DANƖƐL 9 - WƖA TENIŊ

Danɩɛl chʋɔlɛ Wɩa

¹ Medi tɩɩna kʋbala nɛ fa hɛ nɩmɛ ʋ yɩrɩŋ nɛ Daarus, a dii kuoruŋ Babɩlɔŋ tinteeŋ. Ʋ nyɩmma yɩrɩŋ nɛ fa Zɛsɛs.

² Ʋ sɩ dii kuoruŋ ʋ jɩ-bumbuŋ lɛ nɛ, mɩ-na Danɩɛl karɩmɛ Wɩa teniŋ a jɩŋ wɩɩ-la La TƖƖNA sɩ to ʋ wʋlaabʋlla Jɛrɩmaaya lɛ a bʋl, arɩ Jerusalɛm jaŋ pɩŋ jikpeeŋ jɩsɩŋ mahɩŋ batori arɩ fii.

³ Ŋɩɩ nɛ mɩ chʋɔlɛ La TƖƖNA Wɩa a sʋlʋ, a vɔɔ niiŋ a laalɛ tʋɔ-chei gɛnnɩŋ a ŋaa tʋɔrʋŋ bʋgɛ.

⁴ Mɩ sɩɩ sʋl mɩ TƖƖNA Wɩa ŋɩɩ, mɩ dagɛ wʋbɔmɔ-la mɩ nɩaa sɩ ŋaa a bʋl: “La TƖƖNA ŋ nɛ Wɩa sɩ yʋga a kɛŋ fawʋllʋŋ. Ŋ kɛŋ wʋtɩtɩɩ nɛ nii-la sɩ hɛ la dɩ ŋ pɛgɛ. Ŋ dagɛ ŋ chono-la sɩ bɩ dɛrɛ a pɩ nɩalɩŋ sɩ choŋ a ŋɩŋaa wɩalɩŋ ŋ sɩ daga nɛ.

⁵ La ŋaa wʋbɔŋ nɛ a ŋaa wɩaa sɩ bɩ ba bʋa lɛ ŋaa. La ŋaa nɩbɔmɔ nɛ a vɩa ŋ niiŋ, la joŋ harɩŋ yɩa wɩalɩŋ ŋ sɩ daga arɩ wombie-la ŋ sɩ bile dɩ la tuto nɛ.

⁶ Ŋ tɩntɩnnaa sɩ ŋaa ŋ wʋlaabʋllaa a bʋl wɩalɩŋ, la bɩ jegile nɩɩ. Ba bʋl wɩaa ŋ yɩrɩŋ lɛ a pɩ la kuoroo, la sɩpaalaaraa, la nyɩmmaba arɩ la tinteeŋ nɩaa kala nɛ.

⁷ La TƖƖNA, ŋ ŋaa tʋɔpʋl Tɩɩna nɛ, ama jɩnɩŋ hɩɩsɩŋ kɛŋ la Juda nɩaa arɩ Jerusalɛm nɩaa arɩ Iziral tɩŋŋaa kala nɛ, nɩalɩŋ sɩ kpaga arɩ nɩalɩŋ kala sɩ hɛ dɩ-boloo, tinteye-la lɛ ŋ sɩ kɛnla pɩsa hɛ a tɩŋ la sɩ bɩ wʋtɩtɩɩ kɛnɛ ŋ teeŋ wɩaa.

⁸ La TƖƖNA, hɩɩsɩŋ kɛŋ la dɩ la kuoroo, la sɩpaalaaraa arɩ la nyɩmmaba kala nɛ, bɛɛ wɩaa la ŋaa wʋbɔŋ nɛ ŋ teeŋ.

⁹ La TƖƖNA Wɩa, ŋŋ fá nɩaa nenige nɛ a joŋ wɩaa chɩchɛba, arɩ la sɩ lɩɩ ŋ harɩŋ ma kala,

¹⁰ a bɩ ŋ-na La TƖƖNA Wɩa niiŋ to, a bɩ wombie-la ma ŋ sɩ to ŋ wʋlaabʋllaa sɩ ŋaa ŋ tɩntɩnnaa lɛ a joŋo dagɛla dɩ la tuto ka to.

¹¹ Iziral tɩŋŋaa kala chei wombii-la ŋ sɩ bile dɩ ba tuto nɛ a joŋ harɩŋ yɩaŋ a vɩa dɩ ba to ŋ niiŋ. Ŋɩɩ wɩaa kalɩbɩna-la arɩ ŋmɩaŋ-la ŋ-na Wɩa tɩntɩnna Mosis sɩ ŋmʋnsa bil ŋ wombiiŋ teniŋ tʋɔŋ mɩɩra wurisila nɛ, bɛɛ wɩaa la ŋaa wʋbɔŋ nɛ ŋ teeŋ.

¹² Ŋ leŋe wɩalɩŋ ŋ sɩ bʋla tɩgɛ la dɩ la sɩpaalaaraa lɛ kʋ ŋaa wʋtɩtɩɩ nɛ. Ŋ sɩ joŋ wʋlɔrʋnʋŋ ŋaa la lɛ, dʋnɩa kala lɛ wʋdoho-la sɩ ŋaa Jerusalɛm lɛ ha bɩ ŋaa aŋ ka.

¹³ Wʋlɔrʋnʋ-la kala sɩ hɛ ŋ wombiiŋ teŋ-la Mosis sɩ ŋmʋnsa bil dɩ la tuto lɛ, ŋaa la lɛ nɛ ka la ha vɩa dɩ la bɩrɩma lɩɩ la wʋbɔŋŋɔɔ lɛ, a ŋaa wɩalɩŋ ŋ-na La TƖƖNA Wɩa sɩ cho a to ŋ wʋtɩtɩɩ-la.

¹⁴ La TƖƖNA, ŋ bɩ kaa dieni aŋ joŋ wʋlɔrʋŋ ŋaa la lɛ, bɛɛ wɩaa ŋ-na La TƖƖNA Wɩa, ŋ ŋaa tʋɔpʋl Tɩɩna nɛ wɩɩ na-kala ŋ sɩɩ ŋaa lɛ, arɩ ŋɩɩ kala la bɩŋ niiŋ to.

¹⁵ La TƖƖNA Wɩa, ŋ nɛ kɛŋ ŋ naduo-la a kɛŋ ŋ nɩaa kaa lɩɩ Ijipiti tinteeŋ lɛ a laa yɩrɩŋ pɩ ŋ tɩtɩa a kaa kɔ arɩ jɩnɩŋ. La ŋaa wʋbɔŋ nɛ, la cheye nɛ.

¹⁶ La TƖƖNA, a tɩŋ tʋɔpʋl wɩalɩŋ kala ŋ sɩ ŋaa wɩaa, sɩ́ baanɩŋ na. Leŋ dɩ ŋ baanɩŋ fɩɛlɛ Jerusalɛm nyuŋ sɩ ŋaa ŋ tabalɩŋ, a ŋaa ŋ dundolo sɩ bɩ disiniŋ kɛnɛ. La wʋbɔŋŋɔɔ arɩ la nyɩmmaba wʋbɔŋŋɔɔ leŋe Jerusalɛm arɩ ŋ nɩaa ŋaa nɩmɔmɩa nɛ nɩalɩŋ kala sɩ gollila teeŋ.

¹⁷ La TƖƖNA Wɩa, mɩ ŋaa ŋ tɩntɩnnʋ nɛ, mɩɩ sʋlʋŋ, jegile nɩɩ mɩ sʋla. Leŋ dɩ ŋ tʋɔŋ tɔrɛ dɩ ŋ beŋ ŋ dɩɩ-bal-la sɩ pɩŋ jikpeeŋ nyuŋ, a zil ŋ tɩtɩa a laa yɩrɩŋ.

¹⁸ Wɩa, kpil dɩgɩlɩŋ a jegile nɩɩ, suri ŋ sɩaa a na ŋ tabalɩŋ sɩ kɛŋ ŋ yɩrɩŋ sɩ pɩŋ jikpeeŋ. La bɩ tʋɔpʋl tɩmma nɛ ŋaa a sʋsʋlʋŋ, ama a tɩŋ ŋ sɩɩ fá nɩaa nenige kɩŋkɛŋ wɩaa nɛ.

¹⁹ La TƖƖNA, jegile nɩɩ. La TƖƖNA joŋo chɛla. La TƖƖNA, jegile nɩɩ a kaa tɩŋ. Mɩ Wɩa, tɩŋ ŋ tɩtɩa wɩaa a ŋaa wɩɩ. Sɩ́ kaa dieni a tɩŋ tabal-la arɩ ʋ nɩaa sɩ ŋaa ŋ kɩaa wɩaa.”

Gebiral dagɛ wɩalɩŋ ba sɩ bʋla Wɩa doluŋ lɛ bʋbʋɔŋ

²⁰ Mɩ fa sɩɩ chʋɔlɛ Wɩa a dɩdagɛ mɩ dɩ mɩ nɩaa Iziral tɩŋŋaa wʋbɔŋŋɔɔ, a sʋsʋl mɩ TƖƖNA Wɩa a mʋ tɩgɛ ʋ dundolo-la sɩ bɩ disiniŋ kɛnɛ lɛ ŋɩɩ,

²¹ mɩ fa haa chʋɔlɛ Wɩa ŋɩɩ nɛ aŋ na Gebiral, baal-la mɩ fa sɩ laa sɩpaaŋ duoso na dɩ ʋ file kɔ mɩ teeŋ dɩdaanɩŋ Wɩɩsʋlʋŋ bʋa lɛ.

²² Ʋ sɩ kɔ ŋɩɩ ʋ bʋla pɩmɛ, “Danɩɛl, mɩ kɔ dɩ mɩ leŋ dɩ ŋ kɛŋ wʋjɩmɩŋ a jɩŋ wɩaa sɩaa nɛ.

²³ Ŋ sɩɩ sʋl Wɩa ŋɩɩ, ʋ laa ŋ sʋla nɛ. Ŋɩɩ nɛ mɩ kɔ dɩ mɩ bʋla pɩŋ. Ʋ choŋ nɛ woruŋ, ŋɩɩ wɩaa jegile nɩɩ tɩndaarɩ-la mɩ sɩ kɛnɛ a jɩŋ duoso-la bʋbʋɔŋ.

²⁴ Jɩsɩŋ zɔɔ-banɛsɛ arɩ mahɩŋ banɛsɛ arɩ fii nɛ Wɩa lɩɩsɛ dɩ ʋ kaa ŋaa dɩ ŋ nɩaa arɩ tabal-la sɩ bɩ disiniŋ kɛnɛ wʋbɔŋŋɔɔ dɛrɛ, a giri nɩbɔŋ wɩaa ta, aŋ leŋ dɩ ba kɛŋ tʋɔpʋla deeŋ deeŋ a kaa kɔ tapʋlɩɩ-la Wɩa sɩ jaŋ lɩɩsɛ ʋ dɩɩ-bal-la sɩ chaasa zɔŋ a bɩ disiniŋ kɛnɛ, a leŋ dɩ wɩalɩŋ ŋ sɩ na duosoo tʋɔŋ arɩ wɩalɩŋ ba sɩ bʋla Wɩa doluŋ lɛ kʋ ŋaa wʋtɩtɩɩ.

²⁵ Jɩŋ wɩɩŋ deeŋ sɩaa woruŋ: A chɩŋ bʋa-la lɛ ba sɩ pa wombiiŋ dɩ ba paa Jerusalɛm wasa saa, a kaa kɔ bʋa-la lɛ Wɩa sɩ jaŋ lɩɩsɛ sɩpaalaarʋ-la dɩ ʋ kɔ, jaŋ ŋaa yɔɔsʋŋ balɩpɛ sɩ bala lɛ. Ba sɩ jaŋ bɩra bil wombiee ma a lu bʋɔsʋŋ ma a kaa pɔ ba tɩtɩa Jerusalɛm lɛ jaŋ ŋaa jɩsɩŋ zɔɔ-banɛsɛ arɩ mahɩŋ banɛsɛ arɩ batori lɛ. Ama bʋa deeŋ lɛ wʋjʋʋlaa jaŋ hɛ nɩmɛ.

²⁶ Jɩsɩŋ zɔɔ-banɛsɛ arɩ mahɩŋ banɛsɛ arɩ batori-la harɩŋ lɛ, ba jaŋ kpʋ sɩpaalaarʋ-la ba sɩ lɩɩsa arɩ ʋ kʋŋkala ta. Sɩpaalaara dɔŋɔ ma arɩ ʋ laalɩyuoroo jaŋ kʋ lɩɩ a chei tabal-la arɩ Wɩa dɩɩ-balɩŋ, a nagɛ lɩɩŋ sɩ pɛllɛ paa nɩaa. Laalɩŋ arɩ leriŋ cheyiŋ ha jaŋ hɛ nɩmɛ a kaa mʋ dɩdɛrɩŋ arɩ ŋɩɩ Wɩa sɩ daga.

²⁷ Sɩpaalaara deeŋ arɩ nɩ-daŋ jaŋ bil niiŋ pɩ dɔŋɔ jɩsɩŋ balɩpɛ, ama jɩsɩ-la kpaa magɛ dɔŋɔ lɛ, ʋ jaŋ giri pʋsʋŋ kpʋ ŋaa Wɩɩsʋlʋŋ arɩ kɩaa joŋo ŋaa Wɩɩsʋlʋŋ ta. Ʋ jaŋ joŋ disiŋ kʋŋ sɩɩ chei leriŋ bil Wɩa dɩɩ-bal-la tʋɔŋ, koruŋ leriŋ dɩ ʋ chɩŋ nɩmɛ halɩɩ, a kaa mʋ bʋa-la lɛ Wɩa sɩ daga dɩ ʋ cheyu yie.”