AMƆS 4 - WƖA TENIŊ

Iziral tɩŋŋaa ha bɩ Wɩa teeŋ mɩɩra kɔ

¹ La Tɩɩna sɩ, “Ma haala-la sɩ hɛ Samarɩa lɛ, a nɛrɛ nagɛ nɛsɩ-la sɩ hɛ Samarɩa peelee nyuŋ pʋsʋŋ dɩ-diiliŋ, lee-la ba sɩɩ yɩrɛ Basaŋ, má jegile nɩɩ wɩɩŋ deeŋ: Ma nɛ nɩalɩŋ sɩ dɔgɩsɛ summoo, aŋ kɛŋ nɩalɩŋ sɩ bɩ ba tɩtɩa lɛ wuo pɛ a jɩlaa tuu, aŋ yie bʋla pɩ ma balaba, ‘Má pɩla sɩnɩŋ.’

² Mɩ-na ma Tɩɩna Wɩɩjarɩbakɔ ŋmɩɛsa nɛ mɩ yɩrɩ zɔmʋŋ lɛ: Bʋa kʋbala jaŋ yi dɩ ba kɛŋ gbɩamba kɛsɛma a nagɛ ba sɩ yie kɛŋ chenfilee ŋɩɩ.

³ Ba jaŋ kɛmma lɛrɛ to ma taŋ jeye-la bʋɔsʋŋ a lɩɩ to Hamɔŋ tinteeŋ dɩɩrɩŋ. Mɩ-na ma Tɩɩna nɛ bʋla.”

⁴ La Tɩɩna bɩra sɩ, “Ma-na Iziral tɩŋŋaa, má mʋ Bɛtɛl arɩ Gɩlɩgal a ŋaa wʋbɔŋŋɔɔ, a fɩɛsɛ sɩɩŋ a vɩvɩa mɩ niiŋ, ma wʋbɔŋŋɔɔ ka chʋɔrʋ nɛ. Má kpʋ pʋsʋŋ sʋl Wɩɩsʋlʋŋ chʋchʋa na-kala, a kɛŋ ma kɩaa kpaa leree fii jɩsɩŋ batori na-kala a joŋ kʋbala pɩmɛ.

⁵ Má nyɩgɛ boroboro-la sɩ kɛŋ sɩbʋrʋŋ a sʋl Wɩɩsʋlʋŋ, a kɛŋ ma tʋɔtɔrɛ Wɩɩsʋlʋŋ kɩaa ma sʋl Wɩɩsʋlʋŋ aŋ ŋmoo ma bɔɩsɩŋ lɛ. Wʋbɔmɔ-la ma Iziral tɩŋŋaa sɩ cho dɩ maa ŋaa nɛ ŋɩɩ. Mɩ-na ma Tɩɩna Wɩɩjarɩbakɔ nɛ bʋla.

⁶ Mɩ nɛ leŋe losuŋ jʋʋ ma tabalaa arɩ ma tabiisiŋ kala, ka ma ha vɩamɛ. Mɩ-na ma Tɩɩna nɛ bʋla.

⁷ Ʋ sɩ ka chɛnsɩŋ batori ka dɩ ma ŋaa ma baga kɩaa, mɩ bɩ leŋe duonuŋ nɩɩ. Bʋa dɔŋɔ lɛ mɩ yie leŋ ʋ nɩɩ taŋ dɔŋɔ lɛ aŋ bɩ dɔŋɔ lɛ nɩa. Mɩ yie leŋ ʋ nɩɩ baga dɔŋɔ lɛ, aŋ bɩ dɔŋɔ ma lɛ nɩa, ʋ kɩaa kala sʋʋ.

⁸ Nɩaa yie lɩɩ tasɩŋ dɔnsʋŋ lɛ a baara mʋ taŋ-la sɩ kɛŋ lɩɩŋ a chɩchɛ dɩ ba nyʋa, aŋ bɩ na nyʋa vʋvɔgɛ. Ka ma ha vɩa dɩ ma mɩɩra kɔ mɩ teeŋ. Mɩ-na ma TƖƖNA nɛ bʋla.

⁹ Mɩ leŋe hɩlɩŋ chɩŋ nɛ ma bagɩsɩŋ lɛ, ma ŋmaŋkaanɩŋ arɩ ma girep tɩɩsɩŋ bagɩsɩŋ kala lɛ, ma kʋduuloo kala hɩl. Hɔbɔ dii ma tutogusuŋ arɩ ma olif tɩɩsɩŋ kala, ka ma ha vɩa dɩ ma mɩɩra kɔ mɩ teeŋ.”

¹⁰ La Tɩɩna bɩra sɩ, “Mɩ joŋ nyanyal bɔŋŋɔɔ hɛ ma lɛ nɛ arɩ mɩ fa sɩ ŋaa ŋɩɩ Ijipiti tɩŋŋaa lɛ. Mɩ kpʋ ma bapʋɔsaa nɛ laalɩŋ lɛ aŋ leŋ ba kɛsɛ ma janɩŋ, mɩ leŋ sʋʋnʋŋ sʋɔra su ma bugoo kala, ka ma ha vɩa dɩ ma mɩɩra kɔ mɩ teeŋ.

¹¹ Mɩ chei ma dɔnsʋŋ arɩ mɩ fa sɩ chei tasɩ-la ba sɩɩ yɩrɛ Sodom arɩ Gomora ŋɩɩ nɛ. Ma fa nagɛ daasɩŋ sɩɩ dii nyiniŋ nɛ, mɩ kɛmma tɩɛrɛ nyiŋ-la lɛ. Ka ma ha vɩa dɩ ma mɩɩra kɔ mɩ teeŋ. Mɩ-na ma Tɩɩna nɛ bʋla.

¹² Ŋɩɩ wɩaa, mɩɩ chɛ dɩ mɩ dii ma sarɩya nɛ Iziral tɩmma. Má ŋaa siri a cheŋ mɩ-na ma Wɩa.

¹³ Má bee na, mɩ nɛ ŋaa peelee arɩ peliŋ, a kɛŋ mɩ tʋɔbɩɩnaa a dagɛ nuhuobiine. Mɩ nɛ yie ŋaa taŋ biri, aŋ vɩvɛŋ peelee nyuŋ. Mɩ yɩrɩŋ nɛ ma Tɩɩna Wɩa doluŋ kala Tɩɩna.”