AMƆS 1 - WƖA TENIŊ

¹ Wɩalɩŋ Amɔs sɩ na arɩ duosoo tʋɔŋ a bʋla tɩgɛ Iziral lɛ nɛ ŋ-la. Amɔs fa ŋaa taŋ-la ba sɩɩ yɩrɛ Tɛkʋa pie-daaraa dɔŋɔ nɛ. Bʋa-la lɛ dɩ baal kʋbala baa yɩrɛ Uzia nɛ ŋaa Juda tinteeŋ kuoro, ka Jerobuam nanʋala Jehuas ma ŋaa Iziral tinteeŋ kuoro. Ʋ sɩ bʋl wɩalɩŋ, jɩsɩŋ balɩa nɛ bala ka tinteeŋ-na zigili.

² Amɔs fa bʋla: “La TƖƖNA jaŋ tʋɔra lɩɩ Zaayɔŋ lɛ, a dɔmɔ lɩɩ Jerusalɛm lɛ. Piesee dɩ-diilee yaŋ kala jaŋ hɩl, dɩ peel-la ba sɩɩ yɩrɛ Kamɛl ma nyuŋ yaŋ hɩl.”

La Tɩɩna jaŋ dii tinteye-la sɩ kpagɛ Iziral sarɩya

³ Wɩɩ-la La TƖƖNA sɩ bʋla nɛ ŋ-la: “Mɩ bɩ jaŋ leŋ dɩ mɩ baanɩŋ fɩɛlɛ, mɩ jaŋ dɔgɩsɛ Damasɩkʋs nɩaa, a tɩŋ ba wʋbɔŋ dandaŋ-la wɩaa. Ba nɛ ŋmoo Gɩlɩad tɩŋŋaa a nagɛ ba sɩɩ ŋmoo mɩaa ŋɩɩ.

⁴ Mɩ jaŋ joŋ nyiniŋ hɛ dɩ ʋ dii kuoro Hazɛɛl dɩa a joŋ nyiniŋ hɛ dɩ ʋ dii kuoro Bɛŋ-Hadad ma dɩɩ-duoruŋ.

⁵ Mɩ jaŋ ŋmoo Damasɩkʋs boi-baalɩŋ lo, aŋ chei nɩalɩŋ sɩ hɛ Avɛŋ fuonaaŋ lɛ (Avɛŋ bʋbʋɔŋ nɛ wʋbɔŋŋɔɔ), a chei nɩɩ-la ma sɩɩ beŋ taŋ-la ba sɩɩ yɩrɛ Bɛf Ɛdɛŋ. (Bɛf Ɛdɛŋ bʋbʋɔŋ nɛ tʋɔtɔrʋŋ dɩa.) Ba jaŋ yuo kɛsɛ Siiria tɩŋŋaa a kaa mʋ yoŋ-baga Kɩɩ tinteeŋ.” La Tɩɩna nɛ bʋla.

⁶ Ŋ-la nɛ La TƖƖNA bɩra bʋl: “Mɩ bɩ jaŋ leŋ dɩ mɩ baanɩŋ fɩɛlɛ, mɩ jaŋ dɔgɩsɛ Gaza nɩaa a tɩŋ ba wʋbɔŋ dandaŋ-la wɩaa. Ba kɛsɛ ta-pilimee nɩaa nɛ a yalla pɩ Ɛdɔm tɩŋŋaa ba ŋaa yosi.

⁷ Mɩ jaŋ joŋ nyiniŋ hɛ dɩ ʋ dii Gaza jeyee arɩ ʋ dɩɩ-duoruŋ.”

⁸ La TƖƖNA Wɩɩjarɩbakɔ bɩra bʋla, “Mɩ jaŋ chei taŋ-la ba sɩɩ yɩrɛ Asɩdɔd nɩaa arɩ nɩɩ-la ma sɩɩ beŋ taŋ-la ba sɩɩ yɩrɛ Asɩkɛlɔŋ. Mɩ jaŋ dɔgɩsɛ nɩalɩŋ sɩ hɛ taŋ-la ba sɩɩ yɩrɛ Ɛkʋrɔŋ lɛ ŋɩɩ halɩɩ, dɩ Fɩlɩsɩtɩa tɩŋŋaa nɩkaana-la sʋʋ dɛrɛ.”

⁹ Wɩɩ-la La TƖƖNA bɩra sɩ bʋla nɛ ŋ-la: “Mɩ bɩ jaŋ leŋ dɩ mɩ baanɩŋ fɩɛlɛ, mɩ jaŋ dɔgɩsɛ Taaya nɩaa a tɩŋ ba wʋbɔŋ dandaŋ-la wɩaa. Ba kɛsɛ ta-pilimee nɩaa nɛ a yalla pɩ Ɛdɔm tɩŋŋaa ba ŋaa yosi, aŋ bɩ naambii nii-la sɩ hɛ ʋ dɩ ba pɛgɛ kaa tɩŋ.

¹⁰ Mɩ jaŋ joŋ nyiniŋ a hɛ taŋ-la ba sɩɩ yɩrɛ Taaya jeyee lɛ, dɩ ʋ dii ʋ dɩɩ-duoruŋ.”

¹¹ Wɩɩ-la La Tɩɩna sɩ bʋla nɛ ŋ-la: “Mɩ bɩ jaŋ leŋ dɩ mɩ baanɩŋ fɩɛlɛ, mɩ jaŋ dɔgɩsɛ Ɛdɔm nɩaa a tɩŋ ba wʋbɔŋ dandaŋ-la wɩaa. Ba baanɩŋ sɩ sie a faasa hosi, ba bɩ wuo kɛŋ ba tɩtɩa aŋ kire to kpʋ ba naambiiriŋ Iziral tɩŋŋaa a bɩ ba nenige fá.

¹² Mɩ jaŋ joŋ nyiniŋ hɛ dɩ ʋ dii tasɩ-la ba sɩɩ yɩrɛ Tɛmaŋ arɩ Bozira dɩɩ-duoruŋ kala.”

¹³ Wɩɩ-la La Tɩɩna bɩra sɩ bʋla nɛ ŋ-la: “Mɩ bɩ jaŋ leŋ dɩ mɩ baanɩŋ fɩɛlɛ, mɩ jaŋ dɔgɩsɛ Amɔŋ nɩaa a tɩŋ ba wʋbɔŋ dandaŋ-la wɩaa. Ba sɩɩ yuo laalɩŋ dɩ ba kɛŋ ba tinteeŋ bʋa jallɛ pɛ, ŋɩɩ nɛ ba kɛsɛ Gɩlɩad tɩŋŋaa hapuugoo a kpɛrɛ chaarɛ ba biiriŋ ta.”

¹⁴ La Tɩɩna bɩra sɩ, “Mɩ jaŋ joŋ nyiniŋ hɛ dɩ ʋ dii taŋ-la ba sɩɩ yɩrɛ Raba jeyee arɩ ʋ dɩɩ-duoruŋ. Tapʋlɩɩ-la ba dʋndɔŋŋɔɔ jaŋ ŋaa laalɩyuoru goŋ, aŋ tɔba hɛ a nagɛ pel-vinvilimiŋ a yuoba.”

¹⁵ La Tɩɩna sɩ, “Ba jaŋ kɛŋ ba kuoro arɩ ʋ nɩhɩasɩŋ kala kaa mʋ yoŋ-baga.”