MOSIS BƖRA WULLI WƖA WOMBIIŊ 22 - WƖA TENIŊ

¹ Dɩ ŋ nɛ na ŋ naambie nɛŋ koo ʋ piese dɩ ʋ lɛlɛ, sɩ́ beŋ a nagɛ ŋ bɩ ʋ na, kɛŋ a kaa mʋ pʋ.

² Dɩ ŋ naambile nɛ bɩŋ kpaga, koo ŋ bɩ pʋna-la tɩɩna jɩŋ, kɛŋ pʋna-la kaa mʋ ŋ dɩa. Dɩ ŋ naambile nɛ chɛ pʋna-la kɔ, dɩ ŋ kaa pʋ.

³ Ŋɩɩ tɩtɩa nɛ maga dɩ ŋ ŋaa, dɩ ŋ naambie kakumo koo ʋ gɛrɩŋ koo ʋ kʋŋkala nɛ lɛlɛ. Sɩ́ vɩa ta.

⁴ Dɩ ŋ nɛ na ŋ naambie kakumo koo nɛŋ dɩ ʋ tel wombiiŋ lɛ, sɩ́ kiele bal. Pɛ ʋ lɛ dɩ ma kɛŋ pʋna-la chʋʋlɛ.

⁵ Haala bɩ maga dɩ ʋ laalɛ baalaa gɛnnɩŋ koo baala laalɛ haalaa gɛnnɩŋ. Ma Tɩɩna Wɩa bɛrɛ nɩalɩŋ kala sɩɩ ŋaa ŋɩɩ nɛ.

⁶ Dɩ ŋ nɛ na diibii-dɛlɛ tɩa nyuŋ wombiiŋ niiŋ koo tinteeŋ, dɩ ʋ pɛŋ halaa nyuŋ nɛ koo dɩ ʋ tiese nɛ, sɩ́ naaŋ-la arɩ ʋ biiriŋ kala paa.

⁷ Ŋ jaŋ wuo paa biiri-la aŋ leŋ ba naaŋ. Ŋɩɩ jaŋ leŋ dɩ wɩaa vɛŋ woruŋ a pɩŋ dɩ ŋ kɛŋ mɩɩ-duduoŋ.

⁸ Dɩ ŋ nɛ saa dɩɩ-falɩŋ a yuo, saa kɛrɛ golli lusu-la chu, dɩ nʋʋ sɩ́ lusu-la nyuŋ lɩɩ tel a sʋʋ dɩ ba joŋ cheeriŋ pɩŋ.

⁹ Dɩ ŋ nɛ kɛŋ girep tɩɩsɩŋ baga, sɩ́ kʋŋ dɔŋ joŋo duu hɛ tɩɩsɩ-la pɛgɩsɩŋ lɛ, dɩ ŋ nɛ ŋaa ŋɩɩ, ŋ jaŋ kɩkɩsɛ baga-la kɩalɩŋ kala.

¹⁰ Má sɩ́ kakumo arɩ nɛŋ kaa hɛ dɔŋɔ dɩ ba pɛrɛ.

¹¹ Má sɩ́ gɛrɩŋ ba sɩ kɛŋ gɛrɩpɛ fʋfʋlʋŋ arɩ pʋnaa yuo laalʋ.

¹² Má yɛrɛ jʋɔsaa hɛ ma gɛnnɩ-la ma sɩɩ laalʋ niipinee banɛsɛ kala lɛ.

Dɩ baala nɛ nyɩɛ wɩaa a pɩ ʋ haala arɩ ʋ bɩ hapuŋ ŋaa, ŋɩɩ ba sɩ jaŋ to

¹³ Dɩ baal nɛ jaa haala a kɛnʋ pɩŋ aŋ bɩra bɩ haal-la cho,

¹⁴ a chei haal-la yɩrɩŋ arɩ ʋ sɩ jaaʋ ʋ bɩ hapuŋ ŋaa,

¹⁵ dɩ ŋɩɩ nɛ ŋaa, haal-la nɩaa maga dɩ ba joŋ gɛrɩ-la ba sɩ jaa dɔŋɔ a kaa jɛrɛ pɩŋ. Dɩ chalɩŋ nɛ hɛ gɛrɩ-la lɛ nɛ jaŋ dagɛ arɩ ʋ ŋaa hapuŋ nɛ, dɩ ba kaa mʋ lee-la ba taŋ nɩhɩasɩŋ sɩɩ hilimu a dagɛba.

¹⁶ Haal-la nyɩmma jaŋ bʋla pɩba, “Mɩ joŋ mɩ tolo pɩ baala deeŋ ʋ jaa nɛ, ama lɛɛlɛ ʋ bɩra bɩ ʋ cho.

¹⁷ Ʋ chei ʋ yɩrɩŋ arɩ ʋ sɩ jaaʋ ʋ bɩ hapuŋ ŋaa, na kʋ-la sɩ daga arɩ mɩ tolo fa ŋaa hapuŋ nɛ.” Ba jaŋ kɛŋ gɛrɩ-la a jɛrɛ ba taŋ nɩhɩasɩŋ sɩpaaŋ dɩ ba na.

¹⁸ Nɩhɩasɩ-la sɩ na gɛrɩ-la ŋɩɩ, ba jaŋ kɛŋ ʋ bala-la a dɔgʋsʋ.

¹⁹ Ba jaŋ keri warɩpʋla zɔlɔ chɩmɩŋ pʋ dɩ ʋ time pɩ tolo-la nyɩmma, bɛɛ wɩaa ʋ chei Iziral tɩŋŋaa tolo sɩ ŋaa hapuŋ yɩrɩŋ nɛ. Tolo-la ha jaŋ ŋaa ʋ haal ʋ mɩɩsɩŋ kala lɛ, ʋ bɩ maga dɩ ʋ vɩaʋ.

²⁰ Dɩ wɩɩ-la ʋ bala-la sɩ bʋla ma nɛ ŋaa wʋtɩtɩɩ, dɩ kʋŋkala nɛ tuo sɩ jaŋ dagɛ arɩ haal-la ŋaa hapuŋ nɛ,

²¹ ŋɩɩ-na ba jaŋ kɛŋ tolo-la a mʋ ʋ nyɩmma dɩa boiŋ niiŋ, dɩ ʋ jaŋ baalaa yagʋ kpʋ arɩ tabɩaa, bɛɛ wɩaa hɩɩsɩ wɩɩ nɛ ʋ ŋaa ŋɩɩ Iziral kala lɛ, ʋ sɩ hɛ ʋ nyɩmma dɩa lɛ a bɩ bala jaa aŋ pɩpɩŋ baalaa. Ʋ maga dɩ ma giri wʋbɔmʋŋ deeŋ ta nɛ ma tʋɔŋ.

²² Dɩ baal nɛ kɛŋ ʋ dɔŋɔ haala pɩŋ dɩ ma kɛnʋ, ʋ maga dɩ ba kpʋ baal-la arɩ haal-la kala nɛ. Ʋ maga dɩ má giri wʋbɔmʋŋ deeŋ ta nɛ Iziral tinteeŋ lɛ.

²³ Dɩ nʋʋ nɛ sʋgɛ tolo taŋ lɛ dɩ ʋ jaa, dɩ baal dɔŋ kɛnʋ pɩŋ taŋ-la lɛ,

²⁴ ʋ maga dɩ ba kɛŋ baal-la sɩ kɛnʋ pɩŋ arɩ tolo-la kala a lɩɩ ba jaŋ lɛ, a yagɛba kpʋ arɩ tabɩaa, bɛɛ wɩaa jaŋ tʋɔŋ nɛ, ka tolo-la vɩa dɩ ʋ ŋmoo niiŋ dɩ ba laaʋ ta. Baal-la ma maga dɩ ʋ sʋʋ nɛ, bɛɛ wɩaa nʋʋ haal nɛ ʋ kaa pɩŋ. Ʋ maga dɩ má giri wʋbɔmʋŋ deeŋ ta nɛ ma tʋɔŋ.

²⁵ Dɩ baal nɛ gurigi tolo gɩrɩŋ lɛ nʋʋ sɩ sʋga dɩ ʋ jaa, baal-la dʋndʋŋa nɛ maga dɩ ba kpʋ.

²⁶ Ʋ bɩ maga dɩ ba ŋaa haal-la wɩɩkala, bɛɛ wɩaa ʋ bɩ wɩɩkala ŋaa chei sɩ maga dɩ ba kpʋʋ. Wɩɩŋ deeŋ naga nʋʋ sɩ mʋ gurigi ʋ naambie a kpʋʋ nɛ.

²⁷ Baal-la sɩ gurigi tolo-la nʋʋ sɩ sʋga dɩ ʋ jaa, ʋ jaŋ wuo ŋmoo niiŋ lee-la, ka nʋʋkala tuo dɩ ʋ laaʋ ta.

²⁸ Dɩ baal nɛ na hapuŋ nʋʋ ha sɩ bɩ sʋga a gurigu, dɩ ba nɛ kɛmba,

²⁹ baal-la maga dɩ ʋ tiŋ warɩpʋla mahɩŋ balɩa arɩ fii nɛ a pɩ tolo-la nyɩmma. Ʋ maga dɩ ʋ jaa tolo-la nɛ, bɛɛ wɩaa ʋ nɛ cheyu. Ʋ mɩɩsɩŋ kala lɛ ʋ bɩ jaŋ wuo vɩa tolo-la.

³⁰ Baal kala bɩ maga dɩ ʋ kɛŋ ʋ nyɩmma haala pɩŋ. Dɩ ʋ nɛ ŋaa ŋɩɩ, ʋ hɩɩsɛ ʋ nyɩmma nɛ.