AMƆS 8 - WƖA TENIŊ

Tɩɩ-nɛŋ bɩɩlaa sɩ hɛ sime tʋɔŋ

¹ Wɩalɩŋ La Tɩɩna Wɩɩjarɩbakɔ sɩ joŋo dagɛmɛ arɩ duosoo tʋɔŋ nɛ ŋ-la: Tɩɩ-nɛŋ bɩɩlaa sɩ hɛ sime tʋɔŋ.

² La Tɩɩna pɩɛsɛmɛ, “Amɔs, bɛɛ kʋŋ nɛ ŋ na?” Mɩ bʋl, “Mɩ na tɩɩnɛnɛɛ sɩ bɩa nɛ a hɛ sime tʋɔŋ.” Ŋɩɩ nɛ La Tɩɩna bʋla pɩmɛ, “Mɩ nɩaa Iziral tɩŋŋaa bʋa-la yie nɛ, mɩ bɩra bɩ jaŋ joŋo chɛba.

³ Yɩɩla-la ba sɩ yie yɩɩ mɩ dɩɩ-balɩŋ lɛ, tapʋlɩɩ-la ba jaŋ mɩɩra bɩrɩmɛ yele, dɩ ba ŋmoo niiŋ a yel. Nɩaa jaŋ yʋgɛ sʋʋ a su leriŋ kala dɩ leriŋ ŋaa fʋɩɩ. Mɩ-na ma TƖƖNA Wɩɩjarɩbakɔ nɛ bʋla.”

⁴ Ŋɩɩ nɛ Amɔs bʋl, “Má jegile nɩɩ wɩɩŋ deeŋ, ma nɩalɩŋ sɩ yie kɛŋ nɩalɩŋ sɩ bɩ ba tɩtɩa lɛ wuo pɛ a jɩla tutuu, a leŋ summoo nyɩɩgɛ tinteeŋ lɛ.

⁵ Ma yie pɩɛsɛ ma tɩtɩa, ‘Chɛ bɛɛ nɛ chɛŋ-falɩŋ gbiele jaŋ bal ka dɩ la yallɛ mɩaa? Chɛɛ bɛɛ nɛ chɛ-wiesii-la chɛɛŋ jaŋ bal ka dɩ la kɛŋ mɩaa gbaŋa muuri, a hɛ kɩaa yalɩŋ, a kɛŋ sanɩaba-la sɩ bɩ zɔŋ a magɩsa gʋrɛ nɩaa?

⁶ La jaŋ wuo joŋ mɩɩ-hagɩla a yallɛ yal-haaŋ, a yɔɔ summo-la sɩ bɩ ba chɩŋŋaa wuo tiŋ dɩ ba ŋaa la yosi, dɩ ba chɩmɩŋ nɛ paala bɩ nɛntɛŋŋɛɛ yalɩŋ yie ma.’ ”

⁷ La TƖƖNA, ma Jekɔb doho nɩaa sɩ kaa ŋmoo bɔyɛ hɛ niiŋ a bʋl, “Mɩ bɩ jaŋ yʋ wɩalɩŋ ba sɩ ŋaa kʋŋkala.

⁸ Ma tinteeŋ jaŋ zigili a tɩŋ ma wʋŋaalaa wɩaa, dɩ ma nɩalɩŋ kala sɩ hɛ ʋ lɛ yel. Tintee-la kala jaŋ sii aŋ bɩra tuu pɩŋ a nagɛ Ijipiti tinteeŋ fuo-la ba sɩɩ yɩrɛ Naayɩl fa sɩ sii ŋɩɩ aŋ bɩra tuu pɩŋ.”

⁹ La Tɩɩna Wɩɩjarɩbakɔ sɩ, “Tapʋlɩɩ-la, mɩ jaŋ leŋ dɩ wɩɩpɔsʋŋ jʋʋ, dɩ leriŋ kala biri lim wɩɩhɛyɛ.

¹⁰ Mɩ jaŋ leŋ dɩ ma Wɩɩchʋɔlɛ gbielee kala bɩrɩmɛ yoho. Ma yɩɩlaa ma kala jaŋ bɩrɩmɛ yele. Ma jaŋ laalɛ tʋɔ-chei gɛnnɩŋ aŋ fʋŋ ma nyusuŋ a nagɛ nʋʋ sɩ lʋl ʋ hambolibii-bala ʋ sʋʋ ʋ yiyel. Tapʋlɩɩ-la dɩdɛrɩŋ jaŋ lɔrɛ.”

¹¹ La Tɩɩna Wɩɩjarɩbakɔ bɩra bʋla, “Bʋa kʋbala jaŋ yi dɩ mɩ leŋ dɩ losuŋ jʋʋ ma tinteeŋ. Ʋ bɩ naga kʋdiilee nɛ jaŋ nyaa koo lɩɩnyʋasʋŋ nɛ jaŋ kɛmma, ama ma jaŋ cho dɩ ma nɩɩ mɩ niiŋ wɩaa, aŋ bɩ jaŋ nɩɩ.

¹² Ma jaŋ gɔllɛ lee-kala, a chɩchɛ dɩ ma nɩɩ mɩ-na ma TƖƖNA niiŋ wɩaa, a chɩŋ wɩɩpɔsʋŋ nagʋa dɩɩrɩŋ a mʋmʋ wɩɩpɔsʋŋ dɩɩrɩŋ, a gɔllɛ tinteeŋ kala, ama ma bɩ jaŋ nɩɩ.

¹³ Bʋa-la lɛ lɩɩnyʋasʋŋ jaŋ kɛŋ ma hatol-zɔmɔ-la arɩ ma bapʋɔsɩ duoruŋ dɩ ba yiegi.

¹⁴ Ma nɩalɩŋ sɩ ta niiŋ Samarɩa koo Daŋ koo Bɛɛsɩba tinteeŋ vesiŋ lɛ, jaŋ tel a bɩra bɩ jaŋ wuo sii.”