1 Timoti 5 - WƖA TENIŊ

Ŋɩɩ sɩ maga dɩ nɩalɩŋ sɩ laa Yesu wɩaa dii aa hilimi ŋɩŋaa dɔŋɔ lɛ

¹ Sɩ́ nɩhɩaŋ lɛ kpɩa, ama chaasa bʋl wɩaa pʋ, a zilu arɩ ʋ ŋaa ŋ nyɩmma dɔŋɔ tɩɩna nɛ. Kɛŋ bapʋɔsaa woruŋ arɩ ba ŋaa ŋ naambiiriŋ nɛ.

² Kɛŋ hanɩhɩasɩŋ ma woruŋ arɩ ba ŋaa ŋ naamba nɛ, a kɛŋ hantolibiisiŋ ma woruŋ arɩ ba ŋaa ŋ dɩhaalaa nɛ. Dɩ ŋ nɩɩ ŋaa ŋɩɩ, pɔ dɩ disiniŋ sɩ́ ma pɛgɛ hɛ.

³ Yo-haalaa sɩ bɩ nɩaa kɛnɛ dɩ ba bibemba, zizilba a pɩpɛ ba lɛ.

⁴ Ama dɩ yo-haal-la nɛ kɛŋ biiriŋ koo nihee, ʋ maga dɩ ba laa sɩpaaŋ ŋaa wɩɩ-la Wɩa sɩ sɩ dɩ ba ŋaa nɛ a bibeŋ ba dɩa nɩaa, a wuo tiŋ nɩalɩŋ sɩ lʋlba arɩ ba naabalɩmaba chɩmɩŋ, bɛɛ wɩaa ŋɩɩ nɩɩ tɔrɛ Wɩa tʋɔŋ.

⁵ Yo-haal-la chaasa bɩ nʋʋkala kɛnɛ dɩ ʋ benu, ʋ yie joŋ ʋ yɩɛlaa kala hɛ Wɩa lɛ aa sʋlʋ tɩtaŋɩŋ arɩ wɩɩhɛyɛ bʋa na-kala dɩ ʋ pɛ ʋ lɛ.

⁶ Ama yo-haal-la sɩɩ to ʋ tɩtɩa tʋɔtɔrɛ wʋŋaalaa lɛ, ʋ-na paala nagɛ ʋ sʋba nɛ Wɩa teeŋ aŋ ta wei.

⁷ Chaasa bʋl wɩaa deemba a pɩ Wɩa nɩaa, dɩ ba sɩ́ wʋcheeli kala kɛŋ nɩaa teeŋ.

⁸ Dɩ nʋʋkala nɛ bɩ ʋ naambiiriŋ nyuŋ ka beŋ a wasanyaŋ ʋ dɩa nɩaa tɩtɩa, ʋ vɩa wɩalɩŋ ʋ sɩ laa dii ta nɛ. Nɩɩ-la sɩ paala bɩ Yesu wɩaa laa dii nɛ kpɩaʋ.

⁹ Sɩ́ yo-haal kala yɩrɩŋ ŋmʋnsa hɛ yo-haalaa teŋ-la tʋɔŋ, see ʋ tɩɩna yi jɩsɩŋ mahɩŋ batori, a fa jaa bal-bala dʋndʋŋ.

¹⁰ Ʋ maga dɩ ʋ wʋŋaalaa zɔŋ nɛ, dɩ ʋ bibeŋ ʋ biiriŋ woruŋ, a kɩkɛŋ nʋhʋɔraa woruŋ ʋ dɩa lɛ, a hʋhʋɔrɛ Wɩa nɩaa woruŋ ʋ dɩa lɛ, a pɩpɛ nɩalɩŋ wɩaa sɩ jʋa lɛ, a joŋ ʋ tɩtɩa hɛ wʋzɔŋŋɔɔ ŋaanɩŋ lɛ.

¹¹ Ama sɩ́ yo-haala-la sɩ ŋaa hantolibiisiŋ yɩrɩŋ ŋmʋnsa hɛ yo-haala-la tʋɔŋ. Ba jaŋ wuo kʋ cho dɩ ba jaa balaba, a leŋ Kirisito tɩntɩŋŋaa.

¹² Dɩ ba nɛ ŋaa ŋɩɩ, ba jaŋ laa cheeriŋ a tɩŋ ba sɩ vɩa wɩɩ-la ba fa sɩ laa sɩpaaŋ bʋl arɩ ba jaŋ ŋaa pɩ Kirisito.

¹³ Ŋɩɩ dʋndʋŋ ma dee, ba bɩ sɛɩ dɩ ba tɩŋ tɩntɩŋŋaa aŋ gɔllɔ tuto dɩɩ-niiriŋ. Dɩ-bɔmʋŋ nɛ, ba yie gɩgaa nɩaa harɩŋ a joŋ ba niiŋ hɩhɛ nɩaa wɩaa lɛ a bʋl wɩalɩŋ sɩ bɩ maga dɩ ba bʋl.

¹⁴ Ŋɩɩ wɩaa, mɩ jaŋ bʋl dɩ yo-haala-la sɩ ŋaa hantolibiisiŋ, dɩ ba jaa balaba a lʋlʋl biiriŋ a bibemba, a tɩtɩŋ ba dɩa tɩntɩŋŋaa. Dɩ ba nɛ ŋaa ŋɩɩ, la dʋndɔmɔ Sɩtaanɩ bɩ jaŋ wuo na wombiiŋ a bʋl wʋbɔŋ kala a tɩgɛ la lɛ.

¹⁵ Hantolibiisi-la dɔnsʋŋ sɩ ŋaa yo-haalaa paala vɩa Kirisito nɛ aŋ mɩɩra tuto Sɩtaanɩ.

¹⁶ Ama haal-na kala sɩ laa Yesu wɩaa dii, dɩ yo-haalaa nɛ hɛ ʋ dɩa nɩaa tʋɔŋ, ʋ maga dɩ ʋ beŋ ba nyuŋ nɛ. Ʋ bɩ maga dɩ ʋ jomba pɩ nɩalɩŋ sɩ laa Yesu wɩaa dii aa hilimi dɩ ba bibemba. Nɩalɩŋ sɩ laa Yesu wɩaa dii aa hilimi, nɛ maga dɩ ba bibeŋ yo-haala-la sɩ bɩ nɩaa kɛnɛ dɩ ba bibemba.

¹⁷ Wɩa nɩaa nɩhɩasɩ-la sɩɩ tɩŋ ba tɩntɩŋŋaa woruŋ, ʋ maga dɩ nɩalɩŋ sɩ laa Yesu wɩaa dii aa hilimi zizilba nɛ, a wasanyaŋ nɩalɩŋ sɩ faasa bʋl Wɩa wɩaa aŋ pɛ dɩdagɛ nɩaa,

¹⁸ bɛɛ wɩaa ba bʋl ŋ-la nɛ Wɩa teniŋ tʋɔŋ. Ba sɩ, “Dɩ nɛŋ nɩɩ ŋmoo mɩaa, ʋ bɩ maga dɩ ŋ vɔɔ ʋ niiŋ tɔ.” Ba bɩra ŋmʋnsa arɩ tɩntɩnna maga dɩ ʋ laa ʋ time nɛ.

¹⁹ Dɩ nʋʋ nɛ joŋ cheeriŋ a pɩ nɩalɩŋ sɩ laa Yesu wɩaa dii aa hilimi kʋhɩaŋ, sɩ́ jegile nɩɩ tɩɩna teeŋ, see dɩ nɩaa balɩa koo batori pɛ na wɩɩ-la.

²⁰ Dɩ Wɩa nɩaa nɩhɩaŋ kala nɛ vɛnɛɛ ŋaa wʋbɔŋŋɔɔ ʋ bɩ leŋ, bʋl ʋ teeŋ nɩalɩŋ sɩ laa Yesu wɩaa dii aa hilimi sɩpaaŋ. Dɩ ŋ nɛ ŋaa ŋɩɩ, fawʋllʋŋ jaŋ kɛŋ nɩkaanaa.

²¹ Mɩ bʋl ŋɩɩ pɩŋ Wɩa arɩ Kirisito Yesu arɩ Wɩa tɩndaaraa Wɩa sɩ lɩɩsa sɩpaaŋ nɛ. Mɩɩ sʋlʋŋ arɩ sɩɩfɩɛsɩŋ dɩ ŋ to wɩaa deemba, a sɩ́ nɩaa kaa pɔrɛ wɩɩ-na kala ŋ sɩɩ ŋaa lɛ. Joŋ ba kala dɩ ba ŋaa nɩbala ŋ teeŋ.

²² Fɩɛlɛ ŋ sɩaa a pɔ dɩ ŋ sɩ́ pese lɩɩsɛ nʋʋ a joŋ ŋ nɩsaa daŋ ʋ lɛ dɩ ʋ tɩŋ Wɩa tɩntɩŋŋaa. Dɩ tɩɩna nɛ ŋaa wʋbɔŋ, ka ŋ lɩɩsʋ, ŋ ma jaŋ pɛ jʋʋ ʋ wʋbɔŋ-la lɛ. Sɩ́ disiŋ ŋaa wɩɩŋ deeŋ lɛ.

²³ Sɩ́ lɩɩŋ dʋndʋŋ nyʋa, ama nyʋnyʋa sɩnɩŋ mʋa mʋa, a tɩŋ ŋ luoruŋ sɩ yie wʋwɩɩ bʋa na-kala wɩaa.

²⁴ Nɩaa dɔnsʋŋ wʋbɔŋŋɔɔ bɩ faa, ka dɩ ba-na dii ba sarɩya nʋʋkala yie jɩŋ arɩ ba cheye nɛ, ama nɩaa dɔnsʋŋ wʋbɔŋŋɔɔ yie faa nɛ, tapʋlɩɩ dɔŋ nɛ ba jaŋ kʋ lɩɩ pʋlʋmʋŋ.

²⁵ Ŋɩɩ tɩtɩa nɛ dɩ nɩaa dɔnsʋŋ nɛ ŋaa wʋzɔŋŋɔɔ, nɩaa yie naba lɩma lɩma. Nɩaa dɔnsʋŋ wʋzɔŋŋɔɔ ma yie faa nɛ. Ama chɛɛ dɔŋ nɛ ba jaŋ chaasa lɩɩ pʋlʋmʋŋ tʋɔŋ.