1 Timoti 4 - WƖA TENIŊ

Pɔɔl bʋl wɩaa a tɩgɛ wʋnyɩɛrɩ kerichiba lɛ

¹ Wɩa Dɩŋ-zɔmʋŋ paala chaasa bʋl arɩ dʋnɩa dɩdɛrɩŋ deeŋ lɛ la sɩ hɛ, nɩaa dɔnsʋŋ jaŋ joŋ wɩalɩŋ ba sɩ laa dii ta. Ba jaŋ tuto jɩŋ-bɔŋŋɔɔ harɩŋ a nyɩsɛ nɩaa aa dagɛba Sɩtaanɩ wombiiŋ.

² Ba fugo dɩdagɛ Wɩa wɩaa nɛ, ama ba ŋaa wʋnyɩɛra nɛ. Ba ŋaa tʋɔ-togi tɩmma nɛ.

³ Nɩdosunu-la yie dagɛ arɩ ʋ bɩ maga dɩ nɩaa jɩjaa haalaa, a bɩra kɩkɩsɛ kʋdiilee dɔnsʋŋ ma arɩ nammɩɩ-dosunuŋ. Ama Wɩa nɛ ta nammɩa arɩ kʋdiilee deemba dɩ nɩaa didii. Nɩalɩŋ sɩ laa Yesu wɩaa dii a jɩŋ wʋtɩtɩɩ-la maga dɩ ba laa sɩpaaŋ lɔllʋ aŋ-na dii.

⁴ Kʋŋ na-kala Wɩa sɩ ta zɔmɔ nɛ, ʋ bɩ maga dɩ nɩaa kɩkɩsɛba, ama ʋ maga dɩ la lɔllɛ Wɩa nɛ aŋ-na dii kɩalɩŋ,

⁵ bɛɛ wɩaa Wɩa niiŋ wɩaa arɩ la chʋɔla yie leŋ kɩalɩŋ bɩ disiniŋ kɛnɛ Wɩa teeŋ.

Pɔɔl bʋla pɩ Timoti dɩ ʋ faasa tɩŋ Wɩa tɩntɩŋŋaa woruŋ

⁶ Dɩ ŋ nɛ joŋ wɩaa deemba a dagɛ ŋ dɔnsʋŋ tɩŋŋaa sɩ laa Yesu wɩaa dii, ŋ jaŋ ŋaa Kirisito Yesu tɩntɩnnɩ-zɔŋ. Ŋɩɩ jaŋ dagɛ arɩ ŋ waa nɛ wʋtɩtɩɩ-la la sɩ laa dii lɛ, arɩ wʋzɔmɔ-la la sɩ dagɩŋ ŋ to lɛ.

⁷ Ama pɔ dɩ ŋ sɩ́ sʋnsɔgʋlɔ-la sɩ bɩ Wɩa wombiiŋ ka to gʋnnʋ. Vɩaba ta. Kɛŋ ŋ tɩtɩa, a gʋnnɛ wɩalɩŋ sɩ jaŋ leŋ dɩ ŋ to Wɩa wombiiŋ woruŋ.

⁸ Dɩ ŋ nɛ kɛŋ ŋ yaraa hʋhʋgʋsɛ, ŋɩɩ jaŋ pɛ ŋ lɛ mʋa. Ama dɩ ŋ nɛ kɛŋ ŋ tʋɔŋ a to Wɩa wombiiŋ, ŋɩɩ jaŋ pɛ ŋ lɛ dɩ ŋ na mɩɩsɩŋ dʋnɩa deeŋ lɛ, dɩ ŋ nɛ sʋba ma, ŋ jaŋ kɛŋ mɩɩsɩ-la sɩ bɩ dɛrɛ.

⁹ Wɩɩ-la mɩ sɩ bʋla ŋaa wʋtɩtɩɩ nɛ, a maga dɩ nʋʋkala sɛɩba a laa dii.

¹⁰ Laa yɩɛlɛ Wɩa sɩ weye lɛ nɛ. Ŋɩɩ nɛ tɩɩ laa loo a faasaa tɩŋ woruŋ. Wɩa nɛ ŋaa nʋʋkala Laataara, a saa wasanyaŋ nɩalɩŋ sɩ laa ʋ wɩaa dii.

¹¹ Chaasa bʋl wɩaa deemba a pɩpɩ nɩaa dɩ ba ŋɩŋaa aŋ pɛ dɩdagɛba wɩalɩŋ ma.

¹² Ŋ ŋaa hambie nɛ, ama sɩ́ leŋe dɩ nʋʋkala bee gʋʋnʋŋ. Leŋ dɩ nɩalɩŋ sɩ laa Yesu wɩaa dii na ŋ wʋbʋlaa, ŋ mɛlɛ, ŋɩɩ ŋ sɩ cho nɩaa, ŋɩɩ ŋ sɩ laa Wɩa dii arɩ ŋ tʋɔpʋla a to ŋ naabʋɔsʋŋ.

¹³ Ŋaa sɩɩfɩɛsɩŋ karɩmɛ Wɩa niiŋ wɩalɩŋ pɩ nɩaa dɩ ma nɛ hilime, a dɩdagɛ nɩaa, aŋ pɛ bʋl wɩalɩŋ pɩpɩ nɩaa, aŋ ka dɩ mɩ-na kɔ.

¹⁴ Sɩ́ kʋ-la Wɩa Dɩŋ-zɔmʋŋ sɩ joŋo dii zile ŋ lɛ vɩa, Wɩa wʋlaabʋllaa sɩ bʋl kʋ-la wɩaa, ka Wɩa nɩaa nɩhɩasɩŋ joŋ ba nɩsaa a daŋ ŋ lɛ ŋ laa.

¹⁵ Ʋ maga dɩ ŋ ŋɩŋaa wɩaa deemba nɛ. Joŋ ŋ nyuŋ kala hɛ ba lɛ dɩ nʋʋkala wuo na ŋɩɩ ŋ wɩaa sɩ mʋ sɩpaaŋ.

¹⁶ Kɛŋ ŋ tɩtɩa a mʋ tɩgɛ ŋ mɛlɛ arɩ wɩalɩŋ ŋ sɩɩ dagɛ lɛ. Chɩŋ wɩalɩŋ lɛ woruŋ, bɛɛ wɩaa dɩ ŋ nɛ ŋaa ŋɩɩ, ŋ jaŋ laa ŋ tɩtɩa arɩ nɩalɩŋ sɩ jegilee nɩɩ ŋ teeŋ ta.