DANƖƐL 3 - WƖA TENIŊ

Nebukadineza leŋe ba kɛŋ sɛlɩmɛ ŋaa kʋa

¹ Kuoro Nebukadineza fa ŋaa ba kɛŋ sɛlɩmɛ a mɛ kʋŋ nɛ bil, ʋ leŋiŋ ŋaa naakieliŋ mara arɩ balɩpɛ, ʋ jalɩŋ ma ŋaa naakieliŋ butori. Ʋ joŋo bil tintee-taala kʋbala lɛ baa yɩrɛ Dura a hɛ Babɩlɔŋ tinteeŋ lɛ.

² Ʋ yɩrɛ ʋ tɩntɩnnɩ-hɩasɩŋ kala, nɩalɩŋ sɩɩ beŋ ʋ tinteeŋ ba sɩ kaa kpaa leree, nɩalɩŋ sɩɩ tɩgɛba lɛ, nɩalɩŋ sɩɩ beŋ ba jaŋ tɩntɩŋŋaa wɩaa, nɩalɩŋ sɩɩ chagɩlɛ kuoro, nɩalɩŋ sɩɩ bil ba moribiee, nɩalɩŋ sɩɩ dii ba sarɩya, sarɩya diiri-hɩasɩŋ arɩ ba tinteeŋ sɛsɩŋ dɔnsʋŋ tɩntɩnnɩ-hɩasɩŋ, dɩ ba kɔ kʋ-la ʋ sɩ ŋaa bil gbiele.

³ Ŋɩɩ nɛ nɩalɩŋ sɩɩ beŋ ʋ tinteeŋ ba sɩ kaa kpaa leree, nɩalɩŋ sɩɩ tɩgɛ ba lɛ, nɩalɩŋ sɩɩ beŋ ba jaŋ tɩntɩŋŋaa wɩaa, nɩalɩŋ sɩɩ chagɩlɛ kuoro, nɩalɩŋ sɩɩ bil ba moribiee, nɩalɩŋ sɩɩ dii ba sarɩya, sarɩya diiri-hɩasɩŋ arɩ ba tinteeŋ sɛsɩŋ dɔnsʋŋ tɩntɩnnɩ-hɩasɩŋ kala kʋ hɛ dɔŋɔ dɩ ba gbieli kuoro Nebukadineza kʋ-la ʋ sɩ leŋe ba ŋaa bil gbiele, ba kʋ chɩŋ kʋ-la sɩpaaŋ.

⁴ Ŋɩɩ nɛ nɩɩ-la sɩɩ heelu faasa heeli a bʋl, “Nʋʋkala, tinteyee nɩaa arɩ yikoro na-kala nɩaa, wɩɩ-la ba sɩ sɩ dɩ ma ŋaa nɛ ŋ-la:

⁵ Dɩ ma nɛ kɔ dɩ ma nɩa dɩ ba ŋmʋʋ nyile, ŋmʋlʋŋ, a du cheŋ, kɔnɛ arɩ gɔgʋ kʋŋ na-kala, ʋ maga dɩ ma tuu kpirimi a chʋɔlɛ kʋ-la kuoro Nebukadineza sɩ leŋe ba kɛŋ sɛlɩmɛ ŋaa bil nɛ.

⁶ Nɩɩ-la kala sɩ́ bɩ tuu kpirime chʋɔlɛ kʋ-la, ba jaŋ guu joŋ tɩɩna yuo hɛ nyiŋgeliŋ dɩa tʋɔŋ.”

⁷ Ŋɩɩ wɩaa, ba sɩ guu nɩɩ dɩ ba ŋmʋʋ nyile, ŋmʋlʋŋ, a du cheŋ, kɔnɛ arɩ gɔgʋ kɩaa, nʋʋkala, tinteyee nɩaa arɩ yikoro na-kala nɩaa tuu kpirimi a chʋɔlɛ kʋ-la kuoro Nebukadineza sɩ leŋe ba kɛŋ sɛlɩmɛ ŋaa bil.

⁸ Bʋa deeŋ lɛ nɛ Babɩlɔŋ nɩaa dɔnsʋŋ kʋ lɩɩ a bʋl wɩaa lɩɩ Juu tɩŋŋaa harɩŋ.

⁹ Ba bʋla pɩ kuoro Nebukadineza, “Kuoro, a leŋ dɩ ŋ mɩɩsɩŋ duomi.

¹⁰ Kuoro, ŋ bʋla dɩ nʋʋkala nɛ nɩa dɩ ba ŋmʋʋ nyile, ŋmʋlʋŋ, a du cheŋ, kɔnɛ arɩ gɔgʋ kɩaa, ʋ maga dɩ ba tuu kpirimi a chʋɔlɛ kʋ-la ŋ sɩ ŋaa ba kɛŋ sɛlɩmɛ mɛ bil nɛ,

¹¹ nɩɩ-la kala sɩ́ bɩ tuu kpirime chʋɔlɛ kʋ-la, ba jaŋ joŋ tɩɩna yuo hɛ nyiŋ-balɩŋ tʋɔŋ.

¹² Ama Juu tɩmma-la dɔnsʋŋ ŋ sɩ lɩɩsa ba ŋaa nɩhɩasɩŋ a bibeŋ Babɩlɔŋ tinteeŋ sɛsɩŋ dɔnsʋŋ, Sadɩrak, Mɛsak arɩ Abedinego bɩ ŋ-na kuoro niiŋ ka to. Ba bɩ ŋ vesiŋ ka kpaarɛ a bɩra bɩ kʋ-la ma ŋ sɩ leŋe ba kɛŋ sɛlɩmɛ ŋaa bil ka chʋɔlɛ.”

¹³ Kuoro Nebukadineza faasa na baanɩŋ a leŋ ba yɩrɛ Sadɩrak, Mɛsak arɩ Abedinego ba kɔ ʋ sɩpaaŋ.

¹⁴ Nebukadineza pɩɛsɛba, “Wʋtɩtɩɩ nɛɛ, Sadɩrak, Mɛsak arɩ Abedinego, ma bɩ mɩ vesiŋ ka kpaarɛ koo aa chʋɔlɛ kʋ-la mɩ sɩ leŋe ba kɛŋ sɛlɩmɛ ŋaa bil?

¹⁵ Lɛɛlɛ dɩ ma nɛ nɩa dɩ ba ŋmʋʋ nyile, ŋmʋlʋŋ, a du cheŋ, kɔnɛ arɩ gɔgʋ kɩaa, dɩ ma nɛ jaŋ tuu kpirimi a chʋɔlɛ kʋ-la mɩ sɩ leŋe ba kɛŋ sɛlɩmɛ ŋaa bil, ʋ chaasa ŋaa wʋzɔŋ nɛ. Ama dɩ ma nɛ vɩa dɩ ma chʋɔlʋ, ba jaŋ guu jomma yuo hɛ nyiŋ-balɩŋ tʋɔŋ. Ka dɩ mɩ na vene-la sɩ jaŋ wuo laama ta mɩ nɩsɩŋ lɛ.”

¹⁶ Sadɩrak, Mɛsak arɩ Abedinego bʋla pɩ kuoro Nebukadineza, “Kuoro, la bɩ chɛ dɩ la bʋl wɩaa ŋ sɩpaaŋ a laa la tɩtɩa wɩɩŋ deeŋ lɛ.

¹⁷ Kuoro, dɩ ba nɛ jonla yuo hɛ nyiŋ-balɩŋ tʋɔŋ, Wɩa-la la sɩɩ to jaŋ laala ta ʋ lɛ, a laala ta ŋ nɩsɩŋ ma lɛ.

¹⁸ Ama dɩ ʋ nɛ paala bɩ jaŋ laala ta ma, kuoro, laa chɛ dɩ ŋ jɩŋ arɩ la bɩ jaŋ to ŋ vesiŋ koo a chʋɔlɛ kʋ-la ŋ sɩ leŋe ba kɛŋ sɛlɩmɛ ŋaa bil.”

¹⁹ Ŋɩɩ nɛ Nebukadineza faasa na baanɩŋ Sadɩrak, Mɛsak arɩ Abedinego nyuŋ, a kɛŋ ʋ sɩaa chei. Ʋ leŋ ba wasa gɩrɛ nyiniŋ, ʋ faasa lɩŋ woruŋ, ʋ lɩmɩŋ kɩɩ bumbuŋ-la naansɩɩŋ bʋlɩpɛ.

²⁰ Ʋ leŋ ʋ laalɩyuori duoruŋ dɔnsʋŋ vɔɔ Sadɩrak, Mɛsak arɩ Abedinego a jomba yuo hɛ nyiŋ-bal-la tʋɔŋ.

²¹ Nɩaa deemba fa laalɛ gɛrɩ-duduosuŋ nɛ, a vɔɔ kpuŋkpel-duduosuŋ, a bɛ nyu-bɛllɩŋ arɩ gɛnnɩŋ dɔnsʋŋ, ka ba vɔɔba a jomba yuo hɛ nyiŋgel-bal-la tʋɔŋ.

²² Kuoro sɩ bʋl wɩɩ-la fa ŋaa wʋlɩŋ nɛ, ka nyiŋ-la ma faasa lɩŋ, ʋ nyiŋgeliŋ lieri laalɩyuoro-la fa sɩ joŋ Sadɩrak, Mɛsak arɩ Abedinego a yuo hɛ nyiŋ-gel bal lɛ dɩ ba sʋʋ.

²³ Baalaa deemba batori ba sɩ chaasa vɔɔ ŋɩɩ kpɩm tel nyiŋ-gel bal-la tʋɔŋ.

²⁴ Ŋɩɩ nɛ wʋkpuŋkpere ŋaa kuoro Nebukadineza hirigi a sii fɩl aŋ pɩɛsɛ nɩalɩŋ sɩ bʋl wɩaa chɩchagɩlʋ, “Nɩaa batori dee la fa vɔɔ daha a joŋo yuo hɛ nyiŋ-bal-la lɛɛ?” Ŋɩɩ nɛ ba bʋl, “Kuoro, ŋɩɩ tɩtɩa nɛ.”

²⁵ Ʋ bʋl, “Bee na, mɩ na baalaa banɛsɛ nɛ dɩ baa gɔllɛ nyiŋ-la tʋɔŋ, ba bɩ ba vɔbɔ, ba bɩra bɩ folo ma, aŋ ka nɩ-nɛsɩmɩŋ nagɛ Wɩa tɩndaara.”

²⁶ Ŋɩɩ nɛ Nebukadineza mʋ kpagɛ nyiŋ-bal-la niiŋ aŋ kpɩa yɩrɛ, “Sadɩrak, Mɛsak arɩ Abedinego, Wɩa sɩ kɩɩ kʋŋkala tɩntɩnnaa, má kʋ lɩɩ a kɔ daha.” Ŋɩɩ nɛ Sadɩrak, Mɛsak arɩ Abedinego kʋ lɩɩ nyiŋ-la tʋɔŋ.

²⁷ Nɩalɩŋ sɩɩ beŋ ʋ tinteeŋ ba sɩ kaa kpaa leree, nɩalɩŋ sɩɩ tɩgɛ ba lɛ, nɩalɩŋ sɩɩ beŋ ba jaŋ tɩntɩŋŋaa wɩaa arɩ nɩalɩŋ sɩɩ chagɩlɛ kuoro kʋ chigiba. Ba na dɩ nyiŋ-bal-la bɩ ba yaraa liere, wɩɩkala bɩ ba nyu-pʋnaa ŋaa, ba gɛrɩ-duduosu-la bɩ die, nyiniŋ ma bɩ ba kʋŋkala lɛ ka sʋɔrɛ.

²⁸ Ŋɩɩ nɛ Nebukadineza bʋl, “Má dɛnnɛ Sadɩrak, Mɛsak arɩ Abedinego Wɩa, ʋ nɛ tɩŋ ʋ tɩndaara ʋ kʋ laa ʋ tɩntɩnnaa ta. Ba laaʋ dii nɛ a vɩa mɩ-na kuoro niiŋ aŋ sɛɩ a joŋ ba mɩɩsɩŋ ta a kɩɩ ba sɩ jaŋ to vene dɔŋ koo a kpaarɛ vene dɔŋ, dɩ ba Wɩa dee.

²⁹ Ŋɩɩ wɩaa mɩ hɛ niiŋ nɛ, nʋʋkala sɩ hɛ tintee kala lɛ koo yikoro kala nɩaa sɩ jaŋ bʋl wɩɩkala a tɩgɛ Sadɩrak, Mɛsak arɩ Abedinego lɛ, ba kɛmba kaa keri muno muno aŋ ŋmoo ba dɩɩsɩŋ lo dɩ ba pɩŋ jikpeeŋ, bɛɛ wɩaa vene dɔŋ kala tuo sɩ jaŋ wuo laa ʋ nɩaa ta ŋ-la.”

³⁰ Ŋɩɩ nɛ kuoro leŋ Sadɩrak, Mɛsak arɩ Abedinego ŋaa nɩbala Babɩlɔŋ tinteeŋ lɛ.