Biblia Todo Logo
Bìoball air-loidhne

- Sanasan -


MOSIS BƖRA WULLI WƖA WOMBIIŊ 26 - WƖA TENIŊ


Kʋdii-falaa arɩ kpaalɩŋ fii-la kʋbala sɩ ŋaa La TƖƖNA kʋa

1 Dɩ ma nɛ jʋʋ tintee-la ma TƖƖNA Wɩa sɩ jaŋ joŋo pɩma dɩ ʋ ŋaa ma kʋŋ a hɔŋ nɩmɛ,

2 ma kʋŋkala maga ʋ ŋaa ʋ kʋdii falaa ʋ sɩ pɛrɛ tintee-la lɛ a hɛ sime tʋɔŋ, a kaa mʋ lee-la ma TƖƖNA Wɩa sɩ jaŋ dagɛ dɩ ma zizilu nɩmɛ.

3 Má bʋla pɩ Wɩɩsʋllɩ sɩpaalaara sɩ hɛ nɩmɛ aa tɩŋ tɩntɩŋŋaa bʋa-la lɛ, “Jɩnɩŋ mɩɩ chɛ dɩ mɩ dagɛ a pɩ mɩ Tɩɩna Wɩa arɩ mɩ jʋʋ tintee-la ʋ fa sɩ hɛ niiŋ pɩ la naabalɩmaba arɩ ʋ jaŋ joŋo pɩla nɛ.”

4 Wɩɩsʋllɩ sɩpaalaara jaŋ laa sime-la arɩ kʋdiile-la ŋ nɩsɩŋ lɛ a joŋo bil ŋ Tɩɩna Wɩa koru-la sɩpaaŋ.

5 La TƖƖNA Wɩa sɩpaaŋ, ŋ jaŋ bɩra bʋl wɩaa deemba: “Mɩ nyɩmma fa ŋaa Siiria tɩɩna nɛ, a gɔllɔɔ baarɛ, ʋ doho nɩaa fa bɩ yʋgɛ. Ŋɩɩ nɛ ba mʋ hɔŋ Ijipiti tinteeŋ lɛ, nɩmɛ nɛ ba pʋŋa yʋgɛ a ŋaa tintee sɩ kɛŋ yɩrɩ-balɩŋ arɩ doluŋ.

6 Ama Ijipiti tɩŋŋaa dɔgɩsɛla nɛ nɩmɛ a leŋ la tɩŋ tɩntɩŋ-duoruŋ a na hɛɛŋ.

7 Ŋɩɩ nɛ la ŋmoo niiŋ a pɩ La TƖƖNA sɩ ŋaa la naabalɩmaba Wɩa, ʋ nɩɩ la bunso a na ŋɩɩ ba sɩɩ dɔgɩsɛla, hɛɛ-la la sɩɩ na arɩ ŋɩɩ ba sɩ nyagɛla bil.

8 Ŋɩɩ nɛ La TƖƖNA kɛŋ ʋ doluŋ a ŋaa wʋmagɩlaa arɩ wʋkpuŋkperisiŋ arɩ wɩalɩŋ sɩ kɛŋ fawʋllʋŋ a kɛnla kaa lɩɩ Ijipiti tinteeŋ lɛ.

9 Ʋ kɛnla kaa kɔ daha nɛ, a joŋ tinteeŋ deeŋ sɩ sɩma a kɛŋ kɩaa woruŋ a pɩla.

10 Ŋɩɩ nɛ lɛɛlɛ mɩ kɛŋ tintee-la La TƖƖNA sɩ joŋo pɩmɛ kʋdii falaa mɩ sɩ pɛrɛ a kaa kɔ dɩ mɩ pʋ.” Ŋ sɩ bʋl ŋɩɩ dɛrɛ, joŋ sime-la a bil ŋ Tɩɩna Wɩa sɩpaaŋ aŋ kpirimi ʋ sɩpaaŋ a chʋɔlʋ.

11 Ŋ dɩ Levi doho nɩaa arɩ nɩwogusu-la kala sɩ hɛ ma tʋɔŋ maga dɩ má gbieli ma TƖƖNA Wɩa sɩpaaŋ nɛ, a tɩŋ kʋzɔmɔ-la kala ʋ sɩ joŋo pɩ ŋ dɩ ŋ dɩa nɩaa.

12 Ma sɩ yie kɛŋ ma kɩaa a kpaa leree fii a joŋ kʋbala-la a pɩ La TƖƖNA jɩ-tori lɛ, má joŋo pɩ Levi doho nɩaa, nɩwogusuŋ, biisinsiŋ arɩ yo-haala-la kala sɩ hɛ ma tasɩŋ lɛ dɩ ba dii a vɔgɛ.

13 Ŋ jaŋ bʋla pɩ ŋ TƖƖNA Wɩa, “Mɩ dɩa lɛ, mɩ lɩɩsɛ kpaal-la kala sɩ ŋaa ŋ kʋa nɛ a joŋo pɩ Levi doho nɩaa, nɩwogusuŋ, biisinsiŋ arɩ yo-haalaa, arɩ ŋ sɩ dagɛ ŋɩɩ. Mɩ bɩ ŋ niiŋ wɩaa vɩa, mɩ bɩ ba kʋbala ma yʋa.

14 Mɩ bɩ ŋ kpaal-la mʋa ma die mɩ sɩɩ yel yoho, mɩ bɩ mʋa ma lɩɩsa bʋa-la lɛ mɩ sɩ kɛŋ disiniŋ, mɩ bɩra bɩ ba mʋa ma joŋo a ŋaa Wɩɩsʋlʋŋ pɩ lɛlɛɛ. Mɩ to ŋ-na mɩ TƖƖNA Wɩa niiŋ nɛ, a ŋaa wɩalɩŋ kala ŋ sɩ dagɛmɛ.

15 Ŋ sɩ hɛ ŋ jaŋ lɛ, ŋ dɩ-jʋʋlɩɩ-la sɩ bɩ disiniŋ kɛnɛ, gʋra bee na ŋ nɩaa Iziral tɩŋŋaa a pɛ la lɛ aŋ wasɛ tintee-la sɩ sɩma a kɛŋ kɩaa woruŋ, dɩ ʋ wasa zɔŋ woruŋ arɩ ŋ sɩ hɛ niiŋ ŋɩɩ a pɩ la naabalɩmaba.”


Má to La TƖƖNA niiriŋ

16 Ŋɩɩ nɛ Mosis bɩra bʋl, “Jɩnɩŋ ma TƖƖNA Wɩa bʋlaa pɩma dɩ ma tuto ʋ niiriŋ, ʋ wombiee arɩ wɩalɩŋ ʋ sɩ daga nɛ, ŋɩɩ wɩaa, má fɩɛlɛ ma sɩaa a kɛŋ ma tʋɔŋ arɩ ma wɩɩwɩɩ kala a toba.

17 Jɩnɩŋ ma daga arɩ ma TƖƖNA nɛ ma Wɩa, ma jaŋ sɛyʋ a to ʋ wombiee, ʋ niiriŋ arɩ wɩalɩŋ ʋ sɩ daga.

18 Jɩnɩŋ La TƖƖNA daga arɩ ma ŋaa ʋ nɩaa nɛ. Ma nɛ ŋaa ʋ nɩcholoo arɩ ʋ sɩ hɛ niiŋ ŋɩɩ pɩma, ʋ saa sɩ ʋ maga dɩ ma to wɩalɩŋ kala ʋ sɩ daga.

19 Ʋ daga arɩ ʋ jaŋ leŋ dɩ ma nɛ kɩɩ tinteyee kala ʋ sɩ ŋaa, a kɛŋ yɩrɩŋ dɩ nɩaa bɩbɛsɛ ma lɛ. Ʋ jaŋ leŋ dɩ ma ŋaa tʋɔpʋl tɩmma ʋ-na ma TƖƖNA Wɩa teeŋ arɩ ʋ sɩ hɛ niiŋ pɩma ŋɩɩ.”

©Ghana Institute of Linguistics Literacy and Bible Translation 1984, 2014

Wycliffe Bible Translators, Inc.
Lean sinn:



Sanasan