŋɔɔ nɛ, a chu ʋ kuoru nyunchuulo, a kʋ lɩɩ dɩ kuoro nɩhɩasɩŋ arɩ ʋ nɩaa kala na ŋɩɩ ʋ sɩ zɔmɔ.

¹² Ama kuoro tɩntɩnna-la sɩ mʋ bʋl wɩɩ-la a pɩ Vasiti, ʋ vɩa dɩ ʋ mʋ. Ŋɩɩ nɛ kuoro na baanɩŋ woruŋ.

¹³ Ʋ fa ŋaa ba naaba wɩɩ nɛ dɩ kuoro pɩɛsɛ wʋjɩnnaa a mʋ tɩgɛ wombie-la ba sɩ bile dɩ ba tuto arɩ wʋtɩtɩɩ wɩaa. Ŋɩɩ nɛ ʋ yɩrɛ ʋ wʋjɩnnaa a pɩɛsɛba wɩɩ-la sɩ maga dɩ ʋ ŋaa.

¹⁴ Nɩalɩŋ ʋ sɩ yɩra pɩɛsɛ yɩraa nɛ ŋ-la, Kaasɩhɛna, Seta, Adɩmata, Taasɩs, Mɛrɛs, Masɛna arɩ Mɛmukaŋ. Ba balɩpɛ nɛ ŋaa Pɛsɩa arɩ Midia tinteeŋ nɩbala-la sɩ kpagɛ kuoro tintee-la lɛ.

¹⁵ Kuoro pɩɛsɛba, “Mɩ tɩŋ mɩ tɩntɩnnaa nɛ dɩ ba mʋ kɛŋ mɩ habidiire Vasiti kɔ, ba mʋ ʋ vɩa. La naabarɩŋ lɛ bɛɛ nɛ maga dɩ la ŋaaʋ?”

¹⁶ Ŋɩɩ nɛ ʋ tɩntɩnnɩ-hɩasɩ-la dɔŋɔ ba sɩɩ yɩrɛ Mɛmukaŋ bʋla pɩ kuoro Zɛzɛs arɩ ʋ tɩntɩnnɩ hɩasɩ-la, “Wɩɩ-la kuoro habidiire Vasiti sɩ ŋaa, kuoro dʋndʋŋa dee ʋ hɩɩsɛ, ʋ hɩɩsɛ kuoro tɩntɩnnɩ-hɩasɩŋ, arɩ baal kala sɩ hɛ ʋ tinteeŋ lɛ nɛ.

¹⁷ Haala-la kala sɩ hɛ la tinteeŋ lɛ jaŋ nɩɩ wɩɩ-la Vasiti sɩ ŋaa, a joŋ ba balaba hɛ sɩɩŋ lɛ. Ba jaŋ bʋl ‘Kuoro Zɛzɛs paala yɩrɛ Vasiti nɛ ʋ vɩa.’

¹⁸ Ka dɩ wɩa na jʋʋ, kuoro tɩntɩnnɩ-hɩasɩ-la sɩ hɛ Pɛsɩa arɩ Media lɛ, ba haalaa jaŋ nɩɩ wɩɩ-la kuoro haala sɩ ŋaa, ba ma bɩ jaŋ tuto ba balaba niiŋ. Ba bɩra bɩ jaŋ zizil ba balaba ma, dɩ ba balaba baanɩŋ sii ba nyuŋ.

¹⁹ Ŋɩɩ wɩaa kuoro dɩ ŋ tʋɔŋ nɛ jaŋ tɔrɛ, leŋ dɩ ba heele bʋl arɩ ŋ habidiire Vasiti maachie bɩra bɩ maga ʋ kɔ kuoro sɩpaaŋ, aŋ ŋmʋnsa hɛ Pɛsɩa arɩ Media tinteeŋ wɩalɩŋ ba sɩ bile dɩ ba tuto teniŋ tʋɔŋ, dɩ ʋ ŋaa wɩɩ sɩ bɩ jaŋ dɩsɛ. Ka dɩ la laa ʋ maŋgaazɩa-la a pɩ haal dɔŋ sɩ kpɩaʋ.

²⁰ Dɩ ba nɛ heele bʋl ŋɩɩ dɩ haalaa kala sɩ hɛ la tinteeŋ lɛ nɩɩ, ba jaŋ chaasa zizil ba balaba, dɩ ba ŋaa summo koo dɩ ba kɛŋ kɩaa.”

²¹ Kuoro Zɛzɛs arɩ ʋ tɩntɩnnɩ-hɩasɩŋ kala tʋɔŋ tɔrɛ wɩɩ-la Memukan sɩ bʋla lɛ.

²² Kuoro Zɛzɛs ŋmʋnsɛ tenniŋ joŋo kpaa ʋ tinteeŋ tasɩŋ kala. Taŋ-la kala nɩaa sɩɩ bʋl yikoro-la lɛ nɛ, ʋ kaa ŋmʋnsɛ ba teniŋ a pɩba.