MOSIS BƖRA WULLI WƖA WOMBIIŊ 11 - WƖA TENIŊ

Má cho La TƖƖNA a tuto ʋ niiŋ

¹ Má cho ma TƖƖNA Wɩa a tuto ʋ niiŋ arɩ ʋ wombiee arɩ wɩalɩŋ kala ʋ sɩ daga bʋa na-kala.

² Jɩnɩŋ ma jɩŋ arɩ wɩalɩŋ kala ma sɩ na, ma biiriŋ dee bɩ ba na. Ma nɛ na ma TƖƖNA Wɩa sɩ ŋaa wɩalɩŋ a kɛmma tʋraa kɩɩ, ma na ʋ ballɩŋ arɩ ʋ doluŋ sɩ yʋga nɛ.

³ Ma na wʋmagɩla-la kala ʋ sɩ ŋaa Ijipiti tinteeŋ kuoro arɩ ʋ nɩaa kala lɛ nɛ.

⁴ Ma na ŋɩɩ La TƖƖNA sɩ yuo dii Ijipiti tɩŋŋaa laalɩyuoroo arɩ ba janɩŋ arɩ ba janɩŋ torukoba kala nɛ, a jomba yuo hɛ Mʋgʋ-fɩaŋ lɛ ba kala sʋʋ, bʋa-la lɛ ba sɩ kire to ma harɩŋ.

⁵ Ma biiriŋ dee bɩ wɩalɩŋ La TƖƖNA sɩ ŋaa pɩma tintee-hɩlɩɩ-la lɛ na, aŋ ka ma-na kɔ daha.

⁶ Bʋa-la lɛ La TƖƖNA sɩ leŋe tinteeŋ suri Iziral tɩŋŋaa kala sɩɩŋ lɛ a paa Ɛlɩab sɩ ŋaa Rubiŋ doho nʋʋ biiriŋ liŋ, Dataŋ arɩ Abɩram arɩ ba dɩa nɩaa, ba lɛŋŋɛɛ, tɩntɩnnaa arɩ ba pʋsʋŋ kala.

⁷ Ama ma tɩtɩa nɛ na wʋduoru-la kala La TƖƖNA sɩ ŋaa.

⁸ Ŋɩɩ wɩaa má to wɩalɩŋ kala mɩ sɩɩ dagɛma jɩnɩŋ. Dɩ ma nɛ toba, ma jaŋ kɛŋ doluŋ a wuo chol Jɔdaŋ fuo-la a jʋʋ tintee-la a laaʋ tɩɩ.

⁹ Ŋɩɩ nɛ jaŋ leŋ dɩ ma wuo dieni tintee-la lɛ La TƖƖNA sɩ hɛ niiŋ pɩ ma naabalɩmaba arɩ ʋ jaŋ joŋo pɩ ba dɩ ba doho nɩaa. Tintee-la zɔmɔ nɛ woruŋ a kɛŋ kɩaa.

¹⁰ Tintee-la ma sɩɩ mʋ, dɩ ma laaʋ a tɩɩ, ʋ bɩ Ijipiti tintee-la lɛ ma sɩ lɩa naga. Ijipiti lɛ ma yie duu kɩaa nɛ a ŋaa lɩɩŋ mɩmɩsɛ.

¹¹ Ama tintee-la ma sɩɩ chɛ dɩ ma jʋʋ, ʋ kɛŋ peelee arɩ fuonaasɩŋ nɛ, duonuŋ nɩnɩɩ woruŋ nɩmɛ.

¹² Ma Tɩɩna Wɩa sɩɩŋ fɩɛsɛ tintee-la lɛ nɛ woruŋ, ʋ yie beŋ ʋ nyuŋ a lɩɩ jɩna dɩ-suomuŋ a kaa mʋ ʋ dɩdɛrɩŋ.

¹³ Ŋɩɩ wɩaa dɩ ma nɛ jaŋ kɛŋ wʋtɩtɩɩ a to wɩalɩŋ mɩ sɩ dagɛma jɩnɩŋ a cho ma TƖƖNA Wɩa a tɩmaa pʋ arɩ ma tʋɔŋ arɩ ma wɩɩ-wɩɩkala,

¹⁴ ʋ jaŋ leŋ dɩ duonuŋ nɩɩ ʋ bʋa lɛ a pɩma, tafaaŋ arɩ yibiiniŋ, dɩ ma wuo pɛrɛ a na mɩaa, girep nɛnɛɛ sɩnɩŋ arɩ olif nʋʋŋ.

¹⁵ Ʋ jaŋ leŋ dɩ ma pʋsʋŋ ma na yaŋ a didii, dɩ ma tɩtɩa na kʋdiilee a dii vʋvɔgɛ.

¹⁶ Má fɩɛlɛ ma sɩaa, dɩ ma tʋɔbɩɩnaa sɩ́ bɩrɩmʋ dɩ ma to vesiŋ harɩŋ a kpʋkpaarɛba.

¹⁷ Dɩ ma nɛ ŋaa ŋɩɩ, La TƖƖNA jaŋ na baanɩŋ ma nyuŋ. Ʋ jaŋ pɔ dɩ duonuŋ sɩ́ nɩɩ pɩma dɩ ma wuo pɛrɛ a na kɩaa. Ŋɩɩ jaŋ leŋ dɩ ma sʋʋ lɩma tintee-zɔŋ-la lɛ La TƖƖNA sɩ joŋo pɩpɩma.

¹⁸ Má joŋ wɩaa deemba kala mɩ sɩɩ dagɛma a hɛ ma tʋɔŋ arɩ ma nyuŋ lɛ, a ŋmʋnsɛba a vɔɔ mɛrɛ ma nɩsaa arɩ ma tilliŋ lɛ.

¹⁹ Má joŋ wɩalɩŋ a dɩdagɛ ma biiriŋ bʋa na-kala, ma dɩɩsɩŋ lɛ koo dɩ ma nɩɩ vɛŋ wombiiŋ, dɩ ma nɩɩ chɛ dɩ ma pɩŋ koo dɩ ma nɛ pɩna aŋ sii.

²⁰ Má ŋmʋnsɛba a hɛ ma borusuŋ arɩ ma boi-baalaa lɛ,

²¹ dɩ ŋɩɩ leŋ dɩ ma dɩ ma biiriŋ kala mɩɩsɩŋ duomi tintee-la lɛ La TƖƖNA sɩ hɛ niiŋ pɩ ma naabalɩmaba arɩ ʋ jaŋ joŋo pɩba, dɩ ma hɛ nɩmɛ a kaa mʋ wuu.

²² Dɩ ma nɛ fɩɛlɛ ma sɩaa a tuto wɩaa deemba kala mɩ sɩɩ dagɛma, a cho ma TƖƖNA Wɩa, a tuto ʋ wombiee a kɛŋ ma tɩtɩa mɛrɛ ʋ lɛ,

²³ ʋ jaŋ yuo a kiri tinteye-la kala nɩaa sɩ hɛ ma sɩpaaŋ a yʋga kɩɩma a kɛŋ doluŋ ma kɩɩma. Ka dɩ ma laa ba dɩhɔnʋŋ a hɔŋ.

²⁴ Lee na-kala ma sɩ joŋ naaŋ nʋɔsɛ, ʋ jaŋ ŋaa ma kʋŋ. Ma tinteeŋ bʋa jaŋ chɩŋ tintee-hɩlɩɩ-la lɛ a mʋ yi Lɛbanɔŋ tinteeŋ, a bɩra chɩŋ Yufireti fuo-la lɛ a kaa mʋ mʋgʋ-bal-la ba sɩɩ yɩrɛ Mediterenia sɩ hɛ wɩɩjʋʋlʋŋ dɩɩrɩŋ.

²⁵ Nʋʋkala bɩ jaŋ wuo chɩŋ ma sɩpaaŋ. Lee na-kala ma sɩ jaŋ mʋ, ma TƖƖNA Wɩa jaŋ joŋ fawʋllʋŋ hɛ nɩalɩŋ lɛ dɩ ba fɩfáma arɩ ʋ sɩ bʋl ŋɩɩ.

²⁶ Jɩnɩŋ wɩaa balɩa nɛ mɩ joŋo bil ma sɩpaaŋ: Wɩalɩŋ ma sɩ jaŋ ŋaa dɩ Wɩa pɛ ma lɛ arɩ wɩalɩŋ ma sɩ jaŋ ŋaa dɩ Wɩa cheima.

²⁷ Wɩalɩŋ ma sɩ jaŋ ŋaa dɩ Wɩa pɛ ma lɛ nɛ ŋ-la: dɩ ma nɛ to ma TƖƖNA Wɩa wɩalɩŋ mɩ sɩɩ dagɛma jɩnɩŋ.

²⁸ Wɩalɩŋ ma, ma sɩ jaŋ ŋaa dɩ Wɩa cheima nɛ ŋ-la: dɩ ma nɛ vɩa ma TƖƖNA Wɩa wɩalɩŋ mɩ sɩɩ dagɛma jɩnɩŋ aŋ tuto vesiŋ ma sɩ bɩ jɩŋ.

²⁹ Dɩ ma TƖƖNA Wɩa nɛ kɛmma mʋ tintee-la ma sɩɩ mʋ dɩ ma tɩɩʋ, ʋ maga dɩ má jɩl peel-la ba sɩɩ yɩrɛ Gɛrɩzɩm nɛ a dagɛ wɩalɩŋ nʋʋ sɩ jaŋ ŋaa dɩ Wɩa pɛ ʋ lɛ, aŋ bɩra jɩl peel-la ba sɩɩ yɩrɛ Ɛbal ma a dagɛ wɩalɩŋ nʋʋ sɩ jaŋ ŋaa dɩ Wɩa cheyu.

³⁰ Peelee deemba balɩa hɛ Kɛnaŋ tɩmma-la sɩ hɛ Jɔdaŋ fuo-la cholo tinteeŋ wɩɩjʋʋlʋŋ dɩɩrɩŋ nɛ, ba dɩ More tɩɩ-bala-la bɩ bol aŋ kpagɛ taŋ-la ba sɩɩ yɩrɛ Gɩlɩgal.

³¹ Ma ka mʋa nɛ, ka dɩ ma chol Jɔdaŋ fuo-la a jʋʋ tintee-la ma TƖƖNA Wɩa sɩ joŋo pɩpɩma dɩ ma tɩɩ. Dɩ ma nɛ jʋʋ tintee-la a hɔŋ nɩmɛ,

³² má hɛ doluŋ aŋ to wombie-la arɩ wɩalɩŋ kala mɩ sɩ joŋo bil ma sɩpaaŋ jɩnɩŋ.