2 Jɔɔŋ 1 - WƖA TENIŊ

¹ Mɩ-na Wɩa dɩa nɩhɩaŋ nɛ ŋmʋnsɛ teniŋ deeŋ aa pɩ ŋ-na haal-la Wɩa sɩ lɩɩsa, arɩ ŋ biiriŋ, nɩalɩŋ mɩ sɩ cho woruŋ. Mɩ dʋndʋŋa dee bɩ ma cho, mɩ dɩ nɩalɩŋ kala sɩ jɩŋ wʋtɩtɩɩ-la nɛ choma.

² La choma ŋɩɩ a tɩŋ wʋtɩtɩɩ-la sɩ hɛ la lɛ nɛ. Ʋ saa jaŋ hɛ la lɛ a kaa mʋ.

³ La Nyɩmma Wɩa arɩ ʋ Bie Yesu Kirisito lahɔrɩmɔ lɛ, ba jaŋ fá la nenige, a leŋ dɩ la hɔŋ arɩ yarɩfɩɛlaa, a pɛ la lɛ dɩ la sɛnɛ to wʋtɩtɩɩ lɛ a cho dɔŋɔ.

Ʋ maga dɩ la cho dɔŋɔ

⁴ Mɩ tʋɔŋ tɔrɔ kɩŋkɛŋ mɩ sɩ na arɩ ŋ biiriŋ dɔnsʋŋ to wʋtɩtɩɩ-la lɛ, arɩ la Nyɩmma Wɩa sɩ dagɛla ŋɩɩ.

⁵ Haal, mɩɩ sʋlʋŋ dɩ ŋ to wɩɩ-la dɔŋɔ Wɩa fa sɩ bʋla pɩla bumbuŋ kala. Ʋ bɩ wʋfalɩɩ ŋaa. Ʋ nɛ ŋ-la: Ʋ maga dɩ la cho dɔŋɔ.

⁶ Dɩ la nɩɩ to wɩalɩŋ Wɩa sɩ daga, la sɛnɛ cho Wɩa arɩ nɩaa nɛ. Wɩɩ-la Wɩa fa sɩ bʋla pɩla bumbuŋ kala nɛ ŋ-la: dɩ la cho dɔŋɔ.

⁷ Nɩaa yʋga a hɛ lee-kala dʋnɩa lɛ dɩ ba nyɩsɛ nɩaa. Nɩaa deemba bɩ sɛyɛ arɩ Yesu Kirisito kʋ ŋaa nuhuobiiŋ nɛ a kʋ tuu dʋnɩa. Nʋʋkala sɩ nagɛ nɩaa deemba ŋaa nɩnyɩsɛrʋ nɛ a ŋaa Kirisito dʋndɔŋ-balɩŋ ma.

⁸ Má pɔ ma tɩtɩa lɛ a sɩ́ leŋe dɩ tɩntɩmɩɩ-la ma sɩ tɩma, sɩ́ pɛɩ ŋaa. Ama má tɩŋ ŋɩɩ sɩ maga dɩ Wɩa wuo joŋ ma time kala a pɩma.

⁹ Nɩɩ-la kala sɩ bɩ wɩalɩŋ Kirisito sɩ daga dʋndʋŋa ka to, ʋ tɩɩna bɩ Wɩa teeŋ hɛ. Ama nɩɩ-la kala sɩɩ to wɩalɩŋ Kirisito sɩ daga dʋndʋŋa, ʋ tɩɩna kɛŋ Wɩa arɩ ʋ Bie kala nɛ.

¹⁰ Dɩ nʋʋkala nɛ kɔ ma teeŋ a bɩ wɩaa deemba ka dagɛ, má sɩ́ leŋe dɩ tɩɩna jʋʋ ma dɩa. Má paala sɩ́ ʋ chʋɔlʋ.

¹¹ Dɩ nʋʋkala nɛ chʋɔlʋ a kɛnʋ woruŋ, ʋ ma ŋaa ʋ dɔŋɔ tɩɩna nɛ a ŋɩŋaa wʋbɔŋŋɔɔ.

Wʋkaanaa

¹² Mɩ kɛŋ wɩaa yʋgɛ nɛ mɩ sɩɩ chɛ dɩ mɩ bʋla pɩma. Ama mɩ bɩ chɛ dɩ mɩ ŋmʋnsɛ ba kala teniŋ tʋɔŋ. Mɩɩ chɛ dɩ mɩ tɩtɩa kʋ yi ma nɛ a bʋla pɩma, dɩ la kala tʋɔŋ faasa tɔrɛ.

¹³ Ŋ dɩhaala Wɩa sɩ lɩɩsa, ʋ biiriŋ ka chʋɔlʋŋ woruŋ.