MOSIS BƖRA WULLI WƖA WOMBIIŊ 7 - WƖA TENIŊ

Má kiri tintee-wogusu-la nɩaa sɩ hɛ tintee-la lɛ

¹ Ma TƖƖNA Wɩa jaŋ kɛmma jʋʋ tintee-la ʋ sɩɩ chɛ ʋ joŋo pɩma dɩ ʋ ŋaa ma kʋŋ, a kiri tintee-wogusuŋ deemba balɩpɛ nɩaa sɩ kɛŋ doluŋ a kɩɩma a yʋgɛ kɩɩma ma sɩ hɛ tintee-la lɛ: Hiti tɩŋŋaa, Gɩgasɩ tɩŋŋaa, Amɔrɩ tɩŋŋaa, Kɛnaŋ tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa.

² Dɩ ma TƖƖNA Wɩa nɛ jomba hɛ ma nɩsɩŋ lɛ dɩ ma yuo dii, má sɩ́ ba nenige fá, má chei ba kala. Má sɩ́ leŋe ma dɩ ba pɛ nii.

³ Má sɩ́ ba toloo jaa, a sɩ́ leŋe dɩ ba ma jaa ma toloo.

⁴ Dɩ ma nɛ leŋe ma biiriŋ jaa ba toloo, tolie-la jaŋ lɛrɛba mʋ dɩ ba ma tuto ba vesiŋ. Dɩ ba nɛ saa ŋaa ŋɩɩ, La TƖƖNA jaŋ chaasa na baanɩŋ ma nyuŋ a guu cheima.

⁵ Wɩalɩŋ sɩ maga dɩ ma ŋaa nɩalɩŋ lɛ nɛ ŋ-la: Má giri ba vʋɩyaa korunuŋ, a ŋmoo ba vesiŋ tabɩaa yɛrɛ, a keri ba vene-la ba sɩɩ yɩrɛ Asɩra daasɩŋ lo aŋ nyɩgɛ ba tɔŋŋɔɔ kala.

⁶ Ma chaasa ŋaa ma TƖƖNA Wɩa nɩaa nɛ. Ʋ lɩɩsɛma nɛ dʋnɩa nɩaa kala tʋɔŋ dɩ ma nɛ chaasa ŋaa ʋ nɩchooloo.

⁷ Ʋ bɩ naga ma sɩ yʋga nɛ tɩɩ La TƖƖNA choma a lɩɩsɛma dɩ ma nɛ ŋaa ʋ nɩaa, ma nɛ paala ŋaa doho-la nɩaa sɩ bɩ yʋgɛ dʋnɩa nɩaa kala tʋɔŋ.

⁸ Ama La TƖƖNA paala choma nɛ a bɩ chɛ dɩ nii-la ʋ sɩ hɛ pɩ ma naabalɩmaba kʋ ŋaa pɛɩ. Ŋɩɩ nɛ tɩɩ ʋ yuo laama arɩ ʋ doluŋ Ijipiti tinteeŋ kuoro nɩsɩŋ lɛ, a kɛmma kaa kʋ lɩɩ Ijipiti tinteeŋ lɛ, lee-la ma fa sɩ hɛ a ŋaa yosi.

⁹ Ŋɩɩ wɩaa, ʋ maga dɩ ma jɩŋ arɩ La TƖƖNA Wɩa dʋndʋŋa nɛ Wɩa, ʋ nɛ kɛŋ wʋtɩtɩɩ. Ʋ jaŋ leŋ dɩ nii-la sɩ hɛ ma dɩ ʋ pɛgɛ chɩŋ. Ʋ jaŋ dagɛ ʋ chonuŋ a pɩ nɩalɩŋ kala sɩ chou a tuto wɩalɩŋ kala ʋ sɩ daga doho doho bʋɩba.

¹⁰ Ama nɩalɩŋ sɩ bɛrʋ, ʋ bɩ jaŋ lemba, ʋ jaŋ cheiba.

¹¹ Ŋɩɩ wɩaa, má hɛ doluŋ aŋ to wombie-la arɩ niiri-la arɩ wɩalɩŋ kala mɩ sɩɩ dagɛma jɩnɩŋ.

¹² Dɩ ma nɛ to wombie-la woruŋ a kɛmba tɩtɩŋ, ma TƖƖNA Wɩa jaŋ choma a leŋ dɩ nii-la ʋ sɩ hɛ ʋ dɩ ma pɛgɛ chɩŋ, arɩ ʋ sɩ ŋmɩɛsɛ ŋɩɩ pɩ ma naabalɩmaba.

¹³ Ʋ jaŋ choma a pɛ ma lɛ, a leŋ dɩ ma pʋŋ. Ʋ jaŋ pɛ ma lɛ dɩ ma lʋl biiriŋ yʋgɛ, a leŋ ma mɩaa, girep arɩ olif tɩɩsɩŋ wasɛ, a leŋ dɩ ma pʋsʋŋ ma pʋŋ. Ʋ jaŋ ŋaa wɩaa deemba kala a pɩma tintee-la lɛ ʋ sɩ hɛ niiŋ pɩ ma naabalɩmaba arɩ ʋ jaŋ joŋo pɩma.

¹⁴ Ʋ jaŋ pɛ ma lɛ a kɩɩ tintee dɔŋ kala. Ma tʋɔŋ, bapɩrɩ koo hapɩrɩ bɩ jaŋ hɛ nɩmɛ. Ma pʋsʋŋ ma kala jaŋ lʋlʋl.

¹⁵ La TƖƖNA bɩ jaŋ leŋ dɩ nyanyalɩɩ kala jʋʋma. Ʋ bɩ jaŋ joŋ nyanyal bɔmɔ-la ma sɩ na Ijipiti tinteeŋ lɛ kʋŋkala hɛ ma lɛ. Ama La TƖƖNA jaŋ joŋ nyanyal bɔŋŋɔɔ hɛ ma dʋndɔŋŋɔɔ lɛ.

¹⁶ Tintee kala ma TƖƖNA Wɩa sɩ jaŋ joŋo hɛ ma nɩsɩŋ lɛ, má cheiba, má sɩ́ ba nenige fá. Má sɩ́ ba vesiŋ kpaarʋ. Dɩ ma nɛ ŋaa ŋɩɩ, ba jaŋ to ŋɩɩ lɛ a nyɩsa kɛmma.

¹⁷ Ŋ bɩ pɔ ma jaŋ bʋl arɩ tinteyee deemba nɩaa dolie kɩɩma nɛ, ɛɛ nɛ ma jaŋ ŋaa a kiriba dɩ ba lɩɩ tintee-la lɛ?

¹⁸ Ama má sɩ́ leŋe dɩ fawʋllʋŋ kɛmma a tɩŋ ba wɩaa. Má liisi wɩalɩŋ ma TƖƖNA Wɩa sɩ joŋo ŋaa Ijipiti tinteeŋ kuoro arɩ Ijipiti tɩŋŋaa kala lɛ.

¹⁹ Ma na wʋkpuŋkperisi-la arɩ wʋmagɩla-la arɩ wʋduoru-la La TƖƖNA Wɩa sɩ kɛŋ ʋ doluŋ ŋaa nɛ, aŋ kɛmma kaa kʋ lɩɩ Ijipiti tinteeŋ lɛ. Wɩalɩŋ tɩtɩa nɛ ma TƖƖNA Wɩa jaŋ joŋo ŋaa nɩalɩŋ ma sɩɩ fá lɛ.

²⁰ Ma TƖƖNA Wɩa jaŋ leŋ dɩ fawʋllʋŋ faasa jʋʋba. Nɩalɩŋ sɩ foro ma nɩsɩŋ lɛ a faa, ʋ jaŋ kpʋba.

²¹ Má sɩ́ leŋe dɩ fawʋllʋŋ kɛmma a tɩŋ nɩalɩŋ wɩaa, ma TƖƖNA Wɩa hɛ ma teeŋ nɛ, ʋ ŋaa Wɩa sɩ kɛŋ doluŋ nɛ woruŋ a magɛ dɩ nʋʋkala fɩfáʋ.

²² Ma TƖƖNA Wɩa jaŋ kiri tinteye-la nɩaa sɩ hɛ tintee-la lɛ dɩ ba lɩɩ kʋŋ kʋŋ. Ʋ bɩ jaŋ leŋ dɩ ma guu kiri ba kala bala. Dɩ ʋ nɛ leŋe ma guu kiri ba kala bala, baga kɩaa jaŋ pʋrɩgɛ tintee-la lɛ a wʋwalɩmɛma.

²³ Ma TƖƖNA Wɩa jaŋ joŋ ma dʋndɔŋŋɔɔ a hɛ ma nɩsɩŋ lɛ, a leŋ dɩ ba wɩaa kala vʋgʋmɛ dɩ ba to ŋɩɩ lɛ a kala sʋʋ.

²⁴ Ʋ jaŋ joŋ ba kuoroo ma a hɛ ma nɩsɩŋ lɛ, dɩ ma leŋ dɩ ba yɩraa lɛl dʋnɩa kala lɛ. Nɩalɩŋ kʋŋkala bɩ jaŋ wuo yuo diima. Ma nɛ jaŋ yuo diiba a cheiba.

²⁵ Má nyɩgɛ ba vesi-la kala. Má sɩ́ vesi-la sɛlɩmɛ arɩ hɔpʋla paa a kɛŋ. Dɩ ma nɛ ŋaa ŋɩɩ, ʋ jaŋ lɔrɛ a pɩma, bɛɛ wɩaa ma TƖƖNA Wɩa ka kɩsɛ ŋɩɩ nɛ.

²⁶ Ma pʋpɔ má sɩ́ vesiŋ deemba kʋŋkala kaa kʋ jʋʋ ma dɩa. Dɩ ma nɛ ŋaa ŋɩɩ, ŋmɩaŋ-la sɩɩ to vesi-la jaŋ mɩɩra toma. Má kɩkɩsɛ kɩaa deemba a sɩ́ leŋe dɩ ba kpagɛma, bɛɛ wɩaa La TƖƖNA ŋmɩɛsa hɛ vesi-la lɛ nɛ.