1 Jɔɔŋ 1 - WƖA TENIŊ

Wɩɩ-la sɩ kʋ ŋaa nuhuobiine

¹ Mɩ-na Jɔɔŋ nɛ ŋmʋnsɛ teniŋ deeŋ pɩpɩma a tɩgɛ wɩɩ kʋbala lɛ. Wɩɩ-la fa hɛ nɩmɛ bumbuŋ kala nɛ a kɛŋ mɩɩsɩŋ. La nɩɩ ʋ yikoro a kɛŋ la sɩaa ma naʋ a chaasa benu, a kɛŋ la nɩsaa ma digu.

² Wɩɩ-la sɩ kʋ ŋaa nuhuobiine, la naʋ nɛ a laaʋ dii, a bʋl ʋ wɩaa pɩpɩma. Wɩɩ-la nɛ ŋ-la: Mɩɩsɩ-la sɩ bɩ dɛrɛ, ʋ fa hɛ la Nyɩmma teeŋ nɛ a kʋ lɩɩ la teeŋ la naʋ. Yesu Kirisito nɛ ŋɩɩ.

³ Wɩalɩŋ la sɩ na aŋ nɩɩ ma, ba nɛ la bʋlaa pɩma, dɩ ma wuo jʋʋ la tʋɔŋ dɩ la kala kɛŋ nii-bala. La dɩ la Nyɩmma Wɩa arɩ ʋ Bie Yesu Kirisito kɛŋ nii-bala nɛ.

⁴ Laa chɛ dɩ la tʋɔŋ faasa tɔrɛ nɛ woruŋ, ŋɩɩ nɛ tɩɩ la ŋmʋnsɛ wɩɩŋ deeŋ pɩpɩma.

Wɩa nɛ kɛŋ pʋlʋmʋŋ

⁵ Wɩalɩŋ Wɩa Bie sɩ dagɛla a tɩgɛ Wɩa lɛ, ba nɛ ŋ-la: Wɩa nɛ pʋlʋmʋŋ, birimiŋ mʋa ma tuo ʋ lɛ.

⁶ Dɩ la nɛ sɩ la dɩ ʋ kɛŋ nii-bala aŋ ka laa ŋaa birimiŋ tʋɔŋ wɩaa, laa nyɩɛ nɛ. La wʋŋaalaa arɩ la wʋbʋlaa kala bɩ wʋtɩtɩɩ kɛnɛ.

⁷ Ama dɩ la nɛ hɛ pʋlʋmʋŋ tʋɔŋ, arɩ Wɩa sɩ hɛ pʋlʋmʋŋ tʋɔŋ ŋɩɩ, ŋɩɩ-na la dɩ la dɔnsʋŋ tɩŋŋaa kala kɛŋ nii-bala nɛ. Dɩ la nɛ ŋaa ŋɩɩ, Wɩa Bie Yesu chalɩŋ ma jaŋ chɛsɛ la wʋbɔŋŋɔɔ kala ta.

⁸ Dɩ la nɛ sɩ la bɩ wʋbɔŋŋɔɔ ŋaa, laa nyɩsɛ la tɩtɩa nɛ. La bɩ wʋtɩtɩɩ kɛnɛ.

⁹ Ama dɩ la nɛ sɛyɛ arɩ la ŋaa wʋbɔŋŋɔɔ nɛ a dagɛ la wʋbɔmɔ-la a pʋ, Wɩa kɛŋ wʋtɩtɩɩ, ʋ jaŋ wuo joŋ la wʋbɔŋŋɔɔ a chɛla a chɛsɛ la wʋbɔŋŋɔɔ kala ta.

¹⁰ Ama dɩ la nɛ sɩ la bɩ wʋbɔŋŋɔɔ ŋaa, la kɛŋ Wɩa yɩrɛ wʋnyɩɛrʋ nɛ. La bɩ ʋ niiŋ wɩaa laa dii.