3 Jɔɔŋ 1 - WƖA TENIŊ

¹ Mɩ-na Wɩa dɩa nɩhɩaŋ nɛ ŋmʋnsɛ teniŋ deeŋ pɩpɩ ŋ-na Gayas, mɩ nandɔŋ-la mɩ sɩ cho woruŋ.

² Mɩ nandɔŋ-choolii, mɩ Wɩɩsʋlʋŋ nɛ dɩ wɩaa vɛŋ woruŋ a pɩŋ dɩ ŋ kɛŋ yarɩfɩɛlaa a nagɛ wɩaa sɩ zɔmɔ pɩŋ ŋ dɩma lɛ ŋɩɩ.

³ Mɩ tʋɔŋ tɔrɔ nɛ woruŋ la naambiiriŋ sɩ lɩɩ wombiiŋ kʋ bʋla pɩmɛ ŋɩɩ ŋ sɩ kɛŋ wʋtɩtɩɩ a tuto wʋtɩtɩɩ-la. Mɩ jɩma ŋɩɩ nɛ ŋ vɛnɛɛ ŋaa.

⁴ Wɩɩkala bɩ leŋe mɩ tʋɔŋ tɔrɛ kɩŋkɛŋ a magɛ mɩ sɩ nɩa arɩ mɩ biiriŋ ka to wʋtɩtɩɩ wombii-la.

Jɔɔŋ bɛsɛ Gayas lɛ

⁵ Mɩ nandɔŋ-choolii, ŋ kɛŋ wʋtɩtɩɩ nɛ arɩ wɩalɩŋ ŋ sɩ ŋaa pɩpɩ ŋ dɔnsʋŋ tɩmma-la sɩ laa Yesu wɩaa dii, arɩ ba sɩ ŋaa nʋhʋɔraa ma kala ŋ teeŋ.

⁶ Ba bʋl ŋɩɩ ŋ sɩ cho nɩaa a pɩ la nɩalɩŋ sɩ laa Yesu wɩaa dii aa hilimi. Ʋ maga dɩ ŋ hɛ doluŋ aŋ pɛ ba lɛ arɩ kɩalɩŋ ba sɩɩ chɛ dɩ ba kaa vɛŋ wombiiŋ. Ŋaa ŋɩɩ sɩ jaŋ leŋ dɩ Wɩa tʋɔŋ tɔrɛ,

⁷ bɛɛ wɩaa ba lɩɩ ba dɩɩsɩŋ lɛ dɩ ba tɩŋ Kirisito tɩntɩŋŋaa nɛ. Ba vɩa dɩ ba laa kʋŋkala nɩalɩŋ sɩ bɩ Wɩa wɩaa laa dii teeŋ nɛ.

⁸ Ʋ maga dɩ la nɩalɩŋ sɩ laa Wɩa wɩaa dii nɛ pɛ nɩaa deemba lɛ. Dɩ la nɛ ŋaa ŋɩɩ, ʋ naga la ma pɛ ba lɛ nɛ ŋɩɩ wʋtɩtɩɩ wombii-la tɩntɩŋŋaa lɛ.

Dayɔtɩfɩs bɩ woruŋ ŋaa

⁹ Mɩ laa sɩpaaŋ ŋmʋnsɛ teniŋ a pɩ ma nɩalɩŋ sɩ laa Yesu wɩaa dii aa hilimi. Ama baal kʋbala ba sɩɩ yɩrɛ Dayɔtɩfɩs hɛ ma tʋɔŋ a fa cho dɩ ʋ ŋaa ma kʋhɩaŋ. Ʋ joŋ harɩŋ yɩa wɩɩ-la mɩ sɩ bʋla nɛ.

¹⁰ Dɩ mɩ nɛ kɔ, mɩ jaŋ bʋl wɩalɩŋ kala ʋ sɩɩ ŋaa a tɩgɛ la lɛ a pɩma. Ʋ yie gɩgaa la harɩŋ a chichei la yɩrɩŋ. Ŋɩɩ ma dʋndʋŋa dee, la naambiiri-la sɩ ŋaa nʋhʋɔraa, dɩ ba nɛ kɔ, ʋ bɩ ba woruŋ ka kɛŋ, aŋ bɩra pɔ nɩalɩŋ ma sɩɩ chɛ dɩ ba kɛmba woruŋ, dɩ ba sɩ́ ŋɩɩ ŋaa. Dɩ ba nɛ vɩa aŋ ŋaa ŋɩɩ, ʋ yie kiriba ta nɛ nɩalɩŋ sɩ laa Yesu wɩaa dii aa hilimi tʋɔŋ.

¹¹ Mɩ nandɔŋ choolii, sɩ́ nɩalɩŋ sɩɩ ŋaa wʋbɔŋŋɔɔ chesu. Ama chichesi nɩalɩŋ sɩɩ ŋaa wʋzɔŋŋɔɔ. Nɩɩ-la kala sɩɩ ŋaa wʋzɔŋŋɔɔ ŋaa Wɩa bii nɛ. Nɩɩ-la ma kala sɩɩ ŋaa wʋbɔŋŋɔɔ, ʋ tɩɩna bɩ Wɩa jɩŋ.

¹² Baal-la ma ba sɩɩ yɩrɛ Dɛmɩɩtɩas ŋaa nɩzɔŋ nɛ. Nʋʋkala bʋbʋl ʋ wɩaa woruŋ. Ʋ wʋŋaalaa ma tɩtɩa dagɛ ŋɩɩ ʋ sɩɩ to wʋtɩtɩɩ lɛ. La maa bʋl ʋ wʋzɔŋŋɔɔ wɩaa nɛ. Ma jɩma arɩ wɩalɩŋ kala mɩ sɩɩ bʋl ŋaa wʋtɩtɩɩ nɛ.

Chʋɔlaa

¹³ Mɩ kɛŋ wɩaa yʋgɛ nɛ aa chɛ dɩ mɩ bʋla pɩŋ. Ama mɩ bɩ chɛ dɩ mɩ ŋmʋnsɛ ba kala teniŋ tʋɔŋ.

¹⁴ Mɩɩ chɛ dɩ mɩ kɔ ŋ teeŋ nɛ ʋ bɩ dieni, dɩ la hɔnɔ bʋl wɩaa.

¹⁵ Ŋ jaŋ hɔŋ arɩ yarɩfɩɛlaa. Ŋ nandɔnsʋŋ kala sɩ hɛ daha ka chʋɔlʋŋ. Ŋ ma chʋɔlɛ la nandɔnsʋŋ kala sɩ hɛ nɩmɛ pɩla.