1 KUOROO 10 - WƖA TENIŊ

Sɩɩba ha-kuoru kʋbala kɔ Solomoŋ teeŋ

¹ Ŋɩɩ nɛ haal kʋbala sɩ dii kuoruŋ Sɩɩba tinteeŋ lɛ, ʋ nɩɩ ŋɩɩ Solomoŋ yɩrɩŋ sɩɩ sii. Ʋ sii kɔ dɩ ʋ magɩsʋ a pɩɛsʋ wɩaa sɩ hɛyɛ.

² Ʋ sɩɩ kɔ Jerusalɛm, ʋ kɛŋ ʋ tɩntɩnnaa yʋgɛ nɛ ba jɩl bʋntaŋŋaba a chʋŋ tegisiŋ sʋɔra sɩ sɩma, arɩ sɛlɩmɛ sɩ yʋga arɩ tabɩɩ-tʋlaa yalɩŋ sɩ hɛyɛ a kaa kɔ Solomoŋ teeŋ. Ʋ sɩ kɔ, ʋ joŋ wɩɩ na-kala ʋ sɩ kɛnɛ ʋ tʋɔŋ lɛ a pɩɛsɛ Solomoŋ.

³ Solomoŋ ma chaarɛ wɩalɩŋ kala ʋ sɩ pɩɛsa sɩaa. Wɩalɩŋ kʋŋkala fa bɩ wʋhaa ŋaa Solomoŋ teeŋ.

⁴ Sɩɩba kuoru-la sɩ na wʋjɩmɩɩ-la Solomoŋ sɩ kɛnɛ arɩ ʋ kuoru dɩa-la ʋ sɩ saa,

⁵ kʋdiile-la ʋ sɩɩ dii, dɩɩsɩ-la ʋ tɩntɩnnɩ-hɩasɩŋ sɩɩ jʋʋ, arɩ gɛnnɩ-la ʋ tɩntɩnnaa sɩɩ laalʋ, nɩalɩŋ sɩɩ kori ʋ nyʋnyʋalʋsʋŋ, arɩ kʋnyɩgaa Wɩɩsʋlɩɩ-la Solomoŋ sɩ sʋla La TƖƖNA dɩɩ-bal-la lɛ, ʋ sɩaa biri.

⁶ Ʋ bʋla pɩ kuoro Solomoŋ, “Mɩ sɩ hɛ mɩ tinteeŋ lɛ aŋ nɩɩ wɩalɩŋ kala ŋ sɩ ŋaa arɩ wʋjɩmɩɩ-la ŋ sɩ kɛnɛ, sɛnɛ ŋaa wʋtɩtɩɩ nɛ.

⁷ Ama mɩ fa bɩ laa dii, see mɩ tɩtɩa sɩɩŋ sɩ na ŋ-la. Mɩ paala bɩ ŋ wɩaa kpaa magɛ dɔŋɔ ma nɩa. Ŋ wʋjɩmɩŋ arɩ ŋ dʋa yʋga kɩɩ ŋɩɩ mɩ sɩ nɩa nɛ.

⁸ Ŋ nɩaa ŋaa nyu-sɩŋ tɩmma nɛ. Ŋ tɩntɩnnɩ-hɩasɩŋ arɩ nɩalɩŋ sɩɩ tɩŋ ŋ sɩpaaŋ bʋa na-kala ŋaa tʋɔtɔrɛ tɩmma nɛ, ba sɩ jaŋ nɩnɩɩ ŋ wʋjɩmɩɩ-la.

⁹ Mɩɩ dɛnnɛ ŋ Tɩɩna Wɩa, ʋ tʋɔŋ sɩ tɔrɛ ŋ nyuŋ, ʋ leŋ ŋ dii Iziral tɩŋŋaa kuoruŋ. A tɩŋ La TƖƖNA sɩ cho Iziral tɩŋŋaa a kaa mʋ wuu nɛ tɩɩ ʋ joŋuŋ ŋ ŋaa ba kuoro, dɩ ŋ kɛŋ wʋtɩtɩɩ arɩ tʋɔpʋla a bemba.”

¹⁰ Ŋɩɩ nɛ haal-la sɩ ŋaa Sɩɩba kuoro joŋ sɛlɩmɛ yuŋuŋ sɩ kɩɩ kilo bʋɩ banɛsɛ a pɩ Solomoŋ, arɩ tegisiŋ sʋɔra sɩ sɩma a yʋgɛ woruŋ arɩ tabɩɩ-tʋlaa. Nʋʋkala ha bɩ tegisi-la doho kaa kʋ pɩ kuoro Solomoŋ a magɛ kɩalɩŋ Sɩɩba kuoro sɩ joŋo pʋ.

¹¹ Ŋɩɩ nɛ Hiram lɩɩŋ daborusuŋ kɛŋ sɛlɩmɛ lɩɩ Ofi tinteeŋ kɔ, a pɛ daasɩŋ sɩ zɔmɔ woruŋ arɩ tabɩɩ-tʋlaa.

¹² Kuoro kɛŋ daa-zɔmɔ-la nɛ a ŋaa lusuŋ-chol-sɩaa a hɛ La TƖƖNA dɩɩ-bal-la arɩ ʋ kuoru dɩa lɛ, aŋ bɩra kɛmba ŋaa chenniŋ arɩ kɔnɛba a pɩ nɩalɩŋ sɩɩ yɩɩ yɩɩlaa. Ba ha maachie kala bɩra bɩ daa-zɔmɔ-la doho kaa magɛ ŋɩɩ kɔ Jerusalɛm.

¹³ Ŋɩɩ nɛ kuoro Solomoŋ pɩ Sɩɩba kuoro kɩalɩŋ kala ʋ sɩ pɩɛsaa chɛ. Kɩalɩŋ naabarɩŋ wombiiŋ sɩ daga dɩ ʋ joŋo pʋ-na bɩ pɛ. Ŋɩɩ nɛ ʋ dɩ ʋ nɩaa mɩɩra mʋ ba tinteeŋ.

Solomoŋ dʋa

¹⁴ Jɩna na-kala Solomoŋ yie laa sɛlɩmɛ yuŋuŋ sɩ yi kilo bʋɩ mara arɩ batori nɛ.

¹⁵ Lampoo-la bayalaa sɩ yie tiŋ arɩ Arebia kuoroo kala sɩ yie tiŋ kɩalɩŋ arɩ Iziral tinteeŋ nɩhɩasɩŋ sɩ yie joŋ kɩalɩŋ pʋ na bɩ pɛ.

¹⁶ Kuoro Solomoŋ fa leŋe ba kɛŋ sɛlɩmɛ a libi hɔɔtaalɩ-la ba sɩ kaa kɛrɛɛ laa bayuori hɛŋŋɛɛ kʋjalaa zɔɔ-balɩa nɛ. Sɛlɩmɛ-la ba sɩ kaa libi ba kʋŋkala yuŋuŋ ŋaa kilo balɩpɛ nɛ.

¹⁷ Ʋ bɩra leŋ ba kɛŋ sɛlɩmɛ-la a libi hɔɔtaalɩ-la kʋbiisiŋ ma zɔɔ-batori. Sɛlɩmɛ yuŋuŋ sɩ ŋaa kilo batori nɛ ba kaa libi ba ma kʋŋkala. Kuoro jomba a bil ʋ kuoru dɩa lɛ, lee-la ba sɩɩ yɩrɛ Lɛbanɔŋ duuŋ.

¹⁸ Ŋɩɩ nɛ kuoro leŋ ba kɛŋ batu-nyɩlɩŋ ŋaa kuoru kpasɩ-bal, aŋ kɛŋ sɛlɩmɛ sɩ chaasa zɔŋ taara tɔ.

¹⁹ Kuoru kpasa-la kɛŋ lusuŋ-chol sɩaa balɩdʋ nɛ, ka ʋ harɩŋ nyuŋ dɩɩrɩŋ ŋaa gulogulo. Kpasa-la sɛsɩŋ balɩa kala lɛ, nɩsaa dɩdaŋɩŋ hɛ nɩmɛ, ka kɩaa sɩ nagɛ naachigee balɩa chɩŋ a challɛ dɔŋɔ.

²⁰ Lusuŋ-chol sɩa-la balɩdʋ lɛ, kɩaa sɩ nagɛ naachigee fii arɩ balɩa chɩŋ ba sɛsɩŋ. Lusuŋ-chol sɩɩ kala niipiniŋ lɛ, balɩa hɛ nɩmɛ, dɔŋɔ chɩŋ nadiiŋ, dɔŋɔ ma chɩŋ nagʋa. Ba ha bɩ kuoru kpasa deeŋ doho ŋaa tintee dɔŋ kala lɛ.

²¹ Kuoro Solomoŋ nyʋnyʋalʋsʋŋ kala, sɛlɩmɛ nɛ ba kaa ŋaa. Ʋ kuoru dɩa gbansɩ-la kala sɩ hɛ dɩa-la ba sɩɩ yɩrɛ Lɛbanɔŋ duuŋ lɛ, sɛlɩmɛ dʋndʋŋa nɛ ba kaa ŋaa. Kʋŋkala fa tuo ba kɛŋ hɔpʋla ŋaa, bɛɛ wɩaa bʋa-la lɛ hɔpʋla fa bɩ yuŋuŋ kɛnɛ.

²² Kuoro fa kɛŋ lɩɩŋ daborusuŋ ma nɛ. Ba dɩ Hiram lɩɩŋ daborusuŋ yie duori lɩɩŋ a mʋmʋ bayalɩŋ. Jɩsɩŋ batori na-kala ba yie mɩɩra kɔ bala nɛ, a chʋŋ sɛlɩmɛ, hɔpʋla, batu-nyɩlaa, ŋmaŋŋaa arɩ fɔsʋŋ.

²³ Kuoro Solomoŋ nɛ fa kɛŋ kɩaa arɩ wʋjɩmɩŋ a kɩɩ kuoru kala sɩ hɛ tinteeŋ lɛ.

²⁴ Dʋnɩa nɩaa kala fa cho dɩ ba kʋ jegile nɩɩ Solomoŋ wʋjɩmɩɩ-la Wɩa sɩ joŋo pʋ nɛ.

²⁵ Jɩna kala, nʋʋ na-kala sɩ kɔ dɩ ʋ na Solomoŋ yie kɛŋ kɩaa nɛ kʋ dii zile pʋ: hɔpʋla kɩaa, sɛlɩmɛ kɩaa, gɛnnɩŋ, laalɩyuori kɩaa arɩ tegisiŋ, janɩŋ arɩ kakusuŋ.

²⁶ Solomoŋ fa chɛ laalɩŋ janɩŋ torukoba bʋɩ arɩ zɔɔ-banɛsɛ nɛ, janɩŋ ma bʋɩ fii arɩ balɩa, ʋ joŋ dɔnsʋŋ bil tasɩ-la lɛ ʋ sɩɩ bil ʋ laalɩŋ janɩŋ torukoba, ka dɔnsʋŋ ma hɛ ʋ teeŋ Jerusalɛm lɛ.

²⁷ Bʋa-la lɛ Solomoŋ sɩ dii kuoruŋ, hɔpʋla fa pʋrɩga nɛ woruŋ Jerusalɛm lɛ a nagɛ tabɩaa, kuolu daasɩŋ ma pʋrɩgɛ woruŋ a nagɛ tutogusuŋ sɩ hɛ Juda tinteeŋ dundollu-la sɩ hɛ peelee bʋbʋɔŋ nyuŋ.

²⁸ Solomoŋ fa yie leŋ ʋ bayalaa mʋ Ijipiti tinteeŋ arɩ Kuwe tinteeŋ nɛ a yɔɔ ʋ janɩŋ.

²⁹ Ba yie yɔɔ laalɩŋ jaaba toruko Ijipiti tinteeŋ lɛ warɩpʋla zɔɔ-balɩdʋ nɛ, a yɔɔ jaaba ma warɩpʋla zɔlɔ arɩ mahɩŋ balɩa arɩ fii. Ba ma yie mɩɩra kaa kʋ yalla pɩpɩ Hiti tɩŋŋaa arɩ Siiria tɩŋŋaa kuoroo.