MOSIS BƖRA WULLI WƖA WOMBIIŊ 21 - WƖA TENIŊ

Dɩ nʋʋ nɛ ba kpʋ, ka ba bɩ jɩŋ nɩɩ-la sɩ kpʋa, ŋɩɩ sɩ maga dɩ ba to

¹ Tintee-la ma TƖƖNA Wɩa sɩ jaŋ joŋo pɩma dɩ ʋ ŋaa ma kʋŋ lɛ, dɩ ma nɛ na nʋʋ dɩ ʋ sʋʋ pɩŋ pɔkɔŋ nyuŋ, ka ma bɩ jɩŋ nɩɩ-la sɩ kpʋʋ,

² ma nɩhɩasɩŋ arɩ sarɩya diiree maga dɩ ba mʋ lee-la sʋʋ-la sɩ pɩna, a magɩsɛ a na tasɩ-la sɩ golli lee-la, kʋ-la ʋ sɩ kpaga.

³ Taŋ-la sɩ kpagɛ sʋʋ-la, ʋ nɩhɩasɩŋ jaŋ kɛŋ napaha ba ha sɩ bɩ kaa tɩŋ aŋ ka,

⁴ a kaa tuu fuonaaŋ sɩ kɛŋ lɩɩŋ sɩɩ pɛllʋ ba ha sɩ bɩ lee-la pɛrɛ aŋ ka, a mɩlɩmɛ ʋ baŋŋaa bori.

⁵ Levi doho sɩ ŋaa Wɩɩsʋllɩ sɩpaalaaraa maga dɩ ba hɛ nɩmɛ, bɛɛ wɩaa ba nɛ ma TƖƖNA Wɩa lɩɩsɛ dɩ ba tɩtɩŋ ʋ tɩntɩŋŋaa, aŋ sʋl Wɩa pɩpɩma, a laa ma wɩaa jɩma pɩpɩma dɩ nɩaa nɛ kɛŋ kaalɛrɛ koo dɩ ba yuo dɔŋɔ.

⁶ Sʋʋ-la sɩ pɩna a kpagɛ taŋ-la, ʋ nɩhɩasɩ-la jaŋ sɔŋ ba nɩsaa a hɛ napaha-la ba sɩ kaa mʋ fuonaaŋ a mɩlɩmɛ ʋ baŋŋaa bori lɛ,

⁷ aŋ chaasa bʋl, “La dee bɩ baala deeŋ kpʋa, la bɩ nɩɩ-la sɩ kpʋʋ ma jɩŋ.

⁸ La TƖƖNA, joŋ wʋbɔmʋŋ deeŋ a chɛ ŋ nɩaa Iziral tɩŋŋaa, nɩalɩŋ ŋ sɩ kaa lɩɩ Ijipiti tinteeŋ lɛ, aŋ sɩ́ leŋe dɩ la laa cheeriŋ a tɩŋ baala deeŋ sɩ bɩ wɩɩŋ cheye sʋʋŋ bʋbʋɔŋ lɛ.” Dɩ ma nɛ ŋaa ŋɩɩ, ʋ jaŋ joŋo chɛma.

⁹ Má sɩ folo ŋaa ŋɩɩ La TƖƖNA sɩɩ chɛ, ma bɩra bɩ jaŋ laa cheeriŋ baal-la ba sɩ kpʋa bʋbʋɔŋ lɛ.

Haalaa ba sɩ yuo laalɩŋ kɛsɛ jaanɩŋ wɩaa

¹⁰ Dɩ laalɩŋ nɛ sii ma dɩ ma dʋndɔŋŋɔɔ pɛgɛ, dɩ ma TƖƖNA Wɩa pɛ ma lɛ dɩ ma yuo diiba aŋ kɛsɛ ba haalaa,

¹¹ dɩ hazɔŋ nɛ hɛ ba tʋɔŋ, dɩ ŋ na a cho dɩ ŋ jaa,

¹² ŋ jaŋ kɛŋ haal-la mʋ ŋ dɩa dɩ ʋ fʋŋ ʋ nyuŋ a kɩɛrɛ ʋ naanii-fʋlaa,

¹³ aŋ wuri gɛnnɩ-la ʋ fa sɩ laala, ka ma yuo kɛnʋ aŋ laalɛ gɛrɩ-wogusuŋ. Leŋ dɩ ʋ hɛ ŋ dɩa lɛ a yel ʋ nyɩmma arɩ ʋ naaŋ yoho chɛŋ-piliŋ. Ŋɩɩ harɩŋ, ma jaŋ wuo jaa dɔŋɔ.

¹⁴ Dɩ ʋ nɛ kʋ magɛ bʋa dɔŋ dɩ ŋ bɩra bɩ ʋ cho, ŋ jaŋ wuo leŋ dɩ ʋ mʋ lee-kala ʋ sɩɩ chɛ. Ŋ bɩ maga dɩ ŋ joŋu yallɛ arɩ yomo, bɛɛ wɩaa ŋ kɛnʋ ŋaa haal nɛ aŋ ka.

Kpaal-la sɩ maga dɩ hambolibii-hɩaŋ laa

¹⁵ Dɩ baal nɛ kɛŋ haalaa balɩa, a cho dɔŋɔ a kɩɩ dɔŋɔ, dɩ haala-la balɩa kala lʋl hambolibiisiŋ, dɩ haal-la ʋ sɩ bɩ faasa cho hambolibie nɛ ŋaa ʋ bii-hɩaŋ,

¹⁶ dɩ ʋ nɩɩ chɛ dɩ ʋ kɛŋ ʋ dʋa kpaa ʋ biiri-la, ʋ bɩ maga dɩ ʋ joŋ ʋ bii-hɩaŋ-la kpaalɩŋ pɩ ʋ hachooluŋ bie, aŋ vɔŋ haal-la ʋ sɩ bɩ faasa cho bie.

¹⁷ Ʋ maga dɩ ʋ kɛŋ dʋa-la kpaa dɩ kʋhɩaŋ kɩaa kɩɩ kʋbie kɩaa naansɩɩŋ bʋlɩa. Bile nɛ ŋaa ʋ nyɩmma doluŋ, ʋ maga dɩ ʋ laa bii-hɩaŋ kpaalɩŋ.

Ŋɩɩ sɩ maga dɩ ba ŋaa hambolibii-nyu-duo tɩɩna lɛ

¹⁸ Dɩ baal arɩ ʋ haala nɛ kɛŋ ba bii, dɩ bile kɛŋ nyuduoŋ a bɩ ba niiŋ ka nɩɩ, dɩ ba dagʋ a lɔl,

¹⁹ ʋ nyɩmma arɩ ʋ naaŋ maga dɩ ba kɛŋ bile mʋ ba jaŋ nɩhɩasɩŋ sɩpaaŋ lee-la ba sɩɩ hilimu.

²⁰ Ba jaŋ bʋla pɩ nɩhɩasɩ-la, “La bie deeŋ ŋaa nyu-duo tɩɩna nɛ, ʋ bɩ la niiŋ wɩaa ka nɩɩ, a chichei moribiee aŋ pɛ ŋaa sɩ-nyʋarʋ ma.”

²¹ Baala-la kala sɩ hɛ ʋ taŋ-la lɛ maga dɩ ba yagʋ kpʋ nɛ arɩ tabɩaa, a lɩɩsɛ wʋbɔŋ-la ta ma tʋɔŋ. Iziral tɩŋŋaa kala jaŋ nɩɩ wɩɩ-la dɩ fawʋllʋŋ kɛmba.

Wombie-la ba sɩ bile dɔnsʋŋ

²² Dɩ nʋʋ nɛ chaasa ŋaa wʋbɔŋ dɩ ma kpʋʋ a joŋo sagɛ tɩa nyuŋ,

²³ ʋ bɩ maga dɩ ma leŋ dɩ ʋ sagɛ nɩmɛ dɩ taŋ pʋl. Ʋ maga dɩ ma hugu tapʋlɩɩ-la tɩtɩa nɛ, bɛɛ wɩaa Wɩa ŋmɩɛsa hɛ nɩɩ-la kala kʋsʋʋŋ sɩ sagɛ tɩa nyuŋ nɛ. Ʋ bɩ maga dɩ ma ŋaa disiniŋ a hɛ tintee-la ma TƖƖNA Wɩa sɩ joŋo pɩpɩ ma dɩ ʋ ŋaa ma kʋŋ lɛ.