1 SAMƲƐL 28 - WƖA TENIŊ

Sɔɔl arɩ Ɛndɔ ha-hɩla

¹ Bʋa kʋbala lɛ, Fɩlɩsɩtɩa tɩŋŋaa sii kɛŋ ba laalɩyuoroo kala hɛ dɔŋɔ dɩ ba mʋ yuo Iziral tɩŋŋaa. Ŋɩɩ nɛ Akɩs bʋla pɩ Devit, “Ʋ maga dɩ ŋ jɩŋ arɩ ŋ dɩ ŋ nɩaa jaŋ pɛ mɩ dɩ mɩ laalɩyuoroo lɛ dɩ la yuo Iziral tɩŋŋaa.”

² Devit bʋl, “Ŋɩɩ lɛ nɛ ŋ jaŋ na wɩɩ-la ŋ tɩntɩnna sɩ jaŋ wuo ŋaa.” Akɩs ma sɩ, “Ʋ zɔmɔ, mɩ jaŋ leŋ dɩ ŋ nɛ pʋpɔmɛ mɩ mɩɩsɩŋ kala lɛ.”

³ Bʋa deeŋ lɛ dɩ Samʋɛl sʋba. Iziral tɩŋŋaa kala yel ʋ yoho aŋ joŋu hugi ʋ jaŋ Rama lɛ. Sɔɔl fa kiri vʋgʋraa arɩ chichiribee kala nɛ ba lɩɩ Iziral tinteeŋ lɛ.

⁴ Ŋɩɩ nɛ Fɩlɩsɩtɩa tɩŋŋaa kala kʋ hɛ dɔŋɔ a ŋmoo buguŋ lee-la ba sɩɩ yɩrɛ Sunem lɛ, ka Sɔɔl ma kɛŋ Iziral tɩŋŋaa kala hɛ dɔŋɔ ba ma ŋmoo ba buguŋ Gɩlɩbʋa lɛ.

⁵ Sɔɔl sɩ na Fɩlɩsɩtɩa tɩŋŋaa laalɩyuoroo, fawʋllʋŋ kɛnʋ, ʋ bɔyɛ jujoŋ.

⁶ Ʋ pɩɛsɛ La TƖƖNA dɩ ʋ na wɩɩ-la ʋ sɩ maga dɩ ʋ ŋaa. Ama La TƖƖNA bɩ duosoo lɛ koo kʋ-la ba sɩɩ yɩrɛ Urim lɛ koo Wɩa wʋlaabʋllʋ kala lɛ to a bʋl wɩɩ pʋ.

⁷ Ŋɩɩ nɛ Sɔɔl bʋla pɩ ʋ tɩntɩnnɩ-hɩasɩŋ, “Dɩ ma nɛ jɩŋ haal sɩɩ vʋgʋ woruŋ a hɛ lee, má dagɛmɛ, dɩ mɩ mʋ vʋga na wɩɩ-la sɩ maga dɩ mɩ ŋaa.” Ba bʋl, “Dɔŋɔ nɛ hɛ taŋ-la ba sɩɩ yɩrɛ Ɛndɔ lɛ.”

⁸ Tɩtaŋɩŋ Sɔɔl sii a paa gɛrɩ-wogusuŋ laalɛ, dɩ nʋʋkala sɩ́ wuo jɩmʋ, a kɛŋ baalaa balɩa a pɛ ʋ tɩtɩa lɛ ba mʋ haal-la leriŋ. Ʋ bʋla pɩ haal-la, “Pɩɛsɛ lɛlɛɛ pɩmɛ dɩ ba dagɛmɛ wɩɩ-la mɩ sɩ maga dɩ mɩ ŋaa. Nɩɩ-la yɩrɩŋ mɩ sɩ yɩra, yɩrɛ ʋ dɩma dɩ ʋ kɔ.”

⁹ Ama haal-la bʋla pʋ, “Ŋ chaasa jɩŋ wɩɩ-la Sɔɔl sɩ ŋaa nɛ. Ʋ kiri vʋgʋraa arɩ chichiribee kala nɛ, ba lɩɩ Iziral tinteeŋ lɛ. Bɛɛ nɛ tɩɩ ŋ chɩchɛ dɩ ŋ bɛrɛ kɛmmɛ a kpʋmɛ?”

¹⁰ Ŋɩɩ nɛ Sɔɔl ŋmɩɛsɛ La TƖƖNA yɩrɩŋ lɛ a pʋ a bʋl, “La TƖƖNA sɩ weye wɩaa, nʋʋkala bɩ jaŋ tɩŋ wɩɩŋ deeŋ wɩaa a dɔgʋsʋŋ.”

¹¹ Haal-la bɩra pɩɛsɛ, “Mɩ yɩrɛ kʋbɛɛ a pɩŋ?” Sɔɔl sɩ, “Yɩrɛ Samʋɛl.”

¹² Haal-la sɩ na Samʋɛl, ʋ faasa ŋmoo niiŋ, aŋ pɩɛsɛ Sɔɔl, “Bɛɛ nɛ tɩɩ ŋ nyɩsɛmɛ? Ŋ nɛ kuoro Sɔɔl.”

¹³ Kuoro Sɔɔl bʋla pʋ, “Sɩ́ leŋe dɩ fawʋllʋŋ kɛnɩŋ. Bɛɛ kʋŋ nɛ ŋ na?” Haal-la bʋl, “Nɩdɩma nɛ mɩ na dɩ ʋ tɔɔ tinteeŋ kʋʋ lɩɩ.”

¹⁴ Sɔɔl pɩɛsɛ, “Ʋ nagɛ ɛɛ nɛ?” Haal-la bʋl, “Banɩhɩaŋ nɛ, a laalɛ gɛrɩ-duduoŋ a kʋʋ lɩɩ.” Ŋɩɩ nɛ Sɔɔl jɩŋ arɩ Samʋɛl nɛ. Ʋ tuu kpirime yi tinteeŋ.

¹⁵ Ŋɩɩ nɛ Samʋɛl pɩɛsɛ Sɔɔl, “Bɛɛ nɛ tɩɩ ŋ walɩmɛmɛ, a kɛmmɛ kʋ lɩɩ?” Sɔɔl bʋl, “Wɩaa chaasa jʋʋmɛ nɛ, Fɩlɩsɩtɩa tɩŋŋaa nɩɩ yuomi, ka Wɩa lɩɩ mɩ harɩŋ. Ʋ bɩra bɩ Wɩa wʋlaabʋlla lɛ koo duoso lɛ to a bʋl wɩɩkala a pɩpɩmɛ. Ŋɩɩ nɛ tɩɩ mɩ yɩrɩŋ dɩ ŋ kʋ dagɛmɛ wɩɩ-la mɩ sɩ jaŋ ŋaa.”

¹⁶ Ŋɩɩ nɛ Samʋɛl pɩɛsɛ, “Dɩ Wɩa nɛ lɩɩ ŋ harɩŋ a ŋaa ŋ dʋndɔŋ, bɛɛ nɛ tɩɩ ŋ jaŋ pɩpɩɛsɛmɛ wɩɩ-la sɩ maga ŋ ŋaa?

¹⁷ Wɩɩ-la La TƖƖNA sɩ to mɩ lɛ bʋla pɩŋ faafaa kala, ʋ nɛ ʋ ŋaa ŋɩɩ. La TƖƖNA kɛŋ Iziral tinteeŋ a laa ŋ nɩsɩŋ lɛ nɛ, a mɩɩra joŋo pɩ Devit,

¹⁸ bɛɛ wɩaa La TƖƖNA fa chaasa na baanɩŋ Amalɛk tɩŋŋaa nyuŋ nɛ, a bʋl dɩ ŋ chei ba dɩ ba kɩaa kala, ŋ vɩa. Ŋɩɩ nɛ tɩɩ ʋ joŋ wɩaa deemba kala a ŋɩŋaa ŋ lɛ ŋɩɩ jɩnɩŋ.

¹⁹ Chie, La TƖƖNA jaŋ joŋ ŋ dɩ Iziral tɩŋŋaa kala a hɛ Fɩlɩsɩtɩa tɩŋŋaa nɩsɩŋ lɛ. Ba jaŋ kpʋ ŋ dɩ ŋ hambolibiisiŋ dɩ ma kɔ mɩ teeŋ lɛlɛɛ-jaŋ. La TƖƖNA jaŋ leŋ dɩ Fɩlɩsɩtɩa tɩŋŋaa yuo dii Iziral laalɩyuoroo.”

²⁰ Samʋɛl sɩ bʋl wɩalɩŋ, fawʋllʋŋ jʋʋ Sɔɔl ʋ tel tinteeŋ a tɩɛnɛ. Ʋ nandaasɩŋ kala fa yʋɔrɛ nɛ, bɛɛ wɩaa ʋ bɩ kʋŋkala die tɩtaŋɩŋ arɩ wɩɩhɛyɛ kala.

²¹ Havʋgʋrʋ-la sii mʋ Sɔɔl teeŋ a na dɩ ʋ faasaa chel, ʋ bʋl, “Bee na, mɩ-na ŋ tɩntɩnna to ŋ niiŋ nɛ, a joŋ mɩ mɩɩsɩŋ a yɔɔ sʋʋŋ a ŋaa wɩɩ-la ŋ sɩ sɩ mɩ ŋaa.

²² Mɩɩ sʋlʋŋ, jegile nɩɩ mɩ teeŋ. Leŋ dɩ mɩ pɩŋ kʋdiilee dɩ ŋ dii a kɛŋ doluŋ a wuo sii vɛŋ ŋ wombiiŋ.”

²³ Sɔɔl vɩa aŋ bʋl, “Mɩ bɩ jaŋ dii kʋŋkala.” Ʋ dɩ baala-la sɩ mʋa arɩ haal-la ha vɩa aŋ pɛsɛ dɩ ʋ dii kɩaa, ŋɩɩ nɛ ʋ sɛɩ ba niiŋ, a sii tinteeŋ a hɔŋ ʋ kʋpɩnɩŋ nyuŋ.

²⁴ Ŋɩɩ nɛ haal-la kɛŋ nɛ-pɔrʋŋ ʋ sɩ dɩɛsa ʋ nɛrɛ a kpʋ, a ŋaa munuŋ a buu a wasɛ boroboro a bɩ sɩbʋrʋŋ hɛ.

²⁵ Ŋɩɩ nɛ ʋ joŋ kʋdiile-la a kaa mʋ bil Sɔɔl arɩ ʋ tɩntɩnna-la sɩpaaŋ ba dii, aŋ sii viiri tɩtaŋ-la tɩtɩa.