1 SAMƲƐL 7 - WƖA TENIŊ

¹ Ŋɩɩ nɛ Kɩrɩaf Jɩarɩm tɩmma-la kʋ joŋ La TƖƖNA niiriŋ daga-la. Ba sɩ joŋo, ba kaa mʋ bil nɩɩ-la ba sɩɩ yɩrɛ Abɩnadab dɩa lɛ, dundolo nyuŋ, aŋ joŋ ʋ nanʋala Elieza hɛ La TƖƖNA nɩsɩŋ lɛ, dɩ ʋ nɛ bibeŋ La TƖƖNA niiriŋ daga-la nyuŋ.

Samʋɛl yuo dii Fɩlɩsɩtɩa tɩŋŋaa Mɩzɩpa lɛ

² La TƖƖNA niiriŋ daga-la fa hɛ Kɩrɩaf Jɩarɩm lɛ jɩsɩŋ mara nɛ. Bʋa deeŋ kala lɛ Iziral tɩŋŋaa kala yel, a sʋl La TƖƖNA dɩ ʋ pɛ ba lɛ.

³ Ŋɩɩ nɛ Samʋɛl fa bʋla pɩ Iziral tɩŋŋaa kala, “Dɩ ma nɩɩ chɛ dɩ ma joŋ ma tʋɔŋ kala a pɩ La TƖƖNA, ŋɩɩ-na má vɩa nɩwogusuŋ vesiŋ arɩ vene-la ba sɩɩ yɩrɛ Asɩtɔrɛf, aŋ joŋ ma tɩtɩa kala a pɩ La TƖƖNA a tuto ʋ dʋndʋŋa. Dɩ ma nɛ ŋaa ŋɩɩ, ʋ jaŋ laama ta Fɩlɩsɩtɩa tɩŋŋaa nɩsɩŋ lɛ.”

⁴ Ŋɩɩ nɛ Iziral tɩŋŋaa vɩa vesi-la ba sɩɩ yɩrɛ Baal arɩ Asɩtɔrɛf, aŋ joŋ ba tɩtɩa kala pɩ La TƖƖNA a tuto ʋ dʋndʋŋa.

⁵ Ŋɩɩ nɛ Samʋɛl bɩra bʋl, “Má leŋ dɩ Iziral tɩŋŋaa kala kʋ hilimi lee-la ba sɩɩ yɩrɛ Mɩzɩpa, dɩ mɩ sʋl La TƖƖNA pɩma.”

⁶ Ba sɩ kʋ hilimi Mɩzɩpa lɛ, ba ŋaa lɩɩŋ a ta La TƖƖNA sɩpaaŋ a sʋlʋ, aŋ vɔɔ niiŋ tapʋlɩɩ-la kala a bʋl, “La ŋaa wʋbɔŋ nɛ La TƖƖNA lɛ.” Samʋɛl nɛ fa ŋaa Iziral tɩŋŋaa sɩpaalaara Mɩzɩpa lɛ.

⁷ Fɩlɩsɩtɩa tɩŋŋaa sɩ nɩa dɩ Iziral tɩŋŋaa hilimi Mɩzɩpa lɛ nɛ, ba kuorusu-la banɔŋ sii a kɛsɛ ba laalɩyuoroo mʋmʋ dɩ ba yuoba. Iziral tɩŋŋaa sɩ nɩɩ ba wɩaa, fawʋllʋŋ kɛmba.

⁸ Ba bʋla pɩ Samʋɛl, “Ŋ sɩ bunso pɩpɩ La TƖƖNA Wɩa dɩ ʋ pɛ la lɛ ŋɩɩ, sɩ́ leŋ. Sʋlʋ dɩ ʋ laala ta Fɩlɩsɩtɩa tɩŋŋaa nɩsɩŋ lɛ.”

⁹ Ŋɩɩ nɛ Samʋɛl kɛŋ pie-bie ha sɩɩ wasɛ yɩlɩŋ a kpʋ a nyɩgɛ ʋ kala a ŋaa kʋnyɩgaa Wɩɩsʋlʋŋ pɩ La TƖƖNA, aŋ bunso pɩ La TƖƖNA a tɩŋ Iziral tɩŋŋaa wɩaa. Ŋɩɩ nɛ La TƖƖNA nɩɩ ʋ bunso.

¹⁰ Samʋɛl fa sɩɩ sʋl kʋnyɩgaa Wɩɩsʋlɩɩ-la ŋɩɩ, Fɩlɩsɩtɩa tɩŋŋaa kʋ kpagɛ dɩ ba yuo Iziral tɩŋŋaa. Ama tapʋlɩɩ-la, La TƖƖNA leŋ taŋ faasa kpɩa Fɩlɩsɩtɩa tɩŋŋaa lɛ, ba wɩɩkala vʋgʋmɛ, ba fá aŋ ka Iziral tɩŋŋaa.

¹¹ Ŋɩɩ nɛ Iziral tɩmma-la lɩɩ Mɩzɩpa lɛ a kire to Fɩlɩsɩtɩa tɩŋŋaa harɩŋ a kpʋba wombiiŋ lɛ ŋɩɩ halɩɩ a mʋ kpagɛ lee-la ba sɩɩ yɩrɛ Bɛf Kaa.

¹² Ŋɩɩ nɛ Samʋɛl joŋ tabɩɩŋ a pɛ ʋ chɩŋ Mɩzɩpa arɩ lee-la ba sɩɩ yɩrɛ Sɛŋ pɛgɛ. Ʋ hɛ tabɩɩ-la yɩrɩŋ Ɛbɛnɩza, aŋ bʋl, “La TƖƖNA nɛ pɛ la lɛ faafaa kala a kaa kɔ jɩnɩŋ.”

¹³ Iziral tɩŋŋaa sɩ yuo dii Fɩlɩsɩtɩa tɩŋŋaa ŋɩɩ, ba bɩra bɩ ba tinteeŋ jʋa. Samʋɛl mɩɩsɩŋ kala lɛ, La TƖƖNA chaasa chɩŋ Iziral tɩŋŋaa harɩŋ nɛ woruŋ, ba wuo Fɩlɩsɩtɩa tɩŋŋaa.

¹⁴ Tabala-la kala sɩ hɛ Ɛkʋrɔŋ arɩ Gaf pɛgɛ, Fɩlɩsɩtɩa tɩŋŋaa fa sɩ yuo laa Iziral tɩŋŋaa teeŋ, Iziral tɩŋŋaa mɩɩra laa ba kala nɛ. Ŋɩɩ nɛ nii-magɛ dɔŋɔ lɛɛlɛ hɛ Iziral tɩŋŋaa arɩ Amɔrɩ tɩŋŋaa pɛgɛ.

¹⁵ Ŋɩɩ nɛ Samʋɛl ha ŋaa Iziral tɩŋŋaa sɩpaalaara ʋ mɩɩsɩŋ kala lɛ.

¹⁶ Jɩna na-kala, ʋ yie sii gɔllɛ Bɛtɛl, Gɩlɩgal arɩ Mɩzɩpa kala nɛ a laa ba wɩaa bʋla wasɛ pɩba.

¹⁷ Ama dɩ ʋ nɛ tɩŋ ʋ tɩntɩŋŋaa dɛrɛ, ʋ ha yie mɩɩra kɔ ʋ dɩa nɛ Rama lɛ. Ʋ yie kɔ nɩmɛ a laa Iziral tɩŋŋaa ma wɩaa a bʋla wasɛ pɩba. Rama lɛ, ʋ saa Wɩɩsʋllɩ koruŋ nɛ a pɩ La TƖƖNA.