MOSIS BƖRA WULLI WƖA WOMBIIŊ 25 - WƖA TENIŊ

¹ Dɩ nɩaa balɩa nɛ kɛŋ kaalɛrɛ, a kɛŋ wɩɩ-la mʋ sarɩya dɩ-diiliŋ, sarɩya diiree maga dɩ ba dii sarɩya-la a joŋ cheeriŋ a pɩ nɩɩ-la kɩaa sɩ bɩ sɩŋ, aŋ bʋla pɛ nɩɩ-la kɩaa sɩ sɩma lɛ.

² Dɩ nɩɩ-la sɩ laa cheeriŋ nɛ maga dɩ ba vɩɩrʋ, sarɩya diiru-la maga dɩ ʋ leŋ dɩ nɩɩ-la tuu pɩŋ ʋ sɩpaaŋ nɛ, dɩ ba vɩɩrʋ a magɛ ŋɩɩ ʋ wɩɩŋ sɩ maga.

³ Kpaasa naansɩɩŋ mahɩŋ balɩa nɛ maga dɩ ʋ laa. Ʋ bɩ maga dɩ ʋ kieli ŋɩɩ lɛ. Dɩ ʋ nɛ vɩɩrʋ kɩɩ ŋɩɩ, ʋ yaraa jaŋ faasa fol dɩ ʋ nagɛ ʋ ŋaa nɩtɔɔ nɛ.

⁴ Dɩ nɛŋ nɩɩ ŋmoo mɩaa, ʋ bɩ maga dɩ ŋ vɔɔ ʋ niiŋ tɔ.

⁵ Dɩ naambiiriŋ nɛ hɛ nɩmɛ dɩ dɔŋɔ sʋʋ aŋ bɩ bii lʋla, ʋ haala bɩ maga dɩ ʋ lɩɩ dɩa-la lɛ a mʋ jaa baal dɔŋ. Ʋ bala-la naambii nɛ maga dɩ ʋ joŋ yo-haal-la a jaa dɩ ʋ ŋaa ʋ haala.

⁶ Dɩ ba nɛ lʋl ba bii-bumbuŋ dɩ ʋ ŋaa hambolibie, ʋ nɛ jaŋ chɩŋ ʋ naambile sɩ sʋba nyuŋ lɛ dɩ ʋ yɩrɩŋ sɩ́ Iziral tinteeŋ lɛ lɛl.

⁷ Dɩ ʋ naambile nɛ bɩ chɛ dɩ ʋ joŋ yo-haal-la jaa, haal-la maga dɩ ʋ mʋ ba taŋ boiŋ niiŋ nɩhɩasɩŋ sɩpaaŋ a bʋla pɩba, “Mɩ bala naambie ka chɛ ʋ naambile sɩ sʋba yɩrɩŋ lɛl nɛ Iziral tinteeŋ lɛ. Ʋ bɩ chɛ ʋ jommi jaa dɩ la lʋl biiriŋ dɩ ba chɩŋ ʋ naambile nyuŋ.”

⁸ Ʋ taŋ nɩhɩasɩŋ jaŋ yɩrʋ a bʋl wɩaa pʋ. Dɩ ʋ nɛ ha vɩa aŋ bʋl, “Mɩ bɩ jaŋ jaa haal-la,”

⁹ yo-haal-la jaŋ mʋ ʋ bala naambile teeŋ nɩhɩasɩ-la sɩpaaŋ a kɛŋ baal-la nɛntɛbɩŋ dɔŋɔ lɩɩsɛ aŋ tʋ nantʋɔrʋŋ hɛ ʋ sɩaa lɛ aŋ bʋl, “Ŋ-la nɛ maga dɩ ba ŋaa baal-la sɩ vɩa dɩ ʋ joŋ ʋ naambie yo-haala jaa dɩ ba lʋl biiriŋ dɩ ba chɩŋ ʋ naambie nyuŋ lɛ.”

¹⁰ Iziral tinteeŋ kala lɛ, baal-la biiriŋ nɛ ba jaŋ yɩyɩrɛ nɛntɛŋ-bala doho nɩaa.

¹¹ Dɩ baalaa balɩa nɩɩ loo, dɩ dɔŋɔ haala kɔ dɩ ʋ pɛ ʋ bala lɛ a kɛŋ baal-la dɔŋɔ luroo lɛ,

¹² má kɛŋ haal-la a ta ʋ nɩsɩŋ keri, má sɩ́ ʋ nenige fá.

¹³ Má sɩ́ sanɩa balɩa kɛŋ dɩ dɔŋɔ yuŋŋie kɩɩ dɔŋɔ.

¹⁴ Sɩ́ sanɩa balɩa kɛŋ ŋ dɩa lɛ dɩ dɔŋɔ yʋgɛ, ka dɔŋɔ muuri.

¹⁵ Ʋ maga dɩ ma kɛŋ sanɩaba la sɩ maga a mɩmagɩsɛ kɩaa, dɩ ŋɩɩ leŋ dɩ ma wuo hɔŋ tintee-la ma TƖƖNA Wɩa sɩ jaŋ joŋo pɩma lɛ a dieni.

¹⁶ Ma TƖƖNA Wɩa bɛrɛ nɩalɩŋ sɩɩ gʋrɛ nɩaa nɛ.

¹⁷ Má liise yi wɩɩ-la Amalɛk tɩŋŋaa sɩ ŋaa ma lɛ, ma sɩ lɩɩ Ijipiti tinteeŋ kʋkɔ.

¹⁸ Bʋa-la lɛ ma kala fa sɩ lɔlɔ a pʋgʋmɛ, ba bɩ Wɩa fá aŋ kʋ lɩɩ chemma wombiiŋ lɛ a kɛrɛ yuo nɩalɩŋ fa sɩ nɛrɩgɛ tuto ma harɩŋ.

¹⁹ Dɩ ma TƖƖNA Wɩa nɛ leŋe dɩ ma na wiese ma dʋndɔmɔ-la kala sɩ gollima chu nɩsɩŋ lɛ, tintee-la ʋ sɩ jaŋ joŋo pɩma dɩ ʋ ŋaa ma kʋŋ lɛ, má kpʋ Amalɛk tɩŋŋaa doho kala dɩ ba yɩrɩŋ lɛl dʋnɩa lɛ. Má sɩ́ wɩɩŋ deeŋ yʋ.