2 Timoti 1 - WƖA TENIŊ

Teŋ-lɩa-la Pɔɔl sɩ ŋmʋnsa pɩ Timoti

¹ Mɩ-na Pɔɔl nɛ ŋmʋnsɛ teniŋ deeŋ. La Tɩɩna Wɩa tʋɔtɔrʋŋ lɛ nɛ ʋ lɩɩsɛmɛ dɩ mɩ ŋaa Yesu Kirisito nanzɔɔ. Wɩa bʋla pɩla dɩ ʋ to Yesu Kirisito lɛ nɛ a joŋ mɩɩsɩŋ pɩla. Mɩɩsɩ-la wɩaa nɛ ʋ tɩmmɛ dɩ mɩ bʋla pɩ nɩaa.

² Mɩ ŋmʋnsɛ teniŋ deeŋ a pɩpɩ ŋ-na mɩ bii-chooluŋ Timoti nɛ. La Nyɩmma Wɩa arɩ La Tɩɩna Yesu Kirisito lahɔrɩmɔ lɛ, ba jaŋ fáŋ nenige a leŋ dɩ ŋ hɔŋ arɩ yarɩfɩɛlaa.

Pɔɔl bʋla pɩ Timoti dɩ ʋ chɩŋ wɩalɩŋ lɛ ʋ sɩ laa dii

³ Mɩɩ lɔllɛ Wɩa kɩŋkɛŋ, nɩɩ-la mɩ sɩ tɩma pa arɩ tʋɔ-bala, a nagɛ mɩ naabalɩmaba fa sɩ tɩma pʋ ŋɩɩ. Dɩ mɩ nɩɩ chʋɔlɛ Wɩa tɩtaŋɩŋ arɩ wɩɩhɛyɛ kala, mɩ yie liliisi ŋ wɩaa nɛ.

⁴ Mɩ liise yi arɩ bʋa-la lɛ mɩ sɩ sii ŋ teeŋ, ŋ faa yel nɛ. Ŋɩɩ nɛ tɩɩ mɩ cho dɩ mɩ kʋ naŋ arɩ sɩɩfɩɛsɩŋ, dɩ mɩ tʋɔŋ tɔrɛ.

⁵ Mɩ liise yi ŋɩɩ ŋ sɩ laa Wɩa wɩaa dii arɩ sɩɩfɩɛsɩŋ. Ŋ nahɩma Luwis arɩ ŋ naaŋ Yunis nɛ laa sɩpaaŋ laa Wɩa wɩaa dii. Mɩ jɩma arɩ ŋ ma chɩŋ ŋɩɩ lɛ nɛ.

⁶ Ŋɩɩ wɩaa nɛ tɩɩ mɩɩ liisiŋ dɩ ŋ kɛŋ kʋ-la Wɩa sɩ joŋo dii zile ŋ lɛ kaa tɩŋ woruŋ. Kʋ-la ŋ sɩ laa bʋa-la mɩ sɩ joŋ mɩ nɩsɩŋ daŋ ŋ lɛ a chʋɔlɛ Wɩa pɩŋ.

⁷ Wɩa bɩ ʋ Dɩŋ-zɔmʋŋ joŋo hɛ la lɛ dɩ la fɩfá fawʋllʋŋ, ama dɩ ʋ pɛ la lɛ dɩ la wuo kɛŋ doluŋ la mɩɩsɩŋ lɛ, a cho nɩaa, a jɩŋ la tɩtɩa kɛnɩŋ woruŋ.

⁸ Ŋɩɩ wɩaa dɩ ŋ nɛ bʋl La Tɩɩna Yesu wɩaa pɩpɩ nɩaa, sɩ́ leŋe dɩ hɩɩsɩŋ kɛnɩŋ a tɩŋ Yesu wɩaa. Bɩra sɩ́ leŋe dɩ hɩɩsɩŋ kɛnɩŋ mɩ ma wɩaa, a tɩŋ ba sɩ kɛmmɛ tɔ dɩa Kirisito wɩaa. Ama Wɩa doluŋ lɛ, sɛɩ dɩ la kala na hɛɛŋ a tɩŋ Yesu wʋzɔmɔ-la wɩaa.

⁹ Wɩa nɛ laala ta a yɩrɛla dɩ la ŋaa ʋ nɩaa. Ʋ bɩ naga Wɩa to la wʋzɔŋŋɔɔ lɛ nɛ a laala ta. Ama ʋ tɩtɩa tʋɔtɔrʋŋ lɛ nɛ ʋ fá la nenige a laala ta. Yesu Kirisito lɛ nɛ ʋ to a ŋaa ŋɩɩ pɩla. Ʋ jɩma arɩ ʋ jaŋ ŋaa ŋɩɩ pɩla faafaa kala nɛ, ka dʋnɩa-na suomi.

¹⁰ Lɛɛlɛ la Laataara Kirisito Yesu sɛnɛ kɔ dʋnɩa nɛ. Ʋ sɩ kɔ ŋɩɩ, la wuo na Wɩa zile wɩaa sɩ nagɛ ŋɩɩ nɛ. Kirisito sɩ kɔ, ʋ kpʋ sʋʋŋ doluŋ kala nɛ. Ʋ bʋl wʋzɔmɔ-la pɩla a to ŋɩɩ lɛ a dagɛla arɩ ʋ nɛ pɩla mɩɩsɩŋ, a bɩra dagɛla dɩ la nɛ sʋba ma, la jaŋ bɩra sii a kɛŋ mɩɩsɩ-la sɩ bɩ dɛrɛ.

¹¹ Yesu wʋzɔmɔ-la wɩaa nɛ tɩɩ Wɩa lɩɩsɛmɛ dɩ mɩ ŋaa ʋ nanzɔɔ, a leŋ mɩ bʋl wɩaa deemba a pɩpɩ nɩaa a dɩdagɛba.

¹² Mɩ sɩɩ bʋl wɩalɩŋ nɛ tɩɩ mɩ nɩna hɛɛŋ. Ama hɩɩsɩŋ bɩ mɩ kɛnɛ a tɩŋ hɛɛ-la mɩ sɩ na wɩaa. Mɩ jɩŋ nɩɩ-la mɩ sɩɩ to nɛ. Mɩ sɩ joŋ mɩ tɩtɩa hɛ ʋ nɩsɩŋ lɛ ŋɩɩ, mɩ laa dii arɩ ʋ jaŋ wuo bemmi woruŋ halɩɩ a kaa mʋ yi tapʋlɩɩ-la Kirisito Yesu sɩ jaŋ mɩɩra kɔ.

¹³ Wɩalɩŋ kala mɩ fa sɩ dagɩŋ, ba ŋaa wʋtɩtɩɩba nɛ. Chɩŋ wɩalɩŋ lɛ a tutoba. La dɩ Kirisito Yesu sɩ ŋaa kʋbala ŋɩɩ, hɛ doluŋ aŋ chɩŋ wɩalɩŋ ŋ sɩ laa dii lɛ, a cho nɩaa ma.

¹⁴ Wɩa Dɩŋ-zɔmʋŋ doluŋ lɛ, kɛŋ wʋzɔmɔ-la Wɩa sɩ joŋo hɛ ŋ nɩsɩŋ lɛ woruŋ.

¹⁵ Ŋ jɩma arɩ bʋa-la lɛ mɩ fa sɩ hɛ Esia tinteeŋ lɛ, nɩalɩŋ kala fa sɩ hɛ nɩmɛ fa vɩamɛ nɛ, Fɩjɩlas arɩ Hemojinis ma fa hɛ nɩaa deemba tʋɔŋ nɛ.

¹⁶ Ama baal-la ba sɩɩ yɩrɛ Ɔnɩɩsɩfɔrɔs, ʋ nɛ pɛ mɩ lɛ woruŋ a ŋaa mɩ nyuŋ faasa nyaasɛ. Ba sɩ kɛmmɛ kaa tɔ dɩa ŋɩɩ, hɩɩsɩŋ fa bɩ ʋ kɛnɛ a tɩŋ mɩ wɩaa. La Tɩɩna Wɩa jaŋ fá ʋ dɩ ʋ dɩa nɩaa nenige.

¹⁷ Ʋ sɩ kɔ Rom, lee-la ba sɩ tɔmɛ dɩa, ʋ chɛmɛ arɩ sɩɩfɩɛsɩŋ aŋ-na namɛ.

¹⁸ Wɩa jaŋ leŋ dɩ La Tɩɩna Kirisito fá ʋ nenige sarɩya chɛ-diiliŋ. Ŋ ma jɩŋ ŋɩɩ ʋ sɩ faasa pɛ mɩ lɛ nɛ bʋa-la lɛ mɩ fa sɩ hɛ Ɛfɛsɩs lɛ.