2 Timoti 2 - WƖA TENIŊ

Pɔɔl bʋla pɩ Timoti dɩ ʋ ŋaa Kirisito laalɩyuori-zɔmʋŋ

¹ Ŋ-na mɩ bii Timoti, kɛŋ bɔɩ-duoŋ La Tɩɩna Yesu Kirisito lahɔrɩmɔ lɛ.

² Wɩalɩŋ ŋ sɩ nɩa dɩ mɩ bʋla pɩ nɩ-daŋ, ŋ ma bʋl ba tɩtɩa a pɩ nɩaa sɩ kɛŋ wʋtɩtɩɩ, di ba ma joŋo dagɛ ba dɔnsʋŋ tɩŋŋaa.

³ Ŋ sɩ ŋaa Kirisito Yesu laalɩyuoru sɩ kɛŋ wʋtɩtɩɩ, kɛŋ ŋ tɩtɩa hɛ dɔŋɔ dɩ la dɩŋ kala na hɛɛŋ.

⁴ Laalɩyuoru kala sɩ hɛ ʋ tɩntɩŋŋaa lɛ a tɩtɩŋ, ʋ yie chɩchɛ dɩ ʋ tɩŋ dɩ ʋ kʋ-hɩaŋ tʋɔŋ tɔrɛ nɛ. Ŋɩɩ wɩaa ʋ yie bɩ chɛ dɩ ʋ joŋ ʋ tɩtɩa hɛ wʋwogusuŋ lɛ.

⁵ Ŋɩɩ tɩtɩa nɛ fɩfaara ma bɩ jaŋ wuo fá a laa siilee, see dɩ ʋ to wɩalɩŋ ba sɩ bile pɩ fɩfaaraa ba tuto lɛ.

⁶ Bapaarʋ-la sɩ faasa tɩtɩŋ nɛ maga dɩ ʋ laa sɩpaaŋ dii baga kʋfalaa.

⁷ Kɛŋ wɩaa deemba mɩ sɩɩ bʋl bɩbɩɩnɛ. La Tɩɩna Yesu jaŋ pɛ ŋ lɛ dɩ ŋ wuo jɩŋ wɩalɩŋ kala bʋbʋɔŋ.

⁸ Liisi Yesu Kirisito wɩaa, ʋ fa ŋaa Devit doho nʋʋ nɛ. Ʋ sɩ sʋba, ʋ bɩra sii sʋʋŋ lɛ nɛ. Wɩa wʋzɔmɔ-la mɩ sɩɩ bʋl nɛ ŋɩɩ.

⁹ A tɩŋ Yesu wʋzɔmɔ-la wɩaa, mɩ na hɛɛŋ nɛ. Ba vɔɔmɛ arɩ chɔrʋmɔɔ nɛ, a nagɛ mɩ ŋaa nɩbɔŋ nɛ. Ama ba bɩ Wɩa niiŋ wɩaa-na vɔbɔ.

¹⁰ Mɩ nyalɩma nɛ wɩɩkala lɛ a tɩŋ nɩalɩŋ Wɩa sɩ lɩɩsa wɩaa, dɩ Yesu Kirisito wuo laaba ta dɩ ba na ʋ tʋla a kaa mʋ deeŋ deeŋ.

¹¹ Wɩɩ-la mɩ sɩɩ chɛ dɩ mɩ bʋla pɩma ŋaa wʋtɩtɩɩ nɛ. Ʋ nɛ ŋ-la: Dɩ la dɩ Yesu kala nɛ sʋba, la dɩ ʋ kala nɛ jaŋ sii a kɛŋ mɩɩsɩŋ.

¹² Dɩ la nɩɩ na hɛɛŋ aŋ nyalɩmɛ, la dɩ ʋ kala jaŋ dii kuoruŋ. Dɩ la nɛ sɩ la bɩ Yesu jɩŋ, ʋ ma jaŋ bʋl ʋ bɩ la jɩŋ.

¹³ Dɩ la nɛ bɩ ʋ ka to arɩ wʋtɩtɩɩ, ʋ-na ha kɛŋ wʋtɩtɩɩ nɛ, bɛɛ wɩaa ʋ bɩ jaŋ wuo nyɩsɛ ʋ tɩtɩa.

Pɔɔl bʋla pɩ Timoti dɩ ʋ ŋaa Tɩntɩnnɩtɩtɩɩ Wɩa tɩntɩŋŋaa lɛ

¹⁴ Bʋla pɩ nɩalɩŋ sɩ laa Yesu wɩaa dii dɩ ba liliisi wɩaa deemba woruŋ, a kpʋrɩsɛ ba dɩgɩlaa Wɩa sɩpaaŋ, dɩ ba bɩra sɩ́ wɩaa kaa lɩlɛrɛ. Ma sɩ kɛŋ wɩaa lɩlɛrɛ ŋɩɩ, ʋ ŋɩɩ bɩ nʋʋkala lɛɛ pɛ, ama ʋ yie chichei nɩalɩŋ sɩɩ jegilu nɛ.

¹⁵ Hɛ ŋ doluŋ kala dɩ Wɩa wuo na arɩ ŋ ŋaa tɩntɩnnɩ-tɩtɩɩ nɛ, sɩ bɩ hɩɩsɩŋ ka fá, a bɩra leŋ dɩ ʋ wuo na arɩ ŋ dagɛ wɩalɩŋ sɩ ŋaa wʋtɩtɩɩba nɛ woruŋ.

¹⁶ Lɩɩsɛ ŋ tɩtɩa nɩalɩŋ sɩ yie bʋbʋl wɩalɩŋ sɩ bɩ Wɩa wombiiŋ ka to lɛ. Wɩalɩŋ ba sɩɩ bʋl yie leŋ nɩaa joŋ ba harɩŋ yɩa Wɩa nɛ.

¹⁷ Wɩalɩŋ ba sɩɩ dagʋ jaŋ teeli leriŋ a nagɛ naawɩɩlɩŋ sɩ yie keeri ŋɩɩ a dii nampɩlɩŋ kala. Nɩaa balɩa nɛ hɛ nɩaa deemba tʋɔŋ aa dagɛ wɩaa deemba. Ba yɩraa nɛ Haminiiyas arɩ Fɩlɛtɩs.

¹⁸ Ba leŋ wʋtɩtɩɩ wombii-la nɛ aŋ bʋl arɩ bʋa-la lɛ nɩaa sɩ jaŋ sʋʋ aŋ sii sʋʋŋ lɛ paala kieli nɛ. Ba sɩ dagɛ ŋɩɩ ŋaa nɩalɩŋ dɔnsʋŋ sɩ laa Yesu wɩaa dii joŋ wɩalɩŋ ba sɩ laa dii ta nɛ.

¹⁹ Ama dɩa gentiŋ-duo-la Wɩa sɩ bile pɩ ʋ nɩaa, ʋ bɩ jaŋ wuo jigisi. Wɩalɩŋ ba sɩ ŋmʋnsa hɛ ʋ lɛ nɛ ŋ-la: “La Tɩɩna Wɩa jɩŋ nɩalɩŋ sɩ ŋaa ʋ nɩaa nɛ.” Ba bɩra ŋmʋnsa arɩ ʋ maga dɩ nɩɩ-la kala sɩ sɩ ʋ ŋaa Wɩa nʋʋ nɛ, dɩ ʋ leŋ wʋbɔŋŋɔɔ ŋaanɩŋ.

²⁰ Nɩaa nagɛ gbansɩ-la sɩ hɛ nɩaa dɩɩsɩŋ lɛ nɛ. Dɔnsʋŋ ŋaa sɛlɩmɛ gbansɩŋ, dɔnsʋŋ ŋaa taasɩ-gbansɩŋ, dɔnsʋŋ ma ŋaa daaŋ gbansɩŋ, dɔnsʋŋ ma ŋaa hɛnsɩŋ. Dɔnsʋŋ ba yie joŋo bil nɛ a kaa didii kɩaa chɛ-zɔŋŋɔɔ, aŋ kɛŋ dɔnsʋŋ ma kaa didii kɩaa tapʋlɩɩ na-kala.

²¹ Ŋɩɩ wɩaa dɩ nʋʋ nɛ lɩɩsɛ ʋ tɩtɩa wʋbɔŋŋɔɔ lɛ, ʋ jaŋ nagɛ gbansɩ-la ba sɩ kaa didii kɩaa chɛ-zɔŋŋɔɔ. Nɩɩ-la sɩ nagɛ ŋɩɩ ŋaa tʋɔpʋl tɩɩna nɛ ʋ kʋhɩaŋ teeŋ. Nɩɩ-la jaŋ wuo pɛ ʋ kʋhɩaŋ lɛ woruŋ. Ʋ kʋhɩaŋ jaŋ leŋ dɩ ʋ tɩtɩŋ tɩntɩŋ zɔŋ na-kala.

²² Lɩɩsɛ ŋ tɩtɩa wʋbɔmɔ-la bapʋɔsaa arɩ hatoloo sɩ yie cho dɩ baa ŋaa lɛ. Ama ŋ dɩ nɩalɩŋ sɩɩ chʋɔlɛ Wɩa arɩ tʋɔbala maga dɩ ma kɛŋ tʋɔpʋla nɛ a chɩŋ wɩalɩŋ ma sɩ laa dii lɛ woruŋ a cho dɔŋɔ a kɛŋ nii-bala.

²³ Ama lɩɩsɛ ŋ tɩtɩa nɩalɩŋ sɩ kɛŋ nɩyaarɛ wɩaa lɩlɛrɛ lɛ. Ŋ jɩma arɩ wɩaa deemba yie leŋ nɩaa yuyuo dɔŋɔ nɛ.

²⁴ Nɩɩ-la sɩ tɩma pɩpɩ La Tɩɩna Wɩa, ʋ bɩ maga dɩ ʋ yuyuo yuosuŋ. Ʋ maga dɩ ʋ kɛŋ zile nɛ nʋʋkala lɛ, a wuo dɩdagɛ nɩaa woruŋ, aŋ pɛ kɛŋ kenyiri.

²⁵ Ʋ maga dɩ ʋ sɩaa fɩɛlɛ dɩ ʋ nɩɩ dagɛ nɩalɩŋ sɩ bɩ ʋ harɩŋ chɩna. Ŋ bɩ pɔ, Wɩa jaŋ leŋ dɩ ba na wombiiŋ a wuo bɩrɩma lɩɩ ba wʋbɔŋŋɔɔ lɛ a kʋ jɩŋ wʋtɩtɩɩ-la.

²⁶ Ŋɩɩ nɛ ba jaŋ bɩra wasa kɛŋ wʋjɩmɩŋ a lɩɩsɛ ba tɩtɩa Sɩtaanɩ bɛrɛ́-la lɛ. Ʋ fa bɛrɛ kɛmba nɛ ba tuto ʋ tʋɔtɔrʋŋ lɛ.