MOSIS BƖRA WULLI WƖA WOMBIIŊ 6 - WƖA TENIŊ

Má cho ma TƖƖNA Wɩa

¹ Wombiee arɩ niiriŋ deemba nɛ ma TƖƖNA Wɩa dagɛmɛ dɩ mɩ joŋo dagɛma, dɩ ma tutoba dɩ ma nɛ mʋ chol Jɔdaŋ fuo-la a jʋʋ tintee-la ʋ sɩ jaŋ joŋo pɩma dɩ ʋ ŋaa ma kʋŋ.

² Ma dɩ ma biiriŋ arɩ ma nihee kala maga dɩ má zizil ma TƖƖNA Wɩa nɛ bʋa na-kala lɛ, a tuto wombie-la arɩ niiri-la kala mɩ sɩ jaŋ dagɛma, dɩ ŋɩɩ leŋ dɩ ma kɛŋ mɩɩ-duduoŋ tintee-la lɛ ʋ sɩ jaŋ joŋo pɩma.

³ Iziral tɩmma, má tuto wombie-la woruŋ dɩ ŋɩɩ leŋ dɩ wɩaa vɛŋ woruŋ a pɩma, dɩ ma pʋŋa yʋgɛ tintee-la sɩ sɩma woruŋ a kɛŋ kɩaa lɛ, arɩ La TƖƖNA ma nyɩmmaba Wɩa sɩ hɛ niiŋ ŋɩɩ a pɩma.

⁴ Iziral tɩmma, má jɩŋ arɩ La TƖƖNA Wɩa ŋaa kʋbala nɛ.

⁵ Má kɛŋ ma tʋɔŋ arɩ ma wɩɩ-wɩɩkala a cho ma TƖƖNA Wɩa.

⁶ Wɩaa deemba mɩ sɩɩ dagɛma jɩnɩŋ, má joŋo hɛ ma tʋɔŋ lɛ.

⁷ Má joŋ wɩalɩŋ a dɩdagɛ ma biiriŋ bʋa na-kala, ma dɩɩsɩŋ lɛ koo dɩ ma nɩɩ vɛŋ wombiiŋ.

⁸ Má ŋmʋnsɛ wɩalɩŋ a joŋo vɔɔ ma nɩsaa arɩ ma tilliŋ lɛ dɩ ba liliisima bʋa na-kala lɛ.

⁹ Má ŋmʋnsɛ wɩalɩŋ a hɛ ma borusuŋ arɩ boi-baalaa lɛ.

¹⁰ La TƖƖNA Wɩa jaŋ kɛmma kaa mʋ tintee-la ʋ sɩ hɛ niiŋ pɩ ma naabalɩmaba Abɩraham, Aɩzɩk arɩ Jekɔb arɩ ʋ jaŋ joŋo pɩma, tabalaa sɩ kɛŋ dʋa ma sɩ dee bɩ chɛ,

¹¹ dɩɩsɩŋ kala su arɩ kʋzɔŋŋɔɔ ma dee sɩ bɩ chɛ. Vilee ma hɛ nɩmɛ ma sɩ dee bɩ luo, girep arɩ olif tɩɩsɩŋ bagɩsɩŋ ma hɛ nɩmɛ ma sɩ dee bɩ pɛrɛ. Ŋɩɩ wɩaa, dɩ ma nɛ kʋ dii kɩaa deemba a vɔgɛ,

¹² má sɩ́ ma TƖƖNA wɩaa yʋ. Ʋ nɛ kɛmma kaa kʋ lɩɩ Ijipiti tinteeŋ lɛ, lee-la ma fa sɩ hɛ a ŋaa yosi.

¹³ Má zizil ma TƖƖNA Wɩa a chʋchʋɔlɛ ʋ dʋndʋŋa a tutou, a ŋɩŋaa wɩɩkala ʋ yɩrɩŋ lɛ.

¹⁴ Má sɩ́ vene kala to, nɩalɩŋ sɩ hɔnɔ kpagɛma vesiŋ.

¹⁵ Ma Tɩɩna Wɩa bɩ hadɔrʋŋ ka chɛ. Dɩ ma nɛ to vene dɔŋ, ʋ baanɩŋ jaŋ faasa sii ma nyuŋ dɩ ʋ cheima ta tintee-la lɛ.

¹⁶ Má sɩ́ ma TƖƖNA Wɩa magɩsʋ arɩ ma fa sɩ ŋaa ŋɩɩ lee-la ba sɩɩ yɩrɛ Masa lɛ.

¹⁷ Má hɛ doluŋ aŋ to wombie-la, niiri-la arɩ wɩalɩŋ kala ma TƖƖNA Wɩa sɩ dagɛma.

¹⁸ Má ŋɩŋaa wɩaa ba bʋa lɛ arɩ wɩalɩŋ sɩ zɔmɔ La TƖƖNA teeŋ, dɩ wɩɩkala vɛŋ woruŋ a pɩma dɩ ma wuo jʋʋ tintee-zɔŋ-la La TƖƖNA sɩ hɛ niiŋ pɩ ma naabalɩmaba arɩ ʋ jaŋ joŋo pɩma,

¹⁹ dɩ ŋɩɩ leŋ dɩ ma wuo yuo kiri ma dʋndɔŋŋɔɔ kala tintee-la lɛ arɩ La TƖƖNA sɩ bʋl ŋɩɩ.

²⁰ Maachie dɩ ma biiriŋ nɛ pɩɛsɛma, “Bɛɛ nɛ tɩɩ La TƖƖNA Wɩa bʋl dɩ la to wombiee deemba arɩ niiriŋ deemba arɩ wɩalɩŋ kala ʋ sɩ dagɛla?”

²¹ Má bʋla pɩba, “La fa ŋaa yosi nɛ Ijipiti tinteeŋ kuoro nɩsɩŋ lɛ, ŋɩɩ nɛ La TƖƖNA joŋ doluŋ a yuo laala.

²² La sɩɩŋ lɛ nɛ La TƖƖNA ŋaa wʋkpuŋkperisiŋ, wʋmagɩlaa arɩ wʋduoruŋ Ijipiti tinteeŋ kuoro arɩ ʋ tɩntɩnnɩ-hɩasɩŋ kala lɛ.

²³ Ʋ laala ba nɩsɩŋ lɛ nɛ, a kɛnla kaa kɔ tinteeŋ deeŋ arɩ ʋ sɩ hɛ niiŋ ŋɩɩ a pɩ la naabalɩmaba arɩ ʋ jaŋ joŋo pɩla.

²⁴ Ŋɩɩ nɛ La TƖƖNA Wɩa bʋla pɩla arɩ la to wɩaa deemba kala aa zilu. Dɩ la nɩɩ toba bʋa na-kala, ʋ jaŋ beŋ la nyuŋ woruŋ a leŋ dɩ la wɩaa kala vɩvɛŋ ba bʋa lɛ.

²⁵ Dɩ la nɛ chaasa to wombie-la kala, arɩ ŋɩɩ La TƖƖNA sɩ daga, ʋ tʋɔŋ jaŋ tɔrɛ la nyuŋ.”