1 Timoti 1 - WƖA TENIŊ

¹ Mɩ-na Pɔɔl nɛ ŋmʋnsɛ teniŋ deeŋ. La Tɩɩna Wɩa sɩ ŋaa la Laataara doluŋ lɛ nɛ ʋ lɩɩsɛmɛ dɩ mɩ ŋaa Kirisito Yesu nanzɔɔ. Kirisito Yesu lɛ nɛ la yɩɛlaa hɛ.

² Mɩ ŋmʋnsɛ teniŋ deeŋ a pɩpɩ ŋ-na Timoti nɛ. A tɩŋ ŋ sɩ laa Kirisito wɩaa dii lɛ, ŋ ŋaa mɩ bii-tɩtɩɩ nɛ. La Nyɩmma Wɩa arɩ La Tɩɩna Kirisito Yesu lahɔrɩmɔ lɛ, ba jaŋ fá ŋ nenige a leŋ dɩ ŋ hɔŋ arɩ yarɩfɩɛlaa.

Má pɔ ma tɩtɩa lɛ a mʋ tɩgɛ nɩalɩŋ sɩɩ dagɛ wʋnyɩɛrɩŋ lɛ

³ Bʋa-la lɛ la fa sɩ hɛ Ɛfɛsɩs lɛ, mɩ bʋla pɩŋ dɩ ŋ hɔŋ nɩmɛ, aŋ ka dɩ mɩ mʋ Masidoonia tinteeŋ. Nɩaa dɔnsʋŋ hɛ nɩmɛ aa dagɛba wʋnyɩɛrɩŋ. Bʋla pɩba dɩ ba leŋ wɩalɩŋ.

⁴ Bʋla pɩba dɩ ba sɩ nɩalɩŋ sʋnsɔgʋlɔ-la joŋo hɛ ba nyuŋ lɛ, a sɩ́ ba naabalɩmaba doho nɩaa wɩaa sɩ duomo ŋɩɩ dɩɩsʋ. Wɩaa deemba yie ŋaa nɩaa kɛŋ nii-doluŋ nɛ. Nii-doluŋ ma bɩ jaŋ pɛ ba lɛ dɩ ba laa Wɩa dii a laa wɩɩ-la ʋ sɩɩ chɛ dɩ ʋ ŋaa pɩ ʋ nɩaa dii.

⁵ Wʋnyuŋ-la mɩ sɩɩ chɛ mɩ bʋla pɩŋ nɛ dɩ ba cho ba dɔnsʋŋ tɩŋŋaa arɩ tʋɔpʋla, a leŋ dɩ ba tʋɔbɩɩnaa chesi, a bɩra leŋ dɩ ba ŋaa nɩtɩtɩɩba wɩalɩŋ ba sɩ laa dii lɛ.

⁶ Nɩaa dɔnsʋŋ vɩa wɩaa deemba nɛ aŋ mɩɩraa bʋl wʋyaayasɩŋ.

⁷ Mosis fa sɩ ŋmʋnsɛ wɩalɩŋ bil dɩ nɩaa tuto, nɩaa deemba fa cho dɩ ba dagɛ nɩaa wɩaa deemba nɛ, ama ba tɩtɩa bɩ wɩalɩŋ ba sɩ ŋmʋnsa bʋbʋɔŋ jɩŋ. Ba bɩ wɩalɩŋ ma ba sɩɩ bʋl chaasa jɩŋ.

⁸ La jɩma arɩ wɩalɩŋ Mosis sɩ ŋmʋnsa bil dɩ nɩaa tuto, ba zɔmɔ nɛ, dɩ nɩaa nɛ kɛmba kaa tɩtɩŋ arɩ ba sɩ dagɛ ŋɩɩ.

⁹ Ʋ bɩra maga dɩ la jɩŋ arɩ wɩalɩŋ Mosis fa sɩ ŋmʋnsa bil dɩ nɩaa tuto, ʋ bɩ ŋmʋnsa pɩ tʋɔpʋl tɩŋŋaa. Ama ba ŋmʋnsa pɩ nɩalɩŋ sɩɩ chei Wɩa niiŋ wʋbʋlaa nɛ. Ʋ bɩra ŋmʋnsa pɩ nɩbɔŋŋɔɔ, arɩ nɩalɩŋ sɩ bɩ Wɩa ka fá, arɩ wʋbɔŋ ŋaaraa, arɩ nɩalɩŋ sɩ bɩ Wɩa ka to, arɩ nɩalɩŋ sɩɩ kpʋ ba nyɩmmaba arɩ ba naamba, arɩ nɩkpʋʋraa.

¹⁰ Ba bɩra ŋmʋnsɛ wɩaa deemba a pɩ balɩɩlɩŋ arɩ halɩɩlɩŋ nɛ, arɩ baala-la sɩ gɔllɔ tuu ba dɔŋɔba bʋbʋɔ-niiree, arɩ nɩalɩŋ sɩ gɔllɔ paa nɩaa biiriŋ a kaa faa lɛl. Ba bɩra ŋmʋnsɛ wɩaa deemba a pɩ wʋnyɩɛraa arɩ dansɩa wʋnyɩɛraa, arɩ nɩalɩŋ sɩ bɩ Wɩa wʋtɩtɩɩ-la ka to.

¹¹ Wɩalɩŋ mɩ sɩ dagɛma lɩɩ Wɩa sɩ kɛŋ tʋla wʋzɔmɔ-la tʋɔŋ nɛ, ʋ sɩ joŋo pɩmɛ dɩ mɩ bʋla pɩma. Wɩa nɛ kɛŋ yɩrɩŋ.

Pɔɔl lɔllɛ Wɩa a tɩŋ ʋ sɩ fá ʋ nenige

¹² Mɩɩ lɔllɛ La Tɩɩna Kirisito Yesu, bɛɛ wɩaa ʋ nɛ bene dɩ mɩ maga dɩ mɩ bʋl ʋ niiŋ wɩaa pɩ nɩaa. Ŋɩɩ nɛ tɩɩ ʋ lɩɩsɛmɛ dɩ mɩ tɩma pʋ. Ʋ nɛ pɩmɛ doluŋ dɩ mɩ wuo tɩtɩŋ tɩntɩmɩŋ deeŋ.

¹³ Bumbuŋ kala nɛ mɩ paala bʋl wʋbɔŋŋɔɔ ʋ lɛ a to naasɩŋ dɔgɩsʋ a tʋʋsʋ ma. Ka Kirisito ha fá mɩ nenige a lɩɩsɛmɛ dɩ mɩ tɩmaa pʋ. Bʋa-la kala lɛ mɩ fa sɩɩ ŋaa ŋɩɩ, mɩ fa bɩ jɩŋ wɩɩ-la mɩ sɩɩ ŋaa. Mɩ fa bɩ ʋ wɩaa laa dii maa.

¹⁴ Aŋ ka La Tɩɩna Wɩa ha pɛ mɩ lɛ kɩŋkɛŋ kɩŋkɛŋ a leŋ mɩ laa Kirisito Yesu dii, aŋ cho nɩaa ma.

¹⁵ Wɩɩŋ deeŋ mɩ sɩɩ chɛ dɩ mɩ bʋl chaasa ŋaa wʋtɩtɩɩ nɛ a maga dɩ nʋʋkala laa dii. Ʋ nɛ ŋ-la: Kirisito Yesu kʋ tuu dʋnɩa nɛ dɩ ʋ laa wʋbɔŋ ŋaaraa ta. Mɩ nɛ saa paala ŋaa ba tʋɔŋ nɩbɔmʋŋ.

¹⁶ Ama ŋɩɩ wɩaa nɛ tɩɩ Wɩa fá mɩ-na Pɔɔl sɩ chaasa ŋaa wʋbɔŋŋɔɔ a kɩɩ nʋʋkala nenige. Ʋ ŋaa ŋɩɩ dɩ Kirisito Yesu wuo tomi lɛ a dagɛ nɩaa ŋɩɩ ʋ sɩ kɛŋ kenyiri, dɩ ba ma wuo laa ʋ wɩaa dii, a kɛŋ mɩɩsɩ-la sɩ bɩ dɛrɛ.

¹⁷ Má leŋ dɩ la dɛnnɛ la Nyɩmma Wɩa aŋ pɛ zilu a kaa mʋ wuu. Ʋ nɛ kuoro a kaa mʋ deeŋ deeŋ. Ʋ-na bɩ sʋʋ, nɩaa ma bɩ ʋ ka na. Ʋ dʋndʋŋa nɛ ŋaa Wɩa. Amɩɩ.

¹⁸ Mɩ bii, Timoti, mɩɩ chɛ dɩ mɩ bʋl wɩɩ nɛ a pɩŋ. Wɩa wʋlaabʋllaa fa bʋl wɩaa a tɩgɛ ŋ lɛ nɛ. Ŋ nagɛ laalɩyuoru nɛ. Leŋ dɩ wɩalɩŋ ba sɩ bʋla tɩgɛ ŋ lɛ ŋaa ŋ laalɩyuori kɩaa, dɩ ŋ kaa yuo laalɩŋ woruŋ.

¹⁹ Chɩŋ wɩalɩŋ ŋ sɩ laa dii lɛ a leŋ dɩ ŋ tʋɔbɩɩnaa chesi. Nɩaa dɔnsʋŋ bɩra bɩ ba tʋɔbɩɩnaa lɛɛ to, ŋɩɩ nɛ tɩɩ ba joŋ wɩalɩŋ ba sɩ laa dii ta.

²⁰ Haminiiyas arɩ Alɛkɩzanda ma hɛ nɩaa deemba tʋɔŋ nɛ. Ŋɩɩ nɛ mɩ jomba hɛ Sɩtaanɩ nɩsɩŋ lɛ dɩ ʋ dɔgɩsɛba, dɩ ba gʋnnɛ wʋjɩmɩŋ, dɩ ba bɩra sɩ́ Wɩa joŋŋoo tʋʋsʋ.