MOSIS BƖRA WULLI WƖA WOMBIIŊ 30 - WƖA TENIŊ

Wʋzɔmɔ-la ma sɩ jaŋ na dɩ ma nɛ mɩɩra kɔ La TƖƖNA teeŋ

¹ Dɩ ma nɛ to La TƖƖNA Wɩa wombiee, ʋ jaŋ pɛ ma lɛ. Dɩ ma nɛ vɩa ʋ niiŋ, ʋ jaŋ ŋmɩɛsa hɛ ma lɛ a kɛmma pɩsa hɛ tintee-wogusuŋ lɛ,

² ama dɩ ma dɩ ma biiriŋ nɛ mɩɩra kɔ ma TƖƖNA Wɩa teeŋ a tou arɩ ma tʋɔŋ arɩ ma wɩɩwɩɩ kala, a to wɩalɩŋ kala mɩ sɩ joŋo dagɛma jɩnɩŋ,

³ ma TƖƖNA Wɩa jaŋ fá ma nenige a lɩɩsɛma tinteye-la lɛ ʋ sɩ ŋmooma pɩsa hɛ a kɛmma kʋ hɛ dɔŋɔ aŋ leŋ dɩ ma bɩra dʋa.

⁴ Dɩ ma nɛ paala pɩsɛ a mʋ hɛ dʋnɩa loŋgoru-la sɩ faasa bol lɛ ma, ma TƖƖNA Wɩa ha jaŋ kɛmma mɩɩra kʋ hɛ dɔŋɔ.

⁵ Ʋ jaŋ kɛmma kɔ tintee-la sɩ ŋaa ma naabalɩmaba kʋŋ, dɩ ma bɩra tɩɩʋ. Ʋ jaŋ leŋ dɩ ma dʋa kɩaa woruŋ a pʋŋa yʋgɛ a paala kɩɩ ma naabalɩmaba.

⁶ Ma TƖƖNA Wɩa jaŋ suri ma dɩ ma doho nɩaa kala tʋɔŋ, dɩ ŋɩɩ leŋ dɩ ma chou arɩ ma tʋɔŋ arɩ ma wɩɩ-wɩɩkala a wuo kɛŋ mɩɩsɩŋ.

⁷ Ma TƖƖNA Wɩa jaŋ mɩɩra joŋ ŋmɩaŋ-bɔŋŋɔɔ deemba kala a hɛ ma dʋndɔmɔ-la sɩ bɛrɛma aa dɔgɩsɛ ma lɛ.

⁸ Ma jaŋ bɩra sɛɩ ma TƖƖNA niiŋ a tuto ʋ wɩalɩŋ kala mɩ sɩ joŋo dagɛma jɩnɩŋ.

⁹ Ŋɩɩ nɛ ma TƖƖNA Wɩa jaŋ leŋ dɩ ma dʋa woruŋ wɩɩ na-kala ma sɩɩ ŋaa lɛ. Ʋ jaŋ leŋ dɩ ma pʋŋ, dɩ ma pʋsʋŋ ma pʋŋ a yʋgɛ, dɩ kʋdiilee ma pʋrɩgɛ ma tinteeŋ lɛ. Ma TƖƖNA tʋɔŋ bɩra jaŋ tɔrɛ ma nyuŋ woruŋ dɩ ʋ leŋ dɩ ma kuori arɩ ʋ fa sɩ ŋaa ŋɩɩ ma naabalɩmaba lɛ.

¹⁰ Ama ʋ maga dɩ má to ma TƖƖNA Wɩa niiri-la ʋ sɩ bile arɩ ʋ wombiee ba sɩ ŋmʋnsa hɛ ʋ teniŋ tʋɔŋ. Ʋ maga dɩ má sɛyʋ arɩ ma tʋɔŋ arɩ ma wɩɩ-wɩɩkala.

Mɩɩsɩŋ nɛ maa chɛ koo sʋʋŋ

¹¹ Wɩalɩŋ kala mɩ sɩ joŋo dɩdagɛma jɩnɩŋ, ba bɩ hɛɩ koo ba bɩ dolie kɩɩ ma tonuŋ.

¹² Ba bɩra bɩ wɩa-nyuŋ ma nɛ hɛ, ma sɩ jaŋ bʋl, ‘Kʋbɛɛ nɛ jaŋ jɩla kaa kʋ tuu a bʋl dɩ la nɩɩ a kaa tɩŋ?’

¹³ Ba bɩ mʋgʋ-balɩŋ cholo ma nɛ hɛ ma sɩ jaŋ bʋl, ‘Kʋbɛɛ nɛ jaŋ chol lee-la a kɛmba kaa kʋ bʋl dɩ la nɩɩ a kaa tɩŋ?’

¹⁴ Ŋɩɩ dee wɩalɩŋ nagɛ, ba kpagɛma nɛ kɩŋkɛŋ. Ma jɩmba nɛ woruŋ a jaŋ wuo toba ma.

¹⁵ Má bee na, jɩnɩŋ mɩ joŋ mɩɩsɩŋ arɩ dʋa, a joŋ sʋʋŋ arɩ wɩalɩŋ sɩ jaŋ cheima nɛ, a bil ma sɩpaaŋ.

¹⁶ Jɩnɩŋ, mɩ bʋlaa pɩma, má cho ma TƖƖNA Wɩa a to wɩalɩŋ ʋ sɩ daga, ʋ niiriŋ arɩ wombie-la ʋ sɩ bile. Ŋɩɩ nɛ ma jaŋ kɛŋ mɩɩsɩŋ dɩ ma TƖƖNA Wɩa pɛ ma lɛ dɩ ma pʋŋ woruŋ tintee-la ma sɩɩ mʋ dɩ ma tɩɩ lɛ.

¹⁷ Ama dɩ ma nɛ vɩa ma TƖƖNA a joŋ harɩŋ yɩaʋ, aŋ leŋ dɩ vesiŋ lɛrɛma dɩ ma mʋ kpʋkpaarɛba,

¹⁸ mɩ jaŋ chaasa bʋla pɩma, ʋ jaŋ cheima. Ma bɩ jaŋ hɔŋ tintee-la ma sɩ jaŋ chol Jɔdaŋ fuo-la a tɩɩ lɛ a dieni.

¹⁹ Jɩnɩŋ mɩ yɩrɛ wɩa-nyuŋ arɩ tinteeŋ ba pɛ na nɛ arɩ mɩ joŋ mɩɩsɩŋ arɩ sʋʋŋ nɛ a bil ma sɩpaaŋ, a bɩra joŋ wɩalɩŋ ma sɩ jaŋ ŋaa dɩ La TƖƖNA pɛ ma lɛ arɩ wɩalɩŋ ma sɩ jaŋ ŋaa dɩ ʋ ŋmɩɛsa hɛ ma lɛ a bil ma sɩpaaŋ dɩ ma bagɩsa lɩɩsɛ. Ŋɩɩ wɩaa má lɩɩsɛ mɩɩsɩŋ, dɩ ma dɩ ma biiriŋ kala kɛŋ mɩɩsɩŋ.

²⁰ Má cho ma TƖƖNA Wɩa a tuto ʋ niiŋ a kɛŋ ma tɩtɩa mɛrɛ ʋ lɛ. La TƖƖNA nɛ ŋaa ma mɩɩsɩŋ. Ʋ jaŋ leŋ dɩ ma hɔŋ tintee-la lɛ a dieni, arɩ ʋ sɩ hɛ niiŋ pɩ ma naabalɩmaba Abɩraham, Aɩzɩk, arɩ Jekɔb ŋɩɩ.”