2 Timoti 4 - WƖA TENIŊ

¹ Mɩɩ sʋlʋŋ Wɩa arɩ Kirisito kala sɩpaaŋ, nɩɩ-la sɩ jaŋ dii nɩweyee arɩ nɩsʋʋnʋŋ kala sarɩya. Ʋ jaŋ mɩɩra kɔ a dii kuoruŋ, ŋɩɩ wɩaa

² bʋl Wɩa wɩaa pɩpɩ nɩaa bʋa na-kala lɛ, dɩ wɩaa zɔmɔ koo dɩ ba lɔrɔ. Kɛmba tʋra kɩɩ, bʋl ba teeŋ, aŋ ŋaa dɩ ba nyuŋ nyaasɛ. Kɛŋ kenyiri a jɩma dɩdagɛba woruŋ.

³ Ŋaa ŋɩɩ, bɛɛ wɩaa bʋa kʋbala jaŋ yi, nɩaa bɩ jaŋ jegili Wɩa wʋtɩtɩɩ-la ba sɩ jaŋ dagɛba. Ama ba jaŋ to ba tɩtɩa tʋɔtɔrʋŋ lɛ a chɛ kɛsɛ kerichiba yʋgɛ sɩ jaŋ dɩdagɛba wɩalɩŋ ba sɩ cho dɩ ba nɩa.

⁴ Ba jaŋ joŋ harɩŋ yɩa wʋtɩtɩɩ-la aŋ cho dɩ baa nɩɩ sʋnsɔgʋlɔɔ.

⁵ Ama ŋ-na hɛ doluŋ a kɛŋ ŋ tɩtɩa woruŋ wɩɩ na-kala lɛ. Dɩ hɛɛŋ nɛ jʋʋŋ ma, nyalɩmɛ. Ŋ sɩ ŋaa Wɩa tɩntɩnnʋ ŋɩɩ, bʋl Yesu wʋzɔmɔ-la a pɩ nɩaa a tɩŋ ŋ tɩntɩmɩɩ-la kala woruŋ.

Pɔɔl bʋl wɩaa a tɩgɛ ʋ tɩtɩa lɛ

⁶ Bʋa-la lɛ Wɩa sɩ jaŋ laa mɩ mɩɩsɩŋ yie nɛ.

⁷ Mɩ yuo laalɩ-zɔŋ-la nɛ woruŋ. Mɩ fá mɩ fanɩŋ dɛrɛ nɛ. Mɩ chɩŋ wɩalɩŋ mɩ sɩ laa dii lɛ nɛ.

⁸ Lɛɛlɛ, La Tɩɩna Yesu sɩ ŋaa sarɩya diiru-la sɩ kɛŋ wʋtɩtɩɩ, ʋ ŋaa tʋɔpʋl kuoru nyunchuulo nɛ a bil dɩ ʋ joŋo siilimi, tapʋlɩɩ-la ʋ sɩ jaŋ mɩɩra kɔ. Mɩ dʋndʋŋa dee ʋ jaŋ ŋaa ŋɩɩ pa, ama nɩalɩŋ kala sɩ chou a gbɛrʋ dɩ ʋ mɩɩra kɔ, ba ma jaŋ laa ba siilee.

⁹ Hɛ doluŋ aŋ kɔ mɩ teeŋ lɩma,

¹⁰ bɛɛ wɩaa Dɩmas vɩamɛ nɛ. Ʋ cho dʋnɩa kɩaa nɛ. Ŋɩɩ nɛ tɩɩ ʋ vɩamɛ ta aŋ mʋ Tɛsalonaaka. Kɩrɛsɩsɛŋ ma mʋ Galiisia, Taatɩs ma mʋ Dalɩmatɩa.

¹¹ Luuk dʋndʋŋa nɛ hɛ mɩ teeŋ. Dɩ ŋ nɩɩ kɔ mɩ teeŋ, pɛ kɛŋ Maak kaa kɔ. Ʋ jaŋ wuo pɛ mɩ lɛ a yʋgɛ.

¹² Mɩ tɩŋ baal-la ba sɩɩ yɩrɛ Takɩkas nɛ ʋ mʋ Ɛfɛsɩs.

¹³ Dɩ ŋ nɩɩ kɔ, pɛ kɛŋ mɩ gɛrɩ-la arɩ mɩ tenni-la kaa kɔ. Mɩ joŋo pɩ baal-la ba sɩɩ yɩrɛ Kaapɩs nɛ a hɛ Tʋrɔwas lɛ. Tenni-la ba sɩ kɛŋ pʋsʋŋ puruŋ kaa ŋaa nɛ mɩ wasa chɩchɛ.

¹⁴ Libiru kʋbala ba sɩɩ yɩrɛ Alɛkɩzanda dɔgɩsɛmɛ nɛ woruŋ. Ʋ sɩ ŋaamɛ ŋɩɩ, Wɩa jaŋ fɩsɛ ʋ puruŋ.

¹⁵ Pɔ ŋ tɩtɩa arɩ libiru-la lɛ, bɛɛ wɩaa la sɩ bʋl Wɩa niiŋ wɩalɩŋ pɩ nɩaa, ʋ lɩɩ la harɩŋ nɛ.

¹⁶ Bʋa-la lɛ mɩ sɩ laa sɩpaaŋ bʋl wɩaa dɩ mɩ laa mɩ tɩtɩa, ba sɩɩ diimi sarɩya, nʋʋkala bɩ mɩ harɩŋ chɩna. Ba kala vɩamɛ ta nɛ. Mɩɩ sʋl Wɩa dɩ ʋ sɩ́ ba dɔgɩsʋ a tɩŋ wɩalɩŋ ba sɩ ŋaa wɩaa.

¹⁷ Ama Wɩa chɩŋ mɩ harɩŋ nɛ a pɩmɛ doluŋ mɩ wuo bʋl Wɩa niiŋ wɩalɩŋ kala. Mɩ bʋl wɩalɩŋ a pɩ nɩalɩŋ sɩ bɩ Juu tɩŋŋaa ŋaa nɛ. Wɩa lɩɩsɛmɛ nɛ nɩbɔŋŋɔɔ nɩsɩŋ lɛ.

¹⁸ Wɩa jaŋ lɩɩsɛmɛ wʋbɔŋŋɔɔ kala lɛ. Ʋ jaŋ bemmi woruŋ a kɛmmɛ joiiŋ kaa mʋ hɛ ʋ kuorii-la tʋɔŋ Wɩa-jaŋ lɛ. Wɩa yɩrɩŋ jaŋ yɩrɛ bʋa na-kala lɛ, a kaa mʋ wuu. Amɩɩ.

Chʋɔlaa

¹⁹ Chʋɔlɛ Pɩrɩsɩla arɩ Akuila pɩmɛ, a chʋɔlɛ Ɔnɩɩsɩfɔrɔs arɩ ʋ dɩa nɩaa kala ma.

²⁰ Ɩrasɩtas tuo mɩ teeŋ. La sɩ joŋ wombiiŋ, ʋ ká Kɔrɩntɩ lɛ nɛ, aŋ ka mɩ leŋ Tʋrɔfɩmɔs ma Miliitas lɛ. Ʋ faa wɩɩlɛ nɛ.

²¹ Hɛ doluŋ aŋ kɔ, ka dɩ yibiiniŋ na jʋʋ. Nɩalɩŋ ba sɩɩ yɩrɛ Yubulas arɩ Pʋdɛns arɩ Linus arɩ Kɩlaadɩa, ba maa chʋɔlʋŋ, arɩ nɩalɩŋ kala sɩ laa Yesu wɩaa dii.

²² Wɩa jaŋ leŋ dɩ ŋ hɔnʋŋ zɔŋ. Ʋ lahɔrɩmɔ lɛ ʋ jaŋ pɛ ŋ lɛ.