1 Timoti 6 - WƖA TENIŊ

Wʋnyɩɛrɩ kerichiba arɩ wʋtɩtɩɩ kerichiba

¹ Nɩalɩŋ kala sɩ ŋaa yosuŋ, ʋ maga dɩ ba zizil nɩalɩŋ sɩ yɔɔba nɛ. Ʋ maga dɩ ba ŋaa ŋɩɩ dɩ nʋʋkala sɩ́ wombiiŋ na a wuo bʋl wʋbɔŋ kala a mʋ tɩgɛ Wɩa yɩrɩŋ lɛ, koo a mʋ tɩgɛ wɩalɩŋ la sɩɩ dagɛma lɛ.

² Yosu-la nɩhɩasɩŋ sɩ laa Yesu wɩaa dii, ʋ bɩ maga dɩ ba mɩmaasɛ ba tɩŋŋaa a tɩŋ ba kala sɩ laa Yesu wɩaa dii. Ʋ paala magɛ dɩ ba tɩŋ tɩntɩŋŋaa woruŋ nɛ a pɩba, bɛɛ wɩaa nɩalɩŋ ba sɩ tɩmaa pa ŋaa nɩa sɩ laa Yesu wɩaa dii nɛ, a ŋaa nɩa ba cho. Timoti, wɩaa deemba nɛ ŋ jaŋ joŋo dagɛba a chaasa leŋ dɩ ba tutoba.

³ Nɩɩ-la kala sɩ bɩ wʋtɩtɩɩba-la La Tɩɩna Yesu Kirisito sɩ bʋla daga aŋ dagɛ wʋtanɩɩ, wɩalɩŋ sɩ bɩ la Wɩɩchʋɔlɛ wombiiŋ ka to,

⁴ ʋ tɩɩna kɛŋ ʋ tɩtɩa yʋgɛ nɛ, aŋ bɩ wɩɩkala jɩŋ. Ʋ kɛŋ tʋɔbɩɩŋ bɔŋŋɔɔ nɛ a cho kaalɛrɛ, a ŋɩŋaa goŋ wɩalɩŋ sɩ bɩ sɩɩfɩaŋ wɩaa ŋaa lɛ. Ŋɩɩ yie leŋ nɩaa yaraa bibieri dɔŋɔ lɛ, ba yuyuo dɔŋɔ a tʋtʋʋsɛ dɔŋɔ, a bɩbɩɩnɛ wʋbɔŋŋɔɔ dɔŋɔ lɛ.

⁵ Nɩaa deemba nyuŋ bɩra bɩ tɩŋ. Ŋɩɩ nɛ tɩɩ ba yie kɛŋ wɩaa lɩlɛrɛ ŋɩɩ. Ba bɩra bɩ wʋtɩtɩɩ ma jɩŋ. Ba bɩɩna Wɩɩchʋɔlɛ wombiiŋ ŋaa moribii chɛɛrɩ wombiiŋ nɛ.

⁶ Wʋtɩtɩɩ, dɩ nɩaa nɩɩ to Wɩa wombiiŋ aŋ leŋ dɩ ba tʋɔŋ tɔrɛ kɩalɩŋ ba sɩ kɛnɛ nyuŋ, ŋɩɩ nyʋʋrʋŋ yʋga,

⁷ bɛɛ wɩaa la sɩ kɔ dʋnɩa, la bɩ kʋŋkala kaa kɔ. Ŋɩɩ wɩaa, dɩ la nɛ sʋba, la bɩra bɩ kʋŋkala kaa lɩɩ dʋnɩa lɛ a mʋmʋ.

⁸ Dɩ la nɛ kɛŋ kʋdiilee arɩ gɛnnɩŋ, ʋ maga la leŋ dɩ ba magɛla nɛ.

⁹ Ama nɩalɩŋ sɩ cho dɩ ba kɛŋ kɩaa dʋnɩa deeŋ lɛ, Sɩtaanɩ yie nyɩsɛba hɛ bɛrɛ lɛ nɛ, baa ŋaa nɩyaarɩ wɩaa arɩ ba tʋɔtɔrɛ wɩalɩŋ sɩɩ cheiba. Wɩaa deemba nɩɩ chei nɩaa woruŋ.

¹⁰ Dɩ nɩaa nɛ cho moribiee, ba jaŋ wuo ŋaa wʋbɔŋ na-kala. Nɩaa dɔnsʋŋ joŋ ŋɩɩ ba sɩ laa Wɩa dii ta nɛ a tɩŋ ba sɩ cho moribiee wɩaa, ŋɩɩ leŋ tʋɔ-cheeŋ kɩŋkɛŋ jʋʋ.

Pɔɔl chagɩlɛ Timoti

¹¹ Ama ŋ-na sɩ ŋaa Wɩa tɩntɩnnʋ, sɩ́ wɩaa deemba kala ŋaa. Leŋ dɩ ŋ sɩɩŋ fɩɛsɛ dɩ ŋ ŋɩŋaa tʋɔpʋl wɩaa, a tuto Wɩa wombiiŋ, a chɩŋ wɩalɩŋ ŋ sɩ laa dii lɛ, a cho nɩaa, a kɛŋ kenyiri, a kɛŋ ŋ tɩtɩa muuri nɩaa sɩpaaŋ.

¹² Yuo laal-la woruŋ a mʋ tɩgɛ wɩalɩŋ ŋ sɩ laa dii lɛ. Hɛ doluŋ a wuo laa mɩɩsɩ-la sɩ bɩ dɛrɛ, ʋ wɩaa nɛ Wɩa yɩrɩŋ bʋa-la lɛ ŋ sɩ suri ŋ niiŋ a bʋl nɩ-daŋ sɩpaaŋ arɩ ŋ laa Wɩa dii nɛ.

¹³ Mɩɩ sʋlʋŋ Wɩa arɩ Kirisito Yesu sɩpaaŋ dɩ ŋ to wɩalɩŋ kala mɩ sɩ bʋla pɩŋ. Wɩa nɛ joŋ mɩɩsɩŋ a pɩ kʋŋkala. Kirisito Yesu ma nɛ ŋaa nɩɩ-la fa sɩ bʋl wʋtɩtɩɩ Pɔntɩɔs Paalɩt sɩpaaŋ, nɩɩ-la fa sɩ chɩŋ Rom kuoru-balɩŋ nyuŋ Judiya tinteeŋ lɛ, a wuo bʋl wʋtɩtɩɩ a pʋ.

¹⁴ Hɛ doluŋ aŋ to wɩaa deemba arɩ tʋɔ-bala, dɩ nɩaa sɩ́ wuo joŋ cheeriŋ pɩŋ. Kɛŋ ŋɩɩ naaŋ lɛ a kaa mʋ yi tapʋlɩɩ-la La Tɩɩna Yesu Kirisito sɩ jaŋ mɩɩra kɔ.

¹⁵ Wɩa jaŋ leŋ dɩ ʋ kɔ bʋa-la lɛ ʋ sɩ bene dɩ ʋ maga dɩ ʋ kɔ. Wɩa dʋndʋŋa nɛ maga la dɛnnɛ, a ŋaa Wɩɩ-balɩŋ sɩɩ beŋ kʋŋkala. Ʋ nɛ ŋaa kuoru-balɩŋ a kɛŋ kuoroo kala doluŋ. Ʋ nɛ ŋaa kʋŋkala Tɩɩna.

¹⁶ Ʋ dʋndʋŋa nɛ bɩ sʋʋ. Ʋ hɛ pʋlʋŋ-bal tʋɔŋ nɛ, nʋʋkala bɩ nɩmɛ wuo mʋ. Nʋʋkala ha bɩ ʋ na, nʋʋ ma kala saa bɩ ʋ wuo na. Ʋ maga dɩ nɩaa kala zizilu nɛ. Ʋ nɛ kɛŋ doluŋ a kaa mʋ wuu. Amɩɩ.

¹⁷ Bʋla pɩ nɩalɩŋ sɩ kɛŋ kɩaa dʋnɩa deeŋ lɛ dɩ ba sɩ́ ba tɩtɩa dagʋ koo a joŋ ba yɩɛlaa hɛ ba dʋa lɛ, bɛɛ wɩaa nʋʋkala bɩ jɩŋ ʋ dʋa-la chie sɩ jaŋ chɩŋ ŋɩɩ. Ama ʋ maga dɩ ba joŋ ba yɩɛlaa hɛ Wɩa lɛ. Ʋ nɩɩ pɩla kʋŋkala la sɩɩ chɛ dɩ la kaa nɩnɩɩ sɩma.

¹⁸ Bʋla pɩ nɩalɩŋ sɩ kɛŋ kɩaa dɩ ba ŋɩŋaa wʋzɔŋŋɔɔ, dɩ ba leŋ dɩ ba wʋzɔŋŋɔɔ yʋgɛ. Bʋla pɩba dɩ ba kɛŋ zile a ŋaa kɩaa pɩpɩ nɩaa.

¹⁹ Dɩ ba nɩɩ ŋaa ŋɩɩ, ba jaŋ wuo chɛ kɩaa a bil ba tɩtɩa lɛ Wɩa-jaŋ lɛ dɩ ba wuo na kɩalɩŋ nyʋʋrʋŋ maachie. Ŋ-la nɛ ba jaŋ wuo na mɩɩsɩ-la sɩ ŋaa mɩɩ-tɩtɩɩ.

²⁰ Tɔɔ, Timoti, pɔ tɩntɩmɩɩ-la Wɩa sɩ joŋo hɛ ŋ nɩsɩŋ lɛ woruŋ. Lɩɩsɛ ŋ tɩtɩa nɩalɩŋ sɩɩ bʋl wɩalɩŋ sɩ bɩ Wɩa wombiiŋ ka to lɛ, aŋ kɛŋ wɩalɩŋ lɩlɛrɛ. Nɩalɩŋ sɩɩ ŋaa ŋɩɩ yie nyɩɛ wɩaa aŋ bɩɩnɛ wʋjɩmɩɩ nɛ ŋɩɩ.

²¹ Nɩaa dɔnsʋŋ to wʋjɩmɩŋ deeŋ lɛ nɛ a joŋ wɩalɩŋ ba sɩ laa dii ta. Wɩa lahɔrɩmɔ lɛ ma jaŋ hɔŋ arɩ yarɩfɩɛlaa.