1 Timoti 2 - WƖA TENIŊ

Wombii-la Wɩa nɩaa sɩ maga dɩ ba to a chʋchʋɔlɛ Wɩa

¹ Sɩɩfɩaŋ wɩɩ nɛ mɩɩ chɛ dɩ mɩ laa sɩpaaŋ bʋla pɩma. Ʋ nɛ ŋ-la: Má chʋɔlɛ Wɩa aŋ pɛ sʋsʋlʋ dɩ ʋ pɩma kɩalɩŋ ma sɩɩ chɛ. Má chʋɔlɛ Wɩa a pɩpɩ ma dɔnsʋŋ tɩŋŋaa ma, aŋ pɛ lɔllʋ a pɩpɩ nʋʋkala.

² Má chʋɔlɛ Wɩa pɩpɩ kuoroo arɩ nɩalɩŋ sɩ kɛŋ doluŋ ma lɛ, dɩ la wuo hɔŋ sɔm arɩ yarɩfɩɛlaa, a wuo tuto Wɩa a ŋɩŋaa wɩalɩŋ kala sɩɩ to Wɩa wombiiŋ.

³ Ʋ ŋɩɩ zɔmɔ nɛ a tʋtɔrɛ la Laataara Wɩa tʋɔŋ.

⁴ Ʋ cho dɩ ʋ laa nʋʋkala ta nɛ dɩ ba wuo jɩŋ wʋtɩtɩɩ-la sɩ lɩɩ ʋ teeŋ.

⁵ Wɩa ŋaa kʋbala nɛ. Nɩbala ma nɛ hɛ Wɩa arɩ nuhuobiine pɛgɛ dɩ ʋ kɛmba kaa hɛ dɔŋɔ lɛ. Nɩɩ-la nɛ ŋaa Kirisito Yesu.

⁶ Ʋ joŋ ʋ mɩɩsɩŋ yɔɔ sʋʋŋ nɛ dɩ ʋ laa nʋʋkala ta. Ʋ nɛ dagɛla ŋɩɩ arɩ bʋa-la yie nɛ, dɩ Wɩa laa nʋʋkala ta.

⁷ Ŋɩɩ nɛ tɩɩ Wɩa lɩɩsɛmɛ dɩ mɩ ŋaa ʋ nanzɔɔ a wuo heele bʋl wɩaa deemba a pɩ nɩalɩŋ sɩ bɩ Juu tɩŋŋaa ŋaa, aŋ pɛ dagɛba dɩ ba laa wɩalɩŋ dii a jɩŋ wʋtɩtɩɩ. Wʋtɩtɩɩ nɛ mɩɩ bʋl, mɩ bɩ wɩaa nyɩa.

⁸ Dɩ ma nɛ kʋ hilimi lee na-kala dɩ ma chʋɔlɛ Wɩa, mɩɩ chɛ dɩ baala-la sɩ joŋ ba tɩtɩa a pɩ Wɩa nɛ kɛŋ ba nɩsaa jee a chʋɔlɛ Wɩa. Dɩ ba nɩɩ chʋɔlɛ Wɩa, ʋ bɩ maga dɩ ba nɩna baanɩŋ koo a bɩbɩɩnɛ yuosuŋ wɩaa.

⁹ Mɩɩ chɛ dɩ haalaa ma fɩɛlɛ ba sɩaa aŋ pɛ kɛŋ wʋjɩmɩŋ ŋɩɩ ba sɩɩ laalɛ ba gɛnnɩŋ lɛ. Gɛnnɩ-la ba sɩ jaŋ laalɛ dɩ nɩaa bɩbagɩsɛ ba yaraa, ba sɩ́ ba laalʋ. Má sɩ́ leŋe dɩ nɩaa to ma nyuŋ vɔɔnʋŋ lɛ aa bagɩsɛma, koo má sɩ́ sɛlɩmɛ dɩgɩlɩŋ-kpɛnsɩŋ arɩ banzɔlɔba-la sɩɩ tʋl hɛ arɩ gɛnnɩŋ yallɩŋ sɩ hɛyɛ dɩ nɩaa bɩbagɩsɛma.

¹⁰ Ama má leŋ dɩ nɩaa bɩbagɩsɛ haalaa a tɩŋ ba wʋzɔŋŋɔɔ lɛ. Ŋɩɩ nɛ jaŋ dagɛ arɩ baa to Wɩa.

¹¹ Haalaa maga dɩ ba fɩɛla hɔŋ nɛ a gʋgʋnnɛ Wɩa wɩaa, a kɛŋ ba tɩtɩa muuri, a tuto nɩalɩŋ sɩ kɛŋ doluŋ ba lɛ harɩŋ.

¹² Mɩ bɩ haalaa wombiiŋ pa dɩ ba dɩdagɛ baalaa, koo dɩ ba kɛŋ doluŋ baalaa lɛ a bibemba. Ʋ maga dɩ ba hɔŋ sɔm nɛ.

¹³ Wɩɩ-la sɩ tɩɩ nɛ ŋ-la: Wɩa fa laa sɩpaaŋ ta Adam nɛ aŋ-na ta Hawa.

¹⁴ Sɩtaanɩ bɩ Adam nɛ nyɩsa. Hawa nɛ ʋ nyɩsɛ ʋ ŋaa wʋbɔŋ a chei Wɩa niiŋ wɩaa ʋ sɩ bʋla pɩba.

¹⁵ Ama dɩ haala nɛ laa Wɩa dii, a cho nɩaa, a leŋ dɩ ʋ sɩaa fɩɛlɛ a bɩ disiniŋ kɛnɛ, Wɩa jaŋ laaʋ ta biiriŋ lʋlʋŋ lɛ.