Ɛfɛsɩs Nɩaa 1 - WƖA TENIŊ

¹ Mɩ-na Pɔɔl nɛ ŋmʋnsɛ teniŋ deeŋ a pɩpɩ ma Wɩa nɩalɩŋ sɩ hɛ Ɛfɛsɩs lɛ a laa Yesu Kirisito dii arɩ wʋtɩtɩɩ. Wɩa tʋɔtɔrʋŋ lɛ nɛ ʋ lɩɩsɛmɛ dɩ mɩ ŋaa Kirisito Yesu nanzɔɔ.

² La Nyɩmma Wɩa arɩ La Tɩɩna Yesu Kirisito lahɔrɩmɔ lɛ, ma jaŋ hɔŋ arɩ fɩɛlɩŋ.

Wɩa sɩ to Kirisito lɛ a pɛ la lɛ

³ Má leŋ dɩ la dɛnnɛ Wɩa. Ʋ nɛ ŋaa La Tɩɩna Yesu Kirisito Nyɩmma. La dɩ Kirisito sɩ ŋaa kʋbala nɛ tɩɩ ʋ pɛ la lɛ a joŋ wʋzɔŋ na-kala sɩ lɩɩ ʋ teeŋ a pɩla.

⁴ Ka dɩ ʋ-na suomo ŋaa dʋnɩa, ʋ to Kirisito lɛ nɛ a lɩɩsɛla, dɩ la kɛŋ tʋɔpʋla, a sɩ́ cheeri kala kɛŋ ʋ sɩpaaŋ. A tɩŋ Wɩa sɩ chola wɩaa,

⁵ ʋ laa sɩpaaŋ bɩɩna bil nɛ arɩ ʋ jaŋ to Yesu Kirisito lɛ nɛ a leŋ dɩ la ŋaa ʋ biiriŋ. Ʋ tʋɔtɔrʋŋ lɛ nɛ ʋ ŋaa ŋɩɩ.

⁶ Ʋ ŋaa ŋɩɩ dɩ la wuo dɛnnʋ, a leŋ dɩ ʋ yɩrɩŋ yɩrɛ, a tɩŋ ʋ sɩ fá la nenige. Ʋ Bii-choolii-la ʋ sɩ joŋo pɩla lɛ nɛ ʋ to a pɛ la lɛ.

⁷ La sɩ mɛrɛ Kirisito lɛ ŋɩɩ, ʋ joŋ ʋ chalɩŋ jaasɛ la wɩaa a tiŋ la wʋbɔŋŋɔɔ chɩmɩŋ, dɩ Wɩa joŋ la wʋbɔŋŋɔɔ chɛla. Wɩa zile yʋga nɛ kɩŋkɛŋ la teeŋ,

⁸ ŋɩɩ nɛ tɩɩ ʋ ŋaa ŋɩɩ pɩla. Ʋ sɩ kɛŋ wʋjɩmɩŋ, a jɩŋ wɩaa sɩaa lɛ nɛ ʋ ŋaa ŋɩɩ pɩla.

⁹ Ʋ tʋɔtɔrʋŋ lɛ nɛ ʋ leŋ la jɩŋ ʋ wɩalɩŋ kala fa sɩ faa, wɩalɩŋ ʋ sɩɩ chɛ dɩ ʋ to Kirisito lɛ a ŋaa pɩla.

¹⁰ Ʋ ŋaa ŋɩɩ dɩ bʋa-la nɛ yie, dɩ ʋ kɛŋ kʋŋkala kʋ hɛ dɔŋɔ lɛ, kɩalɩŋ sɩ hɛ Wɩa-jaŋ arɩ kɩalɩŋ sɩ hɛ tinteeŋ kala, dɩ Kirisito ŋaa ba kala Tɩɩna.

¹¹ Wɩa tʋɔtɔrʋŋ arɩ ʋ chɛnɩŋ lɛ nɛ ʋ yie ŋaa wɩɩkala. Ʋ to Kirisito lɛ nɛ a lɩɩsɛla a leŋ la ŋaa ʋ nɩaa, arɩ ŋɩɩ ʋ sɩ bɩɩna bil faafaa kala.

¹² Ʋ ŋaa ŋɩɩ dɩ la nɩalɩŋ sɩ laa sɩpaaŋ joŋ la yɩɛlaa hɛ Kirisito lɛ, dɩ la wuo leŋ dɩ ʋ yɩrɩŋ yɩrɛ.

¹³ Ma ma kʋ ŋaa Kirisito nɩaa nɛ bʋa-la lɛ ma sɩ nɩɩ Wɩa wɩalɩŋ sɩ ŋaa wʋtɩtɩɩba, Yesu wʋzɔmɔ-la sɩ laa nɩaa tɩta. Ma sɩ laa ʋ wɩaa dii ŋɩɩ, Wɩa joŋ ʋ Dɩŋ-zɔmʋŋ hɛ ma lɛ nɛ a magɩlɛma, kʋ-la ʋ fa sɩ sɩ ʋ jaŋ joŋo pɩ nɩalɩŋ sɩ laa ʋ wɩaa dii.

¹⁴ Wɩa Dɩŋ-zɔmʋŋ ʋ sɩ joŋo hɛ la lɛ nɛ sɛnɛ daga arɩ wʋtɩtɩɩ, maachie la jaŋ dii kɩalɩŋ Wɩa sɩ ŋaa bil ʋ nɩaa lɛ, aŋ laa ʋ nɩaa ta. Ŋɩɩ lɛ nɛ ʋ yɩrɩŋ jaŋ yɩrɛ.

Pɔɔl chʋɔlɛ Wɩa a pɩ Ɛfɛsɩs nɩaa

¹⁵ Mɩ nɩɩ ŋɩɩ ma sɩ laa La Tɩɩna Yesu wɩaa dii arɩ ŋɩɩ ma sɩ cho Wɩa nɩaa ma nɛ.

¹⁶ Ŋɩɩ nɛ tɩɩ, dɩ mɩ nɩɩ chʋɔlɛ Wɩa na-kala, mɩ yie lʋlɔllʋ nɛ a tɩŋ ma wɩaa. Mɩ yie liisi ma wɩaa nɛ a chʋɔlɛ Wɩa pɩpɩma.

¹⁷ Mɩ yie sʋl Wɩa, La Tɩɩna Yesu Kirisito Nyɩmma, Nɩɩ-la sɩ kɛŋ yɩrɩŋ, dɩ ʋ pɩma wʋjɩmɩŋ, a bɩra kɛŋ ʋ tɩtɩa ma kaa dagɛma ʋ Dɩŋ-zɔmʋŋ doluŋ lɛ dɩ ma wuo jɩmʋ.

¹⁸ Wɩa sɩ yɩrɛma dɩ ma wuo jʋʋ ʋ kuorii-la tʋɔŋ ŋɩɩ, mɩɩ sʋlʋ dɩ ʋ wuo suri ma tʋɔŋ dɩ ma wuo jɩŋ kʋ-la ma sɩɩ yɩɛlʋ nagɩsɩŋ, a bɩra jɩŋ kɩalɩŋ ma dɩ Wɩa nɩaa kala sɩ jaŋ dii zɔmʋŋ.

¹⁹ Mɩ bɩraa sʋlʋ dɩ ʋ wuo leŋ dɩ ma jɩŋ ŋɩɩ ʋ dol-bal-la sɩ bɩ magɩa kɛnɛ nɩalɩŋ sɩ laa ʋ wɩaa dii teeŋ. Ʋ yie to ʋ dol-bal-la lɛ nɛ a tɩŋ ʋ tɩntɩŋŋaa.

²⁰ Dol-la tɩtɩa nɛ ʋ kaa chɩsɛ Kirisito sʋʋŋ lɛ a leŋ ʋ hɔŋ ʋ nadiiŋ Wɩa-jaŋ lɛ, nɩduoŋ dɩhɔnʋŋ.

²¹ Ʋ nɛ kɩɩ kɩalɩŋ kala la sɩ bɩ na ka ba kɛŋ doluŋ a bibeŋ leriŋ. Ʋ nɛ kɛŋ yɩrɩŋ a kɩɩ nʋʋ na-kala sɩ kɛŋ yɩrɩŋ dʋnɩa deeŋ lɛ arɩ dʋnɩa-la sɩ jaŋ bɩra kɔ lɛ.

²² Wɩa joŋ kʋŋkala doluŋ a hɛ Kirisito nɩsɩŋ lɛ nɛ, a bɩra leŋ ʋ ŋaa Wɩa nɩaa kala kʋhɩaŋ ma.

²³ Nɩalɩŋ sɩ laa Yesu wɩaa dii aa hilimi nɛ ŋaa Yesu yaraa. Nɩalɩŋ nɛ leŋe Kirisito ŋaa nɩ-piliŋ, ʋ ma leŋ kʋŋkala ŋaa kʋpiliŋ wɩɩkala lɛ.