AMƆS 7 - WƖA TENIŊ

Hɔbɔ, nyiniŋ arɩ ŋmɛŋ-la dɩɩ-saaraa sɩ kaa magɩsɛ jeeŋ a sɩsaa

¹ Wɩalɩŋ La Tɩɩna Wɩɩjarɩbakɔ sɩ joŋo dagɛmɛ a nagɛ duosoo tʋɔŋ nɛ ŋ-la: Mɩ na dɩ ʋ leŋe hɔbɩ-laalɩŋ kʋ dii baga kɩaa. Ba kɔ bʋa-la lɛ kuoro sɩ ŋaa ʋ baga kɩaa ka kʋharaa bɩra bɩɩ lɛ nɛ.

² Duoso-la tʋɔŋ mɩ na dɩ hɔbɔ-la dii kʋŋ na-kala sɩ ŋaa kʋ-laa tintee-la lɛ. Ŋɩɩ nɛ mɩ ŋmoo niiŋ a bʋl, “La Tɩɩna Wɩɩjarɩbakɔ, joŋo chɛ ŋ nɩaa. Dɩ ŋɩɩ dee, ɛɛ nɛ Jekɔb doho nɩaa jaŋ ŋaa a kɛŋ mɩɩsɩŋ? Ba bɩ wɩɩ maga.”

³ Ŋɩɩ nɛ La Tɩɩna kɛŋ ʋ tʋɔbɩɩnaa bɩrɩmɛ a bʋl, “Wɩɩ-la ŋ sɩ na bɩra bɩ jaŋ ŋaa.”

⁴ Wɩalɩŋ La Tɩɩna Wɩɩjarɩbakɔ bɩra sɩ joŋo dagɛmɛ a nagɛ duosoo tʋɔŋ nɛ ŋ-la: Mɩ na dɩ ʋ joŋ nyiniŋ dɩ ʋ kaa dɔgɩsɛ ʋ nɩaa. Nyiŋ-la dii mʋgʋ-balɩŋ sɩ faasa luŋ arɩ kʋŋkala sɩ hɛ tintee-la lɛ.

⁵ Ŋɩɩ nɛ mɩ bɩra ŋmoo niiŋ a bʋl, “La Tɩɩna Wɩɩjarɩbakɔ, mɩɩ sʋlʋŋ leŋ, dɩ ŋɩɩ dee, ɛɛ nɛ Jekɔb doho nɩaa jaŋ ŋaa kɛŋ mɩɩsɩŋ? Ba bɩ wɩɩ maga.”

⁶ La Tɩɩna Wɩɩjarɩbakɔ bɩra kɛŋ ʋ tʋɔbɩɩnaa bɩrɩmɛ a bʋl, “Wɩɩŋ deeŋ ma bɩra bɩ jaŋ ŋaa.”

⁷ La Tɩɩna bɩra leŋ mɩ na wɩɩŋ deeŋ ma a nagɛ duosoo tʋɔŋ: Mɩ na La Tɩɩna chɩŋ jeeŋ sɛmɛ a kori ŋmɛŋ-la dɩɩ-saaraa sɩ kaa magɩsɛ jeeŋ a sɩsaa.

⁸ Ŋɩɩ nɛ La Tɩɩna pɩɛsɛmɛ, “Amɔs, bɛɛ kʋŋ nɛ ŋ na?” Mɩ bʋl, “Ŋmɛnɩŋ ba sɩ kaa magɩsɛ jeeŋ a sɩsaa nɛ.” La Tɩɩna bʋl, “Bee na, mɩ kɛŋ ŋmɛŋ-la a mɩmagɩsɛ mɩ nɩaa Iziral tɩŋŋaa nɛ. Mɩ bɩra bɩ jaŋ joŋo chɛba.

⁹ Mɩ jaŋ chei ba vʋɩ-kpaarɛ lere-la kala, dɩ Iziral tɩŋŋaa Wɩɩchʋɔlɛ dɩɩsɩŋ pɩŋ jikpeeŋ. Mɩ jaŋ leŋ dɩ laalɩŋ dii Jerobuam doho nʋʋ na-kala sɩ jaŋ dii kuoruŋ.”

Amɔs arɩ Amazɩa

¹⁰ Ŋɩɩ nɛ Wɩɩsʋllɩ sɩpaalaara sɩ hɛ Bɛtɛl lɛ baa yɩrɛ Amazɩa, tɩŋ ba mʋ bʋla pɩ Iziral tinteeŋ kuoro ba sɩɩ yɩrɛ Jerobuam, “Amɔs ka chei ŋ yɩrɩŋ nɛ Iziral nɩaa tʋɔŋ. Ʋ niiŋ wʋbʋlaa jaŋ chei la tinteeŋ.

¹¹ Wɩalɩŋ Amɔs sɩɩ bʋl nɛ ŋ-la: ‘Jerobuam jaŋ sʋʋ laalɩŋ lɛ, ka dɩ ba kɛsɛ Iziral tɩŋŋaa a kaa mʋ yoŋ-baga a kagɛ ba tinteeŋ lɛ.’ ”

¹² Ŋɩɩ nɛ Amazɩa bʋla pɩ Amɔs ma, “Wɩa sɩɩ-naara, kɛŋ wɩalɩŋ ŋ sɩ na a kaa lɩɩ daha. Mɩɩra mʋ Juda tinteeŋ a bʋl ŋ Wɩa wɩaa nɩmɛ, aŋ laa ŋ time.

¹³ Bɩra sɩ́ Wɩa wɩaa bʋl Bɛtɛl lɛ. Daha nɛ kuoro chʋchʋɔlɛ Wɩa, daha nɛ la tinteeŋ Wɩa dɩɩ-balɩŋ hɛ.”

¹⁴ Amɔs bʋla pɩ Amazɩa, “Mɩ bɩ Wɩa wʋlaabʋllʋ ŋaa, mɩ bɩra bɩ Wɩa wʋlaabʋllʋ bii ma ŋaa, ama mɩ ŋaa pie-daarʋ nɛ, aŋ pɛ bibeŋ tutogusuŋ.

¹⁵ La Tɩɩna nɛ lɩɩsɛmɛ pie-daalɩŋ lɛ a bʋla pɩmɛ, ‘Mʋ bʋl mɩ wɩaa a pɩ mɩ nɩaa Iziral tɩŋŋaa.’

¹⁶ Lɛɛlɛ jegile nɩɩ wɩɩ-la La TƖƖNA sɩ bʋla. Na ŋ sɩ mɩ sɩ́ Wɩa wɩaa bʋl daha, a sɩ́ wɩaa bʋla chagɩlɛ Iziral tɩŋŋaa,

¹⁷ Ŋɩɩ wɩaa jegile nɩɩ wɩalɩŋ La Tɩɩna sɩ bʋla a tɩgɛ ŋ lɛ: ‘Ŋ haala jaŋ ŋaa hachɔrʋŋ ma tabalɩŋ lɛ, ka ba kpʋ ŋ hambolibiisiŋ arɩ ŋ toloo ma laalɩŋ lɛ, aŋ kɛŋ ŋ tinteeŋ kpaa dɔŋɔ. Ŋ ma tɩtɩa jaŋ sʋʋ tintee-la nɩaa sɩ bɩ Wɩa ka to lɛ. Ka dɩ ba kɛsɛ Iziral tɩŋŋaa kala lɩɩ ba tinteeŋ lɛ a mʋ yoŋ-baga.’ ”