MOSIS BƖRA WULLI WƖA WOMBIIŊ 4 - WƖA TENIŊ

Mosis bʋla pɩ Iziral tɩŋŋaa dɩ baa to La TƖƖNA niiŋ

¹ Ŋɩɩ nɛ Mosis bʋla pɩ Iziral tɩŋŋaa: Má jegile nɩɩ wombie-la arɩ wɩalɩŋ kala mɩ sɩɩ chɛ dɩ mɩ dagɛma, a tutoba. Dɩ ma nɛ toba, ŋɩɩ jaŋ leŋ dɩ ma kɛŋ mɩɩsɩŋ a laa tintee-la a tɩɩ, tintee-la La TƖƖNA, ma naabalɩmaba Wɩa, sɩ jaŋ joŋo pɩma.

² Má pɔ ma sɩ́ wɩɩ kaa pɛ wɩalɩŋ mɩ sɩ dagɛma lɛ, koo a keri wɩalɩŋ kʋŋ ta. Má tuto ma TƖƖNA Wɩa niiri-la kala mɩ sɩ dagɛma.

³ Ma tɩtɩa na wɩalɩŋ kala La TƖƖNA sɩ ŋaa nɛ peel-la ba sɩɩ yɩrɛ Pio lɛ. Ma tʋɔŋ, ʋ fa kpʋ nɩalɩŋ kala sɩ kpaarɛ vene-la ba sɩɩ yɩrɛ Baal, a hɛ Pio lɛ nɛ.

⁴ Ama ma nɩalɩŋ kala sɩ to ma TƖƖNA Wɩa arɩ tʋɔ-bala nɛ ha hɛ ma mɩɩsɩŋ lɛ ŋ-la jɩnɩŋ.

⁵ Mɩ dagɛma wombie-la arɩ wɩalɩŋ kala mɩ Tɩɩna Wɩa sɩ sɩ dɩ mɩ dagɛma nɛ. Dɩ ma nɛ mʋ tintee-la, má tuto ba.

⁶ Má fɩɛlɛ ma sɩaa a tuto wɩalɩŋ kala. Ŋɩɩ nɛ jaŋ dagɛ arɩ ma kɛŋ wʋjɩmɩŋ nɛ a jɩŋ wɩaa sɩaa a pɩ tintee-la nɩaa sɩ jaŋ nɩɩ ma wɩaa. Dɩ ba nɛ kʋ nɩɩ wombie-la arɩ wɩalɩŋ La TƖƖNA sɩ dagɛma, ba jaŋ bʋl, “Tinteeŋ deeŋ kɛŋ yɩrɩ-balɩŋ a kɛŋ doluŋ ma ʋ nɩaa ŋaa wʋjɩnna, a jɩŋ wɩaa sɩaa.”

⁷ Tintee dɔŋ kala tuo a kɛŋ yɩrɩ-balɩŋ ba vene chɩŋ ba harɩŋ arɩ La TƖƖNA Wɩa sɩ chɩŋ ma harɩŋ ŋɩɩ. Dɩ la nɛ sʋlʋ bʋa na-kala, ʋ yie laa la sʋla nɛ.

⁸ Tintee bɛɛ nɛ hɛ nɩmɛ a kɛŋ yɩrɩ-balɩŋ wombiee arɩ wɩalɩŋ ba sɩɩ to a zɔmɔ nagɛ wɩaa deemba mɩ sɩ joŋo dɩdagɛma jɩnɩŋ?

⁹ Má kɛŋ ma tɩtɩa woruŋ, a sɩ́ wɩalɩŋ ma sɩ na yʋ ma mɩɩsɩŋ kala lɛ. Má joŋ wɩalɩŋ dagɛ ma biiriŋ, dɩ ba ma bɩra joŋo dagɛ ba biiriŋ.

¹⁰ Má liisi tapʋlɩɩ-la ma sɩ chɩŋ ma TƖƖNA Wɩa sɩpaaŋ Sɩnaɩ peel-la lɛ, bʋa-la ʋ sɩ leŋe mɩ yɩrɛma kʋ hilimi ʋ sɩpaaŋ, dɩ ma nɩɩ wɩalɩŋ ʋ sɩ jaŋ bʋl, a jɩŋ ŋɩɩ ma sɩ jaŋ zizilu ma mɩɩsɩŋ kala lɛ, aŋ joŋ wɩalɩŋ dagɛ ma biiriŋ ma.

¹¹ Ŋɩɩ nɛ ma kʋ chɩŋ peel-la bʋbʋɔŋ, ka peel-la kala tɔ arɩ nyiniŋ. Nyʋɔsʋŋ leŋ lee-la kala biri a nagɛ duoŋ-timbine a jɩla tɩgɛ wɩa-nyuŋ.

¹² La TƖƖNA hɛ nyiŋ-la tʋɔŋ nɛ aŋ bʋl wɩaa pɩma. Ma nɩɩ ʋ yikoro dʋndʋŋa nɛ aŋ bɩ ʋ nagɩŋ na.

¹³ Ʋ bʋl nii-la sɩ hɛ ma dɩ ʋ pɛgɛ wɩaa nɛ, niiri-la fii ʋ sɩ dagɛma dɩ ma tuto, aŋ ŋmʋnsɛba hɛ tabɩɩ-taalaa balɩa lɛ.

¹⁴ Bʋa-la lɛ, La TƖƖNA leŋe mɩ dagɛma wombie-la arɩ wɩalɩŋ ma sɩ jaŋ tuto nɛ dɩ ma nɛ chol Jɔdaŋ fuo-la a jʋʋ tintee-la ʋ sɩ jaŋ joŋo pɩma dɩ ma tɩɩʋ.

Má sɩ́ vʋɩyaa kpaarʋ

¹⁵ Bʋa-la lɛ La TƖƖNA sɩ hɛ nyiŋ-la tʋɔŋ aŋ bʋl wɩaa pɩma Sɩnaɩ peel-la lɛ, ma bɩ ʋ nagɩsɩŋ na. Ŋɩɩ wɩaa má kɛŋ ma tɩtɩa woruŋ

¹⁶ a sɩ́ disiniŋ ŋaa hɛ ma tɩtɩa lɛ a mɛ vʋɩŋ pɩ ma tɩtɩa dɩ ʋ nagɛ baal koo haal,

¹⁷ koo dɩ ʋ nagɛ pʋna koo zaarʋ,

¹⁸ koo kɩalɩŋ sɩɩ vaamɛ tinteeŋ koo chenfiliŋ.

¹⁹ Má sɩ kɩaa deemba ma sɩɩ na wɩa-nyuŋ zil: Wɩɩpɔsʋŋ, chɛnɛ arɩ chɛnwʋlaa. Ba ŋaa kɩa nɛ La TƖƖNA sɩ joŋo pɩ dʋnɩa nɩaa kala.

²⁰ Ma nɛ ŋaa nɩalɩŋ La TƖƖNA sɩ laa ta Ijipiti tɩŋŋaa nɩsɩŋ lɛ, lee-la ma fa sɩ chaasa na hɛɛŋ. Ʋ laama dɩ ma ŋaa ʋ nɩaa nɛ arɩ ma sɩ ŋaa ʋ nɩaa ŋɩɩ jɩnɩŋ.

²¹ La TƖƖNA fa na baanɩŋ nɛ mɩ nyuŋ a tɩŋ ma wɩaa, ŋɩɩ nɛ ʋ chaasa ŋmɩɛsɛ arɩ mɩ bɩ jaŋ chol Jɔdaŋ fuo-la a jʋʋ tintee-zɔŋ-la ʋ sɩ jaŋ joŋo pɩpɩma dɩ ʋ ŋaa ma kʋŋ.

²² Ʋ sɩ mɩ jaŋ sʋʋ tinteeŋ deeŋ lɛ, mɩ bɩ jaŋ chol Jɔdaŋ fuo-la. Ama ma-na jaŋ chol fuo-la a laa tintee-zɔŋ-la a tɩɩʋ.

²³ Má kɛŋ ma tɩtɩa woruŋ a pʋpɔ dɩ má sɩ́ nii-la sɩ hɛ ma dɩ ma TƖƖNA Wɩa pɛgɛ yʋ. Má sɩ́ tɔŋ kala mɛ dɩ ʋ nagɛ kʋŋkala a pɩ ma tɩtɩa. Ma Tɩɩna Wɩa ka kɩsɛ ŋɩɩ nɛ.

²⁴ Ma TƖƖNA Wɩa nagɛ nyiŋgeliŋ sɩɩ belimi kɩaa nɛ, ʋ bɩ hadɔrʋŋ ka chɛ.

²⁵ Dɩ ma nɛ mʋ hɔŋ tintee-la lɛ a dieni, a lʋl biiriŋ dɩ ba ma sii a lʋl biiriŋ, ma pʋpɔ má sɩ́ wʋbɔŋ ŋaa ma TƖƖNA Wɩa sɩɩŋ lɛ, a mɛ tɔmʋŋ dɩ ʋ nagɛ kʋŋkala a pɩ ma tɩtɩa. Dɩ ma nɛ ŋaa ŋɩɩ, ʋ baanɩŋ jaŋ sii ma nyuŋ.

²⁶ Jɩnɩŋ, wɩa-nyuŋ arɩ tinteeŋ pɛ na nɛ, dɩ ma nɛ ŋaa wɩaa deemba kʋŋkala ma sɩɩ chol Jɔdaŋ fuo-la dɩ ma laa tintee-la a tɩɩ lɛ, La TƖƖNA jaŋ guu cheima. Ma bɩ jaŋ hɔŋ nɩmɛ dieni ka dɩ ʋ cheima.

²⁷ La TƖƖNA jaŋ ŋmooma pɩsa hɛ tintee-wogusuŋ lɛ. Tintee-wogusu-la lɛ, ma jesiŋ kala jaŋ sʋʋ aŋ ka nɩaa baŋmɛnɛ.

²⁸ Tinteye-la lɛ, ma jaŋ kpʋkpaarɛ tɔŋŋɔɔ ba sɩ mɛ, koo a kɛŋ daaŋ saa koo tabɩaa. Tɔmɔ-la bɩ jaŋ nɩna, ba bɩ nɩɩ, ba bɩ kɩaa wuo dii, ba bɩ sʋɔra maa nɩɩ.

²⁹ Ama tinteye-la lɛ, dɩ ma nɛ yele aa chɛ ma TƖƖNA Wɩa arɩ ma tʋɔŋ arɩ ma wɩɩ-wɩɩkala, ma jaŋ naʋ.

³⁰ Dɩ wɩaa deemba kala nɛ ŋaa ma lɛ, dɩ hɛɛŋ jʋʋma, ʋ ŋɩɩ harɩŋ ma jaŋ mɩɩra kɔ ma TƖƖNA Wɩa teeŋ a sɛyʋ.

³¹ Ma TƖƖNA ŋaa Wɩa sɩɩ fa nɩaa nenige nɛ. Ʋ bɩ jaŋ vɩama ta koo a cheima. Ʋ bɩ jaŋ yʋ nii-la sɩ hɛ ʋ dɩ ma naabalɩmaba pɛgɛ wɩaa.

La TƖƖNA nɛ Wɩa

³² Ma pɩɛsa nɩɩ, a lɩɩ bʋa-la lɛ Wɩa sɩ ŋaa nuhuobiine a kaa kɔ bʋa-la lɛ ba sɩ lʋlma, wʋbalɩŋ deeŋ doho ha ŋaa? Koo nʋʋ ha nɩɩ wʋdoho dɔŋɔ dʋnɩa kala lɛɛ?

³³ Nɩa hɛ nɩmɛ a ha na nyiniŋ sɩɩ dii, ka Wɩa hɛ ʋ tʋɔŋ aŋ bʋl wɩaa pɩpɩba, arɩ ma sɩ na ŋɩɩ aŋ ha kɛŋ mɩɩsɩŋ?

³⁴ Veŋ bɛɛ nɛ hɛ nɩmɛ a jaŋ wuo mʋ tinteeŋ tʋɔŋ a ŋaa wɩaa magɩsɛba, a ŋaa wʋkpuŋkperisiŋ arɩ wʋmagɩlaa, a yuo laalɩŋ, a dagɛ ʋ doluŋ a ŋaa wɩaa sɩ kɛŋ fawʋllʋŋ a laa ʋ nɩaa tintee-la nɩaa teeŋ? Ŋ-la nɛ ma TƖƖNA Wɩa ŋaa ma sɩɩŋ lɛ aŋ laama kaa kʋ lɩɩ Ijipiti tinteeŋ lɛ.

³⁵ La TƖƖNA ŋaa wɩaa deemba kala dɩ ʋ dagɛma nɛ, dɩ ma jɩŋ arɩ ʋ dʋndʋŋa nɛ ŋaa Wɩa, wɩa dɔŋ bɩra tuo.

³⁶ Ʋ leŋe ma nɩɩ ʋ yikoro sɩ lɩɩ wɩa-nyuŋ nɛ, a bʋl wɩaa dagɛma. Tinteeŋ ma lɛ, ʋ leŋ ma na nyiniŋ, ka ʋ hɛ nyiŋ-la tʋɔŋ aŋ bʋl wɩaa pɩma.

³⁷ Ʋ sɩ cho ma naabalɩmaba nɛ tɩɩ ʋ lɩɩsɛma, a tɩtɩa kɛmma kaa kʋ lɩɩ Ijipiti tinteeŋ lɛ arɩ ʋ doluŋ.

³⁸ Ma bɩra na ʋ sɩ yuo dii tinteye-la nɩaa sɩ kɛŋ doluŋ a kɩɩma nɛ, a kiriba ta aŋ joŋ ba tinteeŋ a pɩma dɩ ʋ ŋaa ma kʋŋ. Ma nɛ ha tɩɩ tintee-la arɩ jɩnɩŋ kala.

³⁹ Ma jɩŋ woruŋ jɩnɩŋ a sɩ́ yʋ, La TƖƖNA nɛ ŋaa wɩa-nyuŋ arɩ tinteeŋ kala Wɩa, wɩa dɔŋ bɩra tuo.

⁴⁰ Má to ʋ wombie-la arɩ ʋ wɩalɩŋ mɩ sɩɩ dagɛma jɩnɩŋ, dɩ wɩaa wuo vɛŋ woruŋ a pɩ ma dɩ ma doho nɩaa, dɩ ma nɛ mʋ hɔŋ tintee-la ma TƖƖNA Wɩa sɩ joŋo pɩma dɩ ʋ ŋaa ma kʋŋ a kaa mʋ wuu lɛ.

Tasɩ-la nɩaa sɩ jaŋ fá mʋ yuyuori

⁴¹ Ŋɩɩ nɛ Mosis lɩɩsɛ tabalaa batori sɩ hɛ Jɔdaŋ fuo-la wɩɩpɔsʋŋ dɩɩrɩŋ.

⁴² Dɩ nʋʋkala nɛ bɩ sɛnɛ aŋ kpʋ nʋʋ sɩ bɩ ʋ dʋndɔŋ ŋaa, dɩ ʋ fá mʋ a yuori tasɩ-la dɔŋɔ dɩ ba sɩ́ ʋ kpʋ.

⁴³ Tasɩ-la yɩraa nɛ ŋ-la: Bɛza, ʋ hɛ tintee-hɩlɩɩ-la lɛ peelee sɩ yʋga nɛ. Rubiŋ doho nɩaa kʋa nɛ ŋɩɩ. Ramɔf, ʋ ma hɛ Gɩlɩad lɛ nɛ. Gad doho nɩaa ma kʋa nɛ ŋɩɩ, arɩ Golaŋ, ʋ ma hɛ Basaŋ lɛ nɛ. Manasɛ doho nɩaa ma kʋa nɛ ŋɩɩ.

Mosis suomo joŋ Wɩa wombie-la ʋ sɩ bile a dagɛ Iziral tɩŋŋaa

⁴⁴ Wɩa wombie-la arɩ ʋ wɩalɩŋ Mosis sɩ joŋo dagɛ Iziral tɩŋŋaa dɩ ba tuto nɛ ŋ-la:

⁴⁵ Mosis joŋ wombie-la arɩ wɩalɩŋ a dagɛ Iziral tɩŋŋaa dɩ ba lɩɩ Ijipiti tinteeŋ lɛ,

⁴⁶ a kɔ fuo-la sɩ kpagɛ taŋ-la ba sɩɩ yɩrɛ Bɛf Pio sɩ hɛ Jɔdaŋ wɩɩpɔsʋŋ lɛ nɛ. Lee-la ŋaa Amɔrɩ tɩŋŋaa kuoro Sɩhɔŋ sɩ hɛ Hɛsɩbɔŋ lɛ tinteeŋ nɛ. Mosis arɩ Iziral tɩŋŋaa sɩ lɩɩ Ijipiti tinteeŋ lɛ kɔ nɛ ba yuo diiu, aŋ laa tintee-la.

⁴⁷ Ba sɩ laa ʋ tinteeŋ ʋ ŋaa ba kʋŋ ŋɩɩ, ba laa Basaŋ tɩŋŋaa kuoro Ɔgɩ ma tinteeŋ. Kuoroo deemba balɩa kala ŋaa Amɔrɩ tɩŋŋaa kuoroo nɛ a hɛ Jɔdaŋ fuo-la wɩɩpɔsʋŋ dɩɩrɩŋ.

⁴⁸ Tinteeŋ deeŋ chɩŋ taŋ-la ba sɩɩ yɩrɛ Arʋa lɛ nɛ, Anɔŋ fuo-la niiŋ aŋ pɩŋ ŋɩɩ mʋ yi peel-la ba sɩɩ yɩrɛ Sirioŋ, ʋ nɛ ha baa yɩrɛ Hɛmɔŋ.

⁴⁹ Ʋ nɛ ha mʋ kɛŋ Jɔdaŋ fuo-la wɩɩpɔsʋŋ dɩɩrɩŋ a mʋ yi Mʋgʋ-sʋʋŋ a kaa mʋ Pisiga peel-la lee-la sɩ chullo tuu.