MOSIS BƖRA WULLI WƖA WOMBIIŊ 8 - WƖA TENIŊ

Má sɩ́ La TƖƖNA Wɩaa yʋ

¹ Má hɛ doluŋ aŋ to wɩalɩŋ kala mɩ sɩɩ dagɛma jɩnɩŋ, dɩ La TƖƖNA leŋ dɩ ma kɛŋ mɩɩsɩŋ a pʋŋ, a jʋʋ tintee-la ʋ sɩ hɛ niiŋ pɩ ma naabalɩmaba arɩ ʋ jaŋ joŋo pɩba.

² Má liisi jɩsɩŋ mahɩŋ balɩa-la kala ma TƖƖNA Wɩa sɩ kɛmma kaa vɩvɛŋ tintee-hɩlɩɩ-la lɛ. Ʋ ŋaa wɩaa ma lɛ dɩ ma sɩaa tuu tinteeŋ nɛ, aŋ magɩsɛma dɩ ʋ na ma jaŋ to wɩalɩŋ ʋ sɩ daga koo ma bɩ to.

³ Ʋ ŋaa ma sɩaa tuu tinteeŋ nɛ, ʋ joŋ losuŋ kpʋma, aŋ bɩra leŋ ma dii kʋdiile-la ba sɩɩ yɩrɛ “Mana.” Ma dɩ ma nyɩmmaba kʋŋkala bɩ kʋdiile-la jɩŋ. Ʋ ŋaa wɩɩŋ deeŋ a chɩchɛ ma jɩŋ arɩ kʋdiilee dʋndʋŋa dee bɩ nuhuobiine mɩɩsɩŋ ka pa, ama Wɩa niiŋ wɩalɩŋ ʋ sɩɩ bʋl nɩɩ pɩ mɩɩsɩŋ.

⁴ Jɩsɩŋ mahɩŋ balɩa deeŋ kala ma sɩɩ vɛŋ, ma gɛnnɩŋ bɩ kɩɛsa, ma naasɩŋ ma bɩ ŋmɛrɛ.

⁵ Má saa maga dɩ ma jɩŋ nɛ, a nagɛ nuhuobiine sɩ yie kɛŋ ʋ bie a dagʋ wɩaa a kɛnʋ tʋra kɩkɩɩ ŋɩɩ, ŋɩɩ tɩtɩa nɛ ma TƖƖNA Wɩa ma kɛmma tʋra kɩkɩɩ.

⁶ Wombie-la kala ma TƖƖNA Wɩa sɩ dagɛma, má tutoba a ŋɩŋaa wɩalɩŋ kala ʋ sɩ daga a zizilu.

⁷ Ma Tɩɩna Wɩa kɛmma kaa mʋmʋ tintee-sɩŋ nɛ. Tintee-la kɛŋ fuonuŋ arɩ lɩɩ-bul-sɩaa sɩ bulo lɩɩ a pɩpɛllɛ fuonaasɩŋ arɩ dundolluŋ kala lɛ nɛ.

⁸ Tintee-la kɛŋ kʋdiilee, mɛmpɛ, mɩaa, girep, tutogusuŋ, tɩɩnɛnɛ-la sɩ nagɛ kampoi nɛnɛɛ, olif tɩɩsɩŋ arɩ tʋʋŋ.

⁹ Kʋdiilee bɩ jaŋ kɔ dɩ ba nyaa tintee-la lɛ. Ma bɩ jaŋ chɛ kʋŋkala ka nɩmɛ. Tintee-la bʋsʋŋ kɛŋ hɛgɛŋŋɛɛ, ʋ dundolluŋ ma kɛŋ hɔɔ-fɩaŋ, ma sɩ jaŋ wuo huri.

¹⁰ Dɩ ma nɛ dii kɩalɩŋ kala ma sɩɩ chɛ tintee-la lɛ a vɔgɛ, má zil ma TƖƖNA Wɩa arɩ ʋ sɩ joŋ tintee-zɔŋ-la pɩma.

¹¹ Má fɩɛlɛ ma sɩaa a sɩ́ ma TƖƖNA Wɩa wɩaa yʋ. Má to ʋ niiŋ, ʋ wombiee arɩ ʋ wɩalɩŋ mɩ sɩɩ dagɛma jɩnɩŋ.

¹² Dɩ ma nɛ na kɩalɩŋ kala ma sɩɩ chɛ a dii vɔgɛ, a saa dɩɩ zɔŋŋɔɔ a jʋjʋʋ,

¹³ dɩ ma pʋsʋŋ ma pʋŋ, dɩ ma sɛlɩmɛ arɩ ma hɔpʋla ma pʋŋa pɛ arɩ kʋŋ na-kala ma sɩ kɛnɛ,

¹⁴ ma pʋpɔ má sɩ́ ma tɩtɩa dagʋ a yʋ ma TƖƖNA Wɩa wɩaa. Ʋ nɛ kɛmma kaa kʋ lɩɩ Ijipiti tinteeŋ lɛ, lee-la ma fa sɩ hɛ, a ŋaa yosi.

¹⁵ Ʋ nɛ kɛmma vɛŋ tintee-hɩlɩɩ-la sɩ jalɩa a kɛŋ fawʋllʋŋ lɛ, lee-la dɩ-bɔŋŋɔɔ arɩ nʋɔmaa sɩ hɛ. Tintee-la fa bɩ lɩɩ kɛnɛ, ʋ leŋ lɩɩŋ lɩɩ bʋŋ lɛ a pɩma.

¹⁶ Ʋ pɩma kʋdiile-la ba sɩɩ yɩrɛ ‘Mana’ nɛ tintee-hɩlɩɩ-la lɛ, kɩalɩŋ ma dɩ ma nyɩmmaba kʋŋkala ha sɩ bɩ die aŋ ka. Ʋ ŋaa ŋɩɩ a magɩsɛma nɛ dɩ ma sɩaa tʋʋ tinteeŋ, dɩ wɩaa vɛŋ woruŋ a pɩma.

¹⁷ Ʋ maga dɩ má jɩŋ nɛ arɩ dʋa-la kala ma sɩ na, ma tɩtɩa doluŋ lɛ dee ma naba.

¹⁸ Má jɩŋ arɩ ma TƖƖNA Wɩa nɛ pɩma doluŋ ma dʋa. Ŋɩɩ nɛ daga arɩ nii-la ʋ sɩ hɛ pɩ ma naabalɩmaba chɩna nɛ arɩ ʋ sɩ chɩŋ ŋɩɩ a kaa kɔ arɩ jɩnɩŋ kala.

¹⁹ Dɩ ma nɛ yʋ ma TƖƖNA Wɩa wɩaa, aŋ mɩɩra tuto vesiŋ harɩŋ, mɩ jaŋ chaasa bʋla pɩma jɩnɩŋ arɩ ŋɩɩ jaŋ leŋ dɩ ʋ cheima.

²⁰ Dɩ ma nɛ bɩ ma TƖƖNA Wɩa niiŋ to, ʋ jaŋ cheima arɩ ʋ sɩ laa sɩpaaŋ chei tinteye-la dɔnsʋŋ ŋɩɩ.