MOSIS BƖRA WULLI WƖA WOMBIIŊ 17 - WƖA TENIŊ

¹ Ma pɔ má sɩ́ nɛŋ koo piese sɩ kɛŋ nyɔɔ kpʋ a sʋl Wɩɩsʋlʋŋ a pɩ ma TƖƖNA Wɩa, ʋʋ kɩsɛ ŋɩɩ nɛ.

² Tasɩ-la ma TƖƖNA Wɩa sɩ jaŋ joŋo pɩma dɩ ma hɔŋ ba lɛ, dɩ baal koo haal nɛ hɛ ma tʋɔŋ a vɩa La TƖƖNA niiŋ, a ŋaa wʋbɔŋ a chei nii-la sɩ hɛ ma dɩ ma TƖƖNA pɛgɛ,

³ a zizil wɩa-nyuŋ kʋŋ, wɩɩpɔsʋŋ, chɛnɛ, koo chɛnwʋlaa, arɩ vesiŋ dɔnsʋŋ La TƖƖNA sɩ bɩ ŋɩɩ daga,

⁴ dɩ ma nɛ nɩɩ ŋɩɩ, má nyilimi wɩɩ-la tʋɔŋ woruŋ. Dɩ ma nɛ na dɩ wɩɩ-la ŋaa wʋtɩtɩɩ, arɩ wʋbɔmʋŋ deeŋ nɛ ba sɛnɛ ŋaa Iziral tinteeŋ lɛ,

⁵ má kɛŋ baal-la koo haal-la sɩ ŋaa wʋbɔŋ-la a lɩɩ taŋ-la lɛ, a yagʋ kpʋ arɩ tabɩaa.

⁶ Dɩ nɩaa balɩa koo batori nɛ pɛ na wɩɩ arɩ ʋ ŋaa wʋtɩtɩɩ nɛ, ma jaŋ wuo kpʋ nɩa. Ama ma bɩ jaŋ wuo kpʋ nʋʋ dɩ nɩbala dʋndʋŋ nɛ pɛ na.

⁷ Nɩalɩŋ sɩ dii pɛ na nɛ maga dɩ ba laa sɩpaaŋ paa tabɩaa a yagɛ nɩɩ-la ba sɩɩ chɛ dɩ ba kpʋ, ka dɩ nɩkaanaa na pɛ. Ŋɩɩ ma sɩ jaŋ ŋaa a giri wʋbɔŋŋɔɔ deemba doho ta Iziral tinteeŋ lɛ nɛ ŋɩɩ.

Sarɩya dɩ-diiliŋ

⁸ Dɩ ba nɛ kɛŋ wɩaa kaa kɔ ma sarɩya dɩ-diilee, dɩ wɩalɩŋ dolie kɩɩ ma jɩmɩŋ, má kaa mʋ lee-la ma TƖƖNA Wɩa sɩ jaŋ lɩɩsɛ. Wɩalɩŋ nɛ ŋ-la: dɩ nʋʋ nɛ ba kpʋ koo dɩ nʋʋ nɛ pɩrɛ ʋ dɔŋɔ, koo dɩ nɩaa nɛ kɛŋ dʋa wɩaa yuyuo dɔŋɔ.

⁹ Má kɛŋ wɩɩ-la mʋ Levi doho Wɩɩsʋllɩ sɩpaalaaraa arɩ sarɩya diiri-la sɩ hɔŋ kpasa nyuŋ bʋa-la lɛ teeŋ, a bʋla pɩba. Ba jaŋ laa wɩɩ-la jɩma pɩma.

¹⁰ Lee-la La TƖƖNA sɩ jaŋ lɩɩsɛ lɛ, wɩɩ-la kala ba sɩ bʋla pɩma, ʋ maga dɩ ma fɩɛlɛ ma sɩaa a to ba kala.

¹¹ Ʋ maga dɩ má to wɩalɩŋ kala ba sɩ beŋ wɩɩ-la tʋɔŋ a bʋla pɩma, má sɩ́ begilu wɩalɩŋ kʋŋkala lɛ.

¹² Nɩɩ-la kala sɩ vɩa wɩalɩŋ sarɩya diire sɩ dagɩŋ koo wɩalɩŋ Wɩɩsʋllɩ sɩpaalaara sɩ hɛ lee-la a tɩma pɩpɩ ma TƖƖNA Wɩa sɩ dagɩŋ, ʋ maga dɩ má kpʋʋ nɛ. Ʋ maga dɩ ma ŋaa ŋɩɩ nɛ a giri wʋbɔŋŋɔɔ ta Iziral tinteeŋ lɛ.

¹³ Ŋɩɩ nɛ Iziral tɩŋŋaa kala jaŋ nɩɩ dɩ fawʋllʋŋ kɛmba, dɩ ba bɩra sɩ́ wʋdosunu-la ŋaa.

Ŋɩɩ ba sɩ jaŋ to a lɩɩsɛ kuoro

¹⁴ Dɩ ma nɛ mʋ yi tintee-la ma TƖƖNA Wɩa sɩ sɩ ʋ jaŋ joŋo pɩma dɩ ma hɔŋ ʋ lɛ a tɩɩʋ, ma jaŋ chɩchɛ dɩ ma kɛŋ kuoro, arɩ tinteye-la dɔnsʋŋ sɩ golli ma sɩ kɛŋ kuoroo ŋɩɩ.

¹⁵ Má beŋ woruŋ arɩ nɩɩ-la ma sɩ jaŋ lɩɩsɛ dɩ ʋ ŋaa ma kuoro, ŋaa nʋʋ ma TƖƖNA Wɩa sɩ lɩɩsa. Ʋ maga ʋ ŋaa ma naambii nɛ, nɩwogo bɩ maga ʋ ŋaa ma kuoro.

¹⁶ Kuoru-la bɩ maga ʋ kɛŋ janɩŋ yʋgɛ. Ʋ bɩ maga ʋ chɩchɛ dɩ nɩaa mɩɩra mʋ Ijipiti tinteeŋ a yɔɔ janɩŋ kaa kʋ pʋ, bɛɛ wɩaa La TƖƖNA Wɩa sɩ, ʋ bɩ chɛ dɩ ʋ nɩaa bɩra joŋ ba sɩaa chaasɛ lee-la.

¹⁷ Kuoru-la bɩ maga dɩ ʋ kɛŋ haalaa yʋgɛ, bɛɛ wɩaa ŋɩɩ jaŋ leŋ dɩ ʋ joŋ harɩŋ yɩa La TƖƖNA. Ʋ bɩ maga dɩ ʋ chɩchɛ ʋ kɛŋ hɔpʋla arɩ sɛlɩmɛ yʋgɛ.

¹⁸ Dɩ ʋ nɛ dii kuoruŋ, ʋ maga ʋ laa ba sɩ ŋmʋnsɛ Wɩa niiŋ wɩaa hɛ teŋ-la lɛ Levi doho nɩaa sɩ ŋaa Wɩɩsʋllɩ sɩpaalaaraa teeŋ, a leŋ ba ŋmʋnsa hɛ teniŋ dɔŋɔ lɛ pʋ dɩ ʋ bil, a kɩkarɩmɛ bʋa na-kala lɛ.

¹⁹ Teŋ-la maga ʋ hɛ ʋ teeŋ nɛ dɩ ʋ kɩkarɩmɛ ʋ mɩɩsɩŋ kala lɛ, dɩ ŋɩɩ leŋ ʋ zizil ʋ Tɩɩna Wɩa a tuto ʋ wombiiŋ arɩ wɩalɩŋ kala ʋ sɩ daga.

²⁰ Ŋɩɩ nɛ jaŋ leŋ dɩ ʋ sɩ́ Wɩa wombiiŋ lɛ bibegili, a bɩɩnɛ arɩ ʋ nɛ kpɩa ʋ naambiiriŋ Iziral tɩŋŋaa kala. Dɩ ʋ nɛ to woruŋ, ʋ dɩ ʋ doho nɩaa jaŋ dii kuoruŋ a dieni Iziral tinteeŋ lɛ.