DANƖƐL 5 - WƖA TENIŊ

Ba ŋmʋnsɛ kɩaa jeeŋ lɛ

¹ Baal kʋbala ma nɛ fa dii kuoruŋ Babɩlɔŋ tinteeŋ lɛ baa yɩrɛ Bɛlɩsaza. Tapʋlɩɩ kʋbala ʋ leŋ ba ŋaa kʋdiilee arɩ girep nɛnɛɛ sɩnɩŋ yʋgɛ, ʋ yɩrɛ ʋ nɩhɩasɩŋ bʋɩ ba kʋ dii kɩalɩŋ, ka ʋ dɩ ba nyʋnyʋa tɩɩnɛnɛɛ sɩŋ-la.

² Bɛlɩsaza fa sɩɩ nyʋa sɩŋ-la ŋɩɩ, ʋ ŋaa ba mʋ paa sɛlɩmɛ arɩ hɔpʋla nyʋnyʋalʋsʋ-la ʋ nyɩmma Nebukadineza fa sɩ paa Wɩa dɩɩ-balɩŋ sɩ hɛ Jerusalɛm lɛ a kaa kɔ, dɩ ʋ dɩ ʋ nɩhɩasɩŋ, ʋ haalaa arɩ haala-la ʋ sɩ bile aŋ bɩ jaa kaa nyʋa sɩnɩŋ.

³ Ŋɩɩ nɛ ba paa sɛlɩmɛ arɩ hɔpʋla nyʋnyʋalʋ-la ba fa sɩ paa Wɩa dɩɩ-balɩŋ sɩ hɛ Jerusalɛm lɛ a kaa kɔ. Kuoro arɩ ʋ nɩhɩasɩŋ, ʋ haalaa arɩ haala-la ʋ sɩ bile aŋ bɩ jaa kaa nyʋa sɩnɩŋ.

⁴ Ba faa nyʋa sɩŋ-la nɛ, aŋ dɩdɛnnɛ vesi-la ba sɩ kɛŋ sɛlɩmɛ arɩ hɔpʋla, kɔlɩɩŋ, hɔɔŋ, daaŋ arɩ tabɩaa a kaa ŋaa.

⁵ Ŋɩɩ nɛ nuhuobiine nɩsɩŋ guu kʋ lɩɩ aa ŋmʋnsɛ kɩaa jeeŋ ba sɩ taara lɛ, a kpagɛ chaanaa sɩɩ daŋ kʋ-la nyuŋ kuoro dɩa lɛ. Kuoro bibeŋ nɩsɩ-la, ka ʋ ŋmʋŋmʋnsɛ.

⁶ Kuoro sɩaa biri, fawʋllʋŋ faasa kɛnʋ, ʋ naadʋsʋŋ ŋmuŋmoo dɔŋɔ, ʋ naasɩŋ nagɛ ba sʋba.

⁷ Kuoro ŋaa ba yɩrɛ Babɩlɔŋ nɩalɩŋ sɩ yie beŋ chɛnwʋlaa aŋ dɩdagɛ wɩaa, wʋjɩnnaa arɩ vʋgʋraa ba kɔ. Ʋ bʋla pɩba, “Nɩɩ-la kala sɩ wuo karɩmɛ kɩalɩŋ ba sɩ ŋmʋnsa a dagɛ ba bʋbʋɔŋ pɩmɛ, mɩ jaŋ joŋ gɛrɩ-vachalɩŋ a laalʋ, a joŋ sɛlɩmɛ banzɔlɔ a hɛ ʋ baŋŋaa, aŋ leŋ dɩ ʋ ŋaa nɩ-tori-la sɩ jaŋ kɛŋ doluŋ a bibeŋ mɩ tinteeŋ.”

⁸ Ŋɩɩ nɛ kuoro wʋjɩnnaa kala kɔ, ama ba bɩ wuo karɩmɛ kɩalɩŋ ba sɩ ŋmʋnsa koo a dagɛ ba bʋbʋɔŋ pɩ kuoro.

⁹ Fawʋllʋŋ faasa kɛŋ kuoro Bɛlɩsaza, ʋ sɩaa wasa biri. Ʋ nɩhɩasɩ-la ma bɩ jɩŋ wɩɩ-la ba sɩ jaŋ ŋaa.

¹⁰ Kuoro naaŋ sɩ nɩɩ kuoro arɩ nɩhɩasɩ-la wʋbʋlʋŋ, ʋ kʋ jʋʋ dɩa-la tʋɔŋ ba sɩ hɔnɔ didii kʋdiile-la a bʋl, “Kuoro, a leŋ dɩ ŋ mɩɩsɩŋ duomi. Sɩ́ leŋe dɩ wɩɩŋ deeŋ walɩmɩŋ. Sɩ́ leŋe dɩ ŋ sɩaa biri.

¹¹ Baal kʋbala nɛ hɛ ŋ tinteeŋ lɛ, vesiŋ doluŋ hɛ ʋ lɛ. Ŋ nyɩmma Nebukadineza kuoruŋ bʋa lɛ, ʋ na dɩ ʋ kɛŋ wʋjɩmɩŋ a jɩŋ wɩaa sɩaa a nagɛ vesiŋ. Kuoro lɩɩsʋ ʋ ŋaa chichiribee, nɩalɩŋ sɩ yie beŋ chɛnwʋlaa aŋ dɩdagɛ wɩaa, wʋjɩnnaa arɩ vʋgʋraa kuoro.

¹² Baa yɩrɛ baala deeŋ Danɩɛl nɛ, ka kuoro ma fa kɛnʋ yɩyɩrɛ Bɛlɩtɛsaza. Ʋ fa na dɩ ʋ kɛŋ wʋjɩmɩŋ nɛ a jɩŋ wɩaa sɩaa a dɩdagɛ duosoo bʋbʋɔŋ, a wuo dɩdagɛ namagaba ma bʋbʋɔŋ aa wasɛ wɩalɩŋ sɩ hɛyɛ nɩaa teeŋ. Yɩrɛ Danɩɛl, ʋ jaŋ kʋ dagɛ kɩalɩŋ ba sɩ ŋmʋnsa bʋbʋɔŋ pɩŋ.”

¹³ Ŋɩɩ nɛ ba kɛŋ Danɩɛl kɔ kuoro sɩpaaŋ. Ʋ pɩɛsʋ, “Ŋ nɛ Danɩɛl, Juda nɩalɩŋ dɔŋɔ mɩ nyɩmma kuoro sɩ yuo kɛsɛ a kaa kɔɔ?

¹⁴ Mɩ nɩa dɩ vesiŋ doluŋ hɛ ŋ lɛ nɛ, ŋ kɛŋ jɩma, a jɩŋ wɩaa sɩaa a kɛŋ wʋjɩmɩŋ woruŋ.

¹⁵ Ba kɛŋ wʋjɩnnaa arɩ chichiribee kɔ mɩ sɩpaaŋ nɛ dɩ ba karɩmɛ kɩalɩŋ ba sɩ ŋmʋnsa a dagɛ ba bʋbʋɔŋ pɩmɛ, ama ba bɩ wuo dagɛ ba bʋbʋɔŋ.

¹⁶ Mɩ bɩra nɩa dɩ ŋ jaŋ wuo dagɛ wɩaa bʋbʋɔŋ a wuo wʋwasɛ wɩalɩŋ sɩ hɛyɛ nɩaa teeŋ. Dɩ ŋ nɛ wuo karɩmɛ kɩalɩŋ ba sɩ ŋmʋnsa a dagɛ ba bʋbʋɔŋ pɩmɛ, mɩ jaŋ joŋ gɛrɩ-vachalɩŋ a laalɩŋ a joŋ sɛlɩmɛ banzɔlɔ a hɛ ŋ baŋŋaa, aŋ leŋ dɩ ŋ ŋaa nɩ-tori-la sɩ jaŋ kɛŋ doluŋ a bibeŋ mɩ tinteeŋ.”

¹⁷ Ŋɩɩ nɛ Danɩɛl bʋla pɩ kuoro, “Kɛŋ kɩalɩŋ ŋ sɩ jaŋ joŋo pɩmɛ, koo ŋ joŋo pɩ nʋʋ-dɔŋ. Ama mɩ jaŋ karɩmɛ kɩalɩŋ ba sɩ ŋmʋnsa, aŋ dagɛ ba bʋbʋɔŋ ma pɩŋ.

¹⁸ Kuoro, Wɩa sɩ kɩɩ kʋŋkala pɩ ŋ nyɩmma Nebukadineza doluŋ nɛ, a leŋ ʋ ŋaa nɩbal, ba zizilu ʋ kɛŋ yɩrɩŋ.

¹⁹ Ʋ sɩ leŋe ʋ dɩchɩnɩŋ yuŋ ŋɩɩ, nɩaa kala, tinteyee nɩaa arɩ yikoro na-kala nɩaa fɩfáʋ. Nɩalɩŋ kuoro sɩ cho dɩ ʋ kpʋ, ʋ kpʋba nɛ. Nɩalɩŋ ma ʋ sɩ bɩ cho dɩ ʋ kpʋa, ʋ lemba nɛ. Nɩalɩŋ ʋ sɩ cho dɩ ʋ leŋ ba dɩchɩnɩŋ yuŋ, ʋ leŋe ba dɩchɩnɩŋ yʋgɛ nɛ. Nɩalɩŋ ma ʋ sɩ cho dɩ ʋ kɛmba muuri, ʋ kaa muuri nɛ.

²⁰ Ama Nebukadineza sɩ kʋ kɛŋ sɩɩ-duoŋ a bɩrɩmɛ babiibal, ʋ tʋɔŋ dol, Wɩa kɛŋ ʋ kuoruŋ laa nɛ, ʋ yɩrɩŋ dɩsɛ.

²¹ Ba kiru ta, ʋ lɩɩ nɩaa tʋɔŋ, ʋ tʋɔbɩɩnaa nagɛ pʋna kɩaa, ʋ guoli kosuŋ tʋɔŋ a dii yaŋ a nagɛ nɛŋ. Nyalɩŋ nyala hɛ ʋ lɛ halɩɩ, a mʋ yi bʋa-la lɛ ʋ sɩ kʋ jɩŋ, dɩ Wɩa sɩ kɩɩ kʋŋkala nɛ kɛŋ doluŋ nuhuobiinee kuoruŋ nyuŋ, a jaŋ wuo jomba pɩ nɩɩ-la kala ʋ sɩ cho.

²² Ama ŋ-na Bɛlɩsaza sɩ ŋaa ʋ nanʋala, ŋ jɩŋ wɩaa deemba kala nɛ aŋ bɩ ŋ tɩtɩa kaa muuri.

²³ Ŋ mɩɩra kɛŋ ŋ tɩtɩa yʋgɛ arɩ ŋ nɛ kɩɩ La TƖƖNA sɩ hɛ Wɩa jaŋ lɛ. Ŋ ŋaa ba paa ʋ dɩɩ-balɩŋ nyʋnyʋalʋ-la kaa kʋ pɩŋ nɛ, ŋ dɩ ŋ nɩhɩasɩŋ, ŋ haalaa arɩ haala-la ŋ sɩ bile aŋ bɩ jaa kaa nyʋa sɩnɩŋ. Ŋ dɛnnɛ vesi-la ba sɩ kɛŋ sɛlɩmɛ arɩ hɔpʋla, kɔlɩɩŋ, hɔɔŋ, daaŋ arɩ tabɩaa a ŋaa nɛ, kɩalɩŋ sɩ bɩ na, a bɩ wɩaa ka nɩɩ, a bɩ wɩaa ma jɩŋ, aŋ vɩa dɩ ŋ zil Wɩa, nɩɩ-la nɩsɩŋ lɛ ŋ mɩɩsɩŋ arɩ ŋ wɩɩ wɩɩkala sɩ hɛ.

²⁴ Ŋɩɩ wɩaa, ʋ nɛ tɩŋ nɩsɩ-la sɩ ŋmʋnsɛ kɩaa.

²⁵ Wɩalɩŋ ʋ sɩ ŋmʋnsa nɛ ŋ-la: MENE, MENE, TEKEL, PAASƖŊ

²⁶ Wɩalɩŋ bʋbʋɔŋ nɛ ŋ-la: Mene: Ʋ bʋbʋɔŋ nɛ Wɩa dɩɩsɛ ŋ kuoruŋ tapʋlaa nɛ a leŋ ba dɛrɛ.

²⁷ Tekel: Ʋ bʋbʋɔŋ nɛ, ba magɩsɩŋ nɛ a na dɩ ŋ bɩra bɩ yuŋ kala kɛnɛ.

²⁸ Paasɩŋ: Ʋ bʋbʋɔŋ nɛ, ba kɛŋ ŋ kuoruŋ kpaa nɛ a pɩ Medis arɩ Pɛsɩa tɩŋŋaa.”

²⁹ Ŋɩɩ nɛ Bɛlɩsaza ŋaa ba joŋ gɛrɛ vachalɩŋ a laalɛ Danɩɛl, a joŋ sɛlɩmɛ banzɔlɔ a hɛ ʋ baŋŋaa, aŋ heele bʋl arɩ ʋ nɛ ŋaa nɩ-tori-la sɩ kɛŋ doluŋ a bibeŋ tintee-la.

³⁰ Tɩtaŋ-la tɩtɩa nɛ ba kpʋ Babɩlɔŋ kuoro Bɛlɩsaza.

³¹ Ka Medis tɩɩna kʋbala baa yɩrɛ Daarus dii kuoruŋ. Bʋa-la lɛ dɩ ʋ ŋaa jɩsɩŋ mahɩŋ batori arɩ balɩa.