2 SAMƲƐL 1 - WƖA TENIŊ

Devit nɩɩ Sɔɔl sʋʋŋ wɩaa

¹ Iziral tinteeŋ, kuoro Sɔɔl sɩ sʋba harɩŋ, Devit mʋ yuo dii Amalɛk tɩŋŋaa aŋ mɩɩra kɔ Zɩkɩlag, a hɔŋ nɩmɛ tapʋlaa balɩa.

² Tapʋl-torimuŋ chɛɛŋ, baal kʋbala lɩɩ Sɔɔl laalɩyuoroo buguŋ a fá kɔ Devit teeŋ. Ʋ gɛnnɩŋ kala fa kɩɛsa nɛ, ʋ nyuŋ ma kala bʋgɛ arɩ kʋŋkɔlʋŋ aa dagɛ tʋɔ-cheeŋ. Ʋ sɩ kɔ Devit teeŋ, ʋ tuu kpirimi ʋ sɩpaaŋ a chʋɔlʋ.

³ Ŋɩɩ nɛ Devit pɩɛsʋ, “Nɩɩ nɛ ŋ lɩɩ?” Ʋ bʋl, “Mɩ foro fá nɛ a lɩɩ Iziral tɩŋŋaa buguŋ.”

⁴ Devit bɩra pɩɛsʋ, “Wʋbɛɛ nɛ ŋaa nɩmɛ, bʋla pɩmɛ.” Baal-la bʋl, “Iziral tɩŋŋaa laalɩyuoroo fá nɛ laalɩŋ lɛ. Ba jesiŋ kala nɛ sʋba. Sɔɔl arɩ ʋ nanʋala Jonataŋ ma sʋʋ.”

⁵ Ŋɩɩ nɛ Devit pɩɛsɛ bapʋɔsɩ-bie-la sɩ kʋ bʋl wɩalɩŋ pʋ, “Ɛɛ nɛ ŋ ŋaa jɩŋ arɩ Sɔɔl arɩ ʋ nanʋala Jonataŋ sʋba nɛ?”

⁶ Bapʋɔsɩ-bie-la bʋl, “Mɩ fa hɛ peel-la ba sɩɩ yɩrɛ Gɩlɩbʋa nyuŋ nɛ aŋ na Sɔɔl dɩ ʋ yelli ʋ timiŋ, ka ʋ dʋndɔŋŋɔɔ laalɩyuori-janɩŋ torukoba arɩ ja-jɩllaa fá kʋʋ kpagʋ.

⁷ Ʋ sɩ daasa namɛ, ʋ yɩrɛmɛ. Mɩ pɩɛsɛ, ‘Bɛɛ nɛ ŋ chɛ dɩ mɩ ŋaa pɩŋ?’

⁸ Ʋ ma pɩɛsɛmɛ, ‘Ŋ nɛ kʋbɛɛ?’ Mɩ bʋl, ‘Mɩ ŋaa Amalɛk tɩɩna nɛ.’

⁹ Ŋɩɩ nɛ ʋ bʋla pɩmɛ, ‘Kɔ mɩ teeŋ a kpʋmɛ, mɩ pɩra nɛ woruŋ, a chɩchɛ mɩ sʋʋŋ.’

¹⁰ Ŋɩɩ nɛ mɩ mʋ a kpʋʋ, bɛɛ wɩaa pɩnna-la doho ʋ sɩ pɩna, mɩ jɩma ʋ bɩra bɩ jaŋ sii. Ŋɩɩ nɛ mɩ joŋ ʋ kuoru nyunchuulo arɩ ʋ vaagɩraa tabɩɩŋ kaa kɔ dɩ mɩ pɩŋ, mɩ nɩhɩaŋ.”

¹¹ Devit arɩ nɩalɩŋ kala sɩ hɛ ʋ teeŋ a nɩɩ wɩalɩŋ baal-la sɩ bʋla, ba tʋɔŋ faasa chei, ba kɛŋ ba gɛnnɩŋ kɩɛsɛ.

¹² Ŋɩɩ nɛ ba yel a vɔɔ niiŋ wɩa tuu jʋʋ, a tɩŋ Sɔɔl arɩ ʋ nanʋala Jonataŋ arɩ La TƖƖNA laalɩyuoroo wɩaa, bɛɛ wɩaa Iziral nɩ-daŋ nɛ ba kpʋ laalɩŋ lɛ.

¹³ Devit bɩra pɩɛsɛ bapʋɔsɩ-bie-la sɩ kʋ bʋl wɩalɩŋ pʋ, “Nɩɩ nɛ ŋ lɩɩ?” Baal-la bʋl, “Mɩ nyɩmma ŋaa Amalɛk tɩɩna nɛ, a hɛ Iziral tinteeŋ lɛ.”

¹⁴ Devit bɩra pɩɛsʋ, “Bɛɛ nɛ saa tɩɩ ŋ bɩ fawʋllʋŋ fá, aŋ kpʋ nɩɩ-la La TƖƖNA sɩ lɩɩsa ʋ ŋaa kuoro?”

^15-16 Ŋɩɩ nɛ Devit bʋl Amalɛk tɩɩna-la lɛ, “Ŋ tɩtɩa nɛ chɛ ŋ sʋʋŋ. Ŋ tɩtɩa bʋla: Mɩ nɛ kpʋ nɩɩ-la La TƖƖNA sɩ lɩɩsa ʋ ŋaa kuoro.” Ŋɩɩ nɛ Devit yɩrɛ ʋ nɩaa dɔŋɔ a bʋla pʋ, “Mʋ kpʋ baal-la.” Ŋɩɩ nɛ ʋ mʋ kpʋʋ.

Devit tʋɔŋ chei Sɔɔl arɩ Jonataŋ wɩaa

¹⁷ Ŋɩɩ nɛ Devit yɩɩ yɩɩlɩŋ deeŋ a tɩgɛ Sɔɔl arɩ ʋ nanʋala Jonataŋ lɛ,

¹⁸ aŋ bʋl dɩ ba dagɛ Juda nɩaa yɩɩl-la (ba ŋmʋnsɛ yɩɩl-la hɛ teŋ-la ba sɩɩ yɩrɛ Jasa teŋ tʋɔŋ nɛ):

¹⁹ “Iziral tɩŋŋaa, ba kpʋ ma laalɩyuori sɩpaalaaraa Sɔɔl arɩ Jonataŋ nɛ a bil dundolluŋ nyuŋ. Ma laalɩyuori duoruŋ tele nɛ wuru a sʋʋ!

²⁰ Ma pɔ má sɩ́ wɩɩ-la bʋl Gaf lɛ. Má sɩ́ Asɩkɛlɔŋ wombiee lɛ chɩna heele bʋlʋ pɩ nɩaa. Má sɩ́ ŋɩɩ ŋaa dɩ Fɩlɩsɩtɩa tɩŋŋaa toloo tʋɔŋ tɔrɛ. Má sɩ́ leŋe dɩ nɩalɩŋ sɩ bɩ Wɩa ka to toloo jʋɔsɛ.

²¹ A leŋ dɩ duonuŋ sɩ́ Gɩlɩbʋa peelee nyuŋ nɩɩ, dɩ nyalɩŋ ma sɩ́ nɩmɛ nyal, dɩ ba bagɩsɩŋ ma kʋŋ sɩ́ kʋduulii kala kɛŋ dɩ ba kaa ŋaa Wɩɩ-sʋla, bɛɛ wɩaa hɔɔtaala-la laalɩyuori duoruŋ sɩ kaa kɛrɛɛ laa bayuori hɛŋŋɛɛ jʋʋ disiniŋ nɛ. Hɔɔtaala-la Sɔɔl sɩ kaa kɛrɛ laa bayuori hɛŋŋɛɛ, ba bɩra bɩ nʋʋŋ ŋaa tɩsʋ.

²² Jonataŋ to-hɛmɩŋ bɩ laalɩŋ mʋa aŋ mɩmɩɩrɛ pɛɩ. Sɔɔl ma tokobiiŋ bɩ pɛɩ ka viisi. Ba yie ŋmoo laalɩyuori duoruŋ lo nɛ a kpʋba.

²³ Nɩaa fa cho Sɔɔl arɩ Jonataŋ nɛ woruŋ, ba kala fa hɛ ba mɩɩsɩŋ lɛ, aŋ kala bɩra to dɔŋɔ a sʋʋ. Ba fa lɩma a kɩɩ kachuunuŋ, ba kɛŋ doluŋ ma a kɩɩ naachigee.

²⁴ Iziral tɩŋŋaa haalaa, má yel Sɔɔl lɛ, nɩɩ-la sɩ joŋ gɛrɩ-zɔŋŋɔɔ laalɛma. Ʋ nɛ joŋ sɛlɩmɛ kɩaa a kpɩɛrɛ ma gɛrɩ-balaa ŋɩɩ.

²⁵ Laalɩyuori duoruŋ tele nɛ laalɩŋ lɛ! Jonataŋ nɛ sʋba pɩŋ ma dundolluŋ nyuŋ ŋɩɩ.

²⁶ Jonataŋ, mɩ naambii, mɩɩ yel ŋ lɛ nɛ. Mɩ fa choŋ nɛ woruŋ. Ŋ ma fa chomi nɛ woruŋ, a kɩɩ haala sɩ cho ʋ bala.

²⁷ Laalɩyuori duoruŋ tele sʋʋ nɛ, ka ba laalɩyuori kɩaa pɩŋ pɛɩ.”