1 KUOROO 3 - WƖA TENIŊ

Solomoŋ sʋl Wɩa aa chɛ wʋjɩmɩŋ

¹ Solomoŋ leŋe ʋ dɩ Ijipiti tinteeŋ kuoro pɛ niiŋ nɛ, ka ʋ jaa ʋ tolo. Solomoŋ kɛŋ tolo-la kaa mʋ hɛ Devit tabal-la lɛ, ŋɩɩ halɩɩ a mʋ yi bʋa-la lɛ ʋ sɩ saa ʋ kuoru dɩa arɩ La TƖƖNA dɩa dɛrɛ, a pɛ kɛrɛ-la sɩ golli Jerusalɛm lɛ.

² Bʋa-la lɛ dɩ ba ha bɩ Wɩa dɩa saa dɩ ba mʋ dɩdɛnnɛ La TƖƖNA nɩmɛ. Nɩaa faa ŋaa Wɩɩsʋlʋŋ lere-la ba fa sɩɩ kpaarɛ vesiŋ nɛ.

³ Solomoŋ fa cho La TƖƖNA nɛ, a tuto wɩalɩŋ ʋ nyɩmma Devit sɩ daga, ama ʋ ma kpʋ pʋsʋŋ a ŋɩŋaa Wɩɩsʋlʋŋ lere-la ba sɩɩ kpaarɛ vesiŋ nɛ, a nyɩnyɩgɛ kʋsʋɔrʋsʋŋ nɩmɛ.

⁴ Lee-la nɩaa fa sɩ chaasaa ŋaa Wɩɩsʋlʋŋ hɛ Gibioŋ lɛ nɛ. Bʋa kʋbala lɛ Solomoŋ mʋ nɩmɛ dɩ ʋ ŋaa Wɩɩsʋlʋŋ. Ʋ fa vɛnɛ ŋaa kʋnyɩgaa Wɩɩsʋlʋŋ a yi naansɩɩŋ bʋɩ nɛ lee-la.

⁵ Tɩtaŋ kʋbala Solomoŋ sɩ hɛ Gibioŋ lɛ, La TƖƖNA kɛŋ ʋ tɩtɩa kʋ dagʋ duoso lɛ a bʋla pʋ, “Sʋl kʋŋ na-kala ŋ sɩɩ chɛ mɩ teeŋ, mɩ jaŋ pɩŋ.”

⁶ Solomoŋ bʋl, “Ŋ chaasa dii zile kɩŋkɛŋ nɛ mɩ nyɩmma Devit sɩ ŋaa ŋ tɩntɩnna lɛ, a tɩŋ ʋ fa sɩ laaŋ dii a kɛŋ tʋɔpʋla a chɩŋ wʋtɩtɩɩ naaŋ lɛ. Zile-la tɩtɩa nɛ ŋ haa ŋaa ʋ lɛ a pʋ hambolibie, ʋ hɔŋ ʋ kuoru kpasa nyuŋ jɩnɩŋ ŋ-la.

⁷ Mɩ Tɩɩna Wɩa, ŋ leŋe mɩ laa mɩ nyɩmma Devit nyuŋ a dii kuoruŋ nɛ. Ama mɩ ŋaa hambie nɛ a bɩ wɩalɩŋ mɩ sɩ maga dɩ mɩ ŋaa jɩŋ.

⁸ Mɩ hɛ nɩalɩŋ ŋ sɩ lɩɩsa tʋɔŋ nɛ. Ba ŋaa nɩ-daŋ nɛ nʋʋ sɩ bɩ jaŋ wuo dɩɩsɛ.

⁹ Ŋɩɩ wɩaa, pɩmɛ wʋjɩmɩŋ dɩ mɩ jɩŋ wʋzɔmʋŋ arɩ wʋbɔmʋŋ bʋa a kaa beŋ ŋ nɩaa. Dɩ ŋɩɩ dee, ɛɛ nɛ mɩ jaŋ wuo ŋaa a beŋ ŋ nɩ-daŋ deeŋ?”

¹⁰ La TƖƖNA tʋɔŋ tɔrɛ arɩ Solomoŋ sɩ pɩɛsa chɩchɛ wɩɩŋ deeŋ.

¹¹ Ŋɩɩ nɛ Wɩa bʋla pʋ, “Ŋ sɩ folo chɩchɛ wɩɩŋ deeŋ nɛ, aŋ bɩ mɩɩ-duduoŋ koo dʋa nɛ pɩɛsa chɩchɛ dɩ ŋ kɛŋ, a bɩra bɩ sʋla chɩchɛ dɩ ŋ dʋndɔŋŋɔɔ ma nɛ sʋʋ, ama aŋ sʋla chɩchɛ wʋjɩmɩŋ dɩ ŋ kaa beŋ ŋ nɩaa,

¹² mɩ jaŋ ŋaa wɩɩ-la ŋ sɩɩ chɛ a pɩŋ. Mɩ jaŋ pɩŋ wʋjɩmɩŋ nʋʋ ha sɩ bɩ kɛnɛ aŋ ka arɩ maachie kala.

¹³ Mɩ ha jaŋ bɩra pɩŋ kɩalɩŋ ma ŋ sɩ bɩ sʋla. Mɩ jaŋ leŋ dɩ ŋ kɛŋ kɩaa, a leŋ dɩ nɩaa ziziliŋ. Ŋ mɩɩsɩŋ kala lɛ, kuoru kala jaŋ tuo a magɩŋ.

¹⁴ Dɩ ŋ nɛ jaŋ to mɩ wombiee arɩ wɩalɩŋ kala mɩ sɩ daga, arɩ ŋ nyɩmma Devit sɩ ŋaa ŋɩɩ, mɩ jaŋ leŋ dɩ ŋ mɩɩsɩŋ duomi.”

¹⁵ Ŋɩɩ nɛ Solomoŋ hirige sii a na dɩ duosoo tʋɔŋ nɛ. Ʋ mɩɩra mʋ Jerusalɛm, a chɩŋ La TƖƖNA niiriŋ daga-la sɩpaaŋ a kpʋ pʋsʋŋ a sʋl kʋnyɩgaa Wɩɩsʋlʋŋ arɩ nii-magɛ dɔŋɔ Wɩɩsʋlʋŋ. Ŋɩɩ nɛ aŋ yɩrɛ ʋ tɩntɩnnaa kala ba kʋ gbieli aŋ dii kɩaa.

Solomoŋ dii sarɩya arɩ wʋjɩmɩŋ

¹⁶ Tapʋlɩɩ kʋbala hachɔrʋmɔɔ balɩa sii a kɔ Solomoŋ teeŋ.

¹⁷ Haala-la dɔŋɔ bʋl, “Mɩ nɩhɩaŋ, mɩ dɩ haala deeŋ kala hɛ dɩɩ-bala lɛ nɛ, mɩ lʋl hambolibie dɩ ʋ hɛ nɩmɛ.

¹⁸ Mɩ lʋlʋŋ harɩŋ, tapʋlaa batori chɛɛŋ ʋ ma lʋl. La dʋndʋŋa nɛ, nʋʋ dɔŋ fa bɩ la lɛ pɛ dɩa-la lɛ.

¹⁹ Haala deeŋ pɩŋ tɩtaŋ kʋbala a bilime nyagɛ ʋ bie kpʋ.

²⁰ Mɩ pɩŋ doŋ ka ʋ sii tɩta-siesee a joŋ mɩ bie sɩ pɩŋ mɩ sɛmɛ, a kaa mʋ bil ʋ sɛmɛ, aŋ mɩɩra joŋ ʋ bii-sʋʋ-la a kaa kʋ bil mɩ sɛmɛ.

²¹ Mɩ sɩ sie chʋchʋɔŋ, a chɩchɛ mɩ kɛŋ yɩlɩŋ a pɩ mɩ bie, mɩ bene dɩ ʋ sʋba. Ama leriŋ sɩ pʋlla mɩ beŋ fii, mɩ na dɩ mɩ bie dee.”

²² Haal-la dɔŋɔ ma bʋl, “Aɩ, bile sɩ weye nɛ mɩ kʋa, bii-sʋʋ-la nɛ ŋaa ŋ kʋa.” Ha-bumbuŋ-la ha pɛsɛ, “Aɩ, bii-sʋʋ-la nɛ ŋaa ŋ kʋa, kʋla sɩ weye nɛ ŋaa mɩ kʋa.” Ba kaa chɩna lɩlɛrɛ kuoro sɩpaaŋ.

²³ Ŋɩɩ nɛ kuoro Solomoŋ bʋl, “Ma kʋŋkala sɩ, ‘Mɩ nɛ tɩɩ bile sɩ weye, ŋ nɛ tɩɩ bii-sʋʋŋ.’ ”

²⁴ Solomoŋ bɩra bʋl, “Má joŋ tokobiiŋ kʋ pɩmɛ.” Ŋɩɩ nɛ ba joŋo kaa kʋ pʋ.

²⁵ Kuoro pa wombiiŋ a bʋl, “Má kɛŋ bii-wei-la keri balɩa a joŋ kpaa magɛ dɔŋɔ pɩ dɔŋɔ, aŋ joŋ kpaa magɛ dɔŋɔ a pɩ dɔŋɔ ma.”

²⁶ Ŋɩɩ nɛ nisusuŋ kɛŋ haal-la bie sɩ bɩ sʋba, ʋ bʋla pɩ kuoro, “Mɩɩ sʋlʋŋ kuoro, joŋ bile a pɩ haal-la, sɩ́ ʋ kpʋ.” Ama haal-la dɔŋɔ ma bʋl, “La kala jaŋ ta, la kʋŋkala bɩ jaŋ tɩɩ bile. Má kɛnʋ keri balɩa.”

²⁷ Ŋɩɩ nɛ Solomoŋ bʋl, “Má sɩ́ bile kpʋ, má joŋ bile pɩ ha-bumbuŋ-la, ʋ nɛ tɩɩ bile.”

²⁸ Iziral tɩŋŋaa kala sɩ nɩɩ ŋɩɩ kuoro sɩ dii sarɩya-la, ba kala zizilu woruŋ. Ba jɩŋ arɩ Wɩa pʋ wʋjɩmɩŋ nɛ dɩ ʋ kaa dii sarɩya ʋ bʋa lɛ.