1 SAMƲƐL 20 - WƖA TENIŊ

Devit arɩ Jonataŋ

¹ Ŋɩɩ nɛ Devit lɩɩ fá Nayɔf sɩ hɛ Rama lɛ, a mʋ Jonataŋ teeŋ a pɩɛsʋ, “Wʋbɛɛ nɛ mɩ ŋaa? Wʋbɔŋ bɛɛ nɛ mɩ ŋaa ŋ nyɩmma lɛ, ʋ chɩchɛ dɩ ʋ kpʋmɛ?”

² Jonataŋ bʋl, “Ŋɩɩ bɩ jaŋ ŋaa, ŋ bɩ jaŋ sʋʋ. Bee na, mɩ nyɩmma bɩ jaŋ ŋaa wɩɩkala dɩ ʋ bɩ bʋla pɩmɛ, dɩ wɩɩ-la ŋaa wʋbal koo wʋbie. Ʋ bɩ jaŋ joŋ wɩɩŋ deeŋ faamɛ. Wɩɩ-la ŋ sɩ bʋla bɩ wʋtɩtɩɩ ŋaa.”

³ Devit ŋmɩɛsa pɩ Jonataŋ a bʋl, “Ŋ nyɩmma jɩma arɩ ŋ chomi nɛ woruŋ, ŋɩɩ nɛ ʋ bʋl ʋ tʋɔŋ lɛ, ‘Jonataŋ bɩ maga dɩ ʋ jɩŋ wɩɩŋ deeŋ lɛ, dɩ ʋ nɛ jɩma, ʋ tʋɔŋ jaŋ faasa chei.’ Wʋtɩtɩɩ nɛ mɩ bʋlaa pɩŋ La TƖƖNA sɩ weye yɩrɩŋ lɛ, mɩ dɩ sʋʋŋ pɛgɛ bɩ bol mʋa ma.”

⁴ Ŋɩɩ nɛ Jonataŋ bʋla pɩ Devit, “Wɩɩ-la kala ŋ sɩɩ chɛ dɩ mɩ ŋaa a pɛ ŋ lɛ, mɩ jaŋ ŋaa.”

⁵ Devit bʋl, “Chie nɛ ŋaa chɛŋ-falɩŋ gbiele, ʋ maga mɩ dɩ kuoro nɛ chie pɛ dɔŋɔ a dii kɩaa. Ama leŋ dɩ mɩ mʋ faa ŋmaŋkaaŋ lɛ, a kaa mʋ yi chietuo dɩdaanɩŋ.

⁶ Dɩ ŋ nyɩmma nɛ chɛ mɩ ka kɩalɩŋ dɩ-diiliŋ, bʋla pʋ arɩ mɩ sʋl wombiiŋ nɛ arɩ sɩɩfɩɛsɩŋ dɩ mɩ fá mʋ mɩ jaŋ Bɛtɩlɛhɛm, bɛɛ wɩaa bʋa-la lɛ mɩ nyɩŋ-nɩaa kala sɩ yie vɛnɛɛ sʋl Wɩɩsʋlʋŋ jɩna na-kala yie nɛ.

⁷ Dɩ ʋ nɛ sɩ, ‘Ʋ zɔmɔ.’ Ŋɩɩ-na, ŋ tɩntɩnna bɩ wɩɩ jʋa. Ama dɩ ʋ nɛ na baanɩŋ, ŋɩɩ-na jɩŋ arɩ ʋ chaasa chɛ dɩ ʋ ŋaamɛ wʋbɔŋ nɛ.

⁸ Ŋ-na Jonataŋ, mɩɩ sʋlʋŋ, dagɛ ŋ chonuŋ pɩ mɩ-na ŋ tɩntɩnna, aŋ leŋ dɩ nii-la ŋ sɩ hɛ pɩmɛ La TƖƖNA sɩpaaŋ arɩ mɩ dɩŋ jaŋ ŋaa nandɔŋ-zɔmɔ a kaa mʋ wuu chɩŋ. Ama dɩ mɩ nɛ ŋaa wɩɩ a chei, ŋ tɩtɩa nɛ maga dɩ ŋ kpʋmɛ. Sɩ́ mɩ joŋo hɛ ŋ nyɩmma nɩsɩŋ lɛ dɩ ʋ kpʋmɛ.”

⁹ Jonataŋ bʋl, “Sɩ́ ŋɩɩ bɩɩnʋ, dɩ mɩ nɛ fa paala nɩɩ mʋa ma, arɩ mɩ nyɩmma ka chɛ dɩ ʋ ŋaaŋ wʋbɔŋ, ŋ bɩɩna mɩ bɩ jaŋ bʋla pɩŋ?”

¹⁰ Devit ma bɩra pɩɛsɛ Jonataŋ, “Kʋbɛɛ nɛ jaŋ bʋla pɩmɛ dɩ ŋ nyɩmma nɛ na baanɩŋ a bʋl wɩaa ŋ teeŋ?”

¹¹ Jonataŋ bʋl, “Kɔ dɩ la lɩɩ pɔkɔŋ nyuŋ.” Ŋɩɩ nɛ ba to dɔŋɔ lɩɩ.

¹² Ŋɩɩ nɛ Jonataŋ bɩra bʋla pɩ Devit, “La TƖƖNA Iziral tɩŋŋaa Wɩa nɛ jaŋ ŋaa la pɛ-naara, chietuo bʋa deeŋ lɛ, mɩ jaŋ chaasa pɩɛsɛ mɩ nyɩmma a na tʋɔbɩɩna-la ʋ sɩ kɛnɛ a tɩgɛ ŋ lɛ, dɩ ba ŋaa tʋɔbɩɩŋ zɔmɔ nɛ koo ɛɛ nɛ. Dɩ tʋɔ-la ʋ sɩ kɛnɛ arɩŋ nɛ zɔmɔ, mɩ jaŋ leŋ dɩ ŋ jɩŋ.

¹³ Dɩ mɩ nɛ wuo jɩŋ dɩ mɩ nyɩmma ka chɛ dɩ ʋ ŋaaŋ wʋbɔŋ nɛ, aŋ vɩa dɩ mɩ bʋla pɩŋ, dɩ ŋ fá viiri arɩ yarɩfɩɛlaa, a leŋ dɩ La TƖƖNA dɔgɩsɛmɛ woruŋ. A leŋ dɩ La TƖƖNA chɩŋ ŋ harɩŋ arɩ ʋ fa sɩ chɩŋ mɩ nyɩmma harɩŋ ŋɩɩ.

¹⁴ Kɛŋ mɩ-na Jonataŋ woruŋ, a chomi mɩ mɩɩsɩŋ kala lɛ, arɩ La TƖƖNA sɩ chomi ŋɩɩ, dɩ ba sɩ́ mɩ kpʋ.

¹⁵ Dɩ mɩ nɛ sʋba ma, kɛŋ chono-la tɩtɩa mɩ dɩa nɩaa ma lɛ a kaa mʋ wuu, dɩ La TƖƖNA nɛ paala kpʋ ŋ-na Devit dʋndɔŋŋɔɔ kala dɛrɛ tinteeŋ lɛ ma.”

¹⁶ Ŋɩɩ nɛ Jonataŋ hɛ niiŋ ʋ dɩ Devit doho nɩaa pɛgɛ a bʋl, “La TƖƖNA jaŋ joŋ ʋ baanɩŋ a fɩɩsɛ Devit doho nɩaa lɛ dɩ ba nɛ chei nii-la sɩ hɛ mɩ dɩ Devit pɛgɛ.”

¹⁷ Jonataŋ leŋ Devit bɩra wasa hɛ niiŋ pʋ arɩ ʋ jaŋ chou a kaa mʋ wuu, bɛɛ wɩaa Jonataŋ cho Devit nɛ woruŋ arɩ ʋ sɩ cho ʋ tɩtɩa ŋɩɩ.

¹⁸ Ŋɩɩ nɛ Jonataŋ bʋla pɩ Devit, “Chie nɛ ŋaa chɛŋ-falɩŋ gbiele, nɩaa jaŋ jɩŋ arɩ ŋ tuo kʋdiile-la leriŋ, bɛɛ wɩaa ŋ dɩhɔnʋŋ jaŋ pɩŋ pɛɩ.

¹⁹ Chietuo a kaa mʋ dɩdaanɩŋ dɩɩrɩŋ, mʋ faa lee-la tɩtɩa ŋ tapʋlɩɩ-la sɩ laa sɩpaaŋ mʋ faa wɩaa deemba sɩ suomo, a gbɛrɛmɛ tabɩɩ-la ba sɩɩ yɩrɛ Ɛzɛl leriŋ.

²⁰ Mɩ jaŋ yuo to-hɛŋŋɛɛ batori ta dɩ ba kʋ to tabɩɩ-la sɛmɛ bal, a nagɛ kʋŋ nɛ mɩɩ magɩsɛ.

²¹ Mɩ jaŋ tɩŋ bii-bie a bʋl, ‘Mʋ chɛ paa to-hɛmɛ-la kaa kɔ.’ Dɩ mɩ nɛ bʋla pʋ, ‘To-hɛmɛ-la hɛ ŋ sɛmɛ deeŋ nɛ, mʋ paa kɔ,’ ŋ ma sii kɔ. Ŋɩɩ daga arɩ wɩɩ tuo nɛ ŋɩɩ. La TƖƖNA sɩ weye wɩaa, wɩɩkala bɩ jaŋ jʋʋŋ.

²² Ama dɩ mɩ nɛ bʋla pɩ bile, ‘To-hɛmɛ-la kieliŋ a mʋ sɩpaaŋ nɛ,’ ŋɩɩ daga arɩ La TƖƖNA ka chɛ dɩ ŋ viiri nɛ. Ŋ ma sii mʋ.

²³ Wɩɩ-la mɩ dɩŋ sɩ bʋla bil ŋɩɩ, jɩŋ arɩ La TƖƖNA nɛ pɛ na a kaa mʋ wuu.”

²⁴ Ŋɩɩ nɛ Devit mʋ faa pɔkʋŋ nyuŋ. Chɛŋ-falɩŋ gbiele-la sɩ yie, kuoro Sɔɔl hɔŋ dɩ ʋ dii kʋdiile-la.

²⁵ Ʋ hɔŋ lee-la ʋ sɩ vɛnɛɛ hɔŋ nɛ a kpagɛ jeeŋ. Abɩna hɔnɔ tɩgɛ Sɔɔl lɛ, Jonataŋ ma hɔŋ a chaasɛ Sɔɔl, aŋ ka Devit dɩhɔnʋŋ pɩŋ pɛɩ.

²⁶ Tapʋlɩɩ-la Sɔɔl bɩ wɩɩkala bʋla, bɛɛ wɩaa ʋ bɩɩna ʋ tʋɔŋ lɛ nɛ a bʋl, “Ʋ naga wɩɩ nɛ ŋaa Devit lɛ, ʋ kɛŋ disiniŋ La TƖƖNA teeŋ.”

²⁷ Chɛŋ-falɩŋ gbiele-la tapʋl-lɩamɩŋ chɛɛŋ ma, Devit dɩhɔnʋŋ ha bɩra pɩŋ pɛɩ nɛ. Ŋɩɩ nɛ Sɔɔl pɩɛsɛ ʋ nanʋala Jonataŋ, “Bɛɛ nɛ tɩɩ Jesi bile bɩ kʋdiilee leriŋ kɔ, dɩa arɩ jɩnɩŋ kala?”

²⁸ Jonataŋ bʋl, “Devit chaasa sʋlmɛ nɛ, dɩ mɩ pʋ wombiiŋ dɩ ʋ mʋ Bɛtɩlɛhɛm.

²⁹ Ʋ sɩ, ‘Leŋ dɩ mɩ mʋ, bɛɛ wɩaa mɩ nyɩŋ-nɩaa kɛŋ Wɩɩsʋlʋŋ gbiele nɛ la jaŋ lɛ. Mɩ naambie bʋla pɩmɛ arɩ mɩ kɔ nɩmɛ. Dɩ ŋ tʋɔŋ nɛ tɔrɛ mɩ nyuŋ, pɩmɛ wombiiŋ dɩ mɩ mʋ na mɩ naambiiriŋ.’ Kuoro, wɩɩ-la sɩ tɩɩ ʋ bɩ ŋ kʋdiilee leriŋ kɔ nɛ ŋɩɩ.”

³⁰ Ʋ sɩ bʋl ŋɩɩ Sɔɔl baanɩŋ guu sii Jonataŋ nyuŋ woruŋ, ʋ bʋl, “Ŋ ŋaa ha-bii-balɩŋ dɩgɩlaa sɩ bɩ wɩaa ka nɩɩ bii nɛ. Mɩ jɩma ŋ pɛ Jesi nanʋala lɛ nɛ. Ŋ saa joŋ hɩɩsɩŋ hɛ ŋ tɩtɩa arɩ ŋ naaŋ-la sɩ lʋlʋŋ lɛ nɛ ŋɩɩ.

³¹ Dɩ Devit nɛ kɛŋ mɩɩsɩŋ, ŋ bɩ jaŋ kɔ dɩ ŋ dii kuoruŋ tinteeŋ deeŋ lɛ. Leŋ ba kɛnʋ kɔ, ʋ maga dɩ ba kpʋʋ nɛ.”

³² Ŋɩɩ nɛ Jonataŋ pɩɛsɛ ʋ nyɩmma, “Bɛɛ nɛ tɩɩ ŋ chɩchɛ ŋ kpʋʋ? Wʋbɛɛ nɛ ʋ chei?”

³³ Ŋɩɩ lɛ nɛ Sɔɔl joŋ ʋ timiŋ a yuo dɩ ʋ kpʋ Jonataŋ. Ŋɩɩ nɛ Jonataŋ chaasa jɩŋ arɩ ʋ nyɩmma kɛŋ tʋɔŋ dɩ ʋ kpʋ Devit nɛ.

³⁴ Jonataŋ chaasa na baanɩŋ, a sii kʋdiile-la nyuŋ. Ʋ bɩ kʋŋkala die chɛ-lɩa-la, bɛɛ wɩaa ʋ tʋɔŋ fa chaasa chei ʋ nyɩmma nyuŋ nɛ woruŋ, a tɩŋ hɩɩsɛ wɩalɩŋ ʋ sɩɩ ŋaa Devit lɛ.

³⁵ Taŋ sɩ pʋla chʋchʋɔŋ, Jonataŋ mʋ pɔkɔŋ nyuŋ dɩ ʋ dɩ Devit cheŋ dɔŋɔ. Ʋ pɛ kɛŋ bii-bie nɛ ba mʋ.

³⁶ Ʋ bʋla pɩ bile, “Mɩɩ chɛ dɩ mɩ yuo to-hɛŋŋɛɛ nɛ, fá a mʋ paa kaa kɔ.” Bile sɩ fá mʋmʋ, Jonataŋ yuo to-hɛmɩŋ ʋ kieli bile mʋ sɩpaaŋ.

³⁷ Bile sɩ mʋ yi lee-la to-hɛŋ-la sɩ tele, Jonataŋ yɩrʋ a bʋl, “To-hɛŋ-la hɛ sɩpaaŋ.”

³⁸ Ŋɩɩ nɛ aŋ kpɩa ʋ lɛ, “Ŋaa lɩma lɩma! Pʋpɔ ŋ sɩ́ chɩŋ.” Bile mʋ a joŋ to-hɛŋ-la a kaa mɩɩra kʋ pɩ ʋ nɩhɩaŋ.

³⁹ (Bile-na bɩ wɩaa deemba kala bʋbʋɔŋ jɩŋ. Jonataŋ arɩ Devit dʋndʋŋa nɛ jɩma.)

⁴⁰ Ŋɩɩ nɛ Jonataŋ joŋ ʋ laalɩyuori-kɩaa pɩ bile aŋ bʋla pʋ, “Kaa mɩɩra mʋ dɩa.”

⁴¹ Bile sɩ mʋa harɩŋ, Devit sii tabɩɩ-la sɛmɛ, a kʋ kpirimi Jonataŋ sɩpaaŋ naansɩɩŋ butori. Ba guori dɔŋɔ aŋ yiyel. Ama Devit nɛ faasa yel kɩŋkɛŋ.

⁴² Ŋɩɩ nɛ Jonataŋ bʋla pɩ Devit, “Ŋ jaŋ mʋ woruŋ. Mɩ dɩŋ ŋmɩɛsa pɩ dɔŋɔ nɛ La TƖƖNA yɩrɩŋ lɛ a ŋaa nandɔsɛ. La TƖƖNA nɛ ŋaa la pɛ-naara, a ŋaa mɩ doho nɩaa arɩ ŋ doho nɩaa ma pɛgɛ pɛ-naara a kaa mʋ wuu.” Ŋɩɩ nɛ Devit viiri, ka Jonataŋ ma mɩɩra mʋ dɩa.