2 SAMƲƐL 23 - WƖA TENIŊ

Wɩalɩŋ Devit sɩ to harɩŋ bʋl

¹ Jesi nanʋala Devit nɛ ŋaa nɩɩ-la Wɩɩjarɩbakɔ fa sɩ lɩɩsa a leŋ ʋ ŋaa nɩbal. Ʋ nɛ Jekɔb Wɩa lɩɩsɛ ʋ ŋaa kuoro. Ʋ fa jɩŋ yɩɩlaa yɩɩnɩŋ nɛ woruŋ Iziral tinteeŋ lɛ. Wɩalɩŋ ʋ fa sɩ to harɩŋ bʋl nɛ ŋ-la:

² “La TƖƖNA Dɩma-la to mɩ lɛ a bʋl wɩaa nɛ, ʋ joŋ wɩalɩŋ ʋ sɩɩ chɛ mɩ bʋl hɛ mɩ niiŋ lɛ nɛ.

³ Iziral Wɩa, nɩɩ-la sɩ kɛŋ doluŋ a nagɛ bʋŋ bʋla pɩmɛ: ‘Dɩ kuoro nɛ kɛŋ tʋɔpʋla a bibeŋ ʋ nɩaa nyuŋ, a to Wɩa niiŋ lɛ a bibemba,

⁴ kuoru-la nagɛ taŋ sɩ pʋla leriŋ pʋllɛ nɛ, duoŋ-bɩlɩmbaaŋ kala tuo, a bɩra nagɛ duonuŋ sɩ nɩa yaŋ nyʋ.’

⁵ Ŋɩɩ Wɩa sɩ jaŋ pɛ mɩ doho nɩaa lɛ nɛ ŋɩɩ, bɛɛ wɩaa, ʋ nɛ hɛ nii-la sɩ bɩ dɛrɛ a pɩmɛ, nii-la sɩ bɩ jaŋ kɔ dɩ ʋ birige. Nii-la suo nɛ, ʋ bɩ jaŋ kɔ dɩ ʋ kɛnʋ bɩrɩmɛ. Wɩɩ-la kala mɩ sɩɩ chɛ nɛ ŋɩɩ, mɩ jɩma bʋa na-kala ʋ jaŋ ŋaa ŋɩɩ a pɩmɛ.

⁶ Ama nɩbɔŋŋɔɔ nagɛ sɔsʋŋ nɛ, ba jaŋ churiba ta. Nɩsɩŋ dee ba jaŋ kaa churiba.

⁷ Dɩ nʋʋ nɩɩ chɛ ʋ digi sɔsʋ-la, see ʋ kɛŋ tɩntɩnnɩ kʋŋ sɩ ŋaa hɔɔŋ koo timiŋ, ba jaŋ nyɩgɛ ba kala nɩmɛ tɩtɩa ba sɩ pɩna.”

Devit laalɩyuori babiibalaa

⁸ Devit laalɩyuori babiibalaa yɩraa nɛ ŋ-la: Jɔsɛb-Basɛbɛf, ʋ ŋaa Takɛmɔŋ tɩɩna nɛ. Ʋ fa ŋaa nɩalɩŋ batori sɩɩ yɩrɛ ba tɩtɩa laalɩyuori-babiibal kpaŋkpamba sɩpaalaara nɛ. Ʋ fa kɛŋ timiŋ a kpʋ nɩaa zɔlɔ chori nɛ laal-bala lɛ.

⁹ Nɩɩ-la sɩɩ tɩgɛ ʋ lɛ nɛ, Dodai nanʋala Elieza, a ŋaa Aho tɩɩna. Bʋa kʋbala lɛ ʋ dɩ Devit nɛ mʋ magɩsɛ Fɩlɩsɩtɩa tɩŋŋaa ba sɩ kʋ hilimi lee-la ba sɩɩ yɩrɛ Pas Damɩŋ lɛ dɩ ba yuo laalɩŋ. Ŋɩɩ nɛ Iziral laalɩyuoroo mɩɩra fá,

¹⁰ ka Elieza-na chɩŋ, a kpʋ Fɩlɩsɩtɩa tɩŋŋaa ŋɩɩ halɩɩ, tokobii-la ʋ sɩ koro paala nyʋa mɛrɛ ʋ nɩsɩŋ lɛ. Ŋɩɩ nɛ Iziral laalɩyuoroo mɩɩra kɔ Elieza leriŋ, a wuri Fɩlɩsɩtɩa tɩŋŋaa laalɩyuoro-la sɩ sʋba kɩaa. Tapʋlɩɩ-la La TƖƖNA leŋe ba yuo diiba nɛ woruŋ.

¹¹ Nɩɩ-la ma bɩra sɩɩ tɩgʋ nɛ, Agɛɛ nanʋala Sama, ʋ ŋaa Hara tɩɩna nɛ. Fɩlɩsɩtɩa tɩŋŋaa bɩra kʋ hilimi ŋmaŋkaa kʋbala sɩ suo arɩ sinsuoŋ. Iziral laalɩyuoroo bɩra fá,

¹² ka Sama chɩŋ baga-la tʋtʋɔbaanɩŋ a pɔ kpʋ Fɩlɩsɩtɩa tɩmma-la. Tapʋlɩɩ-la La TƖƖNA leŋe ʋ yuo diiba nɛ woruŋ.

¹³ Baga kɩaa ŋaanɩŋ bʋa lɛ, laalɩyuori-babiibala-la mara arɩ fii tʋɔŋ nɩaa batori sii mʋ Devit teeŋ, dɩ ʋ faa bʋbʋa-la sɩ hɛ taŋ-la ba sɩɩ yɩrɛ Adulam lɛ. Dɩ Fɩlɩsɩtɩa laalɩyuoroo ma ŋmoo ba buguŋ Refem fuonaaŋ lɛ.

¹⁴ Bʋa-la lɛ dɩ Devit faa bʋbʋa-la lɛ, ka Fɩlɩsɩtɩa laalɩyuoroo ma fa hɛ Bɛtɩlɛhɛm lɛ.

¹⁵ Lɩɩ-nyʋasʋŋ kɛŋ Devit, ʋ bʋl, “Mɩ fa jaŋ cho dɩ nʋʋ mʋ ŋaa lɩɩŋ vil-la sɩ kpagɛ Bɛtɩlɛhɛm boi-baalɩŋ a kaa kʋ pɩmɛ dɩ mɩ nyʋa.”

¹⁶ Ŋɩɩ nɛ laalɩyuori babiibala-la batori wuo nyɩgɩsa to Fɩlɩsɩtɩa laalɩyuoro-la tʋɔŋ, a mʋ ŋaa lɩɩŋ vil-la sɩ kpagɛ Bɛtɩlɛhɛm boi-baalɩŋ lɛ a kaa kʋ pɩ Devit. Ama ʋ vɩa lɩɩ-la aŋ joŋo bɩsa ta La TƖƖNA sɩpaaŋ,

¹⁷ aŋ bʋla pɩ La TƖƖNA, “Mɩ bɩ jaŋ wuo nyʋa lɩɩŋ deeŋ, ʋ nagɛ nɩalɩŋ batori sɩ joŋ ba mɩɩsɩŋ yɔɔ sʋʋŋ a ŋaaʋ kʋ pɩmɛ chalɩŋ nɛ.” Ŋɩɩ nɛ ʋ bɩ lɩɩ-la nyʋa. Bɔɩ-duo wɩalɩŋ laalɩyuori babiibal-kpaŋkpamba-la batori fa sɩ ŋaa nɛ ŋɩɩ.

¹⁸ Laalɩyuori-babiibalaa mara arɩ fii ma fa hɛ nɩmɛ. Zeruya nanʋala Jʋab naambie Abɩsaɩ nɛ fa ŋaa ba sɩpaalaara. Ʋ fa kpʋ nɩaa zɔɔ-batori nɛ arɩ ʋ timiŋ, a laa yɩrɩŋ a nagɛ laalɩyuori-babiibal-kpaŋkpamba-la batori.

¹⁹ Ʋ sɩ ŋaa ŋɩɩ, ʋ laa yɩrɩŋ kɩɩ nɩalɩŋ batori-la. Ʋ fa bɩ ba tʋɔŋ pɛ, aŋ mɩɩra kʋ ŋaa ba nɩhɩaŋ.

²⁰ Jehoyada nanʋala Bɛnaaya ma fa ŋaa laalɩyuori-duo nɛ, a lɩɩ taŋ-la ba sɩɩ yɩrɛ Kabɩzɛɛl. Ʋ fa tɩŋ bɔɩ-duo tɩntɩŋŋaa nɛ woruŋ. Ʋ fa kpʋ Mʋab tɩŋŋaa laalɩyuori-duoruŋ balɩa nɛ. Bʋa kʋbala lɛ bʋrʋŋ tɔ, ka ʋ tuu buo-tuoŋ tʋɔŋ a kpʋ naachigiŋ.

²¹ Ʋ nɛ bɩra kpʋ Ijipiti tɩŋŋaa laalɩyuori-duo kʋbala sɩ waayi. Ijipiti tɩɩna-la fa kori timiŋ nɛ, ka Bɛnaaya mʋ ʋ lɛ arɩ toŋguluŋ, a kɛŋ baal-la timiŋ laa a gʋra kpʋʋ.

²² Bɔɩ-duo wɩalɩŋ Jehoyada nanʋala Bɛnaaya sɩ ŋaa nɛ ŋɩɩ. Ʋ ma fa laa yɩrɩŋ nɛ a nagɛ laalɩyuori babiibala-la batori.

²³ Ʋ fa laa yɩrɩŋ a kɩɩ laalɩyuori babiibala-la mara arɩ fii, ama ʋ fa bɩ nɩalɩŋ batori lɛ pɛ. Ka Devit joŋu ʋ ŋaa nɩalɩŋ sɩɩ pɔʋ tʋɔŋ nɩhɩaŋ.

²⁴ Laalɩyuori babiibala-la mara arɩ fii dɔnsʋŋ yɩraa nɛ ŋ-la: Jʋab naambie Asahɛl, Dodo nanʋala Ɛlɩhanaŋ sɩ lɩɩ Bɛtɩlɛhɛm,

²⁵ Sama arɩ Ɛlɩka sɩ lɩɩ Harɔd,

²⁶ Hɛlɛs, a ŋaa Palɩ tɩɩna, Ɩkɛs nanʋala Ɩra sɩ lɩɩ Tɛkʋa,

²⁷ Abieza sɩ lɩɩ Anatɔf, Mɛbʋnaɩ, a ŋaa Husa tɩɩna,

²⁸ Zalɩmɔŋ, a ŋaa Aho tɩɩna, Maharaɩ, a ŋaa Netofa tɩɩna,

²⁹ Baana nanʋala Hɛlɛd, a ŋaa Netofa tɩɩna, Rɩbaɩ nanʋala Ɩtaɩ sɩ lɩɩ Gɩbɩa sɩ hɛ Bɛnjamɩŋ tinteeŋ lɛ,

³⁰ Bɛnaaya, a ŋaa Pɩratɔŋ tɩɩna, Hɩdaɩ sɩ lɩɩ Gaas fuonaa luŋuŋ,

³¹ Abi-Alɩbɔŋ, a ŋaa Aaba tɩɩna, Azɩmavɛf sɩ lɩɩ Baahum,

³² Ɛlɩaba, a ŋaa Saalɩbɔŋ tɩɩna, sɩ ŋaa Jasɛŋ hambolibiisiŋ,

³³ Sama nanʋala Jonataŋ arɩ Sara nanʋala Ahɩam, a ŋaa Harari tɩmma,

³⁴ Ahasɩbaɩ nanʋala Ɛlɩfɛlɛt, Maaka tɩɩna-la, Ahitofɛl nanʋala Ɛlɩam, Gilo tɩɩna-la,

³⁵ Hɛzɩrɔ, a ŋaa Kamɛl tɩɩna, Paaraɩ, a ŋaa Aabɩ tɩɩna,

³⁶ Netaŋ nanʋala Ɩgal sɩ lɩɩ Zoba, Netaŋ nyɩmma nɛ Hagɩrɩ,

³⁷ Amɔŋ tɩŋŋaa Zɛlɛk, Bɛɛrɔ tɩŋŋaa Naharaɩ, nɩɩ-la fa sɩɩ kori Zeruya nanʋala Jʋab laalɩyuori kɩaa,

³⁸ Ɩra arɩ Garɛb sɩ ŋaa Ɩtɩrɩ tɩmma

³⁹ arɩ Yuria sɩ ŋaa Hiti tɩɩna. Ba kala fa ŋaa mara arɩ fii arɩ balɩpɛ nɛ.