MOSIS BƖRA WULLI WƖA WOMBIIŊ 24 - WƖA TENIŊ1 Dɩ baal nɛ jaa haal, ŋɩɩ harɩŋ lɛ dɩ ʋ tʋɔŋ lɩɩ haal-la, dɩ baal-la chɩchɛ dɩ ʋ vɩa haal-la, a ŋmʋnsɛ teniŋ a pɩ haal-la aŋ kiru ta ʋ lɩɩ ʋ dɩa lɛ, 2 haal-la sɩ lɩa ŋɩɩ, dɩ ʋ nɛ mʋ a jaa baal dɔŋ, 3 dɩ baal-la ma bɩra ŋmʋnsɛ teniŋ a pɩ haal-la aŋ vɩaʋ a kiru ʋ lɩɩ ʋ dɩa lɛ, koo dɩ baal-la nɛ sʋba, 4 ʋ bala-la fa sɩ laa sɩpaaŋ a jaaʋ aŋ kiru ta bɩra bɩ maga dɩ ʋ jaaʋ, bɛɛ wɩaa haal-la kɛŋ disiniŋ nɛ. Ŋɩɩ kɩsɛ nɛ La TƖƖNA teeŋ. Má sɩ́ disiniŋ ŋaa hɛ tintee-la ma TƖƖNA Wɩa sɩ jaŋ joŋo pɩma dɩ ʋ ŋaa ma kʋŋ lɛ. 5 Dɩ baal nɛ jaa ha-falɩŋ, ʋ bɩ maga dɩ ma leŋ dɩ ʋ mʋ laalɩŋ koo a pʋ tɩntɩmɩɩ-dɔŋ kala. Ʋ maga dɩ ʋ hɔŋ dɩa lɛ nɛ jɩna, a ŋaa wɩalɩŋ sɩ jaŋ leŋ dɩ ʋ haal-la tʋɔŋ tɔrɛ. 6 Nʋʋkala pʋpɔ dɩ ʋ sɩ́ ʋ dɔŋɔ tɩɩna nɔmʋŋ koo nɔŋ-biiŋ joŋ a tɩŋ chɩmɩŋ wɩaa, dɩ ŋ nɛ ŋaa ŋɩɩ, ʋ naga tɩɩna mɩɩsɩŋ nɛ ŋŋ chɛ ŋ lɩɩsɛ ŋɩɩ. 7 Dɩ Iziral tɩɩna kala nɛ gaa kɛŋ ʋ naambie a leŋ ʋ ŋaa ʋ yomo aa dɔgʋsʋ koo a yallʋ, ʋ maga dɩ má kpʋ gaarʋ-la. Ʋ maga dɩ ma giri wʋbɔmʋŋ deeŋ ta nɛ ma tʋɔŋ. 8 Dɩ dayalɩbɩŋ nɛ jʋʋ ma jaŋ, má fɩɛlɛ ma sɩaa a to Levi doho sɩ ŋaa Wɩɩsʋllɩ sɩpaalaaraa niiŋ. Wɩalɩŋ kala mɩ sɩ dagɛba, má fɩɛlɛ ma sɩaa a toba. 9 Má liise yi wɩɩ-la ma TƖƖNA Wɩa sɩ ŋaa Mɩrɩam lɛ wombiiŋ lɛ, bʋa-la lɛ ma sɩ lɩɩ Ijipiti tinteeŋ lɛ. 10 Dɩ ŋ nɛ joŋ kʋŋkala a chɩchɩŋ ŋ naambie, ʋ bɩ maga dɩ ŋ jʋʋ ʋ dɩa a joŋ kʋ-la ʋ sɩɩ chɛ dɩ ʋ joŋo bil chɩŋ-la bʋbʋɔŋ. 11 Ʋ maga dɩ ŋ chɩŋ jeeŋ harɩŋ nɛ, ka dɩ ʋ tɩtɩa jʋʋ a joŋ kʋ-la ʋ sɩ jaŋ joŋo bil chɩŋ-la bʋbʋɔŋ a kaa kʋ lɩɩ pɩŋ. 12 Dɩ ʋ nɛ ŋaa summu aŋ joŋ ʋ gɛrɩŋ a bil chɩŋ-la bʋbʋɔŋ a pɩŋ, sɩ́ leŋe dɩ gɛrɩ-la chʋa ŋ teeŋ. 13 Ʋ maga dɩ ŋ kɛŋ ʋ gɛrɩ-la mʋ pʋ nɛ, ka dɩ wɩa-na jʋʋ, dɩ ʋ kaa tɔ ʋ tɩtɩa. Ʋ jaŋ lɔllʋŋ, dɩ ŋ Tɩɩna Wɩa ma na arɩ tʋɔpʋl wɩɩ nɛ ŋ ŋaa ŋɩɩ. 14 Dɩ Iziral tɩɩna koo nɩwogusu-la sɩ hɛ ma tʋɔŋ kʋŋ nɛ ŋaa summu, a tɩma pɩpɩŋ ka dɩ ŋ titimu, pʋpɔ dɩ ŋ sɩ́ ʋ gʋrʋ. 15 Tapʋlɩɩ na-kala, joŋ ʋ time pʋ ka wɩa-na jʋʋ, bɛɛ wɩaa ʋ sɩ ŋaa summu ŋɩɩ, ʋ bɩ kʋŋkala kɛnɛ, time-la lɛ nɛ ʋ yɩɛlaa kala hɛ, dɩ ŋ nɛ vɩa, ʋ jaŋ yele pɩ La TƖƖNA, ŋɩɩ jaŋ ŋaa wʋbɔŋ a pɩŋ. 16 Dɩ nʋʋ bii nɛ ŋaa wʋbɔŋ, ʋ bɩ maga dɩ ba kpʋ ʋ nyɩmma a tɩŋ wɩɩ-la wɩaa, dɩ nyɩmma ma nɛ ŋaa wʋbɔŋ, ʋ bɩ maga dɩ ba kpʋ ʋ bie a tɩŋ wɩɩ-la ʋ sɩ ŋaa wɩaa. Nʋʋkala maga dɩ ba kpʋʋ a tɩŋ ʋ tɩtɩa wʋbɔmʋŋ ʋ sɩ ŋaa wɩaa nɛ. 17 Má sɩ́ nɩwogusuŋ arɩ biisinsiŋ gʋrʋ, koo dɩ ŋ nɛ joŋ kʋŋ a chɩŋ yo-haala, sɩ́ ʋ gɛrɩŋ laa bil chɩŋ-la bʋbʋɔŋ lɛ. 18 Má liise yi arɩ ma fa ŋaa yosi nɛ Ijipiti tinteeŋ lɛ, ma TƖƖNA Wɩa laama ta, a kɛmma lɩɩ nɩmɛ. Ŋɩɩ nɛ tɩɩ mɩ sɩ ma to wɩɩŋ deeŋ ŋɩɩ. 19 Dɩ ma nɩɩ ŋaa ma baga kɩaa, kɩalɩŋ ma sɩ gɛllɛ ta, má bɩra sɩ́ mɩɩra mʋ kuuni. Má lemba a pɩ nɩwogusuŋ, biisinsiŋ arɩ yo-haalaa. Ŋɩɩ jaŋ leŋ dɩ ma TƖƖNA Wɩa pɛ ma lɛ tɩntɩmɩɩ na-kala ma sɩɩ tɩŋ lɛ. 20 Dɩ ma nɩɩ tɔrɛ ma olif nɛnɛɛ, kɩalɩŋ ma sɩ gɛllɛ ta, má bɩra sɩ́ mɩɩra mʋ tɔrɛ, má lemba a pɩ nɩwogusuŋ, biisinsiŋ arɩ yo-haalaa. 21 Dɩ ma nɩɩ tɔrɛ girep nɛnɛɛ ma bagɩsɩŋ lɛ, kɩalɩŋ ma sɩ gɛllɛ ta, má bɩra sɩ́ mɩɩra mʋ tɔrɛ, má lemba a pɩ nɩwogusuŋ, biisinsiŋ arɩ yo-haalaa. 22 Má liise yi arɩ ma fa ŋaa yosi nɛ Ijipiti lɛ. Ŋɩɩ nɛ tɩɩ mɩ sɩ ma to wɩɩŋ deeŋ ŋɩɩ. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.