1 SAMƲƐL 9 - WƖA TENIŊ

Samʋɛl joŋ wɩɩ-sʋllɩ nʋʋŋ taa Sɔɔl

¹ Bɛnjamɩŋ doho nɩaa baal kʋbala nɛ fa hɛ nɩmɛ, ʋ yɩrɩŋ nɛ Kɩs. Ʋ fa kɛŋ kɩaa nɛ woruŋ, nɩaa zizilu. Ʋ nyɩmma nɛ Abɩɛl, Abɩɛl ma nyɩmma nɛ Zɛrɔ, Zɛrɔ ma nyɩmma nɛ Bɛkɔraf, Bɛkɔraf ma nyɩmma nɛ Afɩa.

² Kɩs fa kɛŋ nanʋa-baal nɛ baa yɩrɛ Sɔɔl, a ŋaa bapʋɔsɛ zɔŋ woruŋ, Iziral tɩŋŋaa kala tʋɔŋ ʋ dɔŋ fa tuo. Ʋ nɛ duomo a kɩɩ ba kala ma.

³ Sɔɔl nyɩmma Kɩs fa kɛŋ kakusuŋ nɛ. Ŋɩɩ nɛ kakusu-la lɩɩ lɛl. Kɩs bʋla pɩ ʋ nanʋala Sɔɔl, “Kɛŋ tɩntɩnna-la dɔŋɔ dɩ ma lɩɩ chɛ kakusu-la.”

⁴ Sɔɔl arɩ ʋ tɩntɩnnʋ-la lɩɩ to Efirem tintee-la peelee sɩ yʋga ŋɩɩ a mʋ to lere-la sɩ golli taŋ-la ba sɩɩ yɩrɛ Salɩsa, aŋ bɩ ba na. Ba joŋ ŋɩɩ mʋ lee-la ba sɩɩ yɩrɛ Saalɩm, ama kakusu-la tuo nɩmɛ ma. Ŋɩɩ nɛ ba bɩra joŋ Bɛnjamɩŋ doho nɩaa tinteeŋ ma kala a baara cheŋ, aŋ bɩ ba na.

⁵ Ba sɩ mʋ yi tintee-la ba sɩɩ yɩrɛ Zuf, Sɔɔl bʋla pɩ ʋ dɩ ʋ tɩntɩnnʋ-la sɩɩ vɛŋ, “Kɔ dɩ la mɩɩra mʋ dɩa, dɩ ŋɩɩ dee mɩ nyɩmma jaŋ leŋ kakusu-la wɩaa bɩɩnɩŋ, la wɩaa nɛ jaŋ mɩɩra chɩlʋ.”

⁶ Ama ʋ tɩntɩnnʋ-la bʋl, “Bee na, Wɩa tɩntɩnnʋ nɛ hɛ taŋ deeŋ lɛ, nɩaa zizilu woruŋ, bɛɛ wɩaa dɩ ʋ nɛ bʋl wɩɩkala, wɩɩ-la sɛnɛ yie kʋ ŋaa wʋtɩtɩɩ nɛ. Leŋ dɩ la mʋ ʋ teeŋ. Kapo ʋ jaŋ dagɛla wombii-la la sɩ jaŋ to.”

⁷ Sɔɔl pɩɛsɛ ʋ tɩntɩnnʋ-la, “Dɩ la nɛ mʋa, bɛɛ kʋŋ nɛ la jaŋ joŋo pɩ baal-la? Kʋdiile-la fa sɩ hɛ la lʋagaba lɛ kala dɛrɛ nɛ. La bɩ kʋŋ kɛnɛ la sɩ jaŋ joŋo pɩ Wɩa tɩntɩnnʋ-la. Koo la kɛŋ kʋŋ nɛ?”

⁸ Ŋɩɩ nɛ tɩntɩnnʋ-la bɩra bʋla pɩ Sɔɔl, “Na, mɩ kori warɩpʋla mʋa nɛ, mɩ jaŋ joŋo pɩ Wɩa tɩntɩnnʋ-la, ka dɩ ʋ dagɛla wombii-la la sɩ jaŋ to a na kakusu-la.”

⁹ (Faafaa-la Iziral tinteeŋ lɛ, dɩ nʋʋ nɩɩ chɛ dɩ ʋ chɛ na wɩɩ Wɩa teeŋ, ʋ yie bʋl nɛ, “Kɔ dɩ la mʋ Wɩa sɩɩ-naara teeŋ,” bɛɛ wɩaa nɩalɩŋ la sɩɩ yɩrɛ Wɩa wʋlaabʋllaa jɩnɩŋ, ba fa kɛmba yɩyɩrɛ Wɩa sɩɩ-naaraa nɛ.)

¹⁰ Sɔɔl bɩra bʋla pɩ ʋ tɩntɩnnʋ-la, “Wʋzɔŋ nɛ, kɔ la mʋ.” Ŋɩɩ nɛ ba mʋmʋ taŋ-la lɛ Wɩa tɩntɩnnʋ-la sɩ hɛ.

¹¹ Ba sɩ mʋ jɩl dundolo, ka dɩ ba-na jʋʋ taŋ-la, ba cheŋ hatolibiisi kʋbalaba dɩ ba kʋʋ lɩɩ dɩ ba ŋaa lɩɩŋ, ŋɩɩ nɛ ba pɩɛsɛba, “Wɩa sɩɩ-naarʋ-la hɛ nɩmɛɛ?”

¹² Ba bʋl, “Ʋ hɛ nɩmɛ. Ʋ hɛ ma sɩpaaŋ. Má ŋaa lɩma, ma jaŋ puu. Jɩnɩŋ nɛ ʋ kɔ la jaŋ, bɛɛ wɩaa nɩaa ka chɛ dɩ ba kpʋ pʋsʋŋ a sʋl Wɩɩsʋlʋŋ nɛ dundolo-la nyuŋ ba sɩɩ ŋaa Wɩɩsʋlʋŋ.

¹³ Dɩ ma nɛ jʋʋ taŋ-la, ma jaŋ naʋ, ka dɩ ʋ na jɩl dundolo-la nyuŋ ba sɩɩ ŋaa Wɩɩsʋlʋŋ dɩ ba dii kɩaa. Dɩ ʋ nɛ bɩ mʋa, nɩaa bɩ jaŋ suomo dii kɩaa, bɛɛ wɩaa ʋ maga dɩ ʋ sʋl Wɩa hɛ Wɩɩsʋlʋŋ kɩalɩŋ lɛ nɛ, ka dɩ nɩalɩŋ kala ba sɩ yɩra-na dii. Dɩ ma nɛ jɩla lɛɛlɛ, ma jaŋ naʋ bʋa deeŋ lɛ.”

¹⁴ Ba sɩ mʋ jʋjʋʋ taŋ-la, dɩ Samʋɛl nɛ joŋ wombiiŋ a tʋʋlɛba kʋkɔ ŋɩɩ, a jɩjɩl dundolo-la nyuŋ ba sɩɩ ŋaa Wɩɩsʋlʋŋ.

¹⁵ Taŋ sɩ jaŋ pʋl ka dɩ Sɔɔl-na kɔ, La TƖƖNA laa sɩpaaŋ bʋl ŋ-la nɛ a pɩ Samʋɛl:

¹⁶ “Chie bʋa deeŋ lɛ, mɩ jaŋ leŋ dɩ baal kʋbala lɩɩ Bɛnjamɩŋ doho nɩaa tʋɔŋ a kɔ. Dɩ ʋ nɛ kɔ, joŋ Wɩɩsʋllɩ nʋʋŋ tɩsʋ, dɩ ʋ ŋaa mɩ nɩaa Iziral tɩŋŋaa sɩpaalaara. Ʋ nɛ jaŋ laa mɩ nɩaa ta Fɩlɩsɩtɩa tɩŋŋaa nɩsɩŋ lɛ. Mɩ na hɛɛ-la mɩ nɩaa sɩɩ na nɛ, a nɩɩ ba nii-ŋmobo ma.”

¹⁷ Samʋɛl sɩɩŋ sɩ na Sɔɔl, La TƖƖNA bʋla pʋ, “Baala deeŋ wɩaa nɛ mɩ bʋla pɩŋ ŋɩɩ, ʋ nɛ jaŋ bibeŋ mɩ nɩaa.”

¹⁸ Ŋɩɩ nɛ Sɔɔl mʋ yi Samʋɛl dɩ ʋ hɛ taŋ-la boi-baalɩŋ niiŋ a pɩɛsʋ, “Mɩɩ sʋlʋŋ, dagɛmɛ Wɩa sɩɩ-naarʋ-la dɩa.”

¹⁹ Ŋɩɩ nɛ Samʋɛl bʋl, “Mɩ-na nɛ Wɩa sɩɩ-naarʋ-la, laa mɩ sɩpaaŋ dɩ la jɩl dundolo-la nyuŋ ba sɩɩ ŋaa Wɩɩsʋlʋŋ. Jɩnɩŋ mɩ dɩŋ nɛ jaŋ dii kɩaa, dɩ taŋ nɛ pʋla, mɩ jaŋ bʋl ŋ tʋɔŋ wɩaa kala pɩŋ ka dɩ ŋ-na mʋ.

²⁰ Kakusu-la sɩ lɛlɛ tapʋlaa batori sɩ bala, sɩ́ leŋe dɩ ba wɩaa walɩmɩŋ, ba naba nɛ. Ŋ dɩ ŋ nyɩmma dɩa nɩaa lɛ nɛ Iziral tɩŋŋaa tʋɔbɩɩnaa kala daŋ dɩ ma ŋaa ba sɩpaalaaraa.”

²¹ Ŋɩɩ nɛ Sɔɔl bʋl, “Mɩ ŋaa Bɛnjamɩŋ doho nʋʋ nɛ, ʋ nɛ saa muuro Iziral doho doho-la kala tʋɔŋ. Mɩ nyɩŋ-nɩaa ma nɛ muuro Bɛnjamɩŋ doho nɩaa nyɩŋ-nɩaa kala tʋɔŋ. Bɛɛ nɛ saa tɩɩ ŋ bʋl wɩɩŋ deeŋ pɩpɩmɛ?”

²² Samʋɛl kɛŋ Sɔɔl arɩ ʋ tɩntɩnnʋ-la jʋʋ dɩɩ-bal-la tʋɔŋ ba sɩɩ dii kʋdiilee, dɩ ʋ fa yɩrɛ nɩaa mara arɩ fii ba kʋ hɔŋ nɩmɛ. Ʋ leŋ Sɔɔl arɩ ʋ tɩntɩnnʋ-la mʋ hɔŋ nɩbalaa dɩhɔnʋŋ.

²³ Ŋɩɩ nɛ Samʋɛl bʋla pɩ nɩɩ-la sɩɩ ŋaa kʋdiilee, “Joŋ nammɩa-la mɩ fa sɩ sɩ ŋ joŋo bil kaa kɔ.”

²⁴ Kʋdii-ŋaarʋ-la joŋ vaa-la kaa kʋ bil Sɔɔl sɩpaaŋ. Samʋɛl bʋl, “Na kʋ-la mɩ sɩ joŋo bil ma lɛ nɛ ŋ-la, má chaŋ. Mɩ paala chaasa joŋu bil ma lɛ nɛ, dɩ ma kʋ dii gbiele deeŋ lɛ, bʋa-la lɛ mɩ sɩɩ yɩrɛ nʋhʋɔraa.” Tapʋlɩɩ-la Sɔɔl arɩ Samʋɛl nɛ dii kɩaa.

²⁵ Ba sɩ lɩɩ dundolo-la nyuŋ ba sɩɩ ŋaa Wɩɩsʋlʋŋ a kʋ tuu jaŋ tʋɔŋ, Samʋɛl bil bɔsɔ ʋ lusuŋ nyuŋ a pɩ Sɔɔl ʋ pɩŋ.

²⁶ Ba sɩ sii chʋchʋɔ-fɩɛla, Samʋɛl yɩrɛ Sɔɔl lusu-la nyuŋ a bʋl, “Kɛŋ ŋ tɩtɩa hɛ dɔŋɔ dɩ mɩ kɛnɩŋ lɩɩ hɛ wombiiŋ lɛ.” Sɔɔl sɩ kɛŋ ʋ tɩtɩa hɛ dɔŋɔ, ʋ dɩ Samʋɛl kala to dɔŋɔ a lɩɩ dɩ-jalɩŋ.

²⁷ Ba sɩ mʋ lɩlɩɩ taŋ-la niiŋ, Samʋɛl bʋla pɩ Sɔɔl, “Bʋla pɩ ŋ tɩntɩnnʋ-la dɩ ʋ laa la sɩpaaŋ mʋmʋ.” Ŋɩɩ nɛ ʋ vɩvɛŋ, ka ʋ bɩra bʋl, “Gbɛrɛ mʋa daha, dɩ mɩ bʋl wɩɩ-la Wɩa sɩ bʋla a tɩgɛ ŋ lɛ pɩŋ.”