AMƆS 5 - WƖA TENIŊ

Má leŋ dɩ ma tʋɔŋ chei dɩ ma bɩrɩma lɩɩ ma wʋbɔŋŋɔɔ lɛ

¹ Ma Iziral tɩmma, má jegile nɩɩ jembii-la mɩ-na Amɔs sɩ ta a tɩgɛ ma lɛ:

² “Iziral tɩmma, ma tele nɛ a bɩra bɩ wuo sii, ba vɩama ta nɛ ma pɩŋ ma tɩtɩa tinteeŋ lɛ, nʋʋkala tuo dɩ ʋ kɛmma dɩ ma sii.”

³ Wɩɩ-la La Tɩɩna Wɩɩjarɩbakɔ sɩ bʋla nɛ ŋ-la: “Dɩ Iziral tabal nɛ kɛŋ laalɩyuori-duoruŋ bʋɩ lɩɩ dɩ ba yuo laalɩŋ, ba nɩaa zɔlɔ dʋndʋŋ nɛ jaŋ mɩɩra kɔ. Dɩ ba tabie ma nɛ kɛŋ laalɩyuori-duoruŋ zɔlɔ a lɩɩ dɩ ba yuo laalɩŋ, ba nɩaa fii dʋndʋŋ nɛ jaŋ mɩɩra kɔ.”

⁴ La Tɩɩna bɩra bʋla pɩ Iziral tɩŋŋaa, “Má chɛmɛ, ŋɩɩ nɛ ma jaŋ kɛŋ mɩɩsɩŋ,

⁵ má sɩ́ Bɛtɛl mʋ a chɩchɛmɛ, a sɩ́ Gɩlɩgal ma mʋ chɩchɛ dɩ ma namɛ nɩmɛ, a sɩ́ Bɛɛsɩba ma mʋ. Ba jaŋ kɛsɛ Gɩlɩgal nɩaa mʋ dɩ ba ŋaa yosi. Bɛtɛl ma jaŋ kʋ ŋaa kʋpɛɩ.”

⁶ Má chɛ La Tɩɩna, ŋɩɩ nɛ ma jaŋ kɛŋ mɩɩsɩŋ, dɩ ŋɩɩ dee ʋ jaŋ nagɛ nyiniŋ a kʋ joŋ Josɛf doho nɩaa kala dii, ka nʋʋkala jaŋ tuo Bɛtɛl lɛ sɩ jaŋ dɩsɛ nyiŋ-la.

⁷ Ma yie kɛŋ wʋtɩtɩɩ bɩrɩmɛ wʋnyɩɛrɩŋ nɛ, aŋ gʋrɛ nɩalɩŋ kɩaa sɩ sɩma.

⁸ La TƖƖNA nɛ ŋaa chɛnwʋlaa a leŋ ba chɩŋ ba dɩchɩnaa, ʋ nɛ kɛŋ birimiŋ a bɩrɩmɛ pʋlʋmʋŋ, a bɩra kɛŋ pʋlʋmʋŋ ma a bɩrɩmɛ birimiŋ. Ʋ nɛ yie leŋ mʋgʋ-balɩŋ lɩɩŋ bɩrɩmɛ duonuŋ a nɩɩ hɛ tinteeŋ lɛ. Ʋ yɩrɩŋ nɛ La TƖƖNA.

⁹ Ʋ nɛ chei laalɩyuori babiibalaa arɩ ba dɩ-duoruŋ, a leŋ taŋ-la ba sɩ saa kɛrɛ golli pɩŋ jikpeeŋ.

¹⁰ Ma bɛrɛ nɩalɩŋ sɩɩ dii sarɩya ʋ bʋa lɛ nɛ, ma sɩɩŋ ma bɩ nɩalɩŋ sɩɩ bʋl wʋtɩtɩɩ ka su.

¹¹ Ma kɛŋ summoo jɩlaa tuu nɛ a fʋgaa laa ba mɩaa. Ŋɩɩ wɩaa ma saa dɩɩ-balaa ma nɛ, ama ma bɩ jaŋ jʋʋba a nɩɩ sɩma. Ma pɛrɛ girep tɩɩsɩŋ bagɩsɩŋ nɛ, ama ma bɩ jaŋ nyʋa ba sɩnɩŋ.

¹² Mɩ jɩŋ ŋɩɩ ma wʋcheelee arɩ wʋbɔŋŋɔɔ sɩ yʋga magɛ nɛ. Ma gʋrɛ nɩalɩŋ sɩ kɛŋ wʋtɩtɩɩ nɛ a laa kpalaa, a pɔ dɩ summoo sɩ́ kʋsɩŋŋaa laa sarɩya dɩ-diiliŋ.

¹³ Ŋɩɩ wɩaa, bʋa deeŋ lɛ wɩaa sɩ lɔrɔ ŋ-la, nɩɩ-la kala sɩ kɛŋ wʋjɩmɩŋ jaŋ tɔrɛ ʋ niiŋ.

¹⁴ Dɩ ma nɩɩ chɛ dɩ ma kɛŋ mɩɩsɩŋ, má ŋɩŋaa wʋzɔŋŋɔɔ aŋ leŋ wʋbɔŋŋɔɔ. Ŋɩɩ nɛ La Tɩɩna doluŋ kala Tɩɩna jaŋ chɩŋ ma harɩŋ arɩ ma sɩ sɩ ʋ chɩŋ ma harɩŋ ŋɩɩ.

¹⁵ Má bɛrɛ wʋbɔŋŋɔɔ, aŋ cho wʋzɔŋŋɔɔ, a leŋ dɩ wʋtɩtɩɩ chaasa chɩŋ ma sarɩya dɩ-diilee. Kapo La TƖƖNA doluŋ kala Tɩɩna jaŋ fá ma Josɛf doho nɩkaanaa nenige.

¹⁶ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Ma jaŋ nɩɩ dɩ baa ŋmoo niiŋ womporunuŋ arɩ bilii kala lɛ. Ba jaŋ paala yɩrɛ paaraa dɩ ba kʋ pɛ gɔgɔɔ lɛ dɩ ba yel kɩŋkɛŋ.

¹⁷ Ba jaŋ yele su girep tɩɩsɩŋ bagɩsɩŋ kala. Wɩɩŋ deeŋ jaŋ ŋaa a tɩŋ mɩ sɩ jaŋ kʋ dɔgɩsɛma wɩaa. Mɩ-na ma Tɩɩna nɛ bʋla.”

Tapʋlɩɩ-la La TƖƖNA sɩ jaŋ dii nɩaa sarɩya

¹⁸ Maa gbɛrɛ tapʋlɩɩ-la La Tɩɩna sɩ jaŋ kʋ dii nɩaa sarɩya nɛ, ama tapʋlɩɩ-la jaŋ lɔrɔ pɩma. Bɛɛ nɛ tɩɩ maa gbɛrɛ La TƖƖNA tapʋlɩɩ-la? Tapʋlɩɩ-la, leriŋ kala jaŋ biri, pʋlʋmʋŋ jaŋ tuo.

¹⁹ Ʋ jaŋ nagɛ nʋʋ sɩ fá kagɛ naachigiŋ lɛ a mɩɩra mʋ jʋʋ lʋgʋmʋŋ niiŋ, koo a nagɛ nʋʋ sɩ jʋʋ dɩa a joŋ ʋ nɩsɩŋ tɩgɛ jeeŋ, dɩmɩŋ kaa dɩŋ nɛ.

²⁰ Tapʋlɩɩ-la La TƖƖNA sɩ jaŋ dii nɩaa sarɩya, leriŋ jaŋ chaasa biri lim. Pʋlʋmʋŋ mʋa ma bɩ jaŋ hɛ nɩmɛ.

²¹ La TƖƖNA sɩ, “Mɩ bɛrɛ ma Wɩɩchʋɔlɛ gbieli-la nɛ, mɩ sɩɩŋ bɩ baa su. Mɩ mɩɩsɩŋ fɩɩ ŋɩɩ ma sɩ yie hilimi a dɩdɛnnɛmɛ nɛ.

²² Mɩ bɩ jaŋ laa ma kʋnyɩgaa Wɩɩsʋlʋŋ arɩ ma mɩaa Wɩɩsʋlʋŋ. Mɩ bɩ pʋŋ-nɛrɛɛ-la ma sɩ yie kpʋ a sʋl nii-magɛ dɔŋɔ Wɩɩsʋlɩɩ-la ma ka chɛ.

²³ Má leŋ ma yɩɩlaa goŋ-la, mɩ bɩ jaŋ jegili ma chenni-la ma sɩɩ du.

²⁴ Má leŋ dɩ ma wʋtɩtɩɩ nagɛ fuoŋ sɩɩ pɛllʋ, dɩ tʋɔpʋla ma nagɛ fuoŋ lɩɩŋ sɩ bɩ hʋ.

²⁵ Iziral tɩmma, mɩ sɩ kɛmma gɔllɛ tintee-hɩlɩŋ lɛ jɩsɩŋ mahɩŋ balɩa-la, ma bɩ pʋsʋŋ kpʋa a ŋaa Wɩɩsʋlʋŋ pɩmɛ koo a kɛŋ Wɩɩsʋlʋŋ kɩaa kʋ pɩmɛ.

²⁶ Ma mɛ vesiŋ balɩa nɛ pɩ ma tɩtɩa a kpʋkpaarɛ. Dɔŋɔ yɩrɩŋ nɛ Sakuf, kʋ-la ma sɩ kaa yɩrɛ ma kuoro. Dɔŋɔ ma yɩrɩŋ nɛ Kaɩwaŋ, kʋ-la ma sɩ mɛ ʋ nagɛ chɛnwʋlʋŋ.

²⁷ Ŋɩɩ wɩaa ma jaŋ pɛ paa ma vesi-la dɩ mɩ nɛ kɛmma mʋmʋ yoŋ-baga a kieli tabal-la ba sɩɩ yɩrɛ Damasɩkʋs,” La Tɩɩna nɛ bʋla, ʋ yɩrɩŋ nɛ Wɩa doluŋ kala Tɩɩna.