MOSIS BƖRA WULLI WƖA WOMBIIŊ 5 - WƖA TENIŊ

Wɩa niiriŋ fii-la

¹ Ŋɩɩ nɛ Mosis yɩrɛ Iziral tɩŋŋaa kala kʋ hɛ dɔŋɔ a bʋla pɩba: Iziral tɩmma, má jegile nɩɩ niiri-la arɩ wombie-la mɩ sɩɩ dagɛma jɩnɩŋ. Má gʋnnɛba woruŋ a kɛmba kaa tɩŋ.

² Sɩnaɩ peel-la lɛ La TƖƖNA Wɩa hɛ niiŋ nɛ la dɩ ʋ pɛgɛ.

³ Ʋ dɩ la nyɩmmaba dʋndʋŋa pɛgɛ dee ʋ hɛ nii-la, ama ʋ hɛ nii-la ʋ dɩ la nɩalɩŋ kala ha sɩ hɛ la mɩɩsɩŋ lɛ jɩnɩŋ pɛgɛ nɛ.

⁴ Sɩnaɩ peel-la lɛ La TƖƖNA hɛ nyiniŋ tʋɔŋ nɛ a chaasɛma, aŋ bʋl wɩaa pɩma.

⁵ Bʋa-la lɛ, mɩ chɩŋ ma dɩ La TƖƖNA pɛgɛ nɛ aŋ laa wɩalɩŋ kala ʋ sɩɩ bʋl a bʋla pɩma, bɛɛ wɩaa nyiŋ-la fa leŋe fawʋllʋŋ kɛmma nɛ, ma bɩ peel-la jɩla. La TƖƖNA sɩ:

⁶ Mɩ nɛ ŋaa ma TƖƖNA Wɩa, mɩ nɛ kɛmma kaa kʋ lɩɩ Ijipiti tinteeŋ lɛ, lee-la ma fa sɩ hɛ a ŋaa yosi.

⁷ Ma bɩ maga dɩ má kɛŋ wɩa kala a pɛ mɩ-na Wɩa lɛ.

⁸ Ma pɔ má sɩ́ tɔŋ kala mɛ a pɩ ma tɩtɩa dɩ ʋ nagɛ wɩa-nyuŋ kʋŋ koo tinteeŋ nyuŋ kʋŋ koo lɩɩŋ tʋɔŋ kʋŋ.

⁹ Ma pɔ má sɩ́ ba sɩpaaŋ kpirimu koo a zilba. Mɩ nɛ ma TƖƖNA Wɩa, mɩ bɩ hadɔrʋŋ ka chɛ, nɩalɩŋ sɩ bɛrɩmɛ, mɩ jaŋ dɔgɩsɛba. Mɩ jaŋ dɔgɩsɛ nyɩmmaba arɩ biiriŋ arɩ ba nihee arɩ ba nihi-lɩɛrɛba a tɩŋ nyɩmmaba wʋbɔŋŋɔɔ wɩaa.

¹⁰ Ama nɩalɩŋ sɩ chomi a tuto mɩ niiriŋ, mɩ jaŋ dagɛ mɩ chonuŋ a pɩba arɩ ba doho doho bʋɩba sɩ jaŋ to ba harɩŋ kɔ.

¹¹ Má pɔ ma sɩ́ mɩ yɩrɩŋ yɩrʋ pɛɩ. Mɩ-na ma Tɩɩna Wɩa jaŋ dɔgɩsɛ nɩɩ-la kala sɩ yɩrɛ mɩ yɩrɩŋ pɛɩ.

¹² Má liisi chɛ-wiesii-la wɩaa a joŋu dɩ ʋ ŋaa chɛ-zɔŋ mɩ teeŋ, arɩ mɩ-na ma TƖƖNA Wɩa sɩ dagɛma ŋɩɩ.

¹³ Má tɩŋ ma tɩntɩŋŋaa tapʋlaa balɩdʋ pɛgɛ,

¹⁴ ama tapʋl-pɛɩ chɛɛŋ ŋaa chɛ-wiesii nɛ, a pɩ mɩ-na ma TƖƖNA Wɩa. Má sɩ́ tɩntɩmɩɩ kala tɩŋ, ma biiriŋ, arɩ nɩwogusu-la sɩ hɛ ma tʋɔŋ, ma pʋsʋŋ arɩ ma dɩa tɩntɩnnaa kala baalaa arɩ haalaa, dɩ ŋɩɩ leŋ dɩ ma tɩntɩnnaa baalaa arɩ haalaa ma kala wiesi.

¹⁵ Má jɩŋ arɩ ma fa ŋaa yosi nɛ Ijipiti tinteeŋ lɛ, mɩ-na ma TƖƖNA Wɩa kɛŋ mɩ doluŋ a kɛmma kaa kʋ lɩɩ. Ŋɩɩ nɛ tɩɩ mɩ-na ma TƖƖNA bʋla pɩma arɩ ma tuto mɩ chɛ-wiesii-la woruŋ ŋɩɩ.

¹⁶ Má zizil ma nyɩmmaba arɩ ma naamba, arɩ mɩ-na ma TƖƖNA Wɩa sɩ dagɛma ŋɩɩ. Dɩ mɩ leŋ dɩ ma mɩɩsɩŋ duomi, dɩ wɩaa vɛŋ woruŋ a pɩma tintee-la mɩ sɩ jaŋ joŋo pɩma lɛ.

¹⁷ Má sɩ́ nʋʋ kpʋ.

¹⁸ Má sɩ́ nʋʋ haal chɛ.

¹⁹ Má sɩ́ gaa.

²⁰ Má sɩ́ wɩaa nyɩɛ a joŋ cheeriŋ pɩ ma dɔnsʋŋ tɩŋŋaa.

²¹ Má sɩ́ ma dɔnsʋŋ tɩŋŋaa kɩaa hɩɛnʋ, ba haalaa ba dɩɩsɩŋ, ba tinteyee, ba dɩa tɩntɩnnaa baalaa koo haalaa, ba nɛsɩŋ, ba kakusuŋ koo kʋŋ na-kala ba sɩ kɛnɛ.

²² La TƖƖNA niiri-la ʋ sɩ heele bʋl a dagɛma Sɩnaɩ peel-la nyuŋ nɛ ŋɩɩ. Bʋa-la lɛ ʋ sɩ hɛ nyiniŋ arɩ duoŋ-bɩlɩmbaaŋ-bine tʋɔŋ aŋ bʋl wɩalɩŋ aŋ bɩra bɩ wɩɩ bʋla pɛ. Ŋɩɩ nɛ ʋ ŋmʋnsɛ niiri-la a hɛ tabɩɩ-taalaa balɩa lɛ a joŋo pɩmɛ.

²³ Peel-la kala fa sɩ tɔ arɩ nyiniŋ ŋɩɩ, ka ma nɩɩ yikoro biriŋ-la tʋɔŋ, ma doho doho-la kala sɩpaalaaraa arɩ ma nɩhɩasɩŋ kɔ mɩ teeŋ nɛ,

²⁴ a bʋl, “La TƖƖNA Wɩa kɛŋ ʋ doluŋ arɩ ʋ tʋla dagɛla nɛ, la nɩɩ ʋ yikoro ma nyiŋ-la tʋɔŋ. Jɩnɩŋ la jɩma arɩ Wɩa arɩ nuhuobiine jaŋ wuo bʋl wɩaa, ka dɩ tɩɩna ha kɛŋ mɩɩsɩŋ.

²⁵ Ama bɛɛ nɛ tɩɩ la jaŋ chɛ sʋʋŋ a pɩ la tɩtɩa? Dɩ la nɛ bɩra nɩɩ La TƖƖNA Wɩa yikoro, nyiŋ-balɩŋ deeŋ jaŋ diila dɩ la sʋʋ.

²⁶ Nuhuobiiŋ bɛɛ nɛ hɛ nɩmɛ Wɩa sɩ weye hɛ nyiniŋ tʋɔŋ aŋ bʋl wɩaa pʋ, ka ʋ bɩ sʋba arɩ la sɩ nɩɩ ŋɩɩ?

²⁷ Mosis, mʋ́ kpagɛ a nɩɩ wɩalɩŋ kala La TƖƖNA Wɩa sɩɩ bʋl, a kaa kʋ bʋla pɩla, la jaŋ jegile nɩɩ a kaa tɩŋ.”

²⁸ La TƖƖNA nɩɩ wɩalɩŋ ma sɩ bʋla pɩmɛ nɛ, ŋɩɩ nɛ ʋ bʋla pɩmɛ, “Mɩ nɩɩ wɩalɩŋ kala nɩalɩŋ sɩ bʋla pɩŋ nɛ, ba bʋl woruŋ nɛ.

²⁹ Dɩ ba nɛ jaŋ kɛŋ ŋɩɩ naaŋ lɛ a zizilmi, aŋ tuto wɩalɩŋ mɩ sɩ daga, ŋɩɩ fa jaŋ leŋ dɩ wɩaa vɛŋ woruŋ a pɩ ba dɩ ba biiriŋ kala a kaa mʋ wuu.

³⁰ Mʋ́ a bʋla pɩba dɩ ba mɩɩra mʋ ba lɛŋŋɛɛ.

³¹ Ama ŋ-na Mosis, hɛ mɩ teeŋ daha, dɩ mɩ dagɩŋ mɩ wombiee arɩ mɩ niiriŋ ŋ sɩ jaŋ kaa mʋ a dagɛba dɩ ba tutoba tintee-la lɛ mɩ sɩ jaŋ joŋo pɩba dɩ ʋ ŋaa ba kʋŋ.”

³² Ŋɩɩ wɩaa, má hɛ doluŋ aŋ to wɩalɩŋ kala ma TƖƖNA Wɩa sɩ dagɛma, má sɩ́ begilu.

³³ Má to wɩalɩŋ kala ma TƖƖNA Wɩa sɩ́ dagɛma, dɩ wɩaa vɛŋ woruŋ a pɩma dɩ ma hɔŋ tintee-la ma sɩɩ mʋ dɩ ma tɩɩ lɛ, a dieni.