1 SAMƲƐL 10 - WƖA TENIŊ

¹ Ŋɩɩ nɛ Samʋɛl joŋ nʋʋŋ arɩ loŋ, a wansa hɛ Sɔɔl nyuŋ lɛ, aŋ guoru a bʋl, “La TƖƖNA lɩɩsɩŋ nɛ dɩ ŋ ŋaa ʋ nɩaa Iziral tɩŋŋaa sɩpaalaara.

² Dɩ ŋ nɛ tamɛ jɩnɩŋ aŋ mʋmʋ, ŋ jaŋ cheŋ baalaa balɩa dɩ ba kpagɛ Rakɛl vaamɩŋ sɩ pɩŋ lee-la ba sɩɩ yɩrɛ Zɛlɩza, a hɛ Bɛnjamɩŋ tinteeŋ bʋa. Ba jaŋ bʋla pɩŋ arɩ kakusu-la ŋ sɩ lɩɩ chɩchɛ, ba naba nɛ. Ŋ nyɩmma bɩra bɩ ba-na wɩaa ka bɩɩnɛ, ŋ wɩaa nɛ mɩɩraa walɩmʋ lɛɛlɛ. Ʋ pɩpɩɛsɛ, ‘Ɛɛ nɛ mɩ jaŋ ŋaa mɩ nanʋala deeŋ wɩaa?’

³ Ŋ jaŋ bɩra joŋ ŋɩɩ mʋ yi tɩɩ-bal-la sɩ hɛ lee-la ba sɩɩ yɩrɛ Tabɔ leriŋ. Nɩmɛ ŋ jaŋ cheŋ baalaa batori dɩ baa mʋ Wɩa teeŋ Bɛtɛl lɛ. Dɔŋɔ jaŋ baasɛ bʋʋ-pɔrɔɔ batori, dɩ dɔŋɔ ma kori boroboroba batori, ka dɩ dɔŋɔ ma laalɛ tɩɩnɛnɛɛ sɩnɩŋ arɩ puruŋ.

⁴ Ba jaŋ lɔllʋŋ aŋ joŋ boroboroba balɩa a pɩŋ. Ʋ maga ŋ sɛɩ nɛ a laa boroboroba-la.

⁵ Ŋɩɩ harɩŋ lɛ, ŋ jaŋ jɩl Wɩa dundolo-la sɩ hɛ Gɩbɩa lɛ, nɩmɛ nɛ Fɩlɩsɩtɩa tɩŋŋaa laalɩyuoroo buguŋ hɛ. Dɩ ŋ nɛ kʋʋ kpagɛ taŋ-la, ŋ jaŋ cheŋ Wɩa wʋlaabʋllaa dɩ ba pʋɔla a lɩɩ dundolo-la nyuŋ ba sɩɩ ŋaa Wɩɩsʋlʋŋ a kʋʋ tuu, ka nɩaa dudu kɔnɛba, aa chɩgɩsɛ chɩnchɩgɩsɩŋ, a ŋmʋʋ ŋmʋlaa, a du chenniŋ hɛ a laa ba sɩpaaŋ. Ba jaŋ bʋbʋl wɩaa Wɩa Dɩma doluŋ lɛ.

⁶ La TƖƖNA Dɩma-la jaŋ jʋʋ ŋ ma arɩ doluŋ, dɩ ŋ pɛ ba lɛ a bʋbʋl wɩaa Wɩa doluŋ lɛ. Ʋ jaŋ leŋ dɩ ŋ bɩrɩmɛ nɩwogo.

⁷ Dɩ wʋmagɩlaa deemba kala nɛ kʋ ŋaa ŋ lɛ, wɩɩ-la na-kala ŋ sɩ bene dɩ ʋ zɔmɔ, ŋaa. Wɩa chɩŋ ŋ harɩŋ nɛ.

⁸ Laa sɩpaaŋ tutuu Gɩlɩgal, mɩ jaŋ kʋ tuu puuŋ nɩmɛ, a kpʋ pʋsʋŋ sʋl kʋnyɩgaa Wɩɩsʋlʋŋ arɩ nii-magɛ dɔŋɔ Wɩɩsʋlʋŋ. Ama gbɛrɛ nɩmɛ tapʋlaa balɩpɛ, mɩ jaŋ kɔ ŋ teeŋ a bʋl wɩɩ-la ŋ sɩ jaŋ ŋaa a pɩŋ.”

Sɔɔl dii kuoruŋ

⁹ Sɔɔl sɩ lɩɩ Samʋɛl leriŋ dɩ ʋ mʋ, Wɩa kɛŋ Sɔɔl tʋɔbɩɩnaa bɩrɩmɛ ʋ ŋaa nɩwogo. Wɩalɩŋ kala sɛnɛ ŋaa tapʋlɩɩ-la arɩ ŋɩɩ Samʋɛl sɩ bʋla.

¹⁰ Sɔɔl arɩ ʋ tɩntɩnnʋ-la sɩ mʋ yi Gɩbɩa, Wɩa wʋlaabʋllaa pʋɔlɛ a kʋ chemu. Wɩa Dɩma-la kʋ jʋʋ Sɔɔl arɩ doluŋ woruŋ, ʋ ma pɛ ba lɛ ba bʋbʋl wɩaa Wɩa doluŋ lɛ.

¹¹ Nɩalɩŋ kala sɩ jɩmʋ sɩ naʋ dɩ ʋ pɛ ba lɛ a bʋbʋl wɩaa Wɩa doluŋ lɛ, ba pɩpɩɛsɛ dɔŋɔ, “Bɛɛ kʋŋ wɩɩ ma nɛ ŋaa Kɩs nanʋala Sɔɔl lɛ ŋ-la? Sɔɔl ma ŋaa Wɩa wʋlaabʋlla-la dɔŋɔ nɛɛ?”

¹² Baala-la sɩ hɛ nɩmɛ dɔŋɔ pɩɛsɛ, “Ka Wɩa wʋlaabʋlla-la dɔnsʋŋ-na, ma bɩɩna ba nyɩmmaba nɛ kʋbɛɛba?” Ʋ ŋaa wʋbʋllɩ nandaa nɩaa bʋbʋl, “Sɔɔl ma ŋaa Wɩa wʋlaabʋlla-la dɔŋɔ nɛɛ?”

¹³ Sɔɔl sɩ bʋl Wɩa wɩalɩŋ a dɛrɛ, ʋ mʋ dundolo-la nyuŋ ba sɩɩ ŋaa Wɩɩsʋlʋŋ.

¹⁴ Wɩaa deemba kala harɩŋ Sɔɔl nyɩmma kʋbie naʋ, a pɩɛsɛ ʋ dɩ ʋ tɩntɩnnʋ-la, “Nɩɩ nɛ ma mʋ?” Sɔɔl sɩ, “La lɩɩ chɩchɛ kakusu-la nɛ. Ama la sɩ kʋ jɩŋ arɩ la bɩ jaŋ naba, la mɩɩra mʋ Samʋɛl teeŋ nɛ.”

¹⁵ Ʋ nyɩŋ-bie-la bɩra pɩɛsɛ, “Wʋbɛɛ nɛ Samʋɛl bʋla pɩŋ? Bʋla pɩmɛ.”

¹⁶ Ŋɩɩ nɛ Sɔɔl bʋl, “Ʋ chaasa bʋla pɩla arɩ ba na kakusu-la nɛ.” Ama Samʋɛl sɩ bʋla pɩ Sɔɔl arɩ ʋ jaŋ dii kuoruŋ, ʋ bɩ ʋ-na wɩaa bʋla pɩ ʋ nyɩŋ-bie-la.

¹⁷ Samʋɛl yɩrɛ Iziral tɩŋŋaa kala a kɔ La TƖƖNA teeŋ Mɩzɩpa lɛ,

¹⁸ a bʋla pɩba, “Wɩɩ-la ma TƖƖNA Iziral tɩŋŋaa Wɩa sɩ bʋla nɛ ŋ-la: Mɩ nɛ kɛmma kaa kʋ lɩɩ Ijipiti tinteeŋ lɛ, a laama ta Ijipiti tɩŋŋaa arɩ nɩalɩŋ dɔnsʋŋ kala sɩɩ dɔgɩsɛma nɩsɩŋ lɛ.

¹⁹ Mɩ nɛ ma Wɩa, mɩ nɛ laama ta ma wʋjʋʋlaa arɩ hɛɛ-la kala ma fa sɩɩ na lɛ. Ama lɛɛlɛ ma vɩamɛ nɛ aŋ bʋl: Bil kuoro pɩla. Ŋɩɩ wɩaa má kala kɔ La TƖƖNA sɩpaaŋ doho doho arɩ nyɩŋ-nɩa nyɩŋ-nɩa.”

²⁰ Samʋɛl sɩ kɛŋ Iziral tɩŋŋaa doho doho-la kʋ lɩɩ kʋŋ kʋŋ, La TƖƖNA lɩɩsɛ Bɛnjamɩŋ doho nɩaa.

²¹ Samʋɛl bɩra kɛŋ Bɛnjamɩŋ doho nɩalɩŋ ma lɩɩ nyɩŋ-nɩa nyɩŋ-nɩa. La TƖƖNA bɩra lɩɩsɛ Matɩrɩ nyɩŋ-nɩaa. Dɩ-dɛrɩŋ kala, Kɩs nanʋala Sɔɔl nɛ ba lɩɩsɛ. Ama ba sɩ bee chɩchɛʋ, ba bɩ ʋ na.

²² Ŋɩɩ nɛ ba pɩɛsɛ La TƖƖNA, “Baal-la kɔ daha nɛɛ?” La TƖƖNA bʋl, “Oo, ʋ nɛ faa chʋgʋsʋŋ tʋɔŋ.”

²³ Ŋɩɩ nɛ ba fá mʋ kɛnʋ kʋ lɩɩ, ʋ chɩŋ ba tʋɔŋ a duomo kɩɩ nʋʋkala.

²⁴ Samʋɛl bʋla pɩ nɩalɩŋ, “Ma na baal-la La TƖƖNA sɩ lɩɩsa nɛ. Nʋʋkala tuo ma tʋɔŋ a magʋ.” Nɩalɩŋ kala faasa ŋaa goŋ a bʋl, “A leŋ dɩ kuoro deeŋ kɛŋ mɩɩ-duduoŋ.”

²⁵ Samʋɛl dagɛ nɩalɩŋ kuoruŋ wombiee, aŋ ŋmʋnsa hɛ teniŋ lɛ a joŋo bil La TƖƖNA sɩpaaŋ. Ŋɩɩ nɛ aŋ ka Samʋɛl ta nɩalɩŋ kala ba mɩɩra mʋ ba dɩɩsɩŋ.

²⁶ Sɔɔl ma mɩɩra mʋ ʋ jaŋ Gɩbɩa. Ŋɩɩ nɛ Wɩa digi bayuori duoru-la dɔnsʋŋ tʋɔŋ ba to ʋ harɩŋ mʋ.

²⁷ Ka wʋhɛɛrɛɛ dɔnsʋŋ bʋl, “Ɛɛ nɛ nɩa deeŋ jaŋ wuo ŋaa a laala ta?” Ba bee gʋʋnʋ nɛ, a bɩ zile kʋŋkala kaa kʋ pʋ. Ka Sɔɔl tɔrɛ ʋ niiŋ.