AMƆS 3 - WƖA TENIŊ

Pɛ-naara-la ba sɩ yɩra a tɩgɛ Iziral tɩŋŋaa lɛ

¹ Iziral tɩmma, má jegile nɩɩ wɩɩ-la La Tɩɩna sɩ bʋla a tɩgɛ ma lɛ, ma tintee-la kala nɩaa ʋ sɩ kaa kʋ lɩɩ Ijipiti tinteeŋ lɛ,

² Ʋ sɩ, “Tinteye-la kala sɩ hɛ dʋnɩa lɛ, ma dʋndʋŋa nɛ mɩ lɩɩsɛ. Ŋɩɩ wɩaa nɛ tɩɩ mɩ jaŋ dɔgɩsɛma a tɩŋ ma wʋbɔŋŋɔɔ wɩaa.

³ Nɩaa balɩa jaŋ wuo to dɔŋɔ dɩ ba niiŋ nɛ bɩ kʋbala ŋaa?

⁴ Naachigiŋ jaŋ huhuosi duuŋ tʋɔŋ dɩ ʋ nɛ bɩ ʋ kʋdiiliŋ naa? Ʋ jaŋ hʋhʋʋnɛ ʋ dɩpɩnɩŋ dɩ kʋŋ dee ʋ kaa didii?

⁵ Bɛrɛ́ jaŋ wuo kɛŋ diibie tinteeŋ lee-la ba sɩ bɩ bɛrɛ́ hɛɛ? Bɛrɛ́ jaŋ wuo yuo, dɩ kʋŋ dee bɩ nʋɔsa dɩ ʋ kɛnʋ?

⁶ Ba jaŋ wuo ŋmʋʋ laalɩŋ banyile taŋ lɛ ka fawʋllʋŋ bɩ nɩaa ka kɛŋ? Wʋlɔrʋŋ jaŋ wuo ŋaa taŋ lɛ, dɩ mɩ-na ma Tɩɩna dee bɩ kaa kɔ?

⁷ Wɩɩ na-kala mɩ-na ma Tɩɩna Wɩɩjarɩbakɔ sɩ bɩɩna dɩ ma ŋaa, mɩ yie leŋ mɩ tɩntɩnna-la sɩ ŋaa mɩ wʋlaabʋllaa jɩŋ nɛ.

⁸ Dɩ naachigiŋ nɛ huoso, kʋbɛɛ nɛ fawʋllʋŋ bɩ jaŋ kɛŋ? Dɩ mɩ-na ma Tɩɩna Wɩɩjarɩbakɔ nɛ bʋl wɩaa, nʋʋkala bɩ wɩalɩŋ wuo laa tɔrɔ.

⁹ Amɔs, heele bʋla pɩ Asɩdɔd sɩpaalaaraa arɩ Ijipiti sɩpaalaaraa-la, ‘Má kala kʋ hilimi Samarɩa peele-la nyuŋ, a na wɩaa sɩ faasa vʋgʋmɛ ŋɩɩ nɩmɛ arɩ wʋbɔmɔ-la ba sɩɩ ŋaa.’

¹⁰ Ba paala bɩ wɩaa ba bʋa lɛ ŋaanɩŋ jɩŋ. Yuosuŋ nɛ ba yuo a gurigo laa nɩaa kɩaa a su ba dɩɩ-duoruŋ.

¹¹ Ŋɩɩ wɩaa, wɩɩ-la mɩ-na ma Tɩɩna Wɩɩjarɩbakɔ bɩra sɩ bʋla nɛ ŋ-la: Dʋndɔŋŋɔɔ jaŋ kʋ golli ba tinteeŋ chu, a chei ba dɩ-duoruŋ kala aŋ jʋʋ paa dʋa-la sɩ hɛ ba dɩɩ-duoruŋ lɛ.”

¹² Ŋ-la nɛ La Tɩɩna bɩra bʋl: “Ŋ jɩŋ pie-daara sɩ lorigo laa piese naasɩŋ haŋgbelee balɩa koo dɩgɩlɩŋ naachigiŋ niiŋ lɛ ŋɩɩ, ŋɩɩ tɩtɩa nɛ ba jaŋ lorigo laa Iziral tɩŋŋaa, nɩalɩŋ sɩ hɛ Samarɩa lɛ a hɔŋ kɩaa tɩŋŋaa kʋpɩnaa niipinee lɛ arɩ kumpuŋŋuba nyuŋ.”

¹³ La Tɩɩna Wɩa doluŋ kala Tɩɩna bɩra sɩ, “Má jegile nɩɩ wɩɩ-la mɩ sɩ jaŋ joŋo ŋaa Jekɔb doho nɩaa lɛ.

¹⁴ Tapʋlɩɩ-la mɩ sɩ jaŋ tɩŋ Iziral tɩŋŋaa wʋbɔŋŋɔɔ wɩaa a dɔgɩsɛba, mɩ jaŋ chei Wɩɩsʋllɩ korunu-la sɩ hɛ Bɛtɛl lɛ. Koru na-kala gʋnaa jaŋ boro tel tinteeŋ.

¹⁵ Mɩ jaŋ ŋmoo dɩɩsɩ-la ba sɩ saa yɩ-biiniŋ arɩ tafaaŋ a lo. Dɩɩsɩ-la kala ba sɩ kɛŋ batu-nyɩlaa kpɩɛrɛ arɩ dɩɩ-bala-la, mɩ jaŋ chei ba kala. Mɩ-na ma Tɩɩna nɛ bʋla.”