MOSIS BƖRA WULLI WƖA WOMBIIŊ 27 - WƖA TENIŊ

Ba saa Wɩɩsʋllɩ koruŋ peel-la ba sɩɩ yɩrɛ Ɛbal lɛ

¹ Mosis arɩ Iziral tɩŋŋaa nɩhɩasɩŋ bʋla pɩ ba nɩaa, “Má to wɩalɩŋ kala mɩ sɩ joŋo dagɛma jɩnɩŋ.

² Dɩ ma nɛ chol Jɔdaŋ fuo-la a mʋ tintee-la ma TƖƖNA Wɩa sɩ jaŋ joŋo pɩma, má paa tabɩaa sɩ jalɩa a pɛ, a taarɛ.

³ Má ŋmʋnsɛ Wɩa niiriŋ deemba kala a hɛ ba lɛ dɩ ma nɛ jʋʋ tintee-la sɩ sɩma a kɛŋ kɩaa woruŋ, tintee-la ma TƖƖNA, ma naabalɩmaba Wɩa sɩ hɛ niiŋ arɩ ʋ jaŋ joŋo pɩma.

⁴ Dɩ ma nɛ chol Jɔdaŋ fuo-la, má pɛ tabɩa-la peel-la ba sɩɩ yɩrɛ Ɛbal lɛ a taarɛ arɩ mɩ sɩ dagɛma ŋɩɩ jɩnɩŋ.

⁵ Má kɛŋ tabɩaa a saa Wɩɩsʋllɩ koruŋ nɩmɛ a pɩ ma TƖƖNA Wɩa. Má sɩ́ tɩntɩnnɩ kʋŋkala sɩ ŋaa hɔɔŋ kaa digi tabɩa-la.

⁶ Ʋ maga dɩ má kɛŋ tabɩa-la ba sɩ bɩ saa nɛ a saa ma TƖƖNA Wɩa koruŋ, a ŋaa kʋnyɩgaa Wɩɩsʋlʋŋ ʋ nyuŋ a pɩ ma TƖƖNA Wɩa.

⁷ Má kpʋ ma pʋsʋŋ a sʋl nɩɩ-magɛ dɔŋɔ Wɩɩsʋlʋŋ nɩmɛ a diiba aŋ gbigbieli ma TƖƖNA Wɩa sɩpaaŋ.

⁸ Má ŋmʋnsɛ niiri-la hɛ tabɩa-la ma sɩ taara lɛ dɩ ba chaasa lɩɩ woruŋ.”

Ba jɩl peel-la ba sɩɩ yɩrɛ Ɛbal a kalɩbɛ

⁹ Ŋɩɩ nɛ Mosis arɩ Levi doho Wɩɩsʋllɩ sɩpaalaaraa bʋl wɩaa pɩ Iziral tɩŋŋaa a bʋl, “Má kɛŋ goŋ aŋ jegile nɩɩ. Lɛɛlɛ ma ŋaa ma TƖƖNA Wɩa nɩaa nɛ,

¹⁰ ŋɩɩ wɩaa, má jegile nɩɩ ma TƖƖNA Wɩa teeŋ, a to ʋ niiŋ arɩ wɩalɩŋ mɩ sɩ dagɛma jɩnɩŋ.”

¹¹ Tapʋlɩɩ-la tɩtɩa Mosis bɩra bʋla pɩ nɩalɩŋ:

¹² “Dɩ ma nɛ chol Jɔdaŋ fuo-la, doho doho deemba nɛ maga dɩ ba jɩl peel-la ba sɩɩ yɩrɛ Gɛrɩzɩm a sʋl Wɩa pɩ ma Iziral tɩŋŋaa. Simioŋ doho nɩaa, Levi doho nɩaa, Juda doho nɩaa, Ɩsaka doho nɩaa, Josɛf doho nɩaa arɩ Bɛnjamɩŋ doho nɩaa.

¹³ Dosunuŋ deemba ma nɛ jaŋ jɩl peel-la ba sɩɩ yɩrɛ Ɛbal a kalɩbɛ. Rubiŋ doho, Gad doho nɩaa, Asa doho nɩaa, Zebuluŋ doho nɩaa, Daŋ doho nɩaa arɩ Nafɩtalɩ doho nɩaa.

¹⁴ Levi doho nɩaa jaŋ heeli a bʋl wɩaa deemba:

¹⁵ ‘La TƖƖNA ŋmɩaŋ jaŋ dii nʋʋkala sɩ kɛŋ daaŋ koo tɩɛrɩŋ koo hɔɔŋ a ŋaa tɔmʋŋ a lʋara kpʋkpaarɛ. La TƖƖNA ka kɩsɛ ŋɩɩ nɛ.’ Nɩalɩŋ kala jaŋ laa bʋl, ‘Amɩɩ.’

¹⁶ ‘La TƖƖNA ŋmɩaŋ jaŋ dii nɩɩ-la kala sɩ bɩ ʋ nyɩmma arɩ ʋ naaŋ ka zil.’ Nɩalɩŋ kala jaŋ laa bʋl, ‘Amɩɩ.’

¹⁷ ‘La TƖƖNA ŋmɩaŋ jaŋ dii nɩɩ-la kala sɩ kɛŋ ʋ dɩ ʋ naambie tinteeŋ bʋa magɩlɩŋ gɩrɩmɛ.’ Nɩalɩŋ kala jaŋ laa bʋl, ‘Amɩɩ.’

¹⁸ ‘La TƖƖNA ŋmɩaŋ jaŋ dii nɩɩ-la kala sɩ dagɛ nyʋlɩma ʋ yeŋŋi.’ Nɩalɩŋ kala jaŋ laa bʋl, ‘Amɩɩ.’

¹⁹ ‘La TƖƖNA ŋmɩaŋ jaŋ dii nɩɩ-la kala sɩ gʋrɛ nʋhʋɔraa, biisinsiŋ arɩ yo-haalaa.’ Nɩalɩŋ kala jaŋ laa bʋl, ‘Amɩɩ.’

²⁰ ‘Nɩɩ-la kala sɩ kɛŋ ʋ nyɩmma haala pɩŋ, hɩɩsɛ ʋ nyɩmma nɛ, La TƖƖNA ŋmɩaŋ jaŋ dii tɩɩna.’ Nɩalɩŋ kala jaŋ laa bʋl, ‘Amɩɩ.’

²¹ ‘La TƖƖNA ŋmɩaŋ jaŋ dii nɩɩ-la kala sɩ kɛŋ pʋna pɩŋ.’ Nɩalɩŋ kala jaŋ laa bʋl, ‘Amɩɩ.’

²² ‘La TƖƖNA ŋmɩaŋ jaŋ dii nɩɩ-la kala sɩ kɛŋ ʋ dɩhaala pɩŋ, dɩ ʋ nyɩmma tolo nɛ koo dɩ ʋ naaŋ tolo nɛ.’ Nɩalɩŋ kala jaŋ laa bʋl, ‘Amɩɩ.’

²³ ‘La TƖƖNA ŋmɩaŋ jaŋ dii nɩɩ-la kala sɩ kɛŋ ʋ hɩɩlɩ-haala pɩŋ.’ Nɩalɩŋ kala jaŋ laa bʋl, ‘Amɩɩ.’

²⁴ ‘La TƖƖNA ŋmɩaŋ jaŋ dii nɩɩ-la kala sɩ lʋara kpʋ ʋ naambie.’ Nɩalɩŋ kala jaŋ laa bʋl, ‘Amɩɩ.’

²⁵ ‘La TƖƖNA ŋmɩaŋ jaŋ dii nɩɩ-la kala sɩ laa kpalaa aŋ kpʋ nʋʋ sɩ bɩ wɩɩ cheye.’ Nɩalɩŋ kala jaŋ laa bʋl, ‘Amɩɩ.’

²⁶ ‘La TƖƖNA ŋmɩaŋ jaŋ dii nɩɩ-la kala sɩ vɩa dɩ ʋ to Wɩa niiriŋ deemba arɩ wɩalɩŋ ʋ sɩ daga.’ Nɩalɩŋ kala jaŋ laa bʋl, ‘Amɩɩ.’