MOSIS BƖRA WULLI WƖA WOMBIIŊ 2 - WƖA TENIŊ

Iziral tɩŋŋaa baarɛ tintee-hɩlɩŋ lɛ

¹ Ŋɩɩ nɛ la sii a mɩɩrɛ harɩŋ a to tintee-hɩlɩɩ-la dɩɩrɩŋ a mʋmʋ Mʋgʋ-fɩaŋ arɩ La TƖƖNA sɩ dagɛ ŋɩɩ. Ŋɩɩ nɛ la baarɛ a golli Ɛdɔm tintee-la peelee sɩ yʋga a dieni.

² Ŋɩɩ nɛ La TƖƖNA bʋla pɩmɛ,

³ “Ma baara golli tintee-la peelee sɩ yʋga a dieni nɛ, má mɩɩrɛ a to wɩɩpɔsʋŋ nagʋa dɩɩrɩŋ.

⁴ Bʋl wɩaa deemba pɩ nɩalɩŋ: Ma ka mʋa ka dɩ ma jʋʋ ma naambie Ɛsɔ doho nɩaa sɩ hɛ Ɛdɔm lɛ tinteeŋ. Dɩ ba nɛ na ma, fawʋllʋŋ jaŋ kɛmba, ŋɩɩ wɩaa má fɩɛlɛ ma yaraa.

⁵ Ma pɔ dɩ má sɩ́ ba kaa yuo laalɩŋ, bɛɛ wɩaa mɩ bɩ jaŋ joŋ ba tinteeŋ mʋapɩlɩɩ ma pɩma, bɛɛ wɩaa mɩ joŋ Ɛdɔm tinteeŋ kala a pɩ Ɛsɔ arɩ ʋ doho nɩaa nɛ.

⁶ Má tiŋ kʋdiile-la ma sɩ jaŋ dii arɩ lɩɩ-la ma sɩ jaŋ nyʋa tintee-la lɛ.”

⁷ Ma TƖƖNA Wɩa pɛ ma lɛ nɛ woruŋ ma tɩntɩmɩɩ-kala lɛ. Ʋ beŋ ma nyuŋ nɛ bʋa-la kala lɛ ma sɩɩ vɛŋ tintee-hɩlɩŋ deeŋ tʋɔŋ. Jɩsɩŋ mahɩŋ balɩa-la kala ma TƖƖNA Wɩa sɩ kɛmma baarɛ tintee-hɩl-jalɩŋ deeŋ lɛ, ʋ hɛ ma teeŋ nɛ, ma bɩ kʋŋkala chɛ ka.

⁸ Ŋɩɩ nɛ la joŋ wombii-la sɩ lɩɩ Ɛlaf arɩ Ɛzɩɔŋ-Geba a mʋ Mʋgʋ-sʋʋŋ a mʋ kieli la naambie Ɛsɔ doho nɩalɩŋ sɩ hɔŋ Ɛdɔm tinteeŋ lɛ, a leŋ wombii-la, aŋ to tintee-hɩlɩŋ wombii-la sɩɩ mʋ Mʋab tinteeŋ.

⁹ Ŋɩɩ nɛ La TƖƖNA bʋla pɩmɛ, “Má sɩ́ Mʋab tɩmma-la fugusu koo a kɛmba yuo laalɩŋ. Ba ŋaa Lɔt doho nɩaa nɛ. Mɩ bɩ jaŋ joŋ ba tintee-la mʋapɩlɩɩ ma a pɩma, bɛɛ wɩaa mɩ joŋ tabal-la ba sɩɩ yɩrɛ Aa a pɩ Lɔt arɩ ʋ doho nɩaa nɛ, dɩ ʋ ŋaa ba kʋŋ.”

¹⁰ Emi tɩŋŋaa nɛ fa hɔŋ Aa taŋ-la lɛ. Ba fa yʋgɛ nɛ woruŋ a ŋaa nɩduoru aŋ waa yi a nagɛ Anakɩ tɩŋŋaa.

¹¹ Anakɩ tɩmma-la yɩrɩŋ dɔŋɔ ma nɛ fa Refem tɩŋŋaa. Ama Mʋab tɩŋŋaa-na fa kɛmba yɩyɩrɛ Emi tɩŋŋaa nɛ.

¹² Hɔrɩ tɩŋŋaa nɛ fa hɔŋ Ɛdɔm tinteeŋ lɛ. Ŋɩɩ nɛ Ɛsɔ doho nɩaa mʋ yuo a kiriba, aŋ laa lee-la a hɔŋ arɩ Iziral tɩŋŋaa sɩ yuo kiri ba dʋndɔŋŋɔɔ ŋɩɩ aŋ laa tintee-la La TƖƖNA sɩ joŋo pɩba.

¹³ Ŋɩɩ nɛ La TƖƖNA bɩra bʋla pɩla, “Má sii a chol fuonaa-la ba sɩɩ yɩrɛ Zɛrɛd.” Ŋɩɩ nɛ la sii a chol.

¹⁴ La sɩ sii Kadɛs Banɩa lɛ, ʋ jɩsɩŋ mara arɩ fii arɩ chori tʋɔŋ nɛ la chol Zɛrɛd fuonaa-la. Bʋa deeŋ lɛ, dɩ la doho laalɩyuoroo kala sʋba arɩ La TƖƖNA sɩ ŋmɩɛsa hɛ ba lɛ ŋɩɩ.

¹⁵ La TƖƖNA fa joŋ sɩɩŋ pɛsɛ ba lɛ nɛ, ba kala sʋʋ dɛrɛ.

¹⁶ Laalɩyuoro-la kala sɩ sʋʋ dɛrɛ,

¹⁷ ŋɩɩ nɛ La TƖƖNA bʋla pɩmɛ,

¹⁸ “Jɩnɩŋ, má jʋʋ Mʋab tinteeŋ a to tabal-la ba sɩɩ yɩrɛ Aa.

¹⁹ Dɩ ma nɛ mʋ yi Amɔŋ tɩŋŋaa tinteeŋ, má sɩ́ ba fugusu koo a kɛmba yuo laalɩŋ, bɛɛ wɩaa mɩ bɩ jaŋ joŋ ba tinteeŋ mʋapɩlɩɩ ma a pɩma. Lɔt doho nɩaa Amɔŋ tɩŋŋaa nɛ mɩ joŋ tintee-la pa.”

²⁰ (Refem tɩmma-la fa sɩ hɔŋ lee-la, ba nɛ tɩɩ tintee-la, ama Amɔŋ tɩŋŋaa-na ka yɩrɛba Zamzumi tɩŋŋaa nɛ.

²¹ Zamzumi tɩmma-la fa yʋga nɛ woruŋ a kɛŋ doluŋ a waa yi a nagɛ Anakɩ tɩŋŋaa. Ama La TƖƖNA fa leŋe Amɔŋ tɩŋŋaa yuo diiba nɛ aŋ laa ba tinteeŋ a hɔŋ.

²² La TƖƖNA fa chei Hɔrɩ tɩŋŋaa ŋɩɩ tɩtɩa nɛ aŋ leŋ Ɛsɔ doho nɩaa sɩ hɛ Ɛdɔm lɛ laa ba tinteeŋ a hɔŋ arɩ jɩnɩŋ kala.

²³ Ava tɩmma-la sɩ hɔŋ tabiisi-la kala sɩ hɛ lee-la a kɩɛlɛ ŋɩɩ a mʋ yi Gaza, Kafɩtɔ tɩŋŋaa lɩɩ ba tinteeŋ a kʋ yuo diiba nɛ aŋ hɔŋ lee-la.)

Iziral tɩŋŋaa yuo dii Hɛsɩbɔŋ kuoro Sɩhɔŋ

²⁴ La sɩ kieli Mʋab tinteeŋ, ŋɩɩ nɛ La TƖƖNA bʋla pɩla, “Má sii a chol Anɔŋ fuo-la cholo, mɩ joŋ Amɔrɩ tɩŋŋaa kuoro Sɩhɔŋ sɩ hɛ Hɛsɩbɔŋ lɛ arɩ ʋ tinteeŋ kala a hɛ ma nɩsɩŋ lɛ nɛ. Má kɛŋ ma tɩtɩa a yuo laa tintee-la.

²⁵ A chɩŋ jɩnɩŋ a kaa mʋ, mɩ jaŋ joŋ fawʋllʋŋ a hɛ dʋnɩa nɩaa kala lɛ, dɩ ba nɛ nɩɩ ma wɩaa, dɩ ba chichel.”

²⁶ Ŋɩɩ nɛ mɩ tɩŋ nɩaa ba lɩɩ Kɛdɛmɔf tintee-hɩlɩɩ-la lɛ a mʋ Amɔrɩ tɩŋŋaa kuoro Sɩhɔŋ sɩ hɛ Hɛsɩbɔŋ lɛ teeŋ, a chɩchɛ nii-maga,

²⁷ a bʋl, “Leŋ dɩ la to ŋ tinteeŋ a bal, la jaŋ joŋ womporuŋ a mʋ, la bɩ jaŋ gɛbɛ nadiiŋ koo nagʋa.

²⁸ Dɩ la nɛ nyʋa ŋ tinteeŋ lɩɩŋ koo dɩ la nɛ dii ma kʋdiilee, la jaŋ tiŋ. Wɩɩ-la la sɩɩ chɛ nɛ dɩ la to ŋ tinteeŋ a bal,

²⁹ a nagɛ Ɛsɔ doho nɩalɩŋ sɩ hɔŋ Ɛdɔm tinteeŋ lɛ arɩ Mʋab tɩmma-la sɩ hɔŋ Aa taŋ-la lɛ sɩ leŋe la to ba tinteeŋ bal ŋɩɩ, dɩ la chol Jɔdaŋ fuo-la a mʋ tintee-la La TƖƖNA Wɩa sɩ joŋo pɩpɩla.”

³⁰ Ama Amɔrɩ tɩŋŋaa kuoro Sɩhɔŋ-na bɩ la wombiiŋ pa dɩ la to ba tinteeŋ a bal. Ma TƖƖNA Wɩa fa leŋe ʋ tʋɔŋ pɩrɛ nɛ, ʋ bɩ ʋ niiŋ sɛyɛ. Ŋɩɩ leŋ ʋ joŋu hɛ la nɩsɩŋ lɛ, la yuo diiu a hɔŋ ʋ tinteeŋ lɛ arɩ jɩnɩŋ kala.

³¹ Ŋɩɩ nɛ La TƖƖNA bʋla pɩmɛ, “Mɩ joŋ kuoro Sɩhɔŋ arɩ ʋ tinteeŋ kala a hɛ ma nɩsɩŋ lɛ nɛ. Má kɛŋ ma tɩtɩa hɛ dɔŋɔ a yuo laa tintee-la dɩ ʋ ŋaa ma kʋŋ.”

³² Kuoro Sɩhɔŋ arɩ ʋ laalɩyuoro kala sɩ kʋ lɩɩ chenla Jaha lɛ dɩ ba yuola,

³³ La TƖƖNA Wɩa jomba hɛ la nɩsɩŋ lɛ nɛ, la kpʋʋ arɩ ʋ hambolibiisiŋ arɩ ʋ laalɩyuoro kala.

³⁴ Bʋa-la lɛ, la yuo dii ʋ tasɩŋ kala nɛ, a kpʋ baalaa, haalaa arɩ hambiisi-la kala sɩ hɛ tasɩ-la lɛ, la bɩ nʋʋkala leŋe.

³⁵ Ba pʋsʋŋ arɩ ba dʋa dʋndʋŋa nɛ la fa paa ba ŋaa la kɩaa.

³⁶ A chɩŋ taŋ-la ba sɩɩ yɩrɛ Arʋa sɩ hɛ Anɔŋ fuo-la fuonaaŋ niiŋ a kaa mʋ yi Gɩlɩad, taŋ kala fa tuo a wuola. La TƖƖNA Wɩa leŋe la yuo dii ba kala nɛ.

³⁷ Ama La TƖƖNA Wɩa sɩ sɩ dɩ la sɩ́ tasɩ-la yuo, la bɩ ba jʋa. Ba nɛ: Amɔŋ tɩŋŋaa tinteeŋ, arɩ tasɩ-la kala sɩ golli fuo-la ba sɩɩ yɩrɛ Jabɔk arɩ tasɩ-la sɩ hɛ tintee-la lɛ peelee sɩ yʋga lɛ.