2 Timoti 3 - WƖA TENIŊ

Bʋa-la dʋnɩa sɩ jaŋ dɛrɛ kpaga nɛ

¹ Timoti, bʋa-la lɛ dʋnɩa sɩ jaŋ kpagɛ dɛrɩŋ, wɩaa jaŋ doŋ.

² Nɩaa jaŋ cho ba tɩtɩa aŋ pɛ cho moribiee. Ba jaŋ bibigisi ba tɩtɩa lɛ, ba sɩaa bɩ jaŋ susu nʋʋkala ma, ba jaŋ tʋtʋʋsɛ nɩaa ma. Ba bɩ jaŋ tuto ba nyɩmmaba arɩ ba naamba niiŋ. Ba bɩra bɩ jaŋ kɛŋ zile. Ba bɩ jaŋ kɛŋ tʋɔpʋla ma Wɩa sɩpaaŋ.

³ Ba bɩ jaŋ cho nɩaa. Ba bɩ jaŋ joŋ wɩaa chɩchɛ nɩaa. Ba jaŋ chichei nɩaa yɩrɩŋ ma. Ba bɩ jaŋ jɩŋ ba tɩtɩa kɛnɩŋ. Ba jaŋ tɛrɛ. Ba jaŋ bɛrɛ wʋzɔŋ kala.

⁴ Ba jaŋ ŋaa zɛmbɛ tɩmma, ba bɩ jaŋ kɛŋ tʋɔbɩɩnaa. Ba jaŋ kɛŋ sɩɩ-duoŋ. Ba bɩ jaŋ cho Wɩa. Ba tʋɔtɔrɛ wɩaa dʋndʋŋa nɛ ba jaŋ cho dɩ baa ŋaa.

⁵ Ba yie ŋɩŋaa wɩaa arɩ baa to Wɩa nɛ, ama ba bɩ laa dii arɩ Wɩa kɛŋ doluŋ. Lɩɩsɛ ŋ tɩtɩa nɩaa deemba tʋɔŋ.

⁶ Nɩdosunuŋ deemba nɛ yie jʋʋ nɩaa dɩɩsɩŋ a nyɩnyɩsɛ ha-yaaraa wʋbɔŋŋɔɔ sɩ nyaga bil, ba tuto ba tʋɔtɔrɛ wɩaa sɩ bɔmɔ harɩŋ.

⁷ Haalaa deemba yie cho wʋfalaa gʋnnʋŋ ama ba bɩ wʋtɩtɩɩ-la wuo jɩŋ.

⁸ Baalaa balɩa nɛ fa hɛ nɩmɛ. Ba yɩraa nɛ Janɩs arɩ Jambɩrɛs. Ba fa bɩ Mosis harɩŋ chɩna, ŋɩɩ tɩtɩa nɛ baalaa deemba ma bɩ wʋtɩtɩɩ-la harɩŋ chɩna. Nɩaa deemba nyuŋ bɩ tɩŋ. Ba bɩ Yesu wɩaa laa dii.

⁹ Ama nɩaa deemba bɩ jaŋ wuo ŋaa ŋɩɩ a mʋ sɩpaaŋ, bɛɛ wɩaa nʋʋkala jaŋ na dɩ ba ŋaa nɩyaara nɛ. Ŋɩɩ tɩtɩa nɛ nɩalɩŋ ma fa na dɩ Janɩs arɩ Jambɩrɛs fa yaara.

Pɔɔl chagɩlɛ Timoti

¹⁰ Ama ŋ-na jɩŋ wɩalɩŋ mɩ sɩɩ dagɛ nɛ, a jɩŋ mɩ mɛlɛ, a jɩŋ wɩɩ-la mɩ sɩɩ chɛ dʋnɩa lɛ, a bɩra jɩŋ ŋɩɩ mɩ sɩ chɩŋ wɩalɩŋ mɩ sɩ laa dii lɛ, a kɛŋ kenyiri, a cho nɩaa aŋ kɛŋ nyalɩma ma.

¹¹ Ŋ jɩŋ ŋɩɩ ba sɩ to naasɩŋ dɔgɩsɛmɛ nɛ arɩ ŋɩɩ mɩ sɩ na hɛɛŋ. Ŋ jɩŋ ŋɩɩ mɩ sɩ na hɛɛŋ nɛ Antɩɔk arɩ Ikooniam arɩ Lisita tinteeŋ kala lɛ, ba sɩ to naasɩŋ dɔgɩsɛmɛ ŋɩɩ nɛ, ka mɩ nyalɩmɛ. Ama mɩ Tɩɩna Wɩa lɩɩsɛmɛ nɛ ba kala lɛ.

¹² Nʋʋkala sɩɩ chɛ dɩ ʋ to Wɩa wombiiŋ dɩ ʋ dɩ Kirisito Yesu ŋaa kʋbala, nɩaa jaŋ to naasɩŋ dɔgɩsʋ.

¹³ Ama nɩbɔŋŋɔɔ arɩ nɩalɩŋ sɩ gɔllɔɔ nyɩsɛ nɩaa jaŋ wasa ŋɩŋaa wʋbɔŋŋɔɔ. Ba jaŋ nyɩsɛ nɩaa aŋ pɛ nyɩnyɩsɛ ba tɩtɩa maa.

¹⁴ Ama ŋ-na hɛ doluŋ aŋ chɩŋ wɩalɩŋ ŋ sɩ gʋnna naaŋ lɛ, wɩalɩŋ ŋ sɩ laa dii arɩ ba ŋaa wʋtɩtɩɩ. Ŋ jɩŋ nɩalɩŋ sɩ dagɩŋ wɩalɩŋ nɛ woruŋ.

¹⁵ A suomi ŋ hambiiriŋ kala lɛ a kaa kɔ, ŋ jɩŋ Wɩa teniŋ sɩ bɩ disiniŋ kɛnɛ. Ʋ nɛ pɩŋ wʋjɩmɩŋ ŋ laa Kirisito Yesu wɩaa dii dɩ ʋ laaŋ ta.

¹⁶ Wɩa teniŋ kala lɩɩ Wɩa teeŋ nɛ. Wɩa nɛ joŋ ʋ Dɩŋ-zɔmʋŋ a hɛ nɩaa lɛ ba wuo ŋmʋnsɛba. Wɩa teŋ-la jaŋ wuo dagɛ nɩaa wʋtɩtɩɩ wombiiŋ. Dɩ nʋʋ nɛ ŋaa wɩɩ chei, ʋ wuo dagʋ wɩɩ-la ʋ sɩ ŋaa chei a joŋ cheeriŋ pʋ, a bɩra wuo dagʋ wombii-la sɩ maga dɩ ʋ tuto, a wuo dagʋ ŋɩɩ ʋ sɩ jaŋ wuo ŋaa a kɛŋ tʋɔpʋla Wɩa sɩpaaŋ.

¹⁷ Ŋ-la nɛ jaŋ pɛ Wɩa tɩntɩnna lɛ, dɩ ʋ wɩaa kala chesi dɩ ʋ wuo tɩŋ tɩntɩŋ zɔŋ na-kala.