1 KUOROO 8 - WƖA TENIŊ

Ba kɛŋ Wɩa niiriŋ daga-la jʋʋ Wɩa dɩɩ-bal-la tʋɔŋ

¹ Ŋɩɩ nɛ kuoro Solomoŋ yɩrɛ Iziral doho doho nɩhɩasɩŋ, arɩ ba nyɩŋ-nɩaa nɩhɩasɩŋ kala dɩ ba kɔ ʋ teeŋ Jerusalɛm lɛ dɩ ba joŋ La TƖƖNA niiriŋ daga-la Zaayɔŋ lɛ, Devit tabal-la lɛ.

² Ŋɩɩ nɛ Iziral tɩŋŋaa baalaa kala kɔ kuoro Solomoŋ teeŋ bʋa-la lɛ ba sɩɩ gbieli ba lɛŋŋɛɛ gbiele, chɛŋ-pɛɩ-la ba sɩɩ yɩrɛ Ɛtanɩm tʋɔŋ.

³ Iziral tɩŋŋaa nɩhɩasɩ-la kala sɩ kɔ, Wɩɩsʋllɩ sɩpaalaaraa joŋ La TƖƖNA niiriŋ daga-la,

⁴ arɩ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ arɩ kɩalɩŋ kala sɩ hɛ lɛbɩ-la tʋɔŋ. Wɩɩsʋllɩ sɩpaalaaraa arɩ Levi doho nɩaa nɛ chʋŋ kɩalɩŋ.

⁵ Ka kuoro Solomoŋ arɩ Iziral tɩmma-la kala sɩ kʋ hɛ dɔŋɔ laa daga-la sɩpaaŋ, a kpʋ piesee arɩ nɛsɩŋ a yʋgɛ woruŋ, nʋʋ sɩ bɩ jaŋ wuo dɩɩsɛ a ŋaa Wɩɩsʋlʋŋ.

⁶ Wɩɩsʋllɩ sɩpaalaaraa kɛŋ La TƖƖNA niiriŋ daga-la kʋ jʋʋ Wɩa dɩɩ-bal-la tʋɔŋ sɩpaaŋ lee-la zɔmʋŋ sɩ bɩ magɩa kɛnɛ, a joŋo bil kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ bʋbʋɔŋ.

⁷ Kɩalɩŋ sɩ nagɛ Wɩa tɩndaaraa kɛŋ ba kɩŋkɛnsɩŋ jɛrɛ tɔ La TƖƖNA niiriŋ daga-la arɩ ʋ daa-duduosu-la lɛ ba sɩ kaa jujoŋ.

⁸ Daasɩŋ deemba fa duomo nɛ woruŋ. Dɩ ŋ nɛ jʋʋ Wɩa dɩ-zɔŋ-la lee-la zɔmʋŋ sɩ bɩ magɩa kɛnɛ tʋɔŋ a chɩŋ, ŋ jaŋ wuo naba, ama dɩ ŋ nɛ hɛ ʋ harɩŋ, ŋ bɩ jaŋ wuo naba. Daasɩ-la ha hɛ nɩmɛ arɩ jɩnɩŋ kala.

⁹ Kʋŋkala fa tuo Wɩa niiriŋ daga-la tʋɔŋ a pɛ tabɩɩ-taala-la balɩa Mosis sɩ joŋo hɛ ʋ tʋɔŋ Sɩnaɩ peel-la lɛ, bʋa-la lɛ La TƖƖNA sɩ hɛ niiŋ ʋ dɩ Iziral tɩŋŋaa pɛgɛ, ba sɩ lɩɩ Ijipiti tinteeŋ lɛ harɩŋ.

¹⁰ Wɩɩsʋllɩ sɩpaalaaraa sɩ lɩɩ Wɩa dɩ-zɔŋ-la tʋɔŋ, duoŋ-bɩlɩmbaanɩŋ guu kʋ tuu su Wɩa dɩɩ-bal-la tʋɔŋ kala.

¹¹ La TƖƖNA tʋla fa hɛ duoŋ-bɩlɩmbaaŋ-la tʋɔŋ nɛ, a chaanɛ woruŋ, Wɩɩsʋllɩ sɩpaalaaraa bɩra bɩ wuo jʋʋ dɩɩ-bal-la a tɩŋ ba tɩntɩŋŋaa.

¹² Ŋɩɩ nɛ Solomoŋ fa chʋɔlɛ Wɩa a bʋl, “Mɩ Tɩɩna, ŋ sɩ ŋ jaŋ hɛ duoŋ-bɩlɩmbaaŋ-bine tʋɔŋ.

¹³ Lɛɛlɛ mɩ saa ŋ dɩɩ-balɩŋ sɩ kɛŋ yɩrɩŋ nɛ a pɩŋ, lee ŋ sɩ jaŋ hɛ a kaa mʋ wuu.”

¹⁴ Iziral tɩŋŋaa fa hilime chɩŋ lee-la nɛ, ŋɩɩ nɛ kuoro Solomoŋ bɩrɩma chaasɛba, a sʋl Wɩa pɩba.

¹⁵ Ŋɩɩ nɛ ʋ bɩra bʋl, “Má dɛnnɛ La TƖƖNA, Iziral tɩŋŋaa Wɩa. Ʋ kɛŋ nii-la ʋ sɩ hɛ pɩ mɩ nyɩmma Devit a tɩŋ nɛ. Ʋ fa sɩ,

¹⁶ ‘A chɩŋ bʋa-la mɩ sɩ kɛŋ mɩ nɩaa Iziral tɩŋŋaa kʋ lɩɩ Ijipiti tinteeŋ lɛ, mɩ bɩ tabal kala lɩɩsa Iziral doho doho-la tʋɔŋ dɩ ba saa mɩ dɩɩ-balɩŋ dɩ ba zizilmi nɩmɛ, ama Devit nɛ mɩ lɩɩsɛ dɩ ʋ bibeŋ mɩ nɩaa Iziral tɩŋŋaa.’

¹⁷ Mɩ nyɩmma Devit fa kɛŋ ʋ tʋɔŋ nɛ dɩ ʋ saa Wɩa dɩɩ-balɩŋ nɛ dɩ ba chʋchʋɔlɛ La TƖƖNA, Iziral tɩŋŋaa Wɩa nɩmɛ.

¹⁸ Ŋɩɩ nɛ La TƖƖNA bʋla pɩ mɩ nyɩmma Devit, ‘Ʋ ŋaa wʋzɔŋ nɛ ŋ sɩ kɛŋ ŋ tʋɔŋ dɩ ŋ saa mɩ dɩɩ-balɩŋ pɩmɛ dɩ ba zizilmi nɩmɛ.

¹⁹ Ama ŋ dee nɩɩ-la sɩ jaŋ saa mɩ dɩɩ-balɩŋ pɩmɛ. Ama ŋ tɩtɩa bii-lʋlʋŋ nɛ jaŋ saa mɩ dɩɩ-balɩŋ dɩ ba chʋchʋɔlɛmɛ nɩmɛ.’

²⁰ La TƖƖNA kɛŋ nii-la ʋ fa sɩ hɛ kaa tɩŋ nɛ. Mɩ laa mɩ nyɩmma Devit nyuŋ a dii kuoruŋ nɛ Iziral tinteeŋ lɛ, arɩ La TƖƖNA sɩ bʋl ŋɩɩ, a saa Wɩa dɩɩ-balɩŋ ma dɩ ba chʋchʋɔlɛ La TƖƖNA, Iziral tɩŋŋaa Wɩa nɩmɛ.

²¹ Mɩ bɩra wuo chɛ leriŋ nɛ Wɩa dɩɩ-bal-la tʋɔŋ dɩ Wɩa niiriŋ daga-la chɩŋ nɩmɛ. Ʋ tʋɔŋ nɛ tabɩɩ-taalɩ-la balɩa lɛ ba sɩ ŋmʋnsɛ niiri-la La TƖƖNA sɩ bile ʋ dɩ la nyɩmmaba pɛgɛ bʋa-la lɛ ʋ sɩ kɛmba kaa kʋ lɩɩ Ijipiti tinteeŋ lɛ hɛ.”

Solomoŋ sʋl Wɩa hɛ Wɩa dɩɩ-bal-la lɛ

²² Ŋɩɩ nɛ Solomoŋ sii chɩŋ La TƖƖNA koru-la arɩ Iziral tɩŋŋaa kala sɩpaaŋ, a kɛŋ ʋ nɩsaa je wɩa-nyuŋ,

²³ aŋ chʋɔlɛ Wɩa a bʋl: “Ou, La TƖƖNA, Iziral tɩŋŋaa Wɩa, kʋŋkala tuo wɩa-nyuŋ koo tinteeŋ lɛ a magɩŋ. Ŋ sɩ cho ŋ nɩaa a hɛ nii-la ŋ dɩ ba pɛgɛ, ŋ bɩ ʋ wɩaa yʋa. Ŋ yie chɩŋ ŋ nɩalɩŋ sɩ kɛŋ ba tʋɔŋ kala a tuto wɩalɩŋ ŋ sɩ daga harɩŋ nɛ.

²⁴ Ŋ kɛŋ nii-la ŋ sɩ hɛ pɩ mɩ nyɩmma Devit sɩ ŋaa ŋ tɩntɩnnʋ a tɩŋ nɛ. Jɩnɩŋ ŋ ŋaa wɩalɩŋ kala ŋ sɩ hɛ niiŋ pʋ arɩ ŋ jaŋ ŋaa nɛ.

²⁵ La TƖƖNA, Iziral tɩŋŋaa Wɩa, ŋ hɛ niiŋ a pɩ mɩ nyɩmma Devit sɩ ŋaa ŋ tɩntɩnnʋ nɛ a bʋl, ‘Nʋʋ jaŋ lɩɩ ŋ doho nɩaa tʋɔŋ bʋa na-kala a dii Iziral kuoruŋ, dɩ ba nɛ fɩɛlɛ ba sɩaa a to mɩ niiŋ arɩ ŋ-na Devit sɩ ŋaa ŋɩɩ.’

²⁶ Lɛɛlɛ mɩɩ sʋlʋŋ, Iziral tɩŋŋaa Wɩa, leŋ dɩ nii-la ŋ sɩ hɛ pɩ mɩ nyɩmma, ŋ tɩntɩnna Devit sɛnɛ kʋ ŋaa wʋtɩtɩɩ.

²⁷ Ama Wɩa, ŋ sɛnɛ jaŋ hɛ dʋnɩa deeŋ lɛɛ? Wɩa-nyuŋ arɩ wɩa-nyuŋ balegi balegi ma paala bɩ jalɩa magɛ ŋ jʋʋnʋŋ. Ɛɛ nɛ saa ŋ jaŋ wuo jʋʋ dɩɩ-balɩŋ deeŋ mɩ sɩ saa tinteeŋ lɛ?

²⁸ Mɩɩ sʋlʋŋ mɩ TƖƖNA Wɩa, jegile nɩɩ mɩ-na ŋ tɩntɩnna sʋla a ŋaa wɩɩ-la mɩ sɩɩ chɛ pɩmɛ jɩnɩŋ.

²⁹ Ŋ dɩɩ-balɩŋ deeŋ nɛ ŋaa lee-la ŋ sɩ sɩ ŋ jaŋ lɩɩsɛ dɩ ba dɩdɛnnɩŋ nɩmɛ. Mɩɩ sʋlʋŋ, bibeŋ ʋ nyuŋ wɩɩhɛyɛ arɩ tɩtaŋɩŋ kala. Dɩ mɩ-na ŋ tɩntɩnna nɛ joŋ mɩ sɩaa chaasʋ aŋ sʋlʋŋ, jegile nɩɩ mɩ teeŋ.

³⁰ Mɩ ŋaa ŋ tɩntɩnnʋ nɛ, Iziral tɩŋŋaa ma ŋaa ŋ nɩaa. Ŋɩɩ wɩaa, bʋa na-kala dɩ la kʋŋ nɛ joŋ sɩaa a chaasɛ ŋ dɩɩ-balɩŋ deeŋ a sʋlʋŋ, ŋ hɛ ŋ jaŋ lɛ nɛ, jegile nɩɩ a laa la sʋla a joŋ la wʋbɔŋŋɔɔ chɛla.

³¹ Dɩ nʋʋ nɛ ŋaa wɩɩ a chei ʋ dɔŋɔ, a magɛ dɩ tɩɩna kʋ jʋʋ chɩŋ ŋ koruŋ sɩpaaŋ ŋ dɩɩ-balɩŋ deeŋ lɛ a ŋmɩɛsɛ arɩ ʋ bɩ wɩɩ jɩŋ,

³² ŋ hɛ ŋ jaŋ lɛ nɛ, jegile nɩɩ a laa wɩɩ-la jɩŋ. Dɔgɩsɛ nɩɩ-la sɩ laa cheeriŋ, aŋ joŋ nɩɩ-la sɩ bɩ wɩɩ cheye ta.

³³ Dɩ ŋ nɩaa Iziral tɩŋŋaa nɛ ŋaa wʋbɔŋŋɔɔ a cheyiŋ dɩ ŋ leŋ dɩ ba dʋndɔŋŋɔɔ yuo diiba, dɩ ba nɛ mɩɩra kɔ ŋ teeŋ a sʋsʋlʋŋ ŋ dɩɩ-balɩŋ deeŋ lɛ arɩ ba cheye nɛ,

³⁴ ŋ hɛ ŋ jaŋ lɛ nɛ, jegile nɩɩ ba sʋla a joŋo chɛba aŋ mɩɩra kɛmba kɔ tintee-la ŋ sɩ joŋo pɩ ba naabalɩmaba.

³⁵ Dɩ ŋ nɩaa nɛ ŋaa wʋbɔŋŋɔɔ cheyiŋ dɩ ŋ dɔgɩsɛba a pɔ dɩ duonuŋ sɩ́ nɩɩ, dɩ ba nɛ joŋ ba sɩaa chaasɛ ŋ dɩɩ-balɩŋ deeŋ a yɩrɛ ŋ yɩrɩŋ a sʋlʋŋ arɩ ba cheye nɛ aŋ leŋ wʋbɔmɔ-la,

³⁶ ŋ hɛ ŋ jaŋ lɛ nɛ, jegile nɩɩ a joŋo chɛba. Iziral tɩŋŋaa ŋaa ŋ tɩntɩnnaa nɛ, ŋɩɩ wɩaa dagɛba dɩ ba ŋɩŋaa wɩaa ba bʋa lɛ, aŋ leŋ dɩ duonuŋ bɩra nɩɩ tintee-la lɛ ŋ sɩ joŋo pɩba ʋ ŋaa ba kʋŋ.

³⁷ Dɩ losuŋ nɛ jʋʋ tinteeŋ a tɩŋ kʋduuloo sɩ cheye wɩaa koo hɔbɔ sɩ die koo dʋndɔŋŋɔɔ nɛ kʋ gollo chu ba tasɩ-la dɔŋɔ koo nyanyal bɔŋŋɔɔ nɛ jʋa, koo wʋlɔrʋnʋŋ koo nyanyalaa nɛ jʋʋ kpʋkpʋ nɩaa,

³⁸ dɩ Iziral tɩŋŋaa kʋŋ tʋɔŋ chei a tɩŋ wɩalɩŋ ba sɩ ŋaa, dɩ ʋ kɛŋ ʋ nɩsaa je a chaasɛ ŋ dɩɩ-balɩŋ deeŋ a sʋlʋŋ,

³⁹ ŋ hɛ ŋ jaŋ lɛ nɛ, jegile nɩɩ a joŋ ʋ wʋbɔŋŋɔɔ chɛʋ aŋ pɛ ʋ lɛ. Ŋ jɩŋ nʋʋkala tʋɔbɩɩnaa arɩ ʋ mɛlɛ sɩ nagɛ ŋɩɩ nɛ. Ŋaa ŋɩɩ sɩ maga dɩ ŋ ŋaa nʋʋkala lɛ.

⁴⁰ Ŋɩɩ nɛ ŋ nɩaa jaŋ fɩfáŋ a tuto ŋ wombiee, bʋa-la kala ba sɩ hɛ tintee-la ŋ sɩ joŋo pɩ la naabalɩmaba ʋ ŋaa ba kʋŋ lɛ.

^41-42 Dɩ nʋhʋɔra-la ma sɩ bɩ ŋ nɩaa Iziral tɩŋŋaa kʋŋ ŋaa nɛ nɩɩ ŋ yɩrɩ-balɩŋ wɩaa, ŋ doluŋ wɩaa arɩ wʋduoru-la ŋ sɩ ŋaa wɩaa a lɩɩ tinteye-la sɩ bolie a kɔ dɩ ʋ dɛnnɩŋ, a joŋ ʋ sɩaa chaasɛ ŋ dɩɩ-balɩŋ deeŋ a sʋlʋŋ,

⁴³ ŋ hɛ ŋ jaŋ lɛ nɛ, jegile nɩɩ nʋhʋɔrʋ-la sʋla a ŋaa wɩɩ-la kala ʋ sɩɩ chɛ pʋ. Ŋɩɩ nɛ dʋnɩa nɩaa kala jaŋ jɩmɩŋ a fɩfáŋ arɩ ŋ nɩaa Iziral tɩŋŋaa sɩɩ ŋaa ŋɩɩ, aŋ bɩra jɩŋ arɩ mɩ saa ŋ dɩɩ-balɩŋ deeŋ a pɩŋ nɛ dɩ ba chʋchʋɔlʋŋ nɩmɛ.

⁴⁴ La TƖƖNA, dɩ ŋ nɛ kʋ hɛ ŋ nɩaa dɩ ba mʋ laalɩŋ a yuo ba dʋndɔŋŋɔɔ, dɩ ba joŋ ba sɩaa chaasɛ tabalɩŋ deeŋ ŋ sɩ lɩɩsa arɩ ŋ dɩɩ-bal-la mɩ sɩ saa dɩ ba chʋchʋɔlʋŋ nɩmɛ a sʋlʋŋ,

⁴⁵ ŋ hɛ ŋ jaŋ lɛ nɛ, jegile nɩɩ ba sʋla a leŋ dɩ ba yuo dii ba dʋndɔmɔ-la.

⁴⁶ Nʋʋkala tuo ʋ bɩ wʋbɔŋŋɔɔ ka ŋaa. Ama dɩ ŋ nɩaa Iziral tɩŋŋaa nɛ kʋ ŋaa wʋbɔŋ, dɩ ŋ baanɩŋ sii ba nyuŋ a leŋ ba dʋndɔŋŋɔɔ yuo diiba a kɛsɛba kaa mʋ ba tinteeŋ, dɩ lee-la kpaga koo ʋ bolie,

⁴⁷ dɩ ba nɛ hɛ tintee-la ba sɩ kɛsɛba mʋ ba ŋaa yosi lɛ, aŋ bɩrɩmɛ ba tʋɔbɩɩnaa a sʋlʋŋ arɩ wʋbɔmɔ-la ba sɩ ŋaa ba cheye nɛ,

⁴⁸ dɩ ba nɛ sɛnɛ sɛɩ cheeriŋ aŋ joŋ ba sɩaa chaasɛ tintee-la ŋ sɩ joŋo pɩ ba naabalɩmaba arɩ taŋ-la ŋ sɩ lɩɩsa mɩ saa ŋ dɩɩ-balɩŋ dɩ ba dɩdɛnnɩŋ nɩmɛ a sʋlʋŋ,

⁴⁹ ŋ hɛ ŋ jaŋ lɛ nɛ, jegile nɩɩ ba sʋla a fá ba nenige a joŋo chɛba.

⁵⁰ Dɩ ŋ nɩaa nɛ ŋaa wʋbɔŋŋɔɔ a cheyiŋ magɛ ŋɩɩ ma kala, joŋo chɛba. Ŋaa dɩ ba dʋndɔmɔ-la sɩ yuo diiba fá ba nenige.

⁵¹ Ba ŋaa ŋ nɩaa nɛ. Ba nɛ ŋ laata Ijipiti tɩŋŋaa nɩsɩŋ lɛ, lee-la ba fa sɩ hɛ a nɩna hɛɛŋ sɩ nagɛ nyiŋgeliŋ sɩɩ dii.

⁵² Mɩ ŋaa ŋ tɩntɩnnʋ nɛ, Iziral tɩŋŋaa ma ŋaa ŋ nɩaa. Ŋɩɩ wɩaa dɩ la kʋŋkala nɛ sʋlʋŋ a yele pɩŋ a chɩchɛ dɩ ŋ pɛ la lɛ, jegile nɩɩ.

⁵³ Ŋ sɩ kɛŋ la naabalɩmaba lɩɩ Ijipiti tinteeŋ lɛ, ŋ-na La TƖƖNA Wɩɩjarɩbakɔ bʋla pɩ ŋ tɩntɩnna Mosis dɩ ʋ bʋla pɩba arɩ ba nɛ ŋaa nɩalɩŋ ŋ sɩ lɩɩsa dʋnɩa nɩaa kala tʋɔŋ dɩ ba ŋaa ŋ nɩaa.”

⁵⁴ Solomoŋ sɩ kpirimi La TƖƖNA koru-la sɩpaaŋ aŋ kɛŋ ʋ nɩsaa je wɩa-nyuŋ a chʋɔlɛ Wɩa dɛrɛ, ʋ sii chɩŋ,

⁵⁵ a bɩrɩma chaasɛ Iziral tɩmma-la sɩ chɩŋ ʋ harɩŋ a faasa suri ʋ yikoro a sʋl Wɩa pɩba a bʋl,

⁵⁶ “Má dɛnnɛ La TƖƖNA, ʋ kɛŋ nii-la ʋ sɩ hɛ tɩŋ nɛ a leŋ la hɔŋ arɩ fɩɛlɩŋ. Wʋzɔmɔ-la kala ʋ sɩ bʋla pɩ ʋ tɩntɩnna Mosis arɩ ʋ jaŋ ŋaa, ba kala nɛ ʋ ŋaa.

⁵⁷ A leŋ dɩ La TƖƖNA Wɩa hɛ la teeŋ arɩ ʋ fa sɩ hɛ la naabalɩmaba teeŋ ŋɩɩ. Mɩɩ sʋlʋ dɩ ʋ hɛ la ma teeŋ a sɩ́ la vɩa ta.

⁵⁸ A leŋ dɩ La TƖƖNA kɛŋ la tʋɔŋ bɩrɩmɛ dɩ la wuo to niiri-la ʋ sɩ bile arɩ ʋ wombiee arɩ wɩalɩŋ kala ʋ sɩ dagɛ la naabalɩmaba.

⁵⁹ Mɩɩ sʋl La TƖƖNA Wɩa dɩ ʋ liliisi mɩ Wɩɩsʋlʋŋ deeŋ wɩɩhɛyɛ arɩ tɩtaŋɩŋ kala. A leŋ dɩ ʋ pɛ ʋ nɩaa Iziral tɩŋŋaa arɩ ba kuoro lɛ dɩ ba na wɩalɩŋ kala ba sɩɩ chɛ tapʋlɩɩ kala.

⁶⁰ Ŋɩɩ nɛ jaŋ leŋ dɩ tinteeŋ nɩaa kala jɩŋ arɩ La TƖƖNA Wɩa dʋndʋŋa nɛ Wɩa, kʋŋ dɔŋ kala bɩra tuo a pɛ ʋ lɛ.

⁶¹ Má kɛŋ ma tʋɔŋ kala a to La TƖƖNA Wɩa. Má to ʋ wombiee arɩ wɩalɩŋ kala ʋ sɩ daga arɩ ŋɩɩ ma sɩɩ ŋaa jɩnɩŋ.”

Solomoŋ joŋ Wɩa dɩɩ-balɩŋ hɛ La TƖƖNA nɩsɩŋ lɛ

⁶² Ŋɩɩ nɛ kuoro Solomoŋ arɩ Iziral tɩŋŋaa kala kpʋ pʋsʋŋ a ŋaa Wɩɩsʋlʋŋ pɩ La TƖƖNA.

⁶³ Solomoŋ kpʋ nɛ-belliŋ bʋɩ mara arɩ balɩa nɛ, piesee arɩ bʋʋnaa ma bʋɩ zɔlɔ arɩ mara a ŋaa nii-magɛ dɔŋɔ Wɩɩsʋlʋŋ. Ŋɩɩ nɛ Solomoŋ arɩ Iziral tɩŋŋaa kala joŋ La TƖƖNA dɩɩ-bal-la a hɛ ʋ nɩsɩŋ lɛ.

⁶⁴ Tapʋlɩɩ-la tɩtɩa nɛ Solomoŋ joŋ kaala-la sɩ hɛ La TƖƖNA dɩɩ-bal-la sɩpaaŋ tʋtʋɔbaanɩŋ a hɛ ʋ nɩsɩŋ lɛ, aŋ ŋaa kʋnyɩgaa Wɩɩsʋlʋŋ, mɩaa Wɩɩsʋlʋŋ, a nyɩgɛ nii-magɛ dɔŋɔ Wɩɩsʋlʋŋ pʋsʋ-la nʋʋŋ leree. Ʋ ŋaa ŋɩɩ bɛɛ wɩaa ba sɩ kɛŋ kɔlɩɩŋ ŋaa Wɩɩsʋllɩ koru-la sɩ hɛ La TƖƖNA dɩɩ-bal-la sɩpaaŋ muuro kɩŋkɛŋ nɛ arɩ ba sɩ jaŋ joŋ Wɩɩ-sʋla kɩalɩŋ kala daŋ a ŋaa Wɩɩsʋlʋŋ.

⁶⁵ Solomoŋ arɩ Iziral nɩ-daŋ-la kala chaasa gbieli lɛŋŋɛɛ gbiele-la nɛ. Nɩalɩŋ chaasa yʋgɛ nɛ woruŋ a lɩɩ lee-la ba sɩɩ yɩrɛ Lebo Hamaf sɩ hɛ wɩɩpɔsʋŋ nagʋa a kaa mʋ Ijipiti fuonaa luŋii-la sɩ hɛ wɩɩpɔsʋŋ nadiiŋ dɩɩrɩŋ kala a kɔ. Ba gbieli gbiele-la tapʋlaa balɩpɛ nɛ La TƖƖNA Wɩa sɩpaaŋ, aŋ bɩra gbieli tapʋlaa balɩpɛ pɛ. Tapʋlɩa-la kala ŋaa fii arɩ banɛsɛ.

⁶⁶ Taŋ sɩ pʋla, kuoro Solomoŋ ta nɩalɩŋ kala ba mʋ dɩɩsɩŋ. Ba kala lɔllʋ aŋ mʋ dɩɩsɩŋ arɩ tʋɔtɔrʋŋ a tɩŋ wʋzɔmɔ-la kala La TƖƖNA sɩ ŋaa pɩ ʋ tɩntɩnna Devit arɩ ʋ nɩaa Iziral tɩŋŋaa.